Bo Tabata Sa?

Ki ruta apòstel Pablo a tuma durante su promé biahe pa Roma?

▪ Echonan 28:13-16 ta bisa ku e barku ku Pablo a nabegá bai Italia kuné a yega Puteoli (aktualmente Pozzuoli), den e Bahia di Nápoli. Despues, p’e bai Roma, el a pasa riba Via Apio, e kaminda prinsipal di e stat.

E kaminda Via Apio a haña nòmber di Apio Claudio Ceco, e hòmber polítiko romano ku a kuminsá traha e kaminda na aña 312 promé ku nos era. E kaminda ta mas o ménos 5 pa 6 meter hanchu i ta kubrí ku piedra grandi di volkan. Ku tempu nan a keda rèk e kaminda di Roma akí den direkshon zùitost te ku el a bira 583 kilometer largu. E tabata konektá Roma ku e haf di Brundisium (aktualmente Brindisi), un stat portuario ku hende tabata usa pa bai Oriente. Mas o ménos kada 24 kilometer biaheronan tabata yega na paradanan kaminda nan por a kumpra awa i kuminda, drumi òf kambia kabai òf garoshi.

Pero, Pablo probablemente a kana na pia. Pablo mester a kana un distansia di 212 kilometer riba e parti di Via Apio akí. E kaminda akí tabata pasa dor di e Muras Pontino, p’esei un eskritor romano a keha tokante e sanguranan i e holó malu ku e muras tabata produsí. Parti nort di e muras ei tabatin e Foro di Apio—mas o ménos 65 kilometer for di Roma—i e Tres Posadanan, un lugá pa sosegá ku ta keda rònt di 50 kilometer for di e stat. Na e dos paradanan akí, kristiannan di Roma tabata warda riba Pablo. Ora Pablo a mira nan, “el a gradisí Dios i a haña ánimo.”​—Echonan 28:15.

Ki tipo di tabla Lukas 1:63 ta papia di dje?

▪ E Evangelio di Lukas ta bisa ku e amigunan di Zakarias a puntr’é kon lo e yama su yu resien nasí. Zakarias a pidi “un tabla di skibi i riba dje el a pone: ‘Su nòmber ta Huan.’” (Lukas 1:63, BPK) Segun un obra sientífiko, e palabra griego pa “tabla” ta referí na “un tabla chikitu ku normalmente tabata trahá di palu i kubrí ku un kapa di was.” Tabata pega e pida palunan na otro i kubri nan ku was lizu di abeha. Ku un tipo di pèn hende por a skirbi loke e tabata ke riba dje. Despues e por a kita loke tabatin skirbí i bolbe us’é atrobe.

E buki Reading and Writing in the Time of Jesus ta bisa: “Pinturanan di Pompei, eskulturanan di diferente parti di e Imperio Romano i tablanan ku nan a koba saka di vários lugá, for di Egipto te na e Muraya Adriano [e parti nort di Gran Bretaña], ta mustra ku hende tabata usa e tablanan akí hopi.” Diferente tipo di hende tabatin e tablanan ei na nan disposishon: komersiante, funshonarionan di gobièrnu i kisas asta algun kristian di promé siglo.

[Plachi na página 11]

VIA APIO

[Plachi na página 11]

Tabla di was di mucha di skol, siglo 2 di nos era

[Rekonosementu]

Ku pèrmit di British Library