Bo Ta Kumpli Zelosamente ku Kristu Su Mandato?

‘Manera boso ta kanando, . . . sigui hasi esei mas plenamente.’​—1 TES. 4:1, NW.

1, 2. (a) Menshoná algun kos maravioso ku hopi hende den tempu di Hesus a eksperensiá. (b) Dikon nos tempu tambe ta masha importante?

BO A yega di imaginá bo mes kon maravioso lo tabata pa biba den tempu di Hesus? Si bo tabata malu, probablemente lo bo tabata ke pa Hesus kurá bo, i asina kita bo sufrimentu. Òf kisas lo bo tabatin e goso di mira i tende Hesus. Sí, lo bo por a siña for di dje òf mir’é hasi milager. (Mar. 4:​1, 2; Luk. 5:​3-9; 9:11) Lo tabata un gran privilegio pa presensiá tur e obranan ei. (Luk. 19:37) Desde e tempu ei, ningun generashon no a eksperensiá kosnan asina. I loke Hesus a hasi pa humanidat, esta, duna su bida komo “sakrifisio,” lo no wòrdu ripití nunka mas.​—Heb. 9:26; Juan 14:19.

 ² Pero, nos tempu tambe ta masha importante. Dikon? Pasobra nos ta bibando den e periodo ku Beibel ta yama ‘tempu di fin’ i “e último dianan.” (Dan. 12:​1-4, 9; 2 Tim. 3:1) Durante e tempu akí, Satanas a ser tirá abou for di shelu. I pronto lo e wòrdu mará i tirá “den abismo.” (Rev. 12:​7-9, 12; 20:​1-3) Ademas, ta den e tempu akí nos tin e privilegio di deklará e ‘evangelio di reino’ rònt mundu, i di e manera ei, kompartí e speransa di bida den e binidero Paradeis. I e trabou akí lo no wòrdu ripití nunka mas.​—Mat. 24:14.

3. Ki mandato Hesus a duna su disipelnan promé ku el a bai shelu, i kiko esei lo a enserá?

³ Djis promé ku Hesus a bai shelu, el a bisa su siguidónan: “Boso lo ta mi testigunan na Yerusalèm i na henter Hudea i Samaria, i te na e parti mas alehá di mundu.” (Echo. 1:8) E trabou ei lo a enserá siña hende rònt mundu. Ku ki propósito? Pa yuda mas hende bira disipel di Kristu promé ku e fin yega. (Mat. 28:​19, 20) Kiko nos mester hasi si nos ke kumpli debidamente ku Kristu su mandato?

4. (a) Kiko nos mester hasi segun 2 Pedro 3:​11 i 12? (b) Kiko nos tin ku tene kuidou kuné?

⁴ Tuma nota di loke apòstel Pedro a deklará: “Ki sorto di hende boso mester ta den un kondukta santu i deboto, sperando i purando e binida di e dia di Dios.” (2 Ped. 3:​11, 12) Ku e palabranan ei, Pedro a enfatisá ku durante e último dianan akí ta masha importante pa nos keda alerta i ta personanan deboto. I un manera pa demostrá nos deboshon ta di prediká e bon notisia. P’esei, ta un goso pa mira e zelo ku nos rumannan kristian rònt mundu ta desplegá, kumpliendo ku e mandato di Kristu. Na mesun momento, nos ta realisá ku e mundu di Satanas i nos inklinashonnan pekaminoso ta pone hopi preshon riba nos diariamente. P’esei, nos mester tene kuidou pa esakinan no mengua nos zelo pa Dios su sirbishi. Pues, laga nos konsiderá kon nos por hasi sigur ku nos ta keda sigui e Kristu.

Kumpli ku Responsabilidatnan Kristian

5, 6. (a) Pakiko Pablo a elogiá su rumannan den fe na Yerusalèm, i kontra kiko el a spièrta nan? (b) Dikon nos mester tuma e responsabilidatnan ku Dios a duna nos na serio?

⁵ Den su karta na e kristiannan na Yerusalèm, apòstel Pablo a elogiá su rumannan den fe pa nan fieldat i perseveransia apesar di persekushon. El a bisa nan: “Kòrda e dianan di promé aya, tempu ku, despues di a wòrdu iluminá, boso a soportá un gran lucha di sufrimentu.” I nan por tabata sigur ku Yehova lo no lubidá nan sirbishi fiel. (Heb. 6:10; 10:​32-34) Pablo su palabranan bondadoso lo tabata un gran animashon pa e kristiannan ei. Sinembargo, den e mesun karta ei, Pablo a duna spièrtamentu tambe kontra un tendensia humano ku e kristiannan mester a tene bou di kontròl pa nan zelo pa Dios su sirbishi no mengua. Sí, el a mustra ku nan mester a tene kuidou ku e tendensia di buska “èksküs,” òf di diskulpá nan mes, pa no kumpli ku Dios su mandamentunan.​—Heb. 12:25, NW.

⁶ E spièrtamentu ei ta konta pa kristiannan djawe tambe. P’esei, nos mester ta determiná pa tuma nos responsabilidatnan kristian na serio i nunka laga nos zelo pa e sirbishi di Dios mengua. (Heb. 10:39) Al fin i al kabo, bida ta den wega.​—1 Tim. 4:16.

7, 8. (a) Kiko lo yuda nos sigui sirbi Dios ku zelo? (b) Si nos zelo a mengua, kiko nos tin ku kòrda relashoná ku Yehova i Hesus?

⁷ Kiko lo yuda nos kumpli ku nos obligashonnan na Dios sin buska èksküs? Un manera importante pa lucha kontra e tendensia ei ta di meditá regularmente riba e nifikashon di nos promesa di dedikashon. Básikamente, nos a primintí Yehova ku nos lo pone hasimentu di su boluntat na promé  lugá den nos bida, i nos ke kumpli ku e promesa ei. (Mat. 16:24) P’esei, nos tin ku para ketu de bes en kuando i puntra nos mes: ‘Mi ta mes determiná pa kumpli ku mi dedikashon manera tempu ku mi a batisá? Òf mi zelo a mengua segun e añanan a pasa?’

⁸ Si nos a analisá nos mes sinseramente i a ripará ku nos no ta asina aktivo mas den nos sirbishi na Yehova, ta bon pa kòrda e palabranan akí di profeta Sofonias ku por enkurashá nos: “No laga bo mannan bira débil. Señor bo Dios ta meimei di bo, un guerero viktorioso. E lo regosihá den bo ku alegria.” (Sof. 3:​16, 17) E palabranan alentador akí tabata dirigí primeramente na e israelitanan di antigwedat, kendenan a regresá Yerusalèm despues di nan koutiverio na Babilonia. Sinembargo, e palabranan ei ta konta pa Dios su pueblo djawe tambe. Siendo ku e trabou ku nos ta hasi ta di Yehova, nos tin ku tene na mente ku Yehova i su Yu ta apoyá i fortalesé nos pa kumpli plenamente ku nos responsabilidatnan kristian. (Mat. 28:20; Fil. 4:13, NW) Si nos ta hasi esfuerso pa sigui hasi Dios su trabou ku zelo, lo e bendishoná nos i yuda nos sigui progresá spiritualmente.

“Buska Promé e Reino” Zelosamente

9, 10. Kiko ta e punto prinsipal di Hesus su ilustrashon tokante e bankete, i ki lès nos por saka for di dje?

⁹ Miéntras Hesus tabata kome na kas di un lider di e fariseonan, el a konta un ilustrashon tokante un bankete. Den e ilustrashon ei, Hesus a menshoná e oportunidat ku diferente persona a haña pa bini na remarke pa forma parti di e Reino di shelu. El a ilustrá tambe kon hende sa “diskulpa nan mes,” òf buska èksküs. (Lesa Lukas 14:​16-21.) E invitadonan den Hesus su ilustrashon a diskulpá nan mes pa no asistí na e fiesta. Un di nan a bisa ku e mester bai inspekshoná un pida tereno ku el a kaba di kumpra. Un otro a bisa ku el a kaba di kumpra un par di buey i ku e tin ku bai saminá nan. I un otro a bisa: ‘Mi no por bini, pasobra mi a kaba di kasa.’ Pero, e èksküsnan akí no tabata válido. Pasobra un hende ku kumpra un pida tereno òf un par di bestia, normalmente, ta saminá nan promé ku e kumpra nan. P’esei, no tin ningun motibu urgente pa bai saminá nan despues di a kumpra nan. I pakiko un persona resien kasá lo rechasá un invitashon asina importante? Pues, no ta nada straño ku e shon den e ilustrashon a rabia.

¹⁰ Ki lès nos tur por saka for di e ilustrashon di Hesus? Nunka nos no mester laga asuntunan personal, manera esnan ku Hesus a menshoná den su ilustrashon, bira asina importante ku nan ta haña prioridat riba nos sirbishi na Dios. Si un kristian no tene kosnan personal na nan debido lugá, su zelo pa e ministerio lo mengua gradualmente. (Lesa Lukas 8:14.) Pa evitá esei, nos tin ku biba na armonia ku Hesus su konseho: “Buska promé e reino di Dios i su hustisia.” (Mat. 6:33) Ta un animashon pa mira kon Dios su sirbidónan, hóben i bieu, ta sigui e konseho vital akí! De echo, hopi di nan a tuma medida pa simplifiká nan bida pa nan por tin mas tempu pa e ministerio. I nan ta eksperensiá personalmente ku ora bo buska promé e reino bo ta haña berdadero felisidat i satisfakshon.

11. Kua relato bíbliko ta mustra e importansia di sirbi Dios ku zelo i di henter kurason?

¹¹ Pa nos komprondé e importansia di sirbi Dios ku zelo, laga nos konsiderá un suseso den bida di Rei Joas di Israel. Na un okashon ku Israel tabata kore peliger di kai den man di Siria, Joas a bai ku awa na wowo serka Eliseo. E profeta a instruyé pa tira un flecha via di bentana den direkshon di Siria. E akto ei a indiká ku Yehova lo a yuda nan  gana e bataya kontra Siria. Esaki siguramente mester tabata un animashon pa e rei. Despues, Eliseo a manda e rei kohe su flechanan i dal e suela ku nan. Joas a dal e suela tres biaha so. Eliseo a rabia pasobra Joas mester a dal e suela sinku òf seis biaha pa e por ‘a dal Siria te ora ku e destruyé.’ Pero debí ku Joas tabata falta zelo, su éksito tabata limitá; el a logra tres viktoria so riba Siria. (2 Rei. 13:​14-19) Ki lès nos por saka for di e relato akí? Si nos hasi Yehova su trabou di henter nos kurason i ku zelo, lo e bendishoná nos rikamente.

12. (a) Kiko lo yuda nos keda ku zelo den Dios su sirbishi apesar di difikultatnan di bida? (b) Kon e echo ku bo ta keda aktivo den e ministerio ta benefisiá bo?

¹² Difikultatnan di bida ta pone nos zelo i deboshon na Dios na prueba. Hopi ruman tin problema ekonómiko. Otronan ta desanimá pa motibu di malesa serio ku ta stroba nan di sirbi Yehova manera nan ke. Apesar di esei, nos kada un por dal paso pa sigui kumpli ku Kristu su mandato zelosamente. Tuma nota di algun sugerensia i teksto den e kuadro “Kiko Lo Yuda Bo Sigui Kumpli ku Kristu Su Mandato?” Analisá nan i pensa kon bo por apliká nan lo mihó ku bo por. Si bo hasi esei, lo bo saka hopi benefisio. Ora nos ta keda aktivo den e ministerio, nos lo tin stabilidat, pas i felisidat na abundansia; nos lo tin un mihó bida. (1 Kor. 15:58) Es mas, sirbiendo Dios di henter kurason lo yuda nos sigui ‘spera e binida di e dia di Yehova.’​—2 Ped. 3:12.

Analisá Bo Sirkunstansia Onestamente

13. Kon nos por determiná si nos ta sirbiendo Dios di henter kurason?

¹³ Ta bon pa kòrda ku e kantidat di tempu ku nos ta dediká na nos sirbishi no nesesariamente ta demostrá ku nos trabou ta di henter kurason. Kada hende su sirkunstansia ta diferente. Un publikadó ku ta dediká solamente ún òf dos ora pa luna den sirbishi tin e aprobashon di Yehova si esei ta tur loke su salú ta permití. (Kompará ku Marko 12:​41-44.) P’esei, nos kada un tin ku analisá nos sirkunstansia i abilidatnan onestamente pa determiná si nos ta sirbiendo Dios di henter kurason. Ademas, komo siguidónan di Kristu, nos ke tin e  mesun punto di bista kuné. (Lesa 1 Korintionan 2:16.) Kiko Hesus a pone na promé lugá den su bida? El a bisa e hendenan di Kapernaum: “Mi mester prediká e reino di Dios na e otro statnan tambe, pasobra ta pa e propósito akí mi a wòrdu mandá.” (Luk. 4:43; Juan 18:37) Pues, Hesus tabata masha zeloso den su sirbishi na Dios. Ku esei na mente, analisá bo sirkunstansia i wak si bo por hasi mas den e ministerio.​—1 Kor. 11:1.

14. Den ki maneranan nos por ekspandé nos sirbishi na Dios?

¹⁴ Un análisis kuidadoso di nos sirkunstansia lo por yuda nos yega na e konklushon ku nos por hasi mas den nos sirbishi na Dios. (Mat. 9:​37, 38) Por ehèmpel, míles di nos hóbennan ku resientemente a kaba skol a ekspandé nan sirbishi na Dios, i awor nan ta eksperensiá e goso di sirbi zelosamente komo pionero. Abo tambe ke tin e goso ei? Algun ruman a analisá nan sirkunstansia i a disidí di muda bai un otro área den nan pais òf asta un otro pais kaminda tin mas nesesidat pa predikadónan di Reino. Otronan a siña un idioma stranhero pa por yuda hende ku ta papia e idioma ei. Ounke por ta un desafio pa nos hasi mas den sirbishi, esaki ta trese hopi bendishon kuné. Ademas, nos lo por yuda hopi hende “yega na konosementu di e bèrdat.”​—1 Tim. 2:​3, 4; 2 Kor. 9:6.

Ehèmpelnan Bíbliko Digno di Imitá

15, 16. Menshoná algun persona digno di imitá ku a sigui Kristu zelosamente.

¹⁵ Kon algun persona ku a bira apòstel a reakshoná ora Kristu a invitá nan pa bira su siguidó? Mateo “a laga tur kos atras, i a lanta i a siguié.” (Luk. 5:​27, 28) Pedro i Andres, kendenan tabata piskadó, ‘a laga e redanan para mesora i a siguié.’ Santiago i Juan, kendenan Hesus a haña ta drecha reda den boto huntu ku nan tata, ‘mesora a laga e boto i nan tata i a siguié.’​—Mat. 4:​18-22.

¹⁶ Un otro ekselente ehèmpel ta esun di Saulo, kende a bira apòstel Pablo. Ounke e tabata un persiguidó feros di Kristu su siguidónan, el a kambia i a bira “un instrumènt skohí” pa hiba e nòmber di Kristu. “I mesora [Pablo] a kuminsá proklamá Hesus den e snoanan, bisando: ‘E ta e Yu di Dios.’” (Echo. 9:​3-22) I ounke Pablo a hañ’é ku hopi difikultat i persekushon, nunka el a pèrdè su zelo pa e sirbishi.​—2 Kor. 11:​23-29; 12:15.

17. (a) Kiko bo ta deseá di hasi pa kumpli ku e mandato di Kristu mas plenamente? (b) Ki bendishon nos ta disfrutá di dje ora nos ta hasi Yehova su boluntat di henter kurason?

¹⁷ Sí, nos ke imitá e ekselente ehèmpel di e disipelnan ei i aseptá Kristu su invitashon ku entusiasmo i sin reserva. (Heb. 6:​11, 12) Ki bendishon nos ta disfrutá di dje ora nos ta hasi esfuerso pa sigui kumpli zelosamente ku Kristu su mandato? Hasiendo e boluntat di Dios, aseptando mas privilegio di sirbishi i responsabilidat den kongregashon, nos ta haña berdadero goso i satisfakshon. (Sal. 40:8; lesa 1 Tesalonisensenan 4:1.) Sí, ora nos ta hasi esfuerso vigoroso pa kumpli ku Kristu su mandato, nos ta haña bendishon duradero, manera pas mental, satisfakshon, aprobashon di Dios i e speransa di bida eterno.​—1 Tim. 4:10.

Bo Ta Kòrda?

• Ki trabou importante nos a haña, i kon nos tin ku mir’é?

• Ku ki tendensia humano nos mester tene kuidou, i dikon?

• Kiko nos tin ku analisá onestamente?

• Kiko lo yuda nos sigui kumpli ku Kristu su mandato?

[Preguntanan di Estudio]

[Kuadro/​Plachi na página 30]

Kiko Lo Yuda Bo Sigui Kumpli ku Kristu Su Mandato?

▪ Lesa e Palabra di Dios diariamente i meditá riba loke bo ta lesa.​—Sal. 1:​1-3; 1 Tim. 4:15.

▪ Hasi orashon regularmente pa pidi yudansa i guia di Dios su spiritu santu.​—Zak. 4:6; Luk. 11:​9, 13.

▪ Asosiá ku personanan ku ta desplegá un zelo ardiente pa e ministerio.​—Pro. 13:20; Heb. 10:​24, 25.

▪ Rekonosé e urgensia di e tempu ku nos ta biba aden.​—Efe. 5:​15, 16.

▪ Sea konsiente di e konsekuensianan serio di buska “èksküs.”​—Luk. 9:​59-62.

▪ Reflekshoná regularmente riba bo promesa di dedikashon i e bendishonnan abundante ku bo ta haña debí ku bo ta sirbi Yehova i kumpli ku Kristu su mandato di henter bo kurason.​—Sal. 116:​12-14; 133:3; Pro. 10:22.