E Papel di Spiritu Santu den Kumplimentu di Yehova Su Propósito

‘Mi palabra ku ta sali for di mi boka lo alkansá e propósito ku kual mi a mand’é.’​—ISA. 55:11.

1. Ilustrá e diferensia entre un plan i un propósito.

IMAGINÁ bo e siguiente esena. Dos hòmber ta prepará pa bai hasi un biahe ku outo. Ún di nan ta traha un mapa detayá di e ruta spesífiko ku e ta bai kore pa yega su destinashon. E otro tin su destinashon bon kla na mente, pero e ta konsiente tambe ku tin vários ruta ku e por skohe. Pues, e ta prepará pa ahustá su ruta si esei ta nesesario. Den sierto aspekto, e dos métodonan akí ta ilustrá e diferensia entre un plan i un propósito. Sí, bo por kompará un plan ku un mapa detayá ku ta indiká un ruta spesífiko, miéntras ku un propósito ta enserá ku bo sa e destinashon, pero ku no nesesariamente bo a skohe ún ruta spesífiko pa yega e destinashon ei.

2, 3. (a) Kiko e propósito di Yehova ta enserá, i kon el a reakshoná riba e situashon ku a surgi ora Adam ku Eva a peka? (b) Dikon nos mester keda na altura di e desaroyo di Yehova su propósito i biba na armonia kuné?

² Yehova no tin un plan fiho pa kumpli ku su boluntat. Mas bien, e tin un propósito ku lo kumpli gradualmente atraves di tempu. (Efe. 3:11) E propósito akí tin di haber ku loke Yehova tabatin na mente desde prinsipio pa humanidat i pa e tera, esta, pa henter e tera bira un paradeis, unda hende perfekto por disfrutá di pas i felisidat pa semper. (Gén. 1:28) Ora Adam ku Eva a peka, Yehova a reakshoná di akuerdo ku e situashon ei i a tuma medida pa garantisá ku su propósito lo kumpli. (Lesa Génesis 3:15.) Yehova a determiná ku su esposa, òf muhé,  simbóliko lo a produsí un “simia,” esta, un Yu, ku finalmente lo destruí e instigadó, Satanas i korigí tur daño ku el a kousa.​—Heb. 2:14; 1 Juan 3:8.

³ Ningun poder den shelu ni riba tera por stroba Yehova su propósito di kumpli. (Isa. 46:​9-11) Dikon nos por bisa esei? Pasobra Yehova su spiritu santu ta enbolbí den kumplimentu di Su propósito. Sí, e forsa iresistibel akí ta un garantia ku Dios su propósito lo “kumpli” sigur. (Isa. 55:​10, 11) P’esei, ta masha importante pa nos keda na altura di e desaroyo di Yehova su propósito i biba na armonia ku esaki, pasobra nos prospekto pa bida den futuro ta dependé di su kumplimentu. Ademas, ora nos analisá e manera ku Yehova ta usa su spiritu santu, esaki ta fortalesé nos fe. P’esei, laga nos konsiderá spiritu santu su papel—den pasado, den nos tempu i den futuro—relashoná ku e kumplimentu di Yehova su propósito.

E Papel di Spiritu Santu den Pasado

4. Kon Yehova a revelá su propósito gradualmente?

⁴ Den tempunan bíbliko, Yehova a revelá su propósito gradualmente. Na prinsipio, e identidat di e Simia primintí tabata “un sekreto sagrado.” (1 Kor. 2:7, NW) Ta te despues di mas o ménos 2000 aña, Yehova a bolbe papia tokante un simia. (Lesa Génesis 22:​17 i 18. *) Na e okashon ei, el a hasi un promesa na Abraham ku a revelá mas informashon tokante e identidat di e simia i su bendishonnan. E palabranan “pa medio di bo simia” a indiká bon kla ku e Simia lo tabata un hende, esta, un desendiente di Abraham. Nos por ta sigur ku Satanas tabata presta masha atenshon ora e detaye akí a ser revelá. Sin duda, e Atversario su úniko deseo tabata pa destruí òf korumpí e liña di desendensia di Abraham pa asina stroba Dios su propósito di kumpli. Pero e no a logra, pasobra Dios su forsa invisibel tabata obrando. Den ki maneranan?

5, 6. Kon Yehova a usa su spiritu santu pa protehá personanan den e liña di desendensia ku a hiba na e Simia?

⁵ Yehova a usa su spiritu santu pa protehá personanan den e liña di desendensia ku a hiba na e Simia. Yehova a bisa Abraham (e tempu ei, Abram): “Ami ta un eskudo pa bo.” (Gén. 15:1) I esaki no a keda na palabra so. Por ehèmpel, konsiderá loke a tuma lugá rònt di aña 1919 promé ku nos era ora Abraham ku Sara a bai biba temporalmente na Gerar. Abimelek, e rei di Gerar, no tabata sa ku Sara tabata kasá di Abraham. P’esei, el a tuma Sara ku e intenshon di hasié su esposa. Akaso esaki tabata un intento skondí di Satanas pa manipulá kosnan pa stroba Sara di duna lus na e yu ku lo tabata e simia di Abraham? Beibel no ta bisa esei. Pero e ta bisa sí ku Yehova a intervení den e kaso akí, pasobra den un soño, el a spièrta Abimelek pa e no mishi ku Sara.​—Gén. 20:​1-18.

⁶ Pero, esei no tabata e úniko biaha ku Yehova a protehá òf salba Abraham i su famia. (Gén. 12:​14-20; 14:​13-20; 26:​26-29) P’esei, relashoná ku Abraham i su desendientenan, e salmista por a bisa: “[Yehova] no a permití ningun hende oprimí nan; el a reprendé reinan pa nan motibu, bisando: ‘No mishi ku mi ungínan, ni hasi malu na mi profetanan.’”​—Sal. 105:​14, 15.

7. Kon Yehova a protehá e nashon di Israel?

⁷ Yehova a usa su spiritu santu pa protehá e nashon di Israel di antigwedat, for di kua e Simia primintí lo a nase. Kon el a hasi esei? Wèl, Yehova a usa su spiritu santu pa duna Israel Su Lei ku a preservá adorashon berdadero i protehá e hudiunan kontra kontaminashon spiritual, moral i físiko. (Eks. 31:18; 2 Kor. 3:3) Den tempu di e Huesnan, Yehova a duna sierto hòmbernan poder mediante su spiritu santu pa nan por a libra Israel for di su enemigunan. (Hues. 3:​9, 10) I atraves di e siglonan ku a sigui  te na nasementu di Hesus, kende ta e parti prinsipal di e simia di Abraham, Yehova a usa Su spiritu santu pa protehá Yerusalèm, Bètlehèm i e tèmpel, ya ku e lugánan akí mester a hunga un papel den kumplimentu di profesianan tokante Hesus.

8. Kiko ta mustra ku spiritu santu tabata direktamente enbolbí den e bida i ministerio di e Yu di Dios?

⁸ Spiritu santu tabata direktamente enbolbí den bida i ministerio di Hesus. Obrando den e matris di e bírgen Maria, spiritu santu a logra algu úniko, esta, ku un muhé imperfekto a konsebí i duna lus na un Yu hòmber perfekto. Pues, e Yu tabata liber di piká i di pena di morto. (Luk. 1:​26-31, 34, 35) Mas despues, spiritu santu a protehá Hesus di un morto prematuro tempu ku e tabata mucha. (Mat. 2:​7, 8, 12, 13) Ora Hesus tabatin mas o ménos 30 aña, Dios a ungié ku spiritu santu i asina a nombr’é komo heredero di e trono di David i a enkarg’é ku e trabou di prediká. (Luk. 1:32, 33; 4:16-21) Ku yudansa di spiritu santu, Hesus por a hasi milagernan, manera kura hende enfermo, duna kuminda na multitut di hende i lanta hende for di morto. E obranan poderoso ei ta duna nos un bista adelantá di e bendishonnan ku nos por spera bou di Hesus su reinado.

9, 10. (a) Den ki manera tabata bisto ku Hesus su disipelnan den promé siglo tabata ungí ku spiritu santu? (b) Ki kambio relashoná ku kumplimentu di Yehova su propósito a ser revelá den promé siglo di nos era?

⁹ Kuminsando na Pentekòste di aña 33 di nos era, Yehova a usa su spiritu santu pa ungi e parti sekundario di e simia di Abraham. I mayoria di nan no tabata desendiente di Abraham. (Rom. 8:​15-17; Gal. 3:29) Tabata bisto ku e disipelnan di Hesus den promé siglo a ser ungí ku spiritu santu, ya ku esaki a duna nan poder pa prediká ku zelo i efektuá aktonan poderoso. (Echo. 1:8; 2:​1-4; 1 Kor. 12:​7-11) E echo ku nan a risibí donnan milagroso di spiritu santu a revelá algu nobo relashoná ku e manera ku Yehova ta kumpli ku su propósito. Ounke pa vários siglo Yehova a usa un sistema di adorashon den kua e tèmpel na Yerusalèm tabata sentral, awor el a kuminsá usa e kongregashon kristian resien establesí. Pues, for di e tempu ei padilanti, Yehova ta usa e kongregashon ungí pa kumpli ku su propósito.

¹⁰ Pues, manera nos a mira, Yehova a usa spiritu santu den tempu bíbliko pa, entre otro, protehá su sirbidónan, duna nan poder i ungí nan. Asina el a garantisá kumplimentu di su propósito. Pero, kiko di nos tempu? Kon Yehova ta usa su spiritu santu pa apoyá Su propósito? Nos tin ku sa esei, pasobra nos ke kooperá ku spiritu santu. P’esei, laga nos konsiderá kuater manera den kua Yehova ta usa su spiritu santu den nos tempu.

E Papel di Spiritu Santu den Nos Tempu

11. Kiko ta mustra ku spiritu santu ta promové limpiesa den Dios su pueblo, i kon abo por demostrá ku bo ta kooperá ku spiritu santu?

¹¹ Di promé, spiritu santu ta promové limpiesa den Dios su pueblo. Ta p’esei, tur persona ku ta sirbi Yehova na armonia ku su boluntat i ku lo benefisiá di su propósito mester ta moralmente limpi. (Lesa 1 Korintionan 6:​9-11.) Algun hende tabata kometé inmoralidat seksual—manera fornikashon, adulterio i homoseksualidat—promé ku nan a bira kristian berdadero. I nos sa ku deseonan pa hasi piká por ta profundamente ankrá. (Sant. 1:​14, 15) Pero, Beibel ta bisa ku e personanan akí a ser “labá,” indikando ku nan a hasi e kambionan nesesario pa agradá Dios. Kiko ta yuda un persona ku stima Dios resistí e impulso pa satisfasé deseonan robes? Segun 1 Korintionan 6:11, esei ta “e spiritu di nos Dios.” Pues, ora bo ta mantené bo mes limpi moralmente, bo ta demostrá ku bo ta permití spiritu santu ehersé un influensia poderoso den bo bida.

12. (a) Segun e vishon di Ezekiel, kon Yehova ta dirigí su organisashon? (b) Kon bo por demostrá ku bo ta traha na armonia ku spiritu santu?

¹² Di dos, Yehova ta usa su spiritu pa dirigí  Su organisashon den e direkshon ku e ke p’e bai. E vishon ku Ezekiel a haña ta deskribí e parti selestial di Yehova su organisashon komo un garoshi selestial ku ta move iresistiblemente padilanti pa kumpli ku Yehova su propósito. Kiko ta move e garoshi den un sierto direkshon? Spiritu santu. (Eze. 1:​20, 21) Kòrda ku Yehova su organisashon ta konsistí di dos parti: ún parti selestial i ún parti terenal. I siendo ku ta spiritu santu ta dirigí e parti selestial, ta lógiko ku e ta dirigí esun riba tera tambe. Pues, ora bo ta obedesé i keda leal na e guia ku nos ta risibí for di e parti terenal di Dios su organisashon, bo ta demostrá ku bo ta kana pareu ku Yehova su garoshi selestial i ta traha na armonia ku Su spiritu santu.​—Heb. 13:17.

13, 14. (a) Ken ta forma parti di “e generashon” ku Hesus a menshoná? (b) Menshoná un ehèmpel ku ta mustra ku Yehova ta usa su spiritu santu pa yuda nos komprondé bèrdatnan bíbliko. (Wak e kuadro “Bo Ta Al Dia ku e Lus Ku A Bira Mas Kla?”)

¹³ Di tres, Yehova ta usa spiritu santu pa yuda nos komprondé bèrdatnan bíbliko. (Pro. 4:18) Pa hopi tempu kaba “e esklabo fiel i prudente” ta usa e revista akí komo e medio prinsipal pa revelá bèrdatnan bíbliko gradualmente. (Mat. 24:45) Laga nos tuma, komo ehèmpel, nos komprondementu tokante e palabra “generashon” ku Hesus a menshoná. (Lesa Mateo 24:​32-34.) Na ki generashon el a referí? E artíkulo “E Presensia di Kristu—Kiko E Ta Nifiká pa Bo?” a splika ku Hesus no tabata referí na e malbadonan, sino na su disipelnan, ku denter di poko lo a ser ungí ku spiritu santu. * Ora e profesianan a kumpli den promé siglo, ta Hesus su disipelnan ungí a mira e señal i komprondé su nifikashon, esta, ku Hesus tabata “serka, dilanti di porta.” Den nos tempu ta meskos.

¹⁴ Kiko e splikashon akí ta nifiká pa nos? Ounke nos no por kalkulá eksaktamente kuantu tempu “e generashon akí” lo dura, tin algun punto relashoná ku e palabra “generashon” ku nos tin ku tene na mente. Generalmente, e ta referí na un grupo di hende di vários edat ku ta biba durante un periodo spesífiko ku no ta demasiado largu i ku tin un fin. (Eks. 1:6) P’esei anto, kon nos tin ku komprondé Hesus su palabranan relashoná ku “e generashon akí”? Nos ta komprondé ku e kristiannan ungí, komo grupo, a mira kon e rasgonan di e señal a kuminsá kumpli na 1914 i ku nan lo mira e komienso di e tribulashon grandi  tambe. I siendo ku e generashon ei tabatin un komienso, lo e tin un fin tambe. Ademas, kumplimentu di e vários rasgonan di e señal ta indiká bon kla ku e tribulashon mester ta serka. P’esei, bo tin ku mantené bo sentido di urgensia i keda alerta. Asina, bo ta demostrá ku bo ta keda al dia ku e lus ku ta bira mas i mas kla i ku bo ta sigui e guia di spiritu santu.​—Mar. 13:37.

15. Kiko ta mustra ku spiritu santu ta duna nos poder pa deklará e bon notisia?

¹⁵ Di kuater, spiritu santu ta duna nos poder pa deklará e bon notisia. (Echo. 1:8) Akaso nos lo por a prediká e bon notisia rònt mundu sin yudansa di spiritu santu? Pensa un ratu riba lo siguiente: Kisas bo ta ún di e personanan ku tabata masha tímido mes i ku a yega di bisa: ‘Nunka lo mi por bai prediká di kas pa kas!’ Pero awor, bo ta partisipá yen di entusiasmo den e trabou ei. * Hopi Testigu di Yehova a sigui prediká fielmente apesar di oposishon òf persekushon. Ta Dios su spiritu santu so por duna nos poder pa vense opstákulo i hasi kosnan ku ta imposibel riba nos mes forsa. (Mik. 3:8; Mat. 17:20) P’esei, ora bo ta partisipá plenamente den e trabou di prediká, bo ta demostrá ku bo ta kooperá ku spiritu santu.

E Papel di Spiritu Santu den Futuro

16. Dikon nos por tin konfiansa ku Yehova lo protehá su pueblo durante e tribulashon grandi?

¹⁶ Den futuro, Yehova lo usa su spiritu santu na un manera maravioso pa realisá Su propósito. Promé, Yehova lo usa su spiritu santu pa duna protekshon. Manera nos a mira kaba, den pasado, Yehova a usa su spiritu santu pa protehá hende individual i tambe henter e nashon di Israel. P’esei, nos tin tur motibu pa kere ku lo e bolbe usa e mesun spiritu poderoso ei pa protehá su pueblo durante e tribulashon grandi ku ta aserkando. Nos no tin ku spekulá tokante kon eksaktamente Yehova lo perkurá pa nos e tempu ei. Mas bien, laga nos wak padilanti ku konfiansa, sabiendo ku Yehova semper ta opservá esnan ku ta stim’é i ku su spiritu santu lo ta na nan alkanse.​—2 Kró. 16:9; Sal. 139:​7-12.

17. Kon Yehova lo usa su spiritu santu den e mundu nobo?

¹⁷ Kon Yehova lo usa su spiritu santu den e binidero mundu nobo? Por ehèmpel, lo e usa su spiritu santu pa dirigí skirbimentu di e bukinan, òf ròlnan, nobo ku lo ser habrí e tempu ei. (Rev. 20:12) Kiko e ròlnan akí lo kontené? Evidentemente, nan lo splika kiko Yehova ta rekerí di nos durante e milenio. Bo ta ansioso pa analisá e kontenido di e ròlnan akí? Sí, nos ta spera e mundu nobo ansiosamente. Nos no por ni imaginá nos mes kon bida lo ta den e mundu nobo. Lo ta un tempu maravioso, pasobra Yehova lo usa su spiritu santu pa kumpli ku Su propósito pa e tera i su habitantenan.

18. Kiko bo ta determiná pa hasi?

¹⁸ Laga nos nunka lubidá ku Yehova su propósito lo kumpli sigur, pasobra e ta usa su spiritu santu—e forsa di mas poderoso den universo—pa logra esei. E propósito ei ta toka abo tambe. P’esei, sea firme i determiná pa supliká Yehova pa su spiritu santu i pa sigui su guia. (Luk. 11:13) Asina, bo por tin e speransa di biba pa semper den Paradeis riba tera, manera ta Dios su propósito pa hende.

[Nota]

Bo Ta Kòrda?

• Den ki maneranan Yehova a usa su spiritu santu den tempu bíbliko pa kumpli ku Su propósito?

• Kon Yehova ta usa su spiritu santu den nos tempu?

• Kon Yehova lo usa su spiritu santu den futuro pa kumpli ku Su propósito?

[Preguntanan di Estudio]

[Kuadro na página 22]

Bo Ta Al Dia ku e Lus Ku A Bira Mas Kla?

Yehova ta sigui hasi bèrdatnan bíbliko mas kla i komprendibel pa su pueblo. Kiko ta algun ahuste ku E Toren di Vigilansia a yega di publiká?

▪ Relashoná ku kresementu spiritual, kiko nos por siña for di Hesus su ilustrashon di zürdeg? (Mat. 13:33)​—1 di yüli 2008, página 26-27.

▪ Na ki tempu e yamada di kristiannan pa e speransa selestial ta stòp?​—1 di mei 2007, página 30-31.

▪ Kiko ta nifiká adorá Yehova “den spiritu”? (Juan 4:24)​—15 di yüli 2002, página 15.

▪ Den kua patio e multitut grandi ta sirbi Yehova? (Rev. 7:15)​—1 di mei 2002, página 30-31.

▪ Na ki tempu e separashon di karné for di kabritu lo tuma lugá? (Mat. 25:​31-33)​—15 di òktober 1995, página 18-28.