Nos Lektornan Ta Puntra . . .

Hesus Ta e Arkangel Miguel?

▪ Simplemente bisá, sí. Den hopi kultura ta normal ku un hende tin mas ku un nòmber. Esei ta e kaso tambe ku nòmbernan den Beibel. Por ehèmpel, e patriarka Jakòb tabatin e nòmber Israel tambe. (Gènesis 35:10) Den e Skritura original, apòstel Pedro tabatin sinku nòmber diferente, esta, Simeon, Simon, Pedro, Sefas i Simon Pedro. (Mateo 10:2; 16:16; Juan 1:42; Echonan 15:​7, 14) Kon nos por sa sigur ku Miguel ta un otro nòmber pa Hesus? Laga nos konsiderá e siguiente evidensia bíbliko.

Beibel ta menshoná Miguel, e kriatura spiritual poderoso, sinku biaha, di kua tres ta den e buki di Daniel. Na Daniel 10:​13 i 21, nos ta lesa ku Miguel, kende a wòrdu yamá “prens” i “un di e prensnan prinsipal,” a yuda un angel ku tabatin un mishon difísil pa kumpli kuné. Siguientemente, Daniel 12:1 ta bisa nos ku den e tempu di fin “Miguel, e gran prens ku ta protehá e yu hòmbernan di bo pueblo, lo lanta.”

Revelashon 12:7 tambe ta menshoná Miguel. Einan, Beibel ta bisa ku “Miguel i su angelnan” tabata bringa un guera krusial. I e resultado tabata ku nan a saka Satanas e Diabel i su angelnan malbado for di shelu.

Ripará ku den kada un di e kasonan menshoná, Beibel ta presentá Miguel komo un angel guerero ku ta bringa pa protehá Dios su pueblo i ku ta konfrontá asta Yehova su enemigu di mas grandi, Satanas.

Hudas versíkulo 9 ta yama Miguel “e arkangel.” E prefiho “ark” ta nifiká “hefe” òf “prinsipal.” I Beibel nunka ta usa e palabra “arkangel” den forma plural. E úniko otro versíkulo di Beibel ku ta menshoná e palabra arkangel ta 1 Tesalonisensenan 4:16. Aki Pablo ta deskribí Hesus resusitá, bisando: “Señor [Hesus] mes lo baha for di shelu ku un gritu, ku bos di arkangel i ku tròmpèt di Dios.” Pues, manera e teksto akí ta mustra, ta Hesukristu ta e arkangel, òf e angel prinsipal.

En bista di loke nos a konsiderá kaba, kiko nos por konkluí? Hesukristu ta Miguel, e arkangel. Tur dos nòmber—Miguel (ku ta nifiká “Ken Ta Manera Dios?”) i Hesus (ku ta nifiká “Yehova Ta Salbashon”)—ta hala atenshon na Hesus su papel komo e apoyadó prinsipal di Dios su soberania. Filipensenan 2:9 ta bisa: “Dios a hals’é [Hesus glorifiká] te na e halturanan, i a dun’é e nòmber ku ta riba tur nòmber.”

Ta importante pa nota ku Hesus su nasementu aki riba tera no tabata e prinsipio di su bida. Promé ku Hesus a nase na tera, un angel a bishitá Maria pa bis’é ku lo e haña un yu pa medio di spiritu santu i ku e tin ku dun’é e nòmber Hesus. (Lukas 1:31) Durante su ministerio, vários biaha Hesus a laga hende komprondé ku el a biba den shelu promé ku el a bini na tera.​—Juan 3:13; 8:​23, 58.

Pues, Miguel e arkangel ta Hesus den su eksistensia prehumano. Despues ku Hesus a resusitá i a bolbe na shelu, el a sigui rindi sirbishi na Dios komo Miguel, e angel prinsipal, ‘pa e gloria di Dios, e Tata.’​—Filipensenan 2:11.