BO SA sinti bo manera George i Emily ora bo mira bo yu ta lucha ku un problema òf ta sufri? Wèl, tin hopi mayor ku tambe ta sinti meskos ku bo. Ta masha normal ku mayornan ta purba protehá nan yunan. Sinembargo, e situashonnan menshoná na prinsipio eigenlijk a duna e mayornan ei oportunidat pa siña nan yunan un lès balioso tokante responsabilidat. Ta mas ku klaru ku e lès ku un mucha di 13 aña ta saka ta diferente for di esun di 4 aña.

Pero, echo ta ku bo no por ta semper huntu ku bo yunan pa protehá nan di problema den bida. Ku tempu, un yu lo bandoná kas di su mayornan i lo e tin ku “karga su mes” responsabilidat. (Galationan 6:5; Génesis 2:24) Pa siña nan yunan para riba nan pia, mayornan mester keda enfoká riba e meta pa siña nan bira adultonan generoso,  responsabel i ku no ta pensa riba nan mes so. E tarea ei no ta niun tiki fásil!

Afortunadamente, e manera ku Hesus a trata ku su disipelnan ta un ekselente ehèmpel pa mayornan. Hesus mes no tabatin yu. Pero el a skohe i entrená su disipelnan di tal manera ku nan por a sigui ku e trabou, asta despues ku el a bai. (Mateo 28:​19, 20) Loke Hesus a logra ta loke kada mayor ta spera di logra, esta, pa kria yunan ku ta bira adultonan responsabel. Konsiderá djis tres aspekto den kua Hesus a pone ehèmpel pa mayornan.

Kasi na final di Hesus su bida, el a bisa su disipelnan: “Mi a duna boso un ehèmpel, pa boso tambe hasi manera ami a hasi ku boso.” (Juan 13:15) Meskos ku Hesus, mayornan mester splika nan yunan i mustra nan mediante ehèmpel kiko eksaktamente ta nifiká ser responsabel.

Puntra bo mes: ‘Mi tin kustumber di papia na un manera positivo tokante e responsabilidatnan ku mi tin ku kumpli kuné? Mi ta papia tokante e satisfakshon ku mi ta sinti ora mi traha duru pa yuda otro hende? Òf kada bes mi ta keha i kompará mi mes ku esnan ku ta parse di tin un dushi bida?’

Ta bèrdat ku ningun hende no ta perfekto; nos tur sa sinti nos kargá ku nos kosnan. Pero bo ehèmpel probablemente ta e mihó manera pa yuda bo yunan mira e importansia i balor di bira hende responsabel.

Hesus a spera di su disipelnan pa nan kumpli ku nan papel i nan responsabilidat, pero e tabata sa ku lo a tuma tempu promé ku nan por tabata kla pa esei. Un biaha el a bisa nan: “Ainda mi tin hopi kos mas di bisa boso, ma boso no por soportá nan awor.” (Juan 16:12) Hesus no a pidi nan mesora pa hasi kos sin su yudansa. Mas bien, el a dediká hopi tempu na siña nan bastante kos. Ta te ora Hesus tabata sa ku su disipelnan ta kla, el a laga nan bai nan so.

Di mes manera, ta irasonabel pa mayornan pidi nan yunan pa asumí responsabilidat di hende grandi si nan no ta kla pa esei. Pero tòg, segun ku nan yu ta krese, mayornan mester wak kiko lo ta apropiá pa nan yu hasi. Por ehèmpel, mayornan mester siña nan yunan pa nan mes paga tinu riba nan higiena personal, limpiesa di nan kamber, puntualidat i siña manehá nan plaka bon. Ora yunan ta kuminsá bai skol, mayornan tin ku ferwagt di nan yunan pa nan mira nan tareanan di skol komo responsabilidat serio.

Fuera di duna nan yu responsabilidatnan, mayornan mester yuda nan yu kumpli ku e responsabilidatnan ei. George, e tata menshoná na prinsipio, a bin saka afó ku un di e motibunan ku Michael tabata haña asina tantu nèrvio ora e mester a warda su ko’i hunganan tabata pasobra el a sinti ku e trabou tabata muchu p’e. George a bisa: “En bes di grita Michael pa piki su ko’i hunganan, mi a purba siñ’é un manera kon e por a logra warda su kosnan.”

Kiko spesífikamente George a hasi? George a bisa: “Na promé lugá, mi a stipulá un ora ku e mester piki su ko’i hunganan tur anochi. Kaba mi tabata yuda Michael, nos tabata hasi e kamber pida pa pida. Mi a hasié un wega, te ku nos tabata pusta pa wak kua di nos ta kaba mas lihé. No a tarda hopi ku esaki a bira un rutina promé ku e drumi. Mi a primintí Michael ku si e kaba lihé, lo mi lesa un kuenta mas p’e. Pero si e tarda, e ora ei nos lo lesa ménos.”

Hesus, meskos ku tur bon maestro, tabata sa ku e mihó manera pa siña un hende algu ta di lag’é hasié. Por ehèmpel, ora Hesus a pensa ku e tempu a yega, el a manda su disipelnan “dos-dos su dilanti pa tur stat i lugá, kaminda e mes tabata pa bai.” (Lukas 10:1) Sinembargo, e no a laga nan pa nan kuenta. Promé ku el a manda nan, el a duna nan instrukshon spesífiko. (Lukas 10:​2-12) Ora e disipelnan a bolbe i a kont’é kon bon a bai, Hesus a elogiá i animá nan. (Lukas 10:​17-24) El a bisa nan ku e tabatin konfiansa ku nan tabata por a hasi e trabou i ku nan tabatin su aprobashon.

Ora bo yunan ta enfrentá situashonnan difísil, kiko bo ta hasi? Bo ta buska manera pa protehá bo yunan di e kosnan ku nan tin miedu di dje pa nan no keda desepshoná òf pa nan no frakasá? Bo promé inklinashon kisas ta pa “salba” bo yu òf pa tuma su karga riba bo lomba.

Pero konsiderá lo siguiente: Ki mensahe bo ta transmití si kada bes di un manera òf otro bo basha kareda bai “skapa” bo yu? Bo ta demostrá ku bo tin konfiansa ku nan por trata ku situashonnan difísil? Òf bo ta bisando nan ku ainda nan ta mucha chikí indefenso ku mester di bo pa tur kos?

Por ehèmpel, kon Emily, menshoná promé, a trata ku e problema di su yu muhé? En bes di intervení, el a disidí di laga Jenny mes bai papia ku e maestra. Nan a sinta huntu traha un lista di pregunta pa Jenny bai skol kuné. Despues nan a disidí ki ora e ta bai aserká e maestra. Asta nan a praktiká kon mas o ménos e kòmbersashon lo por bai. Emily a bisa: “Jenny a tuma un kurashi i a aserká su maestra i su maestra a elogi’é pa e inisiativa ku el a tuma. Jenny tabata orguyoso di su mes—i ami tambe tabata orguyoso di dje.”

Si tur ora bai bo protehá bo yu for di problema, en realidat kisas bo ta strob’é di desaroyá e abilidat di enfrentá situashonnan difísil den bida. En bes di esei, siña bo yu aseptá responsabilidat. Esei ta un di e regalonan di mas balioso ku bo por duna bo yu.