Aktividatnan Spiritual Ta Refreská Nos

“Tuma mi yugo riba boso, . . . i boso lo haña sosiegu pa boso alma.”​—MAT. 11:29.

1. Kiko Dios a perkurá pa su pueblo na Seru Sinaí, i dikon?

E PAKTO di Lei ku Yehova a introdusí na Seru Sinaí a inkluí e mandamentu pa tene un Sabat semanal. Pa medio di su bosero, Moisés, Yehova a bisa e nashon di Israel: “Seis dia bo mester hasi bo trabou, ma e di shete dia bo mester stòp di traha, pa asina bo buey i bo buriku por sosegá, i e yu hòmber di bo esklabo muhé i e stranhero por hala rosea.” (Eks. 23:12) Sí, komo muestra di su amor i konsiderashon pa su pueblo ku tabata bou di Lei, Yehova a perkurá un dia di sosiegu pa nan. I asina nan por a “hala rosea,” òf manera e idioma original ta bisa refreská nan mes.

2. Kon Sabat a benefisiá e israelitanan?

² Pero, Sabat tabata djis un dia pa relahá? Nò. E tabata un parti fundamental di e israelitanan su adorashon na Yehova. Por ehèmpel, e dia ei a duna kabesnan di famia oportunidat di instruí nan famia pa ‘warda e kaminda di Yehova’ i hasi loke ta hustu. (Gén. 18:19)  Ademas, Sabat a duna famia- i amigunan oportunidat di bini huntu pa reflekshoná riba Yehova su obranan i disfrutá di asosiashon plasentero. (Isa. 58:​13, 14) I loke ta mas importante ainda, Sabat a señalá profétikamente na e tempu ku hende lo haña berdadero refreskamentu bou di Kristu su Reinado di Mil Aña. (Rom. 8:21) Pero kiko di nos tempu? Na unda i kon kristiannan berdadero por haña refreskamentu pa nan por sigui kana den e kaminda di Yehova?

Asosiashon Kristian Ta Refreská Nos

3. Den ki manera kristiannan di promé siglo a sostené otro, i ku ki resultado?

³ Apòstel Pablo a deskribí e kongregashon kristian komo un “pilar i sosten di e bèrdat.” (1 Tim. 3:15) Sí, kristiannan di promé siglo a sostené otro, ya ku nan a animá i edifiká otro den amor. (Efe. 4:​11, 12, 16) Por ehèmpel, durante Pablo su estadia na Efeso, el a haña un bishita di e miembronan di e kongregashon di Korinto. Ki efekto e bishita akí tabatin? Esaki a anim’é mashá, pasobra el a bisa: ‘Mi ta regosihá den e binida di Stéfanas, Fortunato i Akaiko, pasobra nan a refreská mi spiritu.’ (1 Kor. 16:​17, 18) Tito tambe a sinti meskos ora el a bai sirbi e rumannan na Korinto. P’esei, Pablo a skirbi e kongregashon i a bisa nan: “[Tito] su spiritu a wòrdu refreská dor di boso tur.” (2 Kor. 7:13) Awe tambe, komo Testigunan di Yehova, nos ta sinti nos realmente refreská ora nos ta disfrutá di asosiashon edifikante huntu ku nos rumannan.

4. Den ki sentido reunionnan di kongregashon ta refreská nos?

⁴ Nos sa di eksperensia ku reunionnan di kongregashon ta duna nos masha goso. Na e reunionnan ei, nos ta ‘wòrdu enkurashá, kada un dor di e fe di e otro.’ (Rom. 1:12) Nos rumannan kristian no ta hende deskonosí òf personanan ku nos konosé superfisialmente. Nan ta berdadero amigunan, kendenan nos ta stima i respetá. P’esei, ta un gran goso i konsuelo pa ta regularmente huntu ku nan na nos reunionnan.​—Flm. 7.

5. Kon nos por animá i refreská otro na nos kongreso- i asambleanan?

⁵ Un otro fuente di refreskamentu ta nos kongreso anual i nos asambleanan. Ademas di brinda nos e awa ku ta duna bida, esta, bèrdatnan bíbliko, e reunionnan grandi akí ta duna nos e oportunidat di asosiá ku nos rumannan i ‘hancha nos kurason.’ Sí, nos tin e oportunidat di sera mas amistat. (2 Kor. 6:​12, 13) Pero kiko nos mester hasi si nos ta tímido i tin difikultat pa aserká otro hende? Un kos ku nos por hasi ta di ofresé nos mes komo boluntario pa yuda na kongreso òf asamblea. Di e manera ei, nos por sera konosí ku mas ruman. Por ehèmpel, un ruman muhé, kende a yuda delegadonan na un kongreso internashonal i tambe den limpiesa, a bisa: “Ku eksepshon di mi famianan i algun amigu, mi no tabata konosé niun hende na e kongreso. Pero ora mi a yuda ku limpiesa, mi a topa masha hopi ruman mes. I tabata masha dushi!”

6. Menshoná un manera ku nos por ser refreská durante nos fakansi.

⁶ Tres biaha pa aña, e israelitanan tabatin e kustumber di bai Yerusalèm pa selebrá e fiestanan anual. (Eks. 34:23) Hopi biaha, esei a nifiká ku nan mester a laga kunuku- i negoshinan atras i kana dianan largu riba kaminda di tera yen di stòf. Apesar di esei, ora nan a yega na e tèmpel, tabata un “gran goso” pa nan a mira i asosiá ku esnan ku ‘tabata alabá Yehova.’ (2 Kró. 30:21) Awe tambe, hopi sirbidó di Yehova ta sinti gran goso ora nan bishitá Bètel, esta, e sukursal di Testigunan di Yehova, huntu ku nan famia. Abo i bo famia tambe por inkluí un bishita na Bètel den boso próksimo fakansi?

7. (a) Kon nos por benefisiá di reunionnan sosial? (b) Kiko por kontribuí na un reunion sosial edifikante i plasentero?

⁷ Ora nos ta bini huntu komo famia i amigunan pa pasa un ratu plasentero tambe nos  por animá otro. Salomon, e rei sabí, a bisa: “No tin nada mas mihó pa un hende ku kome i bebe i bisa su mes ku su trabou ta bon.” (Ekl. 2:24) Sí, reunionnan sosial ta refreská nos i ta duna nos oportunidat pa siña konosé nos rumannan mihó i asina fortifiká nos amistat ku nan. Pero, pa e okashonnan ei por ta edifikante i plasentero, ta bon pa nos no invitá muchu hende; nos mester sòru tambe pa bon supervishon foral si ta sirbi bibida alkohóliko.

E Trabou di Prediká Ta Refreská Hende

8, 9. (a) Mustra e kontraste entre e mensahe di Hesus i e siñansa di e eskriba- i fariseonan. (b) Kon nos ta benefisiá ora nos ta kompartí bèrdatnan bíbliko?

⁸ Hesus tabatin masha zelo pa sirbishi i a animá su disipelnan pa nan tambe desplegá zelo. El a bisa nan: “E kosecha ta masha grandi, ma trahadó ta poko. P’esei, pidi e Señor di kosecha pa manda trahadó na su kosecha.” (Mat. 9:​37, 38) E mensahe ku Hesus a prediká tabata masha refreskante; e tabata un “evangelio,” esta, un bon notisia. (Mat. 4:23; 24:14) Esaki tabata kompletamente diferente for di e reglanan pisá ku e fariseonan a imponé riba e pueblo.​—Lesa Mateo 23:​4, 23 i 24.

⁹ Ora nos ta kompartí e mensahe di Reino ku otro hende, nos ta refreská nan spiritualmente. I na mesun tempu, nos ta haña mas komprondementu di Beibel su bèrdatnan presioso i nos apresio pa esakinan ta oumentá. Ku rason, e salmista a bisa: ‘Alabá Yehova! Pasobra ta bon pa kanta alabansa na nos Dios, pasobra esei ta agradabel.’ (Sal. 147:1) Lo bo por hasi mas den e trabou di prediká, alabando Yehova, i asina oumentá bo goso?

10. Nos éksito den sirbishi ta dependé di hende su reakshon? Splika.

¹⁰ Ta sierto ku den algun teritorio, e hendenan ta mustra mas interes den e bon notisia ku otro kaminda. (Lesa Echonan 18:​1, 5-8.) Si bo ta biba den un área kaminda masha tiki hende ta reakshoná bon riba e mensahe di Reino, purba konsentrá riba e bon kosnan ku bo ta logra den bo trabou di prediká. No lubidá, e esfuerso ku bo ta hasi pa sigui proklamá e nòmber di Yehova no ta en bano. (1 Kor. 15:58) Es mas, nos éksito den sirbishi no ta dependé di e hendenan su reakshon. Nos por tin e konfiansa ku Yehova lo perkurá pa hende sinsero haña oportunidat di tende i aseptá e mensahe di Reino.​—Juan 6:44.

Adorashon Komo Famia Ta Refreská Nos

11. Ki responsabilidat Yehova a duna mayornan, i kon nan por kumpli ku esaki?

¹¹ Mayornan deboto tin e responsabilidat di siña nan yunan tokante Yehova i su kaminda. (Deu. 11:​18, 19) Si bo ta un mayor, bo ta apartá tempu pa siña bo yunan tokante nos Tata selestial ku ta stima nos? Pa yuda bo kumpli ku e responsabilidat serio akí i asina perkurá pa e nesesidat spiritual di bo famia, Yehova a proveé un abundansia di kuminda spiritual edifikante mediante grabashonnan (tantu vidio komo oudio), buki- i revistanan.

12, 13. (a) Kon famianan por benefisiá di e anochi di Adorashon Komo Famia? (b) Kon mayornan por perkurá pa nan adorashon komo famia ta un fuente di refreskamentu?

¹² Ademas, e esklabo fiel i prudente a instituí un anochi pa Adorashon Komo Famia. Esaki ta un anochi ku famianan ta apartá tur siman pa studia Beibel. Hopi kristian ta haña ku Adorashon Komo Famia a uni nan famia mas, a oumentá nan amor pa otro i a fortifiká  nan relashon ku Yehova. Pero, kiko mayornan por hasi pa nan adorashon komo famia por ta un fuente di refreskamentu?

¹³ E anochi pa Adorashon Komo Famia no mester ta un okashon laf ni muchu serio. Kòrda ku nos ta adorá e “Dios felis,” i e ke pa nos ador’é ku goso. (1 Tim. 1:11, NW; Fil. 4:4) Un anochi adishonal pa papia tokante bèrdatnan presioso di Beibel ta realmente un bendishon! Mayornan mester ta fleksibel den nan manera di siña, usando nan imaginashon i kreatividat. Por ehèmpel, un famia a laga nan yu hòmber Brandon, di 10 aña, hasi un presentashon titulá: “Dikon Beibel ta yama Satanas un kolebra?” Brandon no tabata gusta e idea ku Beibel ta yama Satanas un kolebra pasobra e ta stima kolebra. De bes en kuando, algun famia ta presentá un drama bíbliko den kua kada miembro di famia ta lesa un porshon di Beibel ku ta korespondé ku un personahe bíbliko òf ta hunga e papel di un personahe. Sí, e métodonan di siña akí ta hasi e anochi ei interesante i plasentero. I di e manera akí, mayornan ta enbolbé e yunan tambe, i esei ta yuda inkulká prinsipionan bíbliko den nan kurason. *

Evitá Karga Innesesario

14, 15. (a) Dikon tin mas strès i insiguridat den e último dianan akí? (b) Ki otro situashonnan difísil kristiannan sa konfrontá?

¹⁴ Strès i insiguridat a oumentá den e último dianan di e sistema malbado akí. Por ehèmpel, miónes di hende ta sufri debí na desempleo i otro problemanan finansiero. Asta esnan ku tin trabou ta haña ku e plaka ku nan ta gana no ta yega pa kubri gastu- i nesesidatnan di nan famia. (Kompará ku Hageo 1:​4-6.) Polítikonan i otro lidernan tin un lucha pa eliminá terorismo i otro fuente di maldat. Ademas, hopi hende ta sinti nan masha  desanimá pa motibu di nan propio debilidatnan.​—Sal 38:4.

¹⁵ Kristiannan berdadero tambe ta konfrontá e problema- i preshonnan ku e mundu di Satanas ta trese kuné. (1 Juan 5:19) Ademas, disipelnan di Kristu sa konfrontá situashonnan difísil debí ku nan ta hasi esfuerso pa keda fiel na Yehova. Hesus a bisa: “Si nan a persiguí mi, boso tambe nan lo persiguí.” (Juan 15:20) Sinembargo, ounke “nos ta wòrdu persiguí,” nos “no ta keda desampará.” (2 Kor. 4:9) Dikon nos por bisa esei?

16. Kiko por yuda nos keda gososo?

¹⁶ Hesus a bisa: “Bin serka mi tur ku ta kansá i kargá, i lo mi duna boso sosiegu.” (Mat. 11:28) Ora nos ta ehersé pleno fe den e reskate di Kristu, ta komo si fuera nos ta pone nos bida den man di Yehova. Di e manera ei, nos ta haña “poder mas ayá di loke ta normal.” (2 Kor. 4:7, NW) Sí, Dios su spiritu santu, òf “ayudante,” ta fortifiká nos fe di tal manera ku nos por soportá prueba i tribulashon i a la bes keda gososo.​—Juan 14:26, NW; Sant. 1:​2-4.

17, 18. (a) Kiko nos tin ku tene kuidou kuné? (b) Kiko por ta e resultado ora buskamentu di plaser ta e kos prinsipal den nos bida?

¹⁷ Awe, kristiannan berdadero tin ku tene kuidou pa nan no ser afektá pa e mundu su deseo loko pa plaser. (Lesa Efesionan 2:​2-5.) Si nos no tene kuidou, “e deseo di karni i e deseo di wowo i e orguyo di bida” por pone nos kai den trampa. (1 Juan 2:16) Nos por asta kuminsá kere inkorektamente ku ora nos satisfasé e deseo di karni, nos lo sinti nos mes refreská. (Rom. 8:6) Por ehèmpel, algun hende a kuminsá usa droga, bebe di mas, enbolbé nan mes ku pornografia, hasi deporte peligroso i vários otro kos ilegal den nan afan pa stimulá nan sentidonan. Pero, e “trampanan” akí di Satanas ta diseñá pa gaña nos i laga nos kere ku kos malu ta duna refreskamentu.​—Efe. 6:11.

¹⁸ Ta sierto ku no tin nada malu den kome, bebe i dibertí na un manera sano i moderá. Pero, nos no mester permití e kosnan ei bira e aktividatnan prinsipal den nos bida. Ta vital pa nos keda balansá i desplegá dominio propio, spesialmente en bista di nos tempu. P’esei, nos no mester kore tras di metanan personal ku por bira un karga pa nos, pasobra nos por bira personanan “inútil [ku no ta produsí] fruta den e konosementu berdadero di nos Señor Hesukristu.”​—2 Ped. 1:8.

19, 20. Kon nos por haña berdadero refreskamentu?

¹⁹ Ora nos ta pensa manera Yehova, nos ta rekonosé ku kualke plaser ku e mundu akí ta ofresé ta pasahero. Moisés a realisá esaki i nos tambe. (Heb. 11:25) Sí, ta ora nos ta hasi e boluntat di nos Tata selestial, nos ta haña berdadero refreskamentu, esta, goso duradero i berdadero satisfakshon.​—Mat. 5:6.

²⁰ Pues, laga nos sigui okupá nos mes ku aktividatnan spiritual pasobra nan ta refreská nos. Ora nos ta hasi esei, nos ta “rechasá maldat i deseonan mundano . . . miéntras ku nos ta warda riba e speransa felis i manifestashon glorioso di e gran Dios i di nos Salbador, Kristu Hesus.” (Tito 2:​12, 13, NW) P’esei, laga nos ta determiná pa keda bou di e yugo di Hesus, sometiendo nos mes na su outoridat i direkshon. Di e manera ei, nos lo haña berdadero felisidat i refreskamentu!

[Nota]

Kon Lo Bo Kontestá?

• Kon Yehova su pueblo ta haña refreskamentu awe?

• Den ki sentido e trabou di prediká ta refreská nos i esnan ku nos ta papia kuné?

• Kiko kabesnan di famia por hasi pa nan adorashon komo famia ta plasentero i edifikante?

• Kiko por bira un karga pa nos i daña nos relashon ku Yehova?

[Preguntanan di Estudio]

[Plachi na página 31]

Ora nos tuma e yugo di Hesus, nos ta ser refreská den vários manera