Buska Siguridat den e Pueblo di Dios
Buska Siguridat den e Pueblo di Dios
“Lo mi duna bo gradisimentu den e kongregashon grandi.”—SAL. 35:18.
1-3. (a) Kiko por pone algun kristian su relashon ku Yehova na peliger? (b) Unda e pueblo di Dios por haña protekshon?
NA UN okashon ku Joe i su kasá tabata snòrkel durante nan fakansi, nan a mira un ref di koral tropikal ku tabata yen di piská di tur koló i tamaño. Pa atmirá e ref, nan a landa bai un tiki mas leu. Ora nan a yega kaminda e laman tabata mas hundu, Joe su kasá a bisa: “Mi ke sa ku nos ta bayendo muchu leu.” Pero Joe a kontest’é: “Keda trankil, mi sa kiko mi ta hasi.” Joe a konta ku djis despues di esei, el a puntra su mes: ‘Unda tur e piskánan a bai?’ Ku horor el a mira dikon e piskánan a disparsé. For di profundidat di laman, un tribon tabata bini stret riba dje. E no por a hasi nada! Pero afortunadamente, ora e tribon tabata djis un meter asina for di dje, el a bira bai.
2 Di mes manera, e atrakshonnan di e sistema di kos di Satanas, manera entretenimentu, trabou i kosnan material por distraí un kristian asina tantu ku e no ta realisá ku e ta bayendo den awanan peligroso di e mundu. Joe, kende ta un ansiano den kongregashon, a bisa: “Mi eksperensia a laga mi pensa riba e personanan ku nos ta asosiá kuné. Laga nos landa kaminda ta safe i agradabel—den e kongregashon!” No landa den awa profundo di e mundu, pasobra bo ta isolá bo mes for di e kongregashon i pone bo bida na peliger. Si un dia bo haña bo den un situashon asina, bira mesora i bai den ‘awa ku ta safe,’ esta, e kongregashon. Si bo no hasi esei, bo ta pone bo relashon ku Yehova na peliger.
3 Awe, e mundu ta un peliger pa kristiannan. (2 Tim. 3:1-5) I Satanas sa ku su dianan ta kontá. P’esei, e ta desididu pa devorá tur hende ku no ta alerta. (1 Ped. 5:8; Rev. 12:12, 17) Pero danki na Yehova, nos no ta indefenso. El a duna nos un refugio—e kongregashon kristian—kaminda nos por haña yudansa pa protehá nos relashon kuné.
4, 5. Kon hopi hende ta mira nan futuro, i dikon?
4 E grado di siguridat físiko òf emoshonal ku sosiedat ta ofresé ta limitá. Hopi hende ta sinti ku krímen, violensia, kosto di bida haltu i asta asuntunan relashoná ku medio ambiente ta pone nan siguridat na peliger. Ademas, nos tur ta haña nos ku e problemanan ku malesa i behes ta trese kuné. I hende ku tin trabou, kas, sufisiente plaka i un grado rasonabel di salú kisas ta puntra nan mes kuantu tempu esakinan lo dura.
5 Hopi hende tin problema tambe pa haña siguridat emoshonal. Sí, lamentablemente, hopi hende ku a spera di haña pas i satisfakshon den matrimonio i den famia a keda desilushoná. Pa loke ta trata siguridat spiritual, hopi baidó di misa ta konfundí i desorientá. Nan tin duda den e guia ku nan ta risibí for di nan lidernan religioso, spesialmente ora nan konsiderá e kondukta kuestionabel i siñansanan no-bíbliko ku e lidernan akí ta promové. P’esei, hopi hende ta pensa ku no ta keda nan nada otro ku pone nan konfiansa den siensia òf e supuesto bondat i sano huisio di nan próhimo. Pues, no ta straño ku hende rònt di nos ta sinti nan masha insigur òf simplemente ta preferá di no pensa mashá tokante nan futuro.
6, 7. (a) Dikon sirbidónan di Dios tin un aktitut diferente for di otro hende? (b) Kiko nos lo konsiderá?
6 Miembronan di e kongregashon kristian tin un aktitut kompletamente diferente for di otro hende. Apesar ku nos ta haña nos konfrontá ku mayoria di e kuestion- i problemanan ku nan ta haña nan kuné, nos ta reakshoná henteramente otro. (Lesa Isaias 65:13 i 14; Malakias 3:18.) Dikon? Pasobra Beibel ta duna nos un splikashon satisfaktorio di e situashon ku humanidat ta aden i ta ekipá nos pa trata ku desafio- i problemanan di bida. Esei ta pone ku nos no ta demasiado preokupá ku futuro. Ademas, e echo ku nos ta adoradó di Yehova ta protehá nos di práktikanan inmoral i nan konsekuensia i tambe di rasonamentu insaludabel i no-bíbliko. P’esei, miembronan di e kongregashon kristian ta disfrutá di un trankilidat ku otro hende no tin.—Isa. 48:17, 18; Fil. 4:6, 7.
7 Pues, ta bon pa konsiderá algun ehèmpel ku por yuda nos meditá riba e siguridat ku solamente sirbidónan di Yehova ta disfrutá di dje. E ehèmpelnan akí lo por motivá nos pa analisá nos manera di pensa i nos kondukta. Asina nos por mira unda pa mehorá den e manera ku nos ta apliká Dios su konsehonan, ya ku nan ta pa nos protekshon.—Isa. 30:21.
“Mi Pia A Hera di Trompeká”
8. Kiko sirbidónan di Yehova mester a hasi semper?
8 Hende ku a skohe pa sirbi i obedesé Yehova semper a hasi esfuerso pa evitá di asosiá estrechamente ku otronan ku no ta ador’é. De echo, Yehova mes a profetisá ku lo tin enemistat entre su adoradónan i e siguidónan di Satanas. (Gén. 3:15) Debí ku e pueblo di Dios ta para firme i ta sigui prinsipionan bíbliko, nan ta aktua diferente for di otro hende. (Juan 17:15, 16; 1 Juan 2:15-17) Pero no ta tur biaha ta fásil pa hasi esei. P’esei, tabatin sirbidó di Yehova ku a yega di duda si ta sabí pa hiba un bida di sakrifisio propio.
9. Ki preokupashon e eskritor di Salmo 73 tabatin?
9 Un sirbidó di Yehova ku a kuminsá duda si el a tuma e desishon korekto ta e eskritor di Salmo 73, kende probablemente tabata un desendiente di Asaf. E salmista no por a komprondé dikon hopi bes ta parse ku malbadonan ta eksitoso, felis i próspero, miéntras ku algun hende ku ta hasi esfuerso pa sirbi Dios ta haña nan ku prueba i problema.—Lesa Salmo 73:1-13.
10. Dikon e asuntu ku e salmista a trese padilanti ta importante pa bo?
10 Abo a yega di tin duda meskos ku e salmista? Si esei ta e kaso, bo no tin nodi di sinti bo demasiado kulpabel ni pensa ku bo ta pèrdiendo bo fe. De echo, vários sirbidó di Yehova, inkluso algun ku el a usa pa skirbi Beibel, tabatin pensamentunan similar. (Jòb 21:7-13; Sal. 37:1; Jer. 12:1; Hab. 1:1-4, 13) Sí, ta komo si fuera nan a puntra nan mes: ‘Sirbi i obedesé Yehova ta e mihó kos ku hende por hasi?’ Tur hende ku ke sirbi Yehova tin ku pensa seriamente riba e pregunta akí i aseptá su kontesta, pasobra e tin di haber ku e kuestion di soberania universal ku Satanas a lanta den hòfi di Edén. (Gén. 3:4, 5) P’esei, ta bon pa nos tur konsiderá e asuntu ku e salmista a trese padilanti. Nos mester envidiá e malbadonan, kendenan ta parse di tin un bida sin niun problema? Nos mester “trompeká,” esta, stòp di sirbi Yehova, i imitá nan? Ta klaru ku esei ta nèt loke Satanas ke.
11, 12. (a) Kon e salmista a vense su dudanan, i kiko esaki ta siña nos? (b) Kiko ta yuda abo yega na e mesun konklushon ku e salmista?
11 Kiko a yuda e salmista vense su dudanan? Ounke el a atmití ku el a hera di desviá for di e kaminda di hustisia, su punto di bista a kambia ora el a drenta “e santuario di Dios,” esta, e tabernakel òf tèmpel di Dios. Einan, e por a meditá riba Dios su propósito i asosiá ku otro hende ku tabata pone adorashon di Dios na promé lugá den nan bida. Esei a yud’é realisá ku e no ke tin e mesun fin ku e malbadonan. Sí, e por a mira ku nan estilo di bida i nan desishonnan a pone nan den “lugánan ku ta slep.” E salmista a komprondé bon kla ku tur hende ku bandoná Yehova siguramente lo haña nan fin den “teror,” esta, den un kalamidat ku lo bini diripiente riba nan. En kambio, esnan ku ta sirbi Yehova lo risibí su yudansa. (Lesa Salmo 73:16-19, 27 i 28.) Sin duda, abo tambe a mira ku esei ta bèrdat. Sí, hopi hende gusta biba manera nan mes ke sin tene kuenta ku e leinan di Dios. Pero, nan no por evitá e mal konsekuensianan di e estilo di bida ei.—Gal. 6:7-9.
12 Kiko mas nos por siña for di e eksperensia di e salmista? Ora el a bai na e lugá kaminda hende tabata adorá Yehova, el a kuminsá pensa na un manera kla i lógiko. Pues, el a haña siguridat i sabiduria den e pueblo di Dios. Awe, nos tambe por haña konseheronan sabí i disfrutá di alimento spiritual saludabel na reunionnan di kongregashon. P’esei, ta ku bon motibu Yehova ta manda su sirbidónan asistí na reunionnan kristian; einan, nan ta haña animashon i estímulo pa aktua sabiamente.—Isa. 32:1, 2; Heb. 10:24, 25.
Skohe Bo Amigunan Sabiamente
13-15. (a) Kiko a pasa ku Dina, i kiko su eksperensia ta siña nos? (b) Dikon amistat ku kompañeronan kristian ta un protekshon?
13 Dina, yu muhé di Jakòb, ta un ehèmpel di un persona ku a hañ’é den problema serio debí ku e tabatin amistat ku hende ku no tabata adorá Yehova. E relato di Génesis ta bisa ku Dina tabatin kustumber di bai serka e muhénan hóben kananeo den e área kaminda su famia tabata biba. Sinembargo, e kananeonan no tabatin e mesun normanan moral haltu ku adoradónan di Yehova. Al kontrario, loke arkeólogonan a haña ta indiká ku nan estilo di bida a saturá nan pais ku idolatria, inmoralidat, violensia i adorashon di sèks. (Eks. 23:23; Lev. 18:2-25; Deu. 18:9-12) Bo ta kòrda kiko tabata e resultado di Dina su amistat ku e hendenan akí?
14 Sikem, un kananeo, deskribí komo “esun di mas respetá di henter e kas di su tata,” a mira Dina, ‘a tum’é, drumi kuné i viol’é.’ (Gén. 34:1, 2, 19) Ki un suseso lamentabel! Bo ta kere ku Dina lo a pensa ku un kos asina lo por a pasa kuné? Podisé el a pensa ku e hóbennan di Kánaan ta inofensivo, i e kier a djis sera amistat ku nan. Sinembargo, manera nos a mira, Dina tabata mal ekiboká.
15 Awor, kiko e relato akí ta siña nos? Nos no por tin amistat ku hende ku no ta Testigu i ferwagt ku esaki lo no tin mal konsekuensia. E Skritura ta bisa ku “mal kompania ta daña bon kustumber.” (1 Kor. 15:33) Di otro banda, bo amigunan por ta un protekshon pa bo. Pero, pa esei por ta asina, nan mester tin e mesun kreensianan ku bo, e mesun normanan moral haltu i nan tambe mester stima Yehova. Ta amigunan asina lo animá bo pa aktua ku sabiduria.—Pro. 13:20.
“Boso A Wòrdu Labá”
16. Kiko apòstel Pablo a bisa di algun kristian den e kongregashon di Korinto?
16 E kongregashon kristian a yuda hopi hende stòp ku práktikanan impuru. Ora apòstel Pablo a skirbi su promé karta na e kongregashon di Korinto, el a papia di e kambionan ku algun kristian einan a hasi pa armonisá nan bida ku e normanan di Dios. Promé ku esei, algun di nan tabata, entre otro, fornikadó, adoradó di dios falsu, adúltero, homoseksual, ladron i buraché. Pero, Pablo a bisa nan: “Ma boso a wòrdu labá.”—Lesa 1 Korintionan 6:9-11.
17. Kon aplikashon di prinsipionan bíbliko a kambia bida di hopi hende?
17 Hende ku no tin fe no tin prinsipionan sano pa guia nan. Nan ta establesé nan mes normanan òf nan ta djis sigui e estilo di bida inmoral ku tin rònt di nan meskos ku algun di e korintionan tabata hasi promé ku nan a bira kristian. (Efe. 4:14) Sinembargo, konosementu eksakto di e Palabra di Dios i Su propósito tin e poder di transformá hende. Sí, tur persona ku ta apliká loke e Skritura ta bisa lo tin un mihó bida. (Kol. 3:5-10; Heb. 4:12) Hopi hende ku awe ta miembro di e kongregashon kristian por konta bo ku promé ku nan a siña i apliká e normanan hustu di Yehova, nan tabata hiba un bida sin ningun restrikshon moral. Pero, e bida ei no a duna nan felisidat ni satisfakshon. Ta te ora nan a kuminsá asosiá ku e pueblo di Dios i biba na armonia ku e prinsipionan di Beibel, nan a haña pas.
18. Ki eksperensia un hóben tabatin, i kiko esei ta proba?
18 Na kontraste ku personanan ku a hasi kambio, tin algun ku den pasado a disidí di bandoná ‘e awa safe’ di e kongregashon kristian. I awe, nan ta lamentá esei amargamente. Un ruman muhé, ku nos lo yama Tanya, ta splika ku el a “lanta den ambiente di e bèrdat,” pero ora e tabatin 16 aña di edat, el a bandoná e kongregashon pa “sigui tras di atrakshonnan ku e mundu ta ofresé.” Kiko tabata e resultado? Entre otro, un embaraso ku e no a deseá i un aborto. Awor e ta bisa: “E tres añanan ku mi a pasa pafó di e kongregashon a laga mi ku heridanan emoshonal ku nunka lo kura. Algu ku semper ta keda molestiá mi ta e echo ku mi a mata mi yu. . . . Mi ke bisa tur hóben ku ke ‘purba’ maske ta un tiki so di e mundu: ‘Por fabor, no hasié!’ Kisas na promé instante, e ta parse dushi, pero despues e ta laga un smak bastante amargo atras. E úniko kos ku e mundu tin di ofresé ta sufrimentu, nada mas. Mi sa esei di eksperensia. Keda den e organisashon di Yehova! Esei ta e úniko manera ku bo por haña felisidat.”
19, 20. Ki protekshon e kongregashon kristian ta ofresé, i kon nos por disfrutá di esaki?
19 Djis pensa kon lo bai ku bo si bo bandoná e ambiente protektivo di e kongregashon kristian. Hopi ruman no ke ni pensa esei ora nan kòrda riba e estilo di bida bano ku nan tabatin promé ku nan a aseptá e bèrdat. (Juan 6:68, 69) Pero pa por sigui disfrutá di siguridat i protekshon, bo tin ku keda den estrecho kompania di bo rumannan kristian. I asina lo bo evitá tur doló i sufrimentu ku ta komun den e mundu di Satanas. Amistat ku e rumannan i asistensia regular na e reunionnan di kongregashon lo yuda bo keda kòrda e sabiduria tras di e normanan hustu di Yehova i a la bes animá bo pa biba na armonia ku nan. Sí, bo tin tur motibu pa alabá òf ‘gradisí Yehova den e kongregashon grandi,’ meskos ku e salmista a hasi.—Sal. 35:18.
20 Klaru ku tur kristian, pa un òf otro motibu, sa haña nan den un situashon den kua por parse difísil pa keda fiel. Den un kaso asina, kisas nan tin mester di djis un persona pa mustra nan e kaminda korekto. Kiko abo—i sin duda e restu di e kongregashon—por hasi pa yuda un kompañero di fe den un situashon asina? E siguiente artíkulo lo analisá kon abo por sigui ‘enkurashá i edifiká’ bo rumannan.—1 Tes. 5:11.
Kon Lo Bo Kontestá?
• Kiko nos por siña for di e eksperensia di e eskritor di Salmo 73?
• Kiko e eksperensia di Dina ta siña nos?
• Dikon bo por haña siguridat den e kongregashon kristian?
[Preguntanan di Estudio]
[Plachinan na página 11]
Landa kaminda ta safe; keda den e kongregashon!
