Nos Konsepto di Piká A Kambia?

NO MUCHU tempu pasá, baidónan di misa regularmente tabata tende nan pastor ekspresá ku bos fuerte for di prekstul su desaprobashon relashoná ku kosnan ku ta kai bou di e pikánan mortal, esta, pashon, golosidat, kudishi, flohedat, rabia, envidia i orguyo. Mayoria di biaha, e pastor tabata deskribí e konsekuensianan teribel di piká i tabata urgi su oyentenan pa arepentí. Un eskritor a bisa: “Awor, pastornan ta opta pa no papia riba tópikonan ku ta pone e oyentenan sinti inkómodo. En bes di esei nan ta enfoká riba temanan ku ta laga e oyentenan sinti bon.”

Periodistanan tambe a tuma nota di e tendensia ei. Ban konsiderá algun komentario di prensa:

▪ “Términonan manera piká, repentimentu i redenshon a bai for di moda i awor sermonnan trankilisante tokante kon pa edifiká balor i amor propio ta na moda.”​—Star Beacon, Ashtabula, Ohio.

▪ “Ta parse ku kasi hende no ta preokupá mas ku e seriedat di piká.”​—Newsweek.

▪ “Nos no ta puntra mas ‘Kiko Dios ta rekerí di mi,’ sino mas bien, ‘Kiko Dios por hasi pa mi?’”​—Chicago Sun-Times.

Den e sosiedat mesklá i tolerante di awe ta reina un miedu di husga otro den asuntunan ku ta toka moralidat, ya ku hende no ta konsiderá esei komo algu nèchi. Segun nan e piká di mas grandi ku un hende por hasi ta di husga otro hende. Pues, ku otro palabra: ‘Bo punto di bista por ta bon pa abo, pero bo no mester imponé bo punto di bista riba niun otro hende. Aktualmente, kada hende tin su propio norma- i balornan. Bo no ta e úniko hende ku sa kiko ta bon. Norma i balor di otro hende tambe ta bon.’

E manera di rasoná akí a kambia hende su vokabulario. Awendia kasi hende no ta mira “piká” komo algu grave. Hende no ta papia mas di “hiba un bida di piká” sino di “biba huntu.” Nan no ta papia mas di “kòrtamentu di orea” sino di “afèr.” En bes di papia di “homoseksual” nan ta papia di “preferensia seksual diferente.”

No tin duda, loke hende ta dispuesto pa aseptá komo “normal” òf kondená komo “piká” a kambia. Pero dikon punto di bista di hende a kambia? Kiko a pasa ku piká? I loke bo ta pensa realmente ta importá?