Partisipá Plenamente den e Gran Kosecha Spiritual

‘Abundá den e trabou di Señor.’​—1 KOR. 15:58.

1. Ki invitashon Hesus a ekstendé na su disipelnan?

ORA Hesus tabata pasa dor di e region di Samaria na kabamentu di aña 30 di nos era, el a sosegá un ratu na un pos pegá ku e stat Sikar. Einan el a bisa su disipelnan: “Hisa boso kara wak i mira e kunukunan, pasobra nan ta blanku pa wòrdu kosechá.” (Juan 4:35) Hesus no tabata referí akinan na un kosecha literal, sino na un rekohementu spiritual di hende di bon kurason ku lo a bira su siguidónan. Bon mirá, el a invitá su disipelnan pa nan pone man na obra. Tabatin hopi trabou pa hasi, anto poko tempu!

2, 3. (a) Kiko ta indiká ku nos ta biba den e tempu di kosecha? (b) Kiko nos lo konsiderá den e artíkulo akí?

² E palabranan di Hesus tokante un kosecha tin un nifikashon spesial pa nos, ya ku nos ta biba den un tempu ku e kunuku mundial di humanidat ta hechu, òf ‘blanku pa ser kosechá.’ Tur aña, miónes di hende ta haña e invitashon pa siña e bèrdatnan di Beibel ku ta duna bida, i míles di disipel nobo ta aseptá e invitashon akí i ta ser batisá. Nos tin e privilegio di partisipá den e kosecha di mas grandi den historia, bou di supervishon di e Doño di e kosecha, nos Dios Yehova. Abo ta ‘abundá,’ es desir, partisipá plenamente, den e kosecha akí?​—1 Kor. 15:58.

³ Durante Hesus su ministerio di tres aña i mei aki riba tera, el a prepará su disipelnan pa nan por a kumpli ku nan papel den e trabou di kosecha. Den e artíkulo akí nos lo konsiderá tres di e vários lèsnan importante ku Hesus a siña nan. Kada lès ta enfatisá un kualidat ku ta di gran balor pa nos den nos esfuersonan pa rekohé disipel nobo den e tempu akí. Laga nos konsiderá e kualidatnan akí un pa un.

Ta Importante pa Ta Humilde

4. Kon Hesus a ilustrá e importansia di ser humilde?

⁴ Imaginá bo e esena: E disipelnan a kaba di diskutí tokante kua di nan tabata mas importante. Probablemente ainda bo por a mira e deskonfiansa i renkor riba nan kara. Di manera ku Hesus a pidi un mucha chikitu bin para meimei di nan. Anto mustrando riba e mucha, e di: “Esun anto ku humiá su mes [òf, ‘ku konsiderá su mes chikí,’ Testament Nobo di Nos Senjor Hesu-Cristo] manera e mucha akí ta esun di mas grandi den e reino di shelu.” (Lesa Mateo 18:​1-4.) En bes di tin e punto di bista di e mundu akí—ku ta midi un hende su balor a base di e poder, rikesa i prominensia ku e tin—e disipelnan mester a komprondé ku nan lo tabata importante solamente si nan a ‘konsiderá nan mes chikí’ den bista di otro hende. Si nan tabata ke pa Yehova bendishoná nan i usa nan, nan mester tabata humilde di kurason.

5, 6. Pakiko nos mester ta humilde pa nos por partisipá plenamente den e trabou di kosecha? Menshoná un ehèmpel.

⁵ Te awe hopi hende den mundu ta pasa henter nan bida ta kore tras di poder, rikesa i prominensia. Komo resultado, kasi nan no tin tempu pa kosnan spiritual. (Mat. 13:22) En kambio, Yehova su sirbidónan sí ta kontentu di por ‘konsiderá nan mes chikí’ den bista di otro hende pa nan por haña e bendishon i aprobashon di e Doño di e kosecha.​—Mat. 6:24; 2 Kor. 11:7; Fil. 3:8.

 ⁶ Tuma por ehèmpel e kaso di Francisco, un ansiano na un pais suramerikano. Tempu e tabata yòn, el a stòp di bai universidat pa bira pionero. El a konta: “Despues, ora mi a kuminsá namorá un ruman muhé pa kasa kuné, mi por a buska un trabou ku lo a duna nos mas siguridat finansiero. Ma nos a disidí di simplifiká nos bida i sigui huntu den e sirbishi di tempu kompletu. Mas despues, nos a haña yu, i kosnan a bira un poko mas difísil. Pero Yehova a yuda nos pega na nos desishon.” Francisco a konkluí: “Mi tin e privilegio di sirbi komo ansiano pa mas ku 30 aña kaba, i mi a risibí hopi otro asignashon spesial di sirbishi. Nunka a duel nos ku nos a hiba un bida simpel.”

7. Kon abo a purba apliká e konseho di Romanonan 12:16?

⁷ Si bo nenga di bai tras di e “kosnan grandi” di e mundu akí i laga e ‘kosnan humilde guia bo,’ bo tambe por spera mas bendishon i privilegio di sirbishi den e trabou di kosecha.​—Rom. 12:16, NW; Efe. 4:2; Mat. 4:​19, 20; Luk. 18:​28-30.

Esfuerso Diligente Ta Duna Bon Resultado

8, 9. (a) Resumí Hesus su komparashon di e talentonan. (b) Pa ken spesialmente e mensahe ku e komparashon akí ta kontené por ta un animashon?

⁸ Un otro kualidat ku nos mester tin pa por partisipá plenamente den e trabou di kosecha ta diligensia, esta, e motivashon pa hasi esfuerso. Hesus a ilustrá esaki den e komparashon di e talentonan. * Tabata trata di un hòmber ku, promé ku el a biaha bai afó, a konfia su pertenensianan na tres esklabo; el a duna nan un suma grandi di plaka ku yama talento. E promé esklabo a risibí sinku talento, e di dos a risibí dos i e di tres a risibí ún. Despues ku nan shon a bai, e promé dos esklabonan a aktua na un manera diligente i mesora a “negoshá” ku nan talentonan. Pero e di tres esklabo a dera su talento den tera, pasobra e tabata “floho.” Ora e hòmber a regresá, el a rekompensá e promé dos esklabonan i a pone nan na enkargo di “hopi kos.” Ma pa loke ta e di tres esklabo, el a kita e talento ku el a dun’é i a kore kuné for di su kas.​—Mat. 25:​14-30.

⁹ Muy probablemente bo ta deseá di ta manera e esklabonan diligente den e komparashon di Hesus i partisipá mas plenamente posibel den e trabou di hasi disipel. Pero kiko si bo sirkunstansianan ta limitá bo den loke bo por hasi aworakí? Kisas e situashon ekonómiko ta obligá bo traha hopi ora pa bo por kria bo famia. Òf podisé bo no tin e energia ni e bon salú mas ku bo tabatin tempu bo tabata yòn. Den tal kaso, e  mensahe ku e komparashon di e talentonan ta kontené por ta un animashon pa bo.

10. Kon e shon den e komparashon a demostrá ku e tabata rasonabel, i dikon esaki ta un animashon pa bo?

¹⁰ Ripará ku e shon den e komparashon a rekonosé ku no ta tur su esklabonan tabatin e mesun potensial, ya ku el a repartí e talentonan na “kada un segun su kapasidat.” (Mat. 25:15) Manera tabata di spera, e promé esklabo a logra muchu mas ganashi ku e di dos. Sinembargo, e shon a balorá e esfuerso diligente di tur e dos esklabonan akí, pasobra el kalifiká nan dos komo “bon i fiel” i a duna nan e mesun rekompensa. (Mat. 25:​21, 23) Meskos tambe, Yehova Dios, e Doño di e kosecha, sa ku bo sirkunstansianan ta determiná kiko bo por hasi den su sirbishi. Lo e apresiá mashá e esfuersonan ku bo ta hasi di henter bo alma pa sirbié i duna bo e debido rekompensa.​—Mar. 14:​3-9; lesa Lukas 21:​1-4.

11. Ilustrá kon esfuerso diligente den sirkunstansianan difísil por resultá den gran bendishon.

¹¹ Tuma por ehèmpel Selmira, un ruman muhé kristian ku ta biba na Brazil. Su kaso ta ilustrá ku bo sirkunstansianan di bida no nesesariamente mester ta faborabel pa bo sirbi Dios na un manera diligente. Binti aña pasá nan a tira su esposo mata den un atrako, i el a keda su so ku tres yu chikitu pa kria. Selmira tabata un kriá di kas ku mester a traha hopi ora pa dia; i uso di transporte públiko pa bai trabou i regresá kas den oranan drùk tabata un kansansio p’e. Apesar di tur esaki, el a organisá su asuntunan pa e por a sirbi komo pionero regular. Despues, dos di su yunan a djòin e den e sirbishi di pionero. El a bisa: “Den transkurso di añanan mi a studia Beibel ku mas di 20 persona, i nan a bira parti di mi ‘famia.’ Te awe mi ta disfrutá di nan kariño i amistat. Esei ta un tesoro ku ni ku tur e plaka di mundu bo no por kumpra.” Sin duda, e Doño di e kosecha a rekompensá Selmira pa su esfuersonan diligente!

12. Kon nos por ta diligente den e trabou di prediká?

¹² Si bo sirkunstansianan aktual ta limitá e tempu ku bo por dediká na sirbishi, tòg lo bo por purba hasi bo partisipashon den e trabou di kosecha mas produktivo. Ora bo ta hasi bo bèst pa apliká e sugerensianan práktiko ku ta ser presentá tur siman den Reunion di Sirbishi, lo bo bira mas kapas pa prediká i lo bo haña formanan nobo pa duna testimonio. (2 Tim. 2:15) Ademas, kisas bo por reprogramá, òf asta sakrifiká, aktividatnan ménos importante pa bo por apoyá e programa di sirbishi di kongregashon riba un base regular.​—Kol. 4:5.

13. Kiko ta e klave pa bira diligente i keda diligente?

¹³ Kòrda ku e motivashon pa hasi esfuerso diligente ta brota di e apresio ku nos ta sinti di kurason. (Sal. 40:8) E di tres esklabo den e komparashon di Hesus tabatin miedu di su shon; el a mira su shon komo un hòmber eksigente i irasonabel. P’esei e esklabo a skonde su talento, en bes di us’é pa oumentá e pertenensianan di su shon. Pa nos no tin un aktitut negligente asina, nos tin ku kultivá i mantené un bon relashon ku Yehova, e Doño di e kosecha. Saka tempu pa bo studia i meditá riba su kualidatnan atraktivo, manera su amor, pasenshi i miserikòrdia. Bo kurason lo motivá bo e ora ei pa hasi bo bèst den su sirbishi.​—Luk. 6:45; Fil. 1:​9-11.

“Boso . . . Sea Santu”

14. Ki rekisito importante hende ku ke partisipá den e kosecha mester kumpli kuné?

¹⁴ Apòstel Pedro a sita for di e Skritura Hebreo ora el a splika kiko ta e boluntat di Dios pa su sirbidónan riba tera, bisando: “Meskos ku Esun Santu ku a yama boso, boso mes tambe sea santu den tur boso kondukta; pasobra ta pará skirbí: ‘Boso lo ta santu, pasobra ami ta santu.’” (1 Ped. 1:​15, 16; Lev. 19:2; Deu. 18:13) E deklarashon akí ta mustra ku hende ku ta partisipá den e kosecha mester ta limpi den sentido moral i spiritual. Pa nos kumpli ku e  rekisito importante ei, nos tin ku dal e pasonan pa, na moda di papia, laba nos kurpa i hasié limpi. Kon nos por hasi esei? Ku yudansa di e bèrdat di e palabra di Dios.

15. Ki efekto e bèrdat di e palabra di Dios por tin riba nos?

¹⁵ Nos por kompará e bèrdat di e palabra di Dios ku awa ku ta purifiká nos. Por ehèmpel, apòstel Pablo a bisa ku e kongregashon di kristian ungí ta limpi den bista di Dios, manera un brùit desente pa Kristu, kende a purifik’é “pa medio di e labamentu di awa ku e palabra . . . , pa é por ta santu i sin kulpa.” (Efe. 5:​25-27) Anteriormente, Hesus tambe a menshoná e poder ku e palabra di Dios tin pa purifiká, refiriendo na e palabra ku e mes a proklamá. Esaki tabata ora el a bisa su disipelnan: “Boso ta limpi kaba pa motibu di e palabra ku mi a papia ku boso.” (Juan 15:3) Pues anto, e bèrdat di e palabra di Dios tin poder pa purifiká nos den sentido moral i spiritual. Si nos ke pa Dios aseptá nos adorashon, nos mester laga e bèrdat di su palabra purifiká nos.

16. Kon nos por keda spiritualmente i moralmente limpi?

¹⁶ Pues, si nos ke partisipá den Dios su trabou di kosecha, nos mester kuminsá ku eliminá tur práktika ku ta moral- i spiritualmente impuru. I si nos ke konserbá e privilegio akí, nos mester mantené un aktitut ehemplar i sigui pega na e normanan moral i spiritual di Yehova. (Lesa 1 Pedro 1:​14-16.) Meskos ku nos ta presta atenshon konstantemente na nos higiena, asina nos mester someté nos mes regularmente na e influensia purifikador di e bèrdat di e palabra di Dios. Esei ta enserá ku nos mester lesa Beibel i asistí na reunionnan kristian. E ta nifiká tambe ku nos ta hasi un esfuerso sinsero pa apliká e rekordatorionan di Dios den nos bida. Esei lo yuda nos lucha kontra nos tendensianan pekaminoso i e mal influensianan di e mundu akí. (Sal. 119:9; Sant. 1:​21-25) Ta un gran konsuelo pa sa ku nos por ser “labá” asta di piká serio ku yudansa di e bèrdat di e palabra di Dios!​—1 Kor. 6:​9-11.

17. Ki konseho di Beibel nos mester sigui pa nos por keda limpi?

¹⁷ Abo ta laga e bèrdat di e palabra di Dios sigui purifiká bo bida? Bo ta permití esei di buena gana? Por ehèmpel, kon bo ta reakshoná ora spièrta bo di e peligernan di e entretenimentu insaludabel di e mundu akí? (Sal. 101:3) Bo ta evitá di anda innesesariamente ku kompañeronan di skol i ku koleganan di trabou ku no tin e mesun kreensianan ku bo? (1 Kor. 15:33) Bo ta hasiendo esfuerso sinsero pa vense debilidatnan personal ku por hasi bo impuru den bista di Yehova? (Kol. 3:5) Bo ta keda leu for di e konfliktonan polítiko di e mundu akí i e nashonalismo ku ta reina den hopi kompetensia deportivo?​—Sant. 4:4.

18. Kon nos limpiesa moral i spiritual ta yuda nos bira produktivo den e trabou di kosecha?

¹⁸ Si bo ta fiel i obediente den e asuntunan ei, lo bo haña bon resultado. Hesus a kompará su disipelnan ungí ku rama di un palu di wendrùif i a bisa: “Tur rama den mi ku no ta karga fruta, [mi Tata] ta kita, i tur rama ku ta karga fruta, e ta snui, pa esaki duna mas fruta.” (Juan 15:2) Si bo someté bo mes na e awa purifikador di e bèrdat di Beibel, lo bo produsí asta mas fruta ainda.

Bendishon Awor i den Futuro

19. Ki bendishon e disipelnan di Hesus a risibí pa nan esfuersonan den e trabou di kosecha?

¹⁹ Na Pentekòste di aña 33, e disipelnan fiel, ku a benefisiá di e entrenamentu ku Hesus a  duna nan, a risibí spiritu santu. Ku poder di spiritu santu nan a duna testimonio “te na e parti mas alehá di mundu.” (Echo. 1:8) Ku tempu, nan a sirbi komo miembro di e kuerpo gobernante, komo misionero i superintendente biahero, i nan a desempeñá un papel importante den predikashon di e bon notisia “den henter kreashon bou di shelu.” (Kol. 1:23) Nan a risibí hopi bendishon, i nan labor a resultá den alegria pa otro hende!

20. (a) Ki bendishon bo a risibí pasobra bo ta partisipá plenamente den e kosecha spiritual? (b) Kiko bo ta determiná pa hasi?

²⁰ Si nos tambe ta humilde i diligente, i ta pega na e normanan haltu di e Palabra di Dios, nos lo por sigui partisipá plenamente i na un manera produktivo den e gran kosecha spiritual ku ta tumando lugá awor. Miéntras ku hopi hende ta sufri di e angustia i frustrashon ku e mundu materialista i opseshoná ku plaser akí ta trese kuné, nos ta haña berdadero goso i satisfakshon. (Sal. 126:6) I mas importante ainda, nos sa ku nos ‘trabou den Señor no ta enbano.’ (1 Kor. 15:58) Yehova Dios, e Doño di e kosecha, lo duna nos un rekompensa eterno pa ‘nos trabou i pa e amor ku nos a mustra pa su nòmber.’​—Heb. 6:​10-12.

[Nota]

Bo Ta Kòrda?

Den bo esfuersonan pa partisipá plenamente den e trabou di kosecha . . .

• pakiko ta esensial pa bo ta humilde?

• kon bo por bira diligente i keda diligente?

• pakiko ta importante pa keda moral- i spiritualmente limpi?

[Preguntanan di Estudio]

[Plachi na página 21]

Humildat por yuda nos hiba un bida simpel ku ta konsentrá riba interesnan di Reino