Un Invitashon pa Tur Hende!

UN INVITASHON pa hasi kiko? Pa bishitá un di e sukursalnan di Testigunan di Yehova, mihó konosí komo Bètel. Tin 118 sukursal situá den vários pais. Hopi biaha bishitantenan ta ekspresá nan apresio sinsero pa loke nan ta mira ta sosodé na Bètel.

Despues ku un studiante hóben di Beibel a mira hopi trahadó diligente ta sirbi Yehova felismente na e sukursal di México, el a keda asina impreshoná ku el a puntra: “Kiko mi tin ku hasi pa mi keda akinan?” Nan di kuné: “Promé, bo tin ku batisá. Despues, ta bon si bo por sirbi komo pionero, esta, komo un predikadó di Reino di tempu kompletu.” E yònkuman a hasi loke nan a rekomend’é, i dos aña despues el a haña e invitashon pa sirbi na Bètel di México, i te awe, 20 aña despues, e ta sirbi einan.

Kiko Ta Bètel?

Na idioma hebreo, “Bètel” ta nifiká “Kas di Dios.” (Gén. 28:​17, 19; nota BPK) Ta usa e fasilidatnan di vários sukursal pa print i distribuí Beibel i literatura bíbliko i pa duna sosten spiritual na mas ku 100.000 kongregashon di Testigunan di Yehova rònt mundu. Tin kasi 20.000 trahadó di Bètel—hende hòmber i muhé di vários background sosial i kultural—kendenan sin ningun interes personal ta sirbi Yehova i nan rumannan spiritual tempu kompletu. Rumannan ku tin hopi aña ta hasi e trabou kristian akí ta sirbi huntu ku hóbennan yen di energia. Parti anochi i den fin di siman, miembronan di e famia di Bètel ta gusta asosiá ku e kongregashonnan di Testigunan di Yehova den nan bisindario, sea na reunion òf den e ministerio kristian. Tambe nan ta usa nan tempu liber pa studia Beibel, pa rekreá i pa atendé asuntunan personal.

Miembronan di e famia di Bètel ta risibí un kompensashon finansiero chikitu tur luna. Nan ta disfrutá di kuminda sabroso i nutritivo, i nan lugá di biba ta limpi i kómodo. Kasnan di Bètel no ta diseñá pa ta manera hotèlnan luhoso. Ma nan ta práktiko. Bishitantenan ta keda impreshoná, no solamente ku e edifisio- i terenonan bon mantené i e trabou bon organisá, sino tambe ku e aktitut bondadoso i e kooperashon ku ta reina na Bètel. Tur hende ta traha diligentemente, ma ningun no ta muchu okupá pa ta amabel. E asignashon ku un hende tin na Bètel no ta krea distinshon sosial ni sintimentu di superioridat, pasobra tur asignashon ta importante,  sea ku ta trabou den limpiesa, hardin, kushina, drùkerei òf ofisina. Bètelitanan, manera ta yama esnan den sirbishi di Bètel, ta traha huntu komo tim pa apoyá e ministerio di Testigunan di Yehova.​—Kol. 3:23.

Sera Konosí ku Algun Bètelita

Laga nos siña un poko mas di e famia internashonal akí. Kiko a motivá nan pa sirbi na Bètel? Tuma por ehèmpel Mario. Tempu ku el a bira Testigu di Yehova, e tabata traha na un kompania di outo aleman prestigioso ku tabata paga bon i kaminda e tabatin bon posibilidat di bai dilanti. Djis despues di su boutismo, el a ofresé pa traha un siman komo boluntario na e Bètel di su pais. Nan a pon’é traha den e drùkerei. Mario por a mira un diferensia masha grandi entre su koleganan na Bètel i esnan di su trabou seglar. Pues, el a yena un solisitut pa sirbi tempu kompletu na Bètel. I awor e ta sirbi felis di dje na Bètel di Alemania, apesar ku hopi di su famia- i koleganan no por a komprondé su desishon pa hasi esei.

Hopi ruman ta drenta sirbishi di Bètel sin ningun abilidat òf edukashon spesial. Esei ta e kaso di Abel, kende tin 15 aña ta sirbi na Bètel di México. El a konta: “Di bèrdat Bètel tabata manera un skol pa mi. Mi a siña manehá mashinnan di drùk masha sofistiká. Mi sa ku mi por gana masha plaka ku e konosementu akí pafó di Bètel, pero lo mi no tin loke mi ta disfrutá di dje akinan: un bida trankil i yen di satisfakshon, sin e preokupashon i spiritu di kompetensia ku bo ta haña na hopi empresa komersial. Mi ta sinti ku mi a haña e mihó edukashon ku tin, unu ku a yuda mi desaroyá tantu den sentido spiritual komo intelektual. Lo mi no por a haña e benefisionan spiritual akí ni na e mihó universidat ku tin.”

Un Bishita na Bètel Por Ta Masha Probechoso

Un bishita na Bètel so kaba por tin un efekto positivo riba e spiritualidat di un persona. Esaki tabata e kaso ku Omar, na México. Su mama a siñ’é e bèrdatnan di Beibel. Pero tempu Omar tabatin 17 aña, el a stòp di bai e  reunionnan kristian i di partisipá den e trabou di prediká. Ku tempu, el hañ’é ku vários bisio i enbolbí den un estilo di bida materialista. Mas despues, ora e tabata traha pa un kompania di komunikashon, el a bishitá Bètel komo parti di un delegashon ku a bin duna demostrashon di algun mashin. Omar a komentá: “Despues di nos demostrashon, nos anfitrion a duna nos un tour di e lugá. Loke mi a mira, i e trato ku mi a haña, a pone mi reflekshoná riba e bida ku mi tabata hiba, un bida alehá for di Yehova. Mesora mi a kuminsá bai reunion atrobe i studia Beibel. Seis luna despues di mi bishita na Bètel, mi a batisá. Mi ta gradisí Yehova pa e motivashon ku mi bishita na Bètel a duna mi.”

Masahiko, na Hapon, tambe a lanta den un famia Testigu di Yehova. Ma el a kuminsá haña e biba kristian muchu restriktivo i a bai okupá su mes ku aktividatnan di skol. El a stòp di bai reunion i di partisipá den e trabou di prediká. Masahiko ta kòrda: “Un dia, nos famia i algun amigu kristian a disidí di bai hasi un tour na Bètel. Komo ku mi famia a insistí, mi a disidí di bai huntu ku nan. Durante e tour na Bètel, mi a sinti mi mas animá ku nunka. Mi a pasa masha dushi mes huntu ku e rumannan kristian durante e biahe ei; nunka mi no a sinti mi asina huntu ku mi amigunan ku no tabata Testigu di Yehova. Mi a haña e deseo di sigui e bida kristian, i mi a disidí di pidi un estudio di Beibel.” Awor Masahiko ta sirbi komo un predikadó di tempu kompletu den su kongregashon.

Un Testigu di Yehova di Fransia a bai biba na Moskú pa trabou. Einan el a pèrdè kontakto ku e pueblo di Yehova i a bira spiritualmente débil. El a kai den piká i ku tempu a kasa ku un hòmber ku no ta Testigu. Un dia, un ruman muhé di su kongregashon na Fransia a bin bishit’é, i huntu nan a bai St. Petersburg, Rusia, pa bishitá e kas di Bètel ku tin einan. E Testigu ta konta: “Na Bètel, nan a risibí nos kalurosamente, i esei a konmové mi. Tabata reina asina un pas. Mi por a sinti e spiritu di Yehova einan. Kon mi por a kometé e fayo di drif bai for di e organisashon di Yehova? Despues ku mi a bishitá Bètel, mi a pidi Yehova yuda mi i ku mas determinashon mi a kuminsá siña mi yunan tokante Beibel.” Pues, su bishita na Bètel, huntu ku otro yudansa spiritual ku el a risibí, a fortales’é mashá, i despues di esei el a hasi bon progreso.

Ki impreshon un bishita na Bètel por hasi riba hende ku no konosé Testigunan di Yehova bon? Na aña 1988, Alberto, kende tabata masha metí den polítika, a bishitá e Bètel di Brazil. E limpiesa di e lugá, e manera ordená—i spesialmente e manera habrí—ku e aktividatnan tabata tuma lugá a hasi un gran impreshon riba dje. Djis promé ku Alberto a hasi e tour na Bètel, el a bishitá e seminario kaminda su sua tabata sirbi komo pastor. Alberto a ripará e kontraste. E di: “Tur kos den e seminario tabata sosodé na sekreto.” Poko despues di su bishita na Bètel, el a aseptá un estudio di Beibel i a bandoná polítika. Awe e ta sirbi komo ansiano di kongregashon.

Bin Bishitá Bètel!

Hopi ruman ta hasi esfuerso ekstraordinario pa bishita e sukursal di nan pais. Por ehèmpel, na Brazil, Paulo ku Eugenia a spar kuater aña largu pa nan por a paga e biahe pa mira e fasilidatnan di Bètel di e pais ei. Nan a biaha 3.000 kilometer ku konvoi durante dos dia. Despues nan a bisa: “Tabata bale la pena. Awor nos tin un punto di bista mas kompletu di e organisashon di Yehova. Ora nos ta splika nos studiantenan di Beibel tokante e trabou ku ta tuma lugá na Bètel, nan sa puntra nos: ‘Boso a yega di bai einan?’ Awor nos por bisa nan ku sí!”

Tin un sukursal i kas di Bètel den bo pais òf den un pais bisiña? Nos ta invitá bo pa bishitá e lugá. Lo bo risibí un kaluroso bonbiní i lo saka gran benefisio spiritual di bo bishita na Bètel.

[Plachi na página 11]

Mario

[Plachi na página 11]

Abel

[Plachi na página 11]

Alemania

[Plachi na página 11]

Hapon

[Plachi na página 11]

Brazil