Un Kambio Teológiko Drástiko

Pa mayoria di katóliko ku ta bai misa e idea di Limbo no ta muchu kla. Den dékadanan resiente gradualmente el a disparsé for di katisashi. Na 2007, Iglesia Katóliko ofisialmente a firma e “akta di fayesimentu” di Limbo. Nan a hasi esei den un dokumento ku ta menshoná “motibunan teológiko i litúrgiko pa karga speransa ku mucha chikí ku muri sin batisá lo por haña salbashon i felisidat eterno.”​—Komishon Internashonal di Teologia.

Dikon nan a hasi e kambio drástiko akí? Básikamente, esei a yuda iglesia libra for di loke e kolumnista franses Henri Tincq a yama “un herensia pisá ku un Iglesia manipulativo a respaldá for di Edat Medio te den siglo 20, i tabata kla pa usa pa preshoná mayornan pa batisá nan yunan mas pronto posibel.” Pero e echo ku e siñansa di Limbo a disparsé ta lanta otro kuestionnan.

Basá Riba Tradishon òf e Palabra di Dios? Segun historia, kreensia den Limbo ta resultado di debatenan teológiko relashoná ku purgatorio ku a tuma lugá den siglo 12. Iglesia Katóliko a siña ku ora un hende muri su alma ta sigui biba i esei a pone ku nan mester a buska un manera pa splika kiko ta sosodé ku alma di mucha chikitu ku no por a bai shelu debí ku nan no a batisá pero ku tòg no a meresé di bai fièrnu. Ta asina e idea di Limbo a nase.

Sinembargo, Beibel no ta siña ku ora un hende muri su alma ta sigui biba. Mas bien, e ta bisa bon kla ku e alma por “wòrdu destruí” i “lo muri.” (Echonan 3:23; Ezekiel 18:4) Siendo ku alma ta muri, ta imposibel ku Limbo ta eksistí. Es mas, Beibel ta kompará morto ku soño, ya ku den tur dos kaso e hende ta inkonsiente.​—Eklesiastés 9:​5, 10; Juan 11:​11-14.

Beibel ta indiká ku Dios ta konsiderá yu chikitu di mayornan kristian komo santu. (1 Korintionan 7:14) Esei lo ta ilógiko si boutismo di mucha chikitu tabata nesesario pa nan haña salbashon.

En realidat e siñansa di Limbo ta un insulto pa Dios. En bes di pint’é manera e realmente ta, esta, un Tata hustu i amoroso, e ta pint’é komo un tirano kruel ku ta kastigá hende inosente. (Deuteronomio 32:4; Mateo 5:45; 1 Juan 4:8) No ta nada straño anto ku e siñansa akí ku no ta basá riba Beibel nunka a zona lógiko pa kristiannan sinsero!