Adorashon Berdadero Ta Uni Hende

“Lo mi trese nan huntu manera karné den kurá.”​—MIK. 2:12.

1. Kon kreashon ta duna prueba di e sabiduria di Dios?

UN SALMISTA a sklama: “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea.” (Sal. 104:24) E sabiduria di Dios ta bisto den e ekosistema di e planeta tera. E sistema akí, ku ta masha asombroso i kompliká, ta manera un ret ku ta konsistí di miónes di mata, insekto, bestia i bakteria ku ta konektá ku otro i ta dependé di otro. Den nos kurpa tambe tin míles di mekanismo, kuminsando ku e órganonan grandi te na e partinan mas chikitu di nos sèlnan, ku ta traha huntu pa nos por ta personanan bon di salú.

2. Dikon e union entre e kristiannan di promé siglo, ku e plachi na página 16 ta ilustrá, lo a parse un milager?

² Yehova a krea hende pa ta dependiente di otro. E rasa humano ta konsistí di hende di diferente aparensia, personalidat i abilidat. Ademas, Dios a traha e promé pareha ku e kapasidat di desplegá kualidatnan ku e mes ta desplegá, i esei a hasi posibel ku nan por a kooperá ku otro i dependé di otro. (Gén. 1:27; 2:18) I tòg awendia, hende en general ta alehá di Dios i nunka no tabatin union rònt mundu. (1 Juan 5:19) P’esei, mirando ku e kongregashon di promé siglo tabata konsistí di, entre otro, esklabonan efesio, muhénan griego prominente, hòmbernan hudiu eduká i hende ku anteriormente tabata adoradó di ídolo, e union ku a eksistí entre nan lo a parse un milager.​—Echo. 13:1; 17:4; 1 Tes. 1:9; 1 Tim. 6:1.

3. Kon Beibel ta deskribí e union entre kristiannan, i kiko nos lo konsiderá durante e lès akí?

³ Adorashon berdadero ta yuda hende kooperá armoniosamente ku otro meskos ku e miembronan di nos kurpa ta funshoná unidamente. (Lesa 1 Korintionan 12:​12 i 13.) P’esei, e artíkulo akí lo konsiderá e siguiente preguntanan: Kon adorashon berdadero ta uni hende? Dikon Yehova ta e úniko ku por uni miónes di hende di tur nashon? Ki opstákulonan Yehova ta yuda nos vense pa nos por ta uní? Relashoná ku union, den ki sentido kristianismo ta diferente for di kristiandat?

Kon Adorashon Berdadero Ta Uni Hende?

4. Kon adorashon berdadero ta uni hende?

⁴ Hende ku ta praktiká adorashon berdadero ta rekonosé Yehova komo e Soberano legítimo di universo, pasobra ta e a krea tur kos. (Rev. 4:11) Pues, ounke kristiannan berdadero ta bini di hopi nashon i ta biba bou di diferente sirkunstansia, nan tur ta obedesé e mesun leinan di Dios i ta biba segun e mesun prinsipionan bíbliko. Korektamente, tur adoradó berdadero ta yama Yehova “Tata.” (Isa. 64:8; Mat. 6:9) Pues, nan tur ta ruman spiritual i por disfrutá di e bunita union ku e salmista a deskribí ora el a bisa: “Mira, ki bon i ki dushi ta pa rumannan biba huntu den armonia!”​—Sal. 133:1.

5. Ki kualidat ta kontribuí na e union di adoradónan berdadero?

⁵ Ounke kristiannan berdadero ta imperfekto, nan ta adorá Dios unidamente pasobra nan a siña stima otro. Ta Yehova ta siña nan  stima; e ta e úniko ku por siña hende kon pa stima. (Lesa 1 Juan 4:​7 i 8.) Su Palabra ta bisa: “Bisti un kurason di kompashon, kariño, humildat, mansedumbre i pasenshi. I boso soportá otro i pordoná otro, si un di boso tin un keho kontra un otro; meskos ku Señor [Yehova] a pordoná boso, asina boso tambe mester hasi. I ademas di tur e kosnan akí bisti amor, kual ta e laso perfekto di unidat [“union,” NW].” (Kol. 3:​12-14) E laso perfekto di union akí, esta amor, ta e kualidat prinsipal ku ta identifiká kristiannan berdadero. Abo personalmente no a ripará ku e union maravioso akí ta un karakterístika di adorashon berdadero?​—Juan 13:35.

6. Den ki sentido e speransa di Reino ta uni nos?

⁶ Adoradónan berdadero ta uní tambe pasobra nan ta mira e Reino di Dios komo e úniko speransa pa humanidat. Nan sa ku pronto e Reino di Dios lo remplasá gobièrnunan humano i bendishoná humanidat ku pas berdadero i duradero. (Isa. 11:​4-9; Dan. 2:44) P’esei, kristiannan ta hasi kaso di loke Hesus a bisa di su siguidónan: “Nan no ta di mundu, meskos ku ami no ta di mundu.” (Juan 17:16) Kristiannan berdadero ta keda neutral den konfliktonan di mundu; p’esei, nan por ta uní asta ora hende rònt di nan ta den konflikto ku otro.

E Úniko Fuente di Instrukshon Spiritual

7, 8. Den ki sentido instrukshon bíbliko ta kontribuí na nos union?

⁷ Kristiannan di promé siglo tabata uní pasobra nan tur a haña instrukshon for di e mesun fuente. Nan tabata sa ku ta Hesus tabata siña i dirigí e kongregashon mediante un kuerpo gobernante, ku a konsistí di e apòstelnan i e ansianonan na Yerusalèm. E hòmbernan deboto akí tabata basa nan desishonnan riba e Palabra di Dios i tabata laga superintendentenan biahero hiba nan instrukshon na e kongregashonnan den vários pais. Relashoná ku algun di e superintendentenan ei, Beibel ta bisa: “Segun ku nan tabata pasa dor di e statnan, nan tabata duna nan e reglanan ku a wòrdu dekretá dor di e apòstelnan i e ansianonan ku tabata na Yerusalèm, pa nan kumpli ku nan.”​—Echo. 15:​6, 19-22; 16:4.

⁸ Awe tambe, tin un Kuerpo Gobernante, ku ta konsistí di kristiannan ungí, ku ta kontribuí na e union di e kongregashonnan rònt mundu. E Kuerpo Gobernante ta publiká literatura den hopi idioma ku ta fortalesé hende spiritualmente. E alimento spiritual akí ta basá riba e Palabra di Dios. Pues, loke ta ser siñá den e kongregashon kristian no ta bini di hende sino di Yehova.​—Isa. 54:13.

9. Kon e trabou ku Dios a duna nos ta yuda nos pa ta uní?

⁹ Superintendentenan tambe ta promové union, dirigiendo e trabou di prediká. E amistat estrecho ku ta uni esnan ku ta traha huntu den e sirbishi di Dios ta muchu mas fuerte  ku e relashon superfisial ku tin entre hende ku ta parti di mundu. E kongregashon kristian no a ser fundá pa sirbi komo un fuente di rekreo, sino pa onra Yehova i hasi loke el a manda: prediká e bon notisia di Reino, hasi disipel i edifiká e kongregashon. (Rom. 1:​11, 12; 1 Tes. 5:11; Heb. 10:​24, 25) P’esei, apòstel Pablo a spera di tende ku e kristiannan ‘tabata para firme den ún spiritu, di ún akuerdo, luchando huntu pa e fe di evangelio.’​—Fil. 1:27.

10. Den ki maneranan e pueblo di Dios ta uní?

¹⁰ Pues, komo e pueblo di Yehova, nos ta uní pasobra nos ta aseptá Yehova komo e Soberano, nos ta stima nos rumannan, ta fiha nos speransa riba e Reino di Dios i ta respetá e personanan ku Yehova ta usa pa dirigí su kongregashon. Apesar di esei, debí na imperfekshon, nos por desplegá sierto aktitutnan ku por pone nos union na peliger. Pero Yehova ta yuda nos vense nan.​—Rom. 12:2.

Kon pa Vense Orguyo i Envidia

11. Dikon orguyo ta kousa desunion, i kon Yehova ta yuda nos vens’é?

¹¹ Orguyo ta separá hende. Un persona orguyoso ta gusta konsiderá su mes superior, i normalmente, e ta sintié bon ora e ta broma. Pero e aktitut akí ta stroba union, pasobra esnan ku ta tende e bromamentu ei por bira yalurs. Disipel Santiago a bisa nos frankamente: “Tur sorto di gabamentu asina ta malu.” (Sant. 4:16) Ta un falta di amor pa trata otro hende komo inferior. Di otro banda, Yehova ta un ehèmpel remarkabel di humildat, pasobra e ta trata ku hende imperfekto manera nos. Relashoná ku Yehova, David a skirbi: “Bo gentilesa [“humildat,” NW] ta hasi mi grandi.” (2 Sam. 22:36) E Palabra di Dios ta yuda nos vense orguyo, ya ku e ta siña nos rasoná na e manera korekto. Bou di inspirashon Pablo a puntra: “Ta ken ta konsiderá bo superior? I kiko bo tin ku bo no a risibí? Ma si bo a risibié, pakiko bo ta gaba komo si fuera bo no a risibié?”​—1 Kor. 4:7.

12, 13. (a) Dikon ta fásil pa nos bira yalurs? (b) Kiko nos ta logra si nos imitá Yehova i mira otro hende manera e ta mira nan?

¹² Envidia ta un otro karakterístika komun ku ta stroba hende di ta uní. Debí na imperfekshon heredá, nos tur tin e tendensia di envidiá otro hende. P’esei, asta un kristian ku tin hopi tempu den e bèrdat, de bes en kuando, por envidiá sirkunstansia, pertenensia, privilegio i abilidat di otronan. (Gén 6:5) Por ehèmpel, un ruman hòmber kasá i ku tin yu por envidiá e privilegionan ku un sirbidó di tempu kompletu tin sin realisá ku kisas e persona ei tambe ta un tiki yalurs riba dje pasobra e ta kasá i tin yu. Kon nos por evitá ku envidia ta afektá nos union?

¹³ Pa evitá envidia, nos tin ku kòrda ku Beibel ta kompará e miembronan ungí di e kongregashon kristian ku partinan di kurpa humano. (Lesa 1 Korintionan 12:​14-18.) Tuma por ehèmpel nos wowo i nos kurason. Ounke e wowo ta loke nos ta mira mas lihé ku e kurason, tur dos ta di balor pa nos, no ta bèrdat? Di mes manera, Yehova ta balorá tur miembro di e kongregashon ounke tin algun ku pa motibu di sierto privilegionan ta mas visibel ku otronan. Pues, laga nos mira nos rumannan manera Yehova ta mira nan. En bes di envidiá nan, nos mester mustra interes den nan. Hasiendo esei, nos ta yuda hende mira e diferensia entre kristiannan berdadero i e miembronan di iglesianan di kristiandat.

 Divishon Ta un Rasgo di Kristiandat

14, 15. Kiko a kousa desunion den kristiandat?

¹⁴ E union ku ta reina entre kristiannan berdadero ta masha distinto for di e lucha ku tin entre e iglesianan di kristiandat. Pa siglo 4, apostasia tabata asina plamá ku asta un emperador pagano di Roma a bira kreyente i a kuminsá dirigí asuntunan di kristiandat; pa motibu di dje, hopi pais mas a bira “kristian.” Pero despues, hopi gobièrnu di paisnan kristian a kibra nan relashon ku Roma i a forma nan propio religionnan di Estado.

¹⁵ Pa siglonan, e gobièrnunan, òf reinonan, akí a bringa kontra otro. Durante siglo 17 i 18, e pueblo di Gran Bretaña, Fransia i Merka a promové deboshon na nan Estado, i esei a pone ku nashonalismo a bira manera un religion. Durante siglo 19 i 20, nashonalismo a kuminsá dominá pensamentu di mayoria di hende. I ku tempu, iglesianan di kristiandat a splet den vários sekta di kua e mayoria ta tolerá nashonalismo. Konsekuentemente, baidónan di misa a bai guera kontra nan mes kompañeronan di fe ku tabata biba den otro pais. Ta p’esei awendia, nashonalismo i diferensia den doktrina ta kousa divishon den kristiandat.

16. Kiko ta kousa divishon den kristiandat?

¹⁶ Den siglo 20, sentenáres di sekta di kristiandat a kuminsá ku e movementu ekuméniko ku tabatin e meta pa uni diferente iglesia kristian. Pero despues di hopi esfuerso ku nan a hasi pa dékadanan, ta algun iglesia so a uni ku otro. I ainda baidónan di misa ta dividí pa loke ta trata evolushon, aborto, homoseksualidat i nombramentu di hende muhé komo lider religioso. Den un intento pa uni hende di diferente sekta, algun lider religioso di kristiandat ta minimisá e importansia di doktrinanan ku anteriormente tabata kousa divishon. Sinembargo, e proseder akí no ta uni e religionnan dividí di kristiandat ni yuda e hendenan, pasobra nan ta keda ku un fe suak.

Adorashon Berdadero Ta Surpasá Nashonalismo

17. Kon Beibel a profetisá ku adorashon berdadero lo uni hende “den e último dianan”?

¹⁷ Awendia humanidat ta mas dividí ku nunka. Apesar di esei, adoradónan berdadero sí ta uní. Mikeas, e profeta di Dios, a profetisá: “Lo mi trese nan huntu manera karné den kurá.” (Mik. 2:12) Ademas, el a profetisá ku adorashon berdadero lo ser elevá riba tur otro forma di adorashon, sea ku ta adorashon na dios falsu òf na Estado. El a skirbi: ‘Lo sosodé den e último dianan ku e seru di e kas di Yehova lo wòrdu establesí komo hefe di e serunan. E lo wòrdu halsá mas haltu ku e seritunan, i e pueblonan lo basha bai na dje. Maske tur e pueblonan ta kana kada un den e nòmber di su dios, ma pa loke ta nos, nos sí lo kana den e nòmber di Yehova nos Dios.’​—Mik. 4:​1, 5.

18. Ki kambionan adorashon berdadero ta yuda nos hasi?

 ¹⁸ Mikeas a profetisá tambe kon adorashon berdadero ta uni hende ku anteriormente tabata enemigu di otro. El a bisa: “[Hende di] hopi nashon lo bin bisa: ‘Ban laga nos subi bai na e seru di SEÑOR i na e kas di e Dios di Jakòb, pa e siña nos di su kamindanan i pa nos kana den su bereanan.’ . . . Nan lo bati nan spadanan traha plug ku nan, i nan lo bati nan lansanan traha skèr-pa-snui ku nan; nashon lo no lanta spada kontra nashon, i nunka mas nan lo no train pa guera.” (Mik. 4:​2, 3) Pues, personanan ku bandoná adorashon di imágen ku hende ta traha òf adorashon di nan nashon pa adorá Yehova ta disfrutá di union ku nan rumannan rònt mundu. Sí, Dios ta instruí nan den e kaminda di amor.

19. E echo ku miónes di hende ta ser uní den adorashon berdadero ta duna prueba di kiko?

¹⁹ E union ku ta eksistí rònt mundu awe entre kristiannan berdadero ta úniko i ta un prueba palpabel ku Yehova ta sigui guia su pueblo mediante su spiritu santu. Hende di tur nashon ta ser uní na un eskala sin presedente. Esaki ta un kumplimentu remarkabel di loke Revelashon 7:​9 i 14 ta indiká. Ademas, e ta un indikashon ku pronto e angelnan di Dios lo lòs e “bientunan” ku lo destruí e sistema malbado akí. (Lesa Revelashon 7:​1-4, 9, 10 i 14.) P’esei, ta un privilegio pa ta parti di un hermandat mundial ku ta uní. Awor, kon nos kada un por kontribuí na e union ei? E siguiente artíkulo lo kontestá e pregunta akí.

Kon Lo Bo Kontestá?

• Kon adorashon berdadero ta uni hende?

• Kon nos por evitá ku envidia ta kibra nos union?

• Dikon adoradónan berdadero sí ta uní siendo ku e nashonnan ta mas dividí ku nunka?

[Preguntanan di Estudio]

[Plachi na página 16]

Den e kongregashon kristian di promé siglo tabatin hende di diferente background

[Plachinan na página 18]

Yudando ku trabou na Salòn di Reino, bo ta kontribuí na union