Dikon Hende Ta Hasi Malu?

NOS tur ta imperfekto, i p’esei nos ta kometé eror i ta hasi kosnan ku nos ta lamentá despues. Esaki ta un bèrdat ku mayoria di hende lo bai di akuerdo kuné. Ta kasi tur dia, sea personalmente òf via medionan di komunikashon, nos ta mira òf tende di kosnan malu ku ta sosodé. Pero ta imperfekshon ta responsabel pa tur e kosnan ei, sea ku nan ta grave òf nò?

Wèl, apesar di imperfekshon, hende en general ta rekonosé ku tin norma i balor ku nan mester tene nan na dje i ku nan por evitá di hasi maldat. Ademas, mayoria di hende ta bai di akuerdo mesora ku tin un gran diferensia entre bisa algu ku no ta bèrdat inkonsientemente i kalumnia un persona deliberadamente; i tambe entre heridá un persona aksidentalmente i kometé un asesinato premeditá. Apesar di esei, hopi bes ta hende ku ta aparentá di ta komun i koriente ta hasi kosnan ku ta shòk otro hende. Dikon? Dikon hende ta hasi malu?

 Beibel ta yuda nos komprondé e asuntu akí. Sí, na un manera kla, e ta laga nos mira kiko ta e motibunan prinsipal pakiko hende ta hasi kosnan ku nan sa ku ta malu. Konsiderá loke e ta bisa.

▪ “Opreshon ta hasi un hende sabí bira loko.”​—EKLESIASTÉS 7:7.

Segun Beibel, sirkunstansia por pone hende hasi kosnan ku normalmente nan lo no a hasi. Algun hende ta asta kometé krímen, pensando ku asina nan por kaba ku sufrimentu i inhustisia. E buki Urban Terrorism ta bisa: “Den hopi kaso, e motibu prinsipal pakiko un persona ta kometé aktonan terorista ta frustrashon, kousá pa e sistemanan polítiko, sosial i ekonómiko ku aparentemente ta inkambiabel.”

▪ “Amor pa plaka ta rais di tur sorto di maldat.”​—1 TIMOTEO 6:10.

Tin hende ta bisa ku asta bon hende ta dispuesto pa hasi kiko-ku-ta, violando tur regla di desensia i moralidat, basta un persona ofresé nan sufisiente plaka. Algun hende ku normalmente ta parse masha amabel i bondadoso ta kambia kompletamente ora plaka ta den wega; nan ta bira hende masha desagradabel i hostil. Pensa riba e kantidat di krímen, manera soborno, froude, sekuestro i asta asesinato, ku hende ta kometé debí na golosidat.

▪ “Pasobra sentensia kontra un echo di maldat no ta wòrdu ehekutá lihé; p’esei kurason di e yunan di hende den nan ta kompletamente dispuesto pa hasi maldat.”​—EKLESIASTÉS 8:11.

E teksto akí ta señalá na e tendensia ku hende tin di pensa ku fásilmente nan por hasi malu i keda sin haña kastigu ora no tin outoridat ku ta mira nan. I esei ta bisto den kaso di outomobilistanan ku ta kore mas duru ku lei ta permití, alumnonan ku ta spik, hende ku ta malversá fondo di gobièrnu i esnan ku ta hasi kosnan pió ku esakinan. E echo ku tin hende ta kibra lei i no ta haña kastigu i ku hende no tin miedu di ser gará ta pone ku un persona ku normalmente ta kumpli ku lei por sintié tentá pa violá lei. Segun e revista Arguments and Facts: “Ta parse ku e echo ku delinkuentenan no ta haña kastigu ta motivá hopi siudadano pa kometé krímennan masha kruel.”

▪ “Kada un ta wòrdu tentá ora ku e wòrdu atraí i sedusí dor di su mes pashon. Anto ora pashon konsebí, e ta duna lus na piká.”​—SANTIAGO 1:​14, 15.

Tur hende por tin pensamentunan robes. Tur dia nos ta haña nos ku masha hopi tentashon i sugerensia pa hasi loke ta malu. Apòstel Pablo a bisa e kristiannan den su tempu ku e tentashonnan ku nan tabata haña nan kuné no ta “fuera di loke tur hende ta pasa aden.” (1 Korintionan 10:13) No opstante, si e tentashonnan ei ta hiba na maldat òf nò ta dependé di e desishon ku e persona tuma: sea e ta eliminá tur pensamentu robes mesora for di su mente òf e ta sigui kultivá nan. I ta manera Santiago a spièrta den e teksto menshoná ariba, si un persona laga pashon, òf mal deseo, “konsebí,” esei lo hiba na maldat sigur.

 ▪ “Esun ku anda ku hende sabí lo ta sabí, ma un kompañero di hende bobo lo sufri daño.”—PROVERBIONAN 13:20.

Nos no por minimisá e influensia, sea bon òf malu, ku nos amigunan tin riba nos. Hopi biaha, hende ta hasi kosnan ku nunka nan no a ni pensa di hasi i ta sufri konsekuensianan desastroso. I dikon nan ta hasi e kosnan akí? Pa motibu di preshon di pareunan òf mal asosiashon. Kòrda ku den Beibel, “hende bobo” no ta referí na hende ku no ta inteligente, pero na esnan ku ta ignorá e konsehonan sabí ku e Palabra di Dios ta kontené. Pues, si nos no skohe nos amistatnan òf esnan ku nos ta anda kuné sabiamente, esta, segun norma- i prinsipionan di Beibel, nos lo “sufri daño.” I esaki ta konta tantu pa hóben komo adulto.

Esakinan ta algun di e hopi tekstonan bíbliko ku ta splika bon kla pakiko hende—kisas hende ku normalmente ta komportá nan bon—ta hasi maldat, inkluso kosnan ku ta shòk komunidat. Awor ku nos a komprondé kiko ta impulsá hende pa hasi kosnan teribel, nos ke sa tambe si lo bini un kambio. Wèl, Beibel no solamente ta splika dikon hende ta hasi malu pero ta primintí tambe ku lo yega un dia ku no tin maldat mas. Pero kiko Dios a primintí realmente? Ta bèrdat ku un dia lo no tin maldat mas riba kara dje tera? E siguiente artíkulo lo kontestá e preguntanan ei.