Nos Lider Aktivo Awe
Nos Lider Aktivo Awe
‘El a sali konkistando, i pa kompletá su konkista.’—REV. 6:2.
1, 2. (a) Kon Beibel ta pinta Kristu su aktividat komo Rei desde 1914? (b) Ki akshon Kristu a tuma desde ku el a ser entronisá?
NA AÑA 1914, Kristu a ser entronisá komo Rei di e Reino Mesiániko di Yehova. Kiko nos ta imaginá ku e Rei ei ta hasiendo awor? Nos ta imaginá ku e ta un rei pasivo sintá riba su trono ku tempu tempu ta wak abou na tera pa mira kon ta bai ku su kongregashon? Si ta asina nos ta pensa, nos tin ku ahustá nos pensamentu. Tantu e Salmonan komo e buki di Revelashon ta pint’é komo un rei aktivo sintá riba un kabai ku ‘a sali konkistando, i pa kompletá su konkista.’—Rev. 6:2; Sal. 2:6-9; 45:1-4.
2 E promé viktoria ku Kristu a logra komo Rei tabata riba “e dragon i su angelnan.” Den su funshon di arkangel, Miguel ku su angelnan bou di su mando a saka Satanas i su demoñonan for di shelu santu i a restringí nan den bisindario di tera. (Rev. 12:7-9) Despues, den su papel di “mensahero di e aliansa” di Yehova, Hesus a bini ku su Tata pa inspekshoná e tèmpel spiritual. (Mal. 3:1) El a husga kristiandat, e parti mas reprensibel di ‘Babilonia e Grandi,’ i a hañ’é kulpabel di dramamentu di sanger i di adulterio spiritual ku el a kometé ku e sistema polítiko di e mundu akí.—Rev. 18:2, 3, 24.
Kristu Ta Purifiká Su Esklabo Riba Tera
3, 4. (a) Kiko Kristu mester a hasi komo Yehova su “mensahero”? (b) Kiko e inspekshon di tèmpel a saka na kla? (c) Komo Kabes di kongregashon, ku kiko Hesus a enkargá su esklabo?
3 E inspekshon ku Yehova i su “mensahero” a hasi ta revelá tambe ku den e patio terenal di e tèmpel spiritual ei tin un grupo di kristian berdadero ku no ta parti di e iglesianan di kristiandat. Sinembargo, Kristu mester a purifiká asta e kristiannan ungí akí, e “yu hòmbernan di Levi.” Ta manera Malakias a profetisá: “E [Yehova] lo sinta manera un refinadó i purifikadó di plata, i e lo purifiká e yu hòmbernan di Levi i refiná nan manera oro i plata, pa nan por presentá na SEÑOR ofrendanan den hustisia.” (Mal. 3:3) Yehova a usa su “mensahero di e aliansa,” Kristu Hesus, pa purifiká e israelitanan spiritual akí.
4 Pero, Kristu a haña e mesun fiel kristiannan ungí akí ta hasi nan máksimo esfuerso pa proveé kuminda spiritual na ora pa tur Yehova su sirbidónan fiel. Desde 1879 padilanti, den tempu faborabel i tempu difísil, nan ta publiká bèrdatnan bíbliko tokante e Reino di Dios den e revista akí. Hesus a profetisá ku “ora [e] bin” pa inspekshoná su kas durante “fin di tempu,” lo e haña su esklabo ta proveé “kuminda na su debido tempu” pa su kas. Lo e deklará e esklabo ei felis i “lo lag’é keda na enkargo di tur su propiedatnan” riba tera. (Mat. 24:3, 45-47) Komo Kabes di e kongregashon kristian, Kristu a usa e “esklabo fiel i prudente” akí pa supervisá tur aktividat i poseshon di Dios su pueblo riba tera. Kristu a usa un Kuerpo Gobernante pa duna guia na e ungínan di su “kas” i nan kompañeronan, e “otro karnénan.”—Juan 10:16.
Kristu Ta Kosechá e Tera
5. Den un vishon, kiko apòstel Juan a mira e Rei Mesiániko ta hasi?
5 Apòstel Juan a haña un vishon di un otro kos ku e Rei Mesiániko lo a bai hasi den “e dia di Señor,” esta, despues ku El a ser entronisá na 1914. Juan a skirbi: “Mi a wak, i ata un nubia blanku, i sintá riba e nubia tabatin Un manera e yu di hende, ku un korona di oro riba su kabes i un sikkel skèrpi den su man.” (Rev. 1:10; 14:14) Juan a tende un angel di Yehova bisa e Kosechadó akí pa zuai su sikkel “pasobra e kosecha di tera ta hechu.”—Rev. 14:15, 16.
6. Segun Hesus, kiko lo krese den e kunuku promé ku tempu di kosecha?
6 E “kosecha di tera” akí ta hasi nos kòrda riba Hesus su komparashon di e trigu i yerba shimaron. Hesus a kompará su mes ku un hòmber ku a sembra simia di trigu den su kunuku pa e haña un kosecha di bon trigu, esta, e “yunan di e reino” ku ta e berdadero kristiannan ungí ku lo goberná kuné den su Reino. Pero durante anochi un enemigu, “Diabel,” a sembra yerba shimaron, “e yunan di e malbado.” E sembradó a instruí su esklabonan pa laga e trigu i e yerba shimaron krese huntu te na tempu di kosecha, es desir, “e konklushon dje sistema di kosnan [NW].” E ora ei, lo e manda su angelnan pa separá e trigu for di e yerba shimaron.—Mat. 13:24-30, 36-41.
7. Kon Kristu ta ‘kosechá e tera’?
7 Na kumplimentu di e vishon ku Juan a haña, Hesus ta dirigiendo un trabou di kosecha rònt mundu. “E kosecha di tera” a kuminsá ku rekohementu di e restu di e 144.000 “yunan di e reino,” “e trigu” di Hesus su komparashon. Despues di Promé Guera Mundial e diferensia entre e kristiannan berdadero i esnan falsu a bira mas bisto, asina bisto ku esei a kontribuí na e di dos parti di “e kosecha di tera,” esta, e rekohementu di e otro karnénan. Nan no ta “e yunan di e reino,” mas bien nan ta “un multitut grandi” di súpditonan di e Reino ei. Nan ta e kosecha ku ta bini for di “tur pueblo, nashon i hende di tur idioma.” Nan ta someté nan mes na e Reino Mesiániko, ku ta konsistí di Kristu Hesus i e 144.000 “santunan” ku lo goberná huntu kuné den shelu.—Rev. 7:9, 10; Dan. 7:13, 14, 18.
Kristu Ta Dirigí e Kongregashonnan
8, 9. (a) Kiko ta mustra ku Kristu ta opservá no solamente e kondukta di henter e kongregashon sino tambe e estilo di bida di kada miembro individual? (b) Manera nos por wak na página 29, ki “kosnan profundo di Satanas” nos mester evitá?
8 Den e artíkulo anterior nos a mira kon Kristu tabata opservá e kondishon spiritual di kada kongregashon den e promé siglo. Den nos tempu, Kristu nos Lider, kende komo Rei a haña “tur outoridat . . . den shelu i riba tera,” ta ehersé su outoridat rònt mundu riba e kongregashonnan i nan superintendentenan. (Mat. 28:18; Kol. 1:18) Yehova a “duna e komo kabes riba tur kos na e iglesia [òf, kongregashon]” di ungínan. (Efe. 1:22) P’e motibu ei, nada ku ta sosodé den e mas ku 100.000 kongregashonnan di Testigunan di Yehova no ta skap’é.
9 Na e kongregashon di Tiatira di antigwedat, Hesus a manda e mensahe akí: “E Yu di Dios, kende tin wowo manera vlam di kandela, . . . ta bisa esaki: ‘Mi konosé bo obranan.’” (Rev. 2:18, 19) El a reprendé miembronan di e kongregashon ei pa nan kondukta inmoral i nan bida di plaser, bisando nan: “Ami ta esun ku ta saminá mente i kurason; i lo mi duna kada un di boso segun boso obranan.” (Rev. 2:23) Loke el a bisa ta mustra ku Kristu ta opservá no solamente e kondukta di e kongregashonnan sino tambe e estilo di bida di kada miembro individual. Hesus a elogiá e kristiannan na Tiatira, “kendenan no konosé e kosnan profundo di Satanas.” (Rev. 2:24) Awe tambe, sin importá nos edat, nos lo tin su aprobashon si nos ta evitá di bai den “e kosnan profundo di Satanas” mediante Internet, weganan di vidio violento, rasonamentu inmoral i spekulashon ku filosofia kompliká, spiritismo i evolushon. Esta kontentu e ta di mira e esfuerso i sakrifisio ku un gran kantidat di kristian ta hasiendo awe pa sigui su guia den tur aspekto di nan bida!
10. Kon e manera ku Kristu ta dirigí ansianonan di kongregashon ta ser simbolisá, pero ki areglo nan mester rekonosé?
10 Kristu ta proveé supervishon amoroso pa su kongregashonnan riba tera mediante e ansianonan. (Efe. 4:8, 11, 12) Den promé siglo, tur e superintendentenan tabata ungí ku spiritu santu. Den e buki di Revelashon, e streanan den Kristu su man drechi ta simbolisá e ansianonan. (Rev. 1:16, 20) Awe, mayoria di e ansianonan den kongregashon ta forma parti di e otro karnénan. Nan tambe ta kai bou di Kristu su direkshon pasobra nombramentu di ansiano ta tuma lugá despues ku hasi orashon i bou di guia di spiritu santu. (Echo. 20:28) Sinembargo, nan ta rekonosé ku Kristu ta usa un grupo chikitu di hòmber kristian ungí komo Kuerpo Gobernante pa guia i dirigí su disipelnan riba tera.—Lesa Echonan 15:6 i 28-30.
“Bin, Señor Hesus”
11. Dikon nos ta ansioso pa mira nos Lider bini pronto?
11 Den e revelashon ku apòstel Juan a haña, vários bes Hesus a bisa ku e ta bini pronto. (Rev. 2:16; 3:11; 22:7, 20) Sin duda, e tabata referí na su binida pa ehekutá huisio kontra Babilonia e Grandi i e restu di Satanas su mal sistema di kosnan. (2 Tes. 1:7, 8) Ansioso pa mira kumplimentu di tur e susesonan maravioso ku a ser pronostiká, apòstel Juan a bisa den su behes: “Amèn. Bin, Señor Hesus.” Nos ku ta biba den e tempu di fin di e mal sistema di kosnan akí tambe ta deseá di mira nos Lider i Rei bini komo gobernante di e Reino di Dios pa santifiká nòmber di su Tata i vindiká Su soberania.
12. Ki trabou Kristu lo kompletá promé ku e angelnan laga e bientunan di destrukshon bai?
12 Promé ku Hesus destruí Satanas su organisashon visibel, e último di e 144.000 miembronan di Israel spiritual lo risibí e seyamentu final. Beibel ta mustra bon kla ku e angelnan lo keda wanta e bientunan ku lo destruí e sistema di Satanas te ora ku tur e 144.000 miembronan ta seyá.—Rev. 7:1-4.
13. Kon Kristu lo manifestá su presensia durante e promé parti di e “gran tribulashon”?
13 Mayoria di hende riba tera no a nota ku Kristu su “presensia [NW]” a kuminsá na 1914. (2 Ped. 3:3, 4) Sinembargo, pronto lo e manifestá su presensia ora e ehekutá Yehova su huisio riba vários elemento di Satanas su sistema di kosnan. E destrukshon di “e hòmber di maldat,” e klero di kristiandat, indudablemente lo ta “manifestashon di su presensia.” (2 Tes. 2:3, 8, NW) Esaki lo duna prueba ku Kristu ta aktuando komo Yehova su Hues nombrá. (Lesa 2 Timoteo 4:1.) Destrukshon di kristiandat, e parti mas reprensibel di Babilonia e Grandi, lo tuma lugá promé ku e destrukshon total di e imperio mundial di religion falsu. Yehova lo hinka den kurason di e lidernan polítiko e deseo pa eliminá e prostituta akí. (Rev. 17:15-18) Esei lo ta e promé parti di e “gran tribulashon.”—Mat. 24:21.
14. (a) Dikon e promé parti di e gran tribulashon lo ser hasí mas kòrtiku? (b) Kiko “e señal di e Yu di hende” lo nifiká pa Yehova su pueblo?
14 Hesus a bisa ku e dianan di e tribulashon ei lo ser hasí mas kòrtiku “pa kousa di e eligínan,” esta, e restu di kristiannan ungí ku ta riba tera ainda. (Mat. 24:22) Ora e lidernan polítiko ataká religion falsu, Yehova lo no permití nan kaba ku e kristiannan ungí ni e otro karnénan. Hesus a agregá ku “despues di e tribulashon di e dianan ei,” lo tin señalnan den solo, luna i streanan, i “e ora ei e señal di e Yu di hende lo aparesé na shelu.” Esaki lo pone e nashonnan di tera “lamentá.” Pero e ungínan, ku tin speransa di bai shelu, i nan kompañeronan, ku tin speransa di biba riba tera, sí lo no lamentá. Nan lo ‘lanta nan kabes, pasobra nan redenshon ta yegando serka.’—Mat. 24:29, 30; Luk. 21:25-28.
15. Ki trabou Kristu lo hasi ora e bini?
15 Promé ku e Yu di hende kompletá su konkista, lo e bini den un otro manera. El a profetisá: “Ora ku e Yu di hende bin den su gloria, i tur e angelnan santu huntu kuné, e lo sinta riba e trono di su gloria. I tur e nashonnan lo wòrdu tresí huntu su dilanti; i e lo separá nan un for di otro, manera wardadó ta separá karné for di kabritu; i e lo pone e karnénan na su man drechi i e kabritunan na su man robes.” (Mat. 25:31-33) Esaki ta referí na Kristu su binida komo Hues pa separá hende di “tur e nashonnan” den dos kategoria: “e karnénan,” esnan ku ta sostené su rumannan spiritual (kristiannan ungí riba tera) i “e kabritunan,” esnan “ku no ta obedesé e evangelio di nos Señor Hesus.” (2 Tes. 1:7, 8) E karnénan, deskribí komo “e hustunan,” lo haña “bida eterno” riba tera, pero e kabritunan “lo bai den kastigu eterno,” esta, destrukshon.—Mat. 25:34, 40, 41, 45, 46.
Hesus Ta Kompletá Su Konkista
16. Kon Kristu nos Lider lo kompletá su konkista?
16 Ora ku tur esnan ku lo ta rei i saserdote ta seyá i e otro karnénan ta na su man drechi pa salbashon, Kristu por ‘kompletá su konkista.’ (Rev. 5:9, 10; 6:2) Siendo na kabes di un ehérsito di angel poderoso i, sin duda, di su rumannan resusitá, lo e destruí henter Satanas su sistema polítiko, militar i komersial riba tera. (Rev. 2:26, 27; 19:11-21) Kristu lo kompletá su konkista òf viktoria ora e destruí e mal sistema di Satanas. Despues lo e tira Satanas i su demoñonan den abismo pa mil aña.—Rev. 20:1-3.
17. Na kiko Kristu lo guia su otro karnénan durante e Reinado di Mil Aña, i kiko mester ta nos determinashon?
17 Papiando di e “multitut grandi” di otro karné, ku lo sobrebibí e gran tribulashon, apòstel Juan a profetisá ku “e Lamchi meimei di e trono lo ta nan wardadó, i lo guia nan hiba na fuentenan di e awa di bida.” (Rev. 7:9, 17) Sí, durante su Reinado di Mil Aña, Kristu lo sigui guia e otro karnénan, kendenan realmente ta skucha su bos, i lo e guia nan na bida eterno. (Lesa Juan 10:16 i 26-28.) Laga nos ta determiná pa sigui nos Rei i Lider—awor i te den e mundu nobo ku Yehova a primintí!
Komo Repaso
• Ki akshon Kristu a tuma despues ku el a ser entronisá?
• Ken Kristu ta usa riba tera pa guia e kongregashonnan?
• Den ki maneranan Kristu nos Lider tin ku bini ainda?
• Kon Kristu lo sigui guia nos den e mundu nobo?
[Preguntanan di Estudio]
[Plachi na página 31]
Kristu lo manifestá su presensia ku e destrukshon di e mal sistema di Satanas
