Union Kristian Ta Duna Gloria na Dios

‘Sea diligente pa preservá e unidat di e spiritu den e vínkulo di pas.’​—EFE. 4:3.

1. Kon e kristiannan di Efeso a duna gloria na Dios den promé siglo?

E UNION ku tabata reina den e kongregashon kristian na Efeso di antigwedat a duna gloria na Yehova, e Dios berdadero. Den e sentro di komersio próspero ei, algun kristian tabata riku i evidentemente doño di esklabo, miéntras ku otronan tabata esklabo i probablemente pober. (Efe. 6:​5, 9) Algun tabata hudiu ku a haña e bèrdat durante e tres lunanan ku apòstel Pablo a prediká den nan snoanan. Tabatin otronan ku anteriormente a praktiká magia i tabata adoradó di Artémis. (Echo. 19:​8, 19, 26) Ta bisto anto, ku kristianismo a uni hende di vários background. Pablo a rekonosé ku e union ku tabata reina den e kongregashon a duna gloria na Dios. P’esei el a skirbi: “Na dje sea e gloria pa medio di e kongregashon.”​—Efe. 3:21, NW.

2. Kiko a pone e union di e kristiannan na Efeso na peliger?

² Sinembargo, e maravioso union ku a reina den e kongregashon na Efeso tabata na peliger. Pablo a spièrta e ansianonan: “For di meimei di boso mes lo lanta hòmbernan ku ta papia kosnan pèrvèrso, pa desviá e disipelnan i hasi nan bai nan tras.” (Echo. 20:30) Ademas, Pablo a spièrta ku algun ruman ainda tabata desplegá e spiritu ku ta kousa desunion, esta, e spiritu ‘ku ta obra den e yunan di desobedensia.’​—Efe. 2:2; 4:22.

 Un Karta Ku Ta Enfatisá Union

3, 4. Kon Pablo su karta na e efesionan ta enfatisá union?

³ Pablo a realisá ku kada kristian mester hasi esfuerso sinsero pa promové union si nan ke keda uní. Dios a inspirá Pablo pa skirbi un karta na e efesionan, i e tópiko prinsipal di esaki tabata union. Por ehèmpel, Pablo a skirbi tokante e propósito di Dios pa ‘reuní tur kos den Kristu.’ (Efe. 1:10) Ademas, komparando kristiannan ku e piedranan ku ta forma un edifisio, el a bisa: “Henter e edifisio, siendo bon hinká den otro, ta krese pa bira un tèmpel santu” pa Yehova. (Efe. 2:​20, 21) Pablo a enfatisá tambe e union ku tabata reina entre kristiannan hudiu i esnan no-hudiu. I el a kòrda nan ku nan tur ta ruman, ya ku ta Dios a krea nan tur. Sí, el a referí na Yehova komo “e Tata, di kende henter e famia den shelu i riba tera ta haña su nòmber.”​—Efe. 3:​5, 6, 14, 15.

⁴ Segun ku nos ta analisá Efesionan kapítulo 4, nos lo mira dikon union ta rekerí esfuerso, kon Yehova ta yuda nos uni ku otro i ki kualidatnan lo yuda nos keda uní. Nos ta animá bo pa lesa henter e kapítulo pa asina bo por benefisiá mas di e estudio akí.

Dikon Union Ta Rekerí Esfuerso Sinsero?

5. Dikon e angelnan di Dios por sirbié unidamente, pero dikon por ta mas difísil pa nos ta uní?

⁵ Pablo a roga su rumannan na Efeso pa nan ‘sea diligente pa preservá e unidat [“union,” NW] di e spiritu.’ (Efe. 4:3) Pa nos por komprondé dikon nos mester ta diligente, òf hasi esfuerso, pa konserbá union, laga nos konsiderá e kaso di e angelnan di Dios. Komo ku riba tera no tin dos kriatura ku ta kompletamente igual, ta lógiko pa nos konkluí ku Yehova a krea kada un di su miónes di angelnan komo un persona úniko. (Dan. 7:10) Apesar di esei, nan por sirbi Yehova unidamente pasobra nan tur ta skuch’é i ta hasi su boluntat. (Lesa Salmo 103:​20 i 21.) Meskos ku e angelnan fiel, kristiannan tin diferente kualidat. Pero, kristiannan ta imperfekto tambe, i esei ta pone ku ta mas difísil pa nan ta uní.

6. Ki kualidatnan lo yuda nos haña goso ora di kooperá ku nos rumannan apesar ku nos kada un tin nos fayonan?

⁶ Ora hende imperfekto ta hasi esfuerso pa kooperá ku otro, fásilmente nan por haña problema ku otro. Por ehèmpel, kiko por sosodé si un ruman hòmber ku karakter suave, ku hopi bes ta lat, ta sirbi Yehova huntu ku un ruman hòmber ku ta puntual, pero ku ta pèrdè pasenshi lihé? Kisas tur dos ta pensa ku e otro su kondukta no ta bon, pero ta lubidá ku nan mes tambe ta hasiendo algu ku  ta robes. Kon e dos ruman hòmbernan akí por sirbi Yehova unidamente? Tuma nota ki kualidatnan Pablo ta rekomendá den su siguiente palabranan: “[Mi] ta roga boso pa kana na un manera digno . . . ku tur humildat i suavedat, ku pasenshi, soportando un i otro den amor, siendo diligente pa preservá e unidat di e spiritu den e vínkulo di pas.”​—Efe. 4:​1-3.

7. Dikon ta masha importante pa kristiannan hasi esfuerso pa ta uní ku otro apesar di imperfekshon?

⁷ Ta masha importante pa nos siña sirbi Yehova den union ku otro hende imperfekto pasobra ta ún adorashon berdadero so tin. Beibel ta bisa: “Tin ún kurpa i ún spiritu, meskos ku boso tambe a wòrdu yamá den ún speransa di boso yamada; ún Señor, ún fe, ún boutismo, ún Dios i Tata di tur.” (Efe. 4:​4-6) I Yehova ta duna su spiritu santu i bendishon na e úniko hermandat ei ku E ta usa. P’esei, asta si un persona den kongregashon ofendé nos, nos mester bandoná Yehova su organisashon? Nò, no tin ningun otro organisashon kaminda nos por tende e palabranan di bida eterno.​—Juan 6:68.

“Donnan den Hende” Ta Promové Union

8. Kiko Kristu ta usa pa fortalesé nos kontra influensianan ku ta kousa desunion?

⁸ Pablo a usa un kustumber ku sòldánan di antigwedat tabatin pa ilustrá kon Hesus a perkurá ‘donnan den forma di hende’ pa yuda uni e kongregashon. Despues di a vense un nashon den bataya, algun sòldá tabata trese un esklabo stranhero pa yuda nan kasá ku trabou di kas. (Sal. 68:​1, 12, 18) Di mes manera, debí ku Hesus a vense mundu, el a haña hopi esklabo boluntario. (Lesa Efesionan 4:​7 i 8. *) Kon Hesus a usa su esklabonan simbóliko? “El a duna algun komo apòstel, i algun komo profeta, i algun komo evangelista, i algun komo pastor [òf, “wardadó,” NW] i siñadó, pa ekipá e santunan pa e trabou di sirbishi, pa edifiká e kurpa di Kristu, te ora nos tur yega na e unidat di fe.”​—Efe. 4:​11-13.

9. (a) Kon “donnan den hende” ta yuda konserbá nos union? (b) Dikon tur kristian mester kontribuí na e union ku ta reina den kongregashon?

⁹ Komo wardadónan ku ta stima e tou, e “donnan den hende” akí ta yuda nos konserbá nos union. Por ehèmpel, si un ansiano di kongregashon ta ripará ku dos ruman hòmber ‘ta kompetí ku otro’ (NW), e por kontribuí mashá na e union di e kongregashon si e konsehá nan den privá ku e meta pa  ‘restorá nan den un spiritu di mansedumbre.’ (Gal. 5:​26–6:1) Komo maestronan, e “donnan den hende” akí ta yuda nos edifiká un fe firme basá riba siñansanan bíbliko. Asina nan ta promové union i ta yuda nos progresá na madures kristian. Segun Pablo, esaki ta pone ku nos no ta keda ‘mucha, tirá p’aki p’aya dor di olanan, i hibá dor di tur bientu di doktrina, dor di triki di hende, dor di astusia den trahamentu di plan engañoso.’ (Efe. 4:​13, 14) Pues, tur kristian mester kontribuí na e union ku ta reina den kongregashon, meskos ku tur miembro di nos kurpa ta edifiká otro, yudando otro haña loke ta nesesario.​—Lesa Efesionan 4:​15 i 16.

Kultivá Bon Aktitut

10. Kon kondukta inmoral por pone nos union na peliger?

¹⁰ Bo a ripará ku kapítulo kuater di Pablo su karta na e efesionan ta mustra ku ta e amor ku tin entre kristiannan maduro ta pone ku nan ta uní? Despues di esei, e ta mustra kiko amor ta enserá. E ta enserá, entre otro, ku kristiannan no ta kometé fornikashon ni komportá nan mes indesente. Pablo a urgi su rumannan pa nan ‘no kana mas meskos ku e paganonan ta kana.’ E hendenan ei a ‘pèrdè tur heful’ i “a entregá nan mes na sensualidat,” òf inmoralidat. (Efe. 4:​17-19) E mundu inmoral ku nos ta biba aden ta un menasa pa nos union. Hende a hasi fornikashon e tópiko di nan chiste-, kantika-, pelíkula- i programanan di televishon; nan ta praktik’é abiertamente òf den sekreto. Asta flirtmentu, esta, aktua komo si fuera bo ta sinti bo atraí na un persona ku bo no tin intenshon di kasa kuné, por alehá bo for di Yehova i e kongregashon. Dikon? Pasobra esei fásilmente por hiba na fornikashon. Ademas, flirtmentu por hiba un persona kasá na adulterio, i esaki por separá yunan kruelmente for di nan mayornan i mayornan inosente for di nan kasá. Pues, flirtmentu ta kousa desunion! P’esei, no ta nada straño ku Pablo a skirbi: “No ta asina boso a siña konosé Kristu.”​—Efe. 4:​20, 21.

11. Ki kambio Beibel ta animá kristiannan pa hasi?

¹¹ Pablo a enfatisá ku nos mester stòp di pensa na un manera ku ta kousa desunion i na lugá di esei kultivá bon aktitut ku ta yuda nos biba na pas ku otro hende. El a bisa: ‘Enkuanto boso manera di biba di ántes, boso pone un banda e hende bieu ku ta wòrdu korumpí konforme [su] pashonnan engañoso pa boso wòrdu renobá den e spiritu di boso mente i pa boso bisti e hende nobo, ku a wòrdu kreá segun Dios den hustisia i santidat berdadero.’ (Efe. 4:​22-24) Awor, kon nos por ‘wòrdu renobá den e spiritu di nos mente’? Nos tin ku meditá ku apresio riba loke nos ta siña for di e Palabra di Dios i riba e ekselente ehèmpel di kristiannan maduro. Di e manera ei, nos ta hasi esfuerso pa kultivá un personalidat nobo, “kreá segun Dios” su boluntat.

Desaroyá Bon Manera di Papia

12. Dikon ora nos ta papia bèrdat nos ta promové union, i dikon ta difísil pa algun hende papia bèrdat?

¹² Ta masha importante pa miembronan di famia òf di kongregashon papia bèrdat ku otro. Komunikashon franko, abierto i bondadoso por hala hende serka otro. (Juan 15:15) Kiko ta pasa si un persona ta gaña? E persona ku el a gaña lo pèrdè konfiansa den dje ora e realisá esaki. P’esei, nos por komprondé dikon Pablo a skirbi: “Kada un di boso papia bèrdat ku su próhimo, pasobra nos ta miembro di otro.” (Efe. 4:25) Kisas pa un persona  ku a kustumbrá gaña for di chikitu ta difísil pa e kuminsá papia bèrdat. Pero Yehova ta apresiá e esfuerso ku e ta hasi pa papia bèrdat i lo yud’é.

13. Kon nos por evitá abla ofensivo?

¹³ Yehova ta siña nos promové rèspèt i union, tantu den kongregashon komo den famia. P’esei, e ta siña nos kon pa usa nos lenga. Beibel ta bisa: “No laga ningun palabra dañino sali for di boso boka . . . Laga tur amargura, furia, rabia, griteria i kalumnia [“abla ofensivo,” NW] wòrdu kitá for di boso, huntu ku tur malisia.” (Efe. 4:​29, 31) Un manera pa evitá abla ofensivo ta di kultivá mas rèspèt pa otro. Por ehèmpel, un hòmber ku ta papia na un manera ofensivo ku su kasá mester hasi esfuerso pa kambia su aktitut na armonia ku loke e ta siña, esta, ku Yehova ta onra hende muhé. Sí, Dios ta asta ungi algun hende muhé, dunando nan e speransa di por reina huntu ku Kristu. (Gal. 3:28; 1 Ped. 3:7) Di otro banda, un esposa ku tin e kustumber di grita su kasá tambe mester sintié motivá pa hasi kambio ora e siña kon Hesus a dominá su mes ora el a ser provoká.​—1 Ped. 2:​21-23.

14. Dikon ta peligroso ora un persona no ta kontrolá su rabia?

¹⁴ Hopi bes, abla ofensivo ta resultado di rabia deskontrolá. Esaki tambe por separá hende for di otro. Rabia ta meskos ku kandela. Fásilmente e por bira grandi i kousa desaster. (Pro. 29:22) P’esei, asta si un persona tin bon motibu pa ekspresá su mal kontentu, e tin ku kontrolá su rabia pa e no hasi daño na su bon relashon ku otro hende. Kristiannan tin ku hasi esfuerso pa nan ta hende ku ta kla pa pordoná, ku no ta karga renkor i ku no ta sigui papia tokante un asuntu. (Sal. 37:8; 103:​8, 9; Pro. 17:9) Pablo a konsehá e efesionan: “Rabia, ma no hasi piká; no laga solo baha riba boso rabia, i no duna Diabel oportunidat.” (Efe. 4:​26, 27) Si un persona no ta kontrolá su rabia, e ta duna Diabel oportunidat pa sembra desunion i asta kousa konflikto den kongregashon.

15. Kiko lo por ta e resultado si nos kohe algu ku no ta di nos?

¹⁵ Un otro manera ku nos por kontribuí na union den kongregashon ta di respetá propiedat di otro hende. Beibel ta bisa: “Laga esun ku ta hòrta, no hòrta mas.” (Efe. 4:28) Generalmente ta reina un ambiente di konfiansa den e pueblo di Yehova. Pues, si un kristian kohe algu ku no ta di dje, e ta hasi daño na e bunita union ei i ta abusá di e konfiansa ku tin entre rumannan.

Amor pa Dios Ta Uni Nos

16. Kon nos por usa abla edifikante pa fortalesé nos union?

¹⁶ Amor pa Dios ta motivá nos tur pa trata otro ku amor; p’esei, e kongregashon kristian ta uní. Apresio pa Yehova su bondat ta motivá nos pa hasi esfuerso sinsero pa apliká e siguiente konseho: “[Papia] palabra ku ta bon pa edifikashon, konforme e nesesidat di e momento, pa esaki por duna grasia na esnan ku ta tende. I sea kariñoso ku otro, miserikòrdioso, pordonando otro, meskos ku Dios den Kristu tambe a pordoná boso.” (Efe. 4:​29, 32) Sí, Yehova bondadosamente ta pordoná hende imperfekto manera nos. Nos tambe no mester pordoná otronan apesar di nan fayonan?

17. Dikon nos tin ku hasi esfuerso sinsero pa promové union?

¹⁷ E union ku ta reina den e pueblo di Dios ta duna gloria na Yehova. Su spiritu santu ta motivá nos den vários manera pa promové union. I nos siguramente no ke bai kontra e guia di Dios su spiritu. Pablo a skirbi: “No hasi spiritu santu di Dios tristu.” (Efe. 4:30) Union ta un tesoro ku ta bale la pena pa protehá. E ta duna goso na tur esnan ku ta kontribuí na dje, i e ta duna gloria na Yehova. ‘P’esei, sea imitadónan di Dios, manera yunan stimá, i kana den amor.’​—Efe. 5:​1, 2.

[Nota]

Kon Lo Bo Kontestá?

• Ki kualidatnan ta promové union entre kristiannan?

• Kon nos kondukta por promové union den kongregashon?

• Kon nos manera di papia por yuda nos kooperá ku otro?

[Preguntanan di Estudio]

[Plachi na página 20]

Hende di vários background ta uní

[Plachi na página 21]

Bo ta konsiente di e peligernan di flirtmentu?