SIN duda bo a ripará ku mayoria di religion ta pone énfasis riba kasnan di orashon luhoso i ta stipulá oranan spesífiko ku mester hasi orashon. Akaso Beibel ta mustra ku nos por hasi orashon solamente na un sierto lugá i na sierto ora?

Beibel ta mustra ku tin okashonnan adekuá pa hasi orashon. Por ehèmpel, promé ku Hesus a kome ku su siguidónan, el a gradisí Dios den orashon. (Lukas 22:17) I ora su disipelnan a reuní pa adorashon, nan tabata hasi orashon huntu. Di e manera ei, nan a sigui ku un kustumber ku tabata eksistí hopi tempu kaba den e snoanan hudiu i den e tèmpel na Yerusalèm. Tabata Dios su intenshon pa e tèmpel ta “un kas di orashon pa tur nashon.”​—Marko 11:17.

Ora sirbidónan di Dios ta reuní i ún di nan ta hasi orashon na fabor di e grupo, nan petishonnan por duna bon resultado. Pa agradá Dios e orashon mester ta basá riba prinsipio bíbliko i e grupo mester ta uní den pensamentu. E orashon kisas asta ta konmové Dios pa hasi kos ku di otro manera lo e no a hasi. (Hebreonan 13:​18, 19) Testigunan di Yehova ta resa regularmente na nan reunionnan. Bo ta keda kordialmente invitá pa bini na un Salòn di Reino serka di bo kas i skucha e orashonnan ei pa bo mes.

Sinembargo, Beibel no ta mustra ku hende mester hasi orashon na sierto ora i na un sierto lugá. Den Beibel, nos ta lesa di sirbidónan di Dios ku a hasi orashon unda ku ta i ki ora ku ta. Hesus a bisa: “Ora bo ta hasi orashon, bai den bo kamber di mas paden, i ora bo a sera bo porta, hasi orashon na bo Tata ku ta den skondí; i bo Tata, ku ta mira den skondí, lo rekompensá bo.”​—Mateo 6:6.

Esei no ta atraé bo? En realidat bo por aserka e Soberano di universo kualke ora, den privá i bo por tin e siguransa ku lo e skucha bo. P’esei, no ta nada straño ku Hesus hopi bes tabata buska manera pa e ta su so pa e hasi orashon! Un biaha el a pasa henter un anochi ta resa na Dios. Evidentemente, e tabata buska Dios su guia den un desishon masha importante.​—Lukas 6:​12, 13.

Beibel ta papia di otro hende hòmber i muhé ku a hasi orashon ora nan mester a tuma desishonnan serio òf enfrentá desafionan. Tin bes nan tabata hasi orashon na bos haltu i tin biaha den silensio; nan tabata hasi orashon den grupo i ora nan tabata nan so. E kos importante ta ku nan a hasi orashon. Dios asta ta invitá su sirbidónan: “Hasi orashon sin stòp.” (1 Tesalonisensenan 5:17) E no ta kansa di skucha e orashonnan di esnan ku ta hasi su boluntat. E invitashon ei no ta un muestra di Yehova su amor?

Klaru ku den un mundu kaminda hende ta duda di tur kos, hopi ta puntra nan mes si orashon realmente ta algu práktiko. Kisas bo ta puntra, ‘Orashon realmente por yuda mi?’