ORASHON ta yuda nos ku algu? Beibel ta mustra ku sí, orashon di sirbidónan fiel di Dios realmente ta benefisiá nan. (Lukas 22:40; Santiago 5:13) De echo, orashon ta trese hopi benefisio, tantu den sentido spiritual komo emoshonal i asta físiko. Kon asina?

Wèl, laga nos bisa ku bo tin un yu ku a haña un regalo. Lo bo siñ’é ku djis sinti apresio so ta basta? Òf lo bo siñ’é tambe pa ekspresá su apresio? Ora nos ta ekspresá nos sintimentunan, nos ta bira mas konsiente di nan i nos ta mehorá nos kualidatnan. Esei no ta e kaso tambe ora nos ta papia ku Dios? Klaru ku sí! Konsiderá algun ehèmpel:

Orashon di gradisimentu. Ora nos gradisí nos Tata pa e bon kosnan ku pasa ku nos, nos ta enfoká riba nos bendishonnan. Komo resultado nos lo haña mas apresio i nos lo ta mas felis i positivo.​—Filipensenan 4:6.

Ehèmpel: Hesus a ekspresá gradisimentu pa e manera ku su Tata a skucha i kontestá su orashonnan.​—Juan 11:41.

Orashon pa pordon. Ora nos pidi Dios pordon, nos ta hasi nos konsenshi skèrpi atrobe, nos sintimentu di repentimentu ta bira mas profundo i nos ta bira mas konsiente di e seriedat di nos piká. Ademas, nos ta kita un peso for di nos konsenshi.

Ehèmpel: David a hasi orashon pa ekspresá repentimentu i tristesa.​—Salmo 51.

Orashon pa guia i sabiduria. Ora nos pidi Yehova guia òf sabiduria pa nos tuma bon desishon, nos ta mustra ku di bèrdat nos ta humilde. Esei por kòrda nos di nos limitashonnan i yuda nos haña mas konfiansa den nos Tata selestial.​—Proverbionan 3:​5, 6.

Ehèmpel: Salomon humildemente a pidi Yehova pa dun’é guia i sabiduria pa e por goberná Israel.​—1 Reinan 3:​5-12.

Orashon durante angustia. Si nos deshogá nos mes serka Dios ora nos ta emoshonalmente intrankil, nos ta haña alivio i nos lo konfia den Yehova en bes di konfia den nos mes.​—Salmo 62:8.

Ehèmpel: Rei Asa a hasi orashon ora e mester a enfrentá enemigunan poderoso.​—2 Krónikanan 14:11.

Orashon pa bienestar di hende den nesesidat. Ora nos ta hasi orashon pa otro hende, esei ta yuda nos vense egoismo i yuda nos haña mas kompashon i empatia.

Ehèmpel: Hesus a hasi orashon pa su siguidónan.​—Juan 17:​9-17.

Orashon di alabansa. Ora nos ta alabá Yehova pa su obranan i kualidatnan maravioso, nos rèspèt i apresio p’e ta krese. Ademas, e orashonnan ei ta yuda nos hala mas serka di nos Dios i Tata.

Ehèmpel: David sinseramente a alabá Dios pa su kreashon.​—Salmo 8.

Un bendishon mas ku orashon por trese kuné ta “e pas di Dios, ku ta surpasá tur komprondementu.” (Filipensenan 4:7) No ta fásil pa hende haña pas mental den e mundu yen di problema akí. E pas akí asta ta trese benefisio físiko kuné. (Proverbionan 14:30) Pero e bendishonnan ku orashon ta trese kuné ta bini solamente debí na nos propio esfuerso? Òf tin algu mas importante enbolbí?