E PREGUNTA aki riba ta lanta hopi emoshon i kuriosidat. Beibel ta mustra ku Yehova ta skucha orashon awe. Pero, ta dependé di nos mes si e ta skucha nos orashon òf nò.

Hesus a akusá e lidernan religioso di su tempu ku nan tabata hasi orashon na un manera hipókrita; nan tabata interesá solamente den duna hende e impreshon ku nan ta hustu. Hesus a bisa ku e hòmbernan ei “ya tin nan pago kaba,” loke ta nifiká ku nan a risibí solamente loke mas nan tabata deseá, esta, atenshon di hende, i no loke nan tabatin mester, esta, pa Dios skucha nan orashon. (Mateo 6:5) Awe tambe, hopi hende ta hasi orashon di akuerdo ku nan propio boluntat i no segun Dios su boluntat. I debí ku nan ta ignorá e prinsipionan di Beibel ku nos a papia riba dje, Dios no ta skucha nan orashon.

Pero, kiko di abo? Dios lo skucha i kontestá bo orashonnan? Esaki no ta dependé di bo rasa, nashonalidat ni posishon sosial. Beibel ta sigurá nos: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echonan 10:​34, 35) Abo ta un hende asina? Si bo ta teme Dios, lo bo tin rèspèt profundo p’e i lo bo tin miedu di desagrad’é. Si bo ta hasi hustisia, bo ta buska pa hasi loke Dios ta bisa ta hustu en bes di sigui bo propio boluntat òf di otro hende. Di bèrdat bo ke pa Dios skucha bo orashonnan? Beibel ta mustra bo kon bo por logra esei. *

Klaru ku hopi hende ke pa Dios kontestá nan orashon milagrosamente. Pero, asta den tempu di Beibel, masha poko bes Dios a hasi e milagernan ei. Tabatin bes ku a dura siglonan promé ku un milager tuma lugá atrobe. Ademas, Beibel ta mustra ku milagernan a stòp di tuma lugá despues di e dianan di e apòstelnan. (1 Korintionan 13:​8-10) Pero, esei ke men ku Dios no ta skucha nos orashonnan awe? Niun ora so! Konsiderá algun manera ku Dios ta kontestá orashon.

Dios ta duna sabiduria. Yehova ta e Fuente supremo di berdadero sabiduria. E ta kompartié generosamente ku esnan ku ke su guia i ku ke biba di akuerdo kuné.​—Santiago 1:5.

Dios ta duna spiritu santu ku tur su benefisionan. Spiritu santu ta Dios su forsa aktivo. No tin ningun forsa mas poderoso ku esei. E por yuda nos wanta prueba. E por duna nos pas ora nos ta preokupá. E por yuda nos kultivá otro kualidatnan bunita i atraktivo. (Galationan 5:​22, 23) Hesus a sigurá su siguidónan ku Dios ta duna spiritu santu generosamente.​—Lukas 11:13.

Dios ta duna konosementu na hende ku ta buska Dios sinseramente. (Echonan 17:​26, 27) Rònt mundu, tin hende ku sinseramente ta buska e bèrdat. Nan ke siña konosé Dios—nan ke sa su nòmber, kiko ta su propósito pa e tera i hende, i kon nan por hala serka dje. (Santiago 4:8) Testigunan di Yehova hopi bes ta topa hende asina i gustosamente nan ta kompartí kontesta ku Beibel ta duna pa e preguntanan ei.

Bo a aseptá e revista akí pasobra bo ta buskando Dios? Kisas esaki ta e manera ku e ta kontestá bo orashon.