Bo Ta Tuma Inisiativa pa Mustra Onor na Bo Rumannan?

“Stima otro ku amor fraternal; duna preferensia na otro den onor.”​—ROM. 12:10.

1, 2. (a) Ki instrukshon Pablo a duna den e karta ku el a skirbi e kristiannan na Roma? (b) Ki preguntanan nos lo konsiderá?

DEN e karta ku apòstel Pablo a skirbi e kristiannan na Roma, el a enfatisá dikon ta masha importante pa rumannan den kongregashon stima otro. El a rekordá nos ku nos amor mester ta “sin hipokresia.” Ademas di esei, el menshoná “amor fraternal.” I tuma nota ku el a bisa ku nos mester desplegá e amor ei ku “tierno kariño [NW].”​—Rom. 12:​9, 10a.

² Ta klaru ku desplegá amor fraternal ta enserá mas ku djis sinti sierto afekto pa otro hende. Nos mester demostrá e sintimentunan ei ku echo. Si nos no hasi esei, kon hende por sa ku nos ta stima nan? Ta p’esei, Pablo a agregá e instrukshon akí: “Duna preferensia na otro den onor,” esta, tuma inisiativa pa mustra onor. (Rom. 12:10b) Kiko mustra onor ta enserá? Dikon ta importante pa nos tuma inisiativa pa mustra onor na nos rumannan? I kon nos por hasi esei?

Rèspèt i Onor

3. Ki nifikashon e palabra “onor” tin den e idiomanan original di Beibel?

³ E palabra hebreo prinsipal tradusí komo “onor” ta nifiká literalmente “peso.” Pues, un persona ku ta ser onrá ta ser konsiderá komo un persona di peso òf importante. Hopi bes, e mesun palabra hebreo ei ta ser tradusí komo “gloria” den e Skritura, i esei ta indiká e rèspèt profundo ku otronan tin pa esun ku nan ta onra. (Gén. 45:13) E palabra griego tradusí komo ‘onor’ den Beibel ta transmití e idea di rèspèt, balor i presiosidat. (Luk. 14:10) Sí, e hende ku nos ta onra ta presioso i di gran balor pa nos.

4, 5. Ki relashon tin entre onor i rèspèt? Ilustrá.

⁴ Kiko mustra onor na otro hende ta enserá? Esaki ta kuminsá ku rèspèt. De echo, hopi bes hende ta usa e palabranan “onor” i “rèspèt” huntu, pasobra nan tin un relashon estrecho ku otro. Onor ta un muestra di rèspèt. Ku otro palabra, e rèspèt ku nos tin pa nos ruman ta indiká prinsipalmente kon nos ta mir’é, miéntras ku e onor ku nos ta mustra na nos ruman ta referí na e manera ku nos ta trat’é.

⁵ P’esei, un kristian no por mustra berdadero onor na su ruman den fe si e no ta respet’é di kurason. (3 Juan 9, 10) Meskos ku un mata mester di bon tera pa e por bona i keda na bida, onor mester ta basá riba rèspèt profundo pa e por ta berdadero i duradero. Di otro manera, tardi òf trempan, lo e kaba na nada meskos ku un mata plantá den mal tera. Ta p’esei, promé ku Pablo a instruí e kristiannan na Roma pa mustra onor na otro, el a bisa nan: ‘Laga boso amor ta sin hipokresia.’​—Rom. 12:9; lesa 1 Pedro 1:22.

Onra Esnan Kreá “den e Semehansa di Dios”

6, 7. Dikon nos tin ku respetá otro hende?

⁶ Siendo ku rèspèt profundo ta un faktor klave pa mustra onor, nunka nos mester lubidá e motibunan ku Beibel ta duna nos pa respetá tur nos rumannan. P’esei, laga nos konsiderá dos di e motibunan ei.

 ⁷ Distinto di otro kriatura riba tera, hende a ser kreá “den e semehansa di Dios.” (Sant. 3:9) P’esei, nos tin kualidatnan ku Dios mes ta desplegá, manera amor, sabiduria i hustisia. Pero nos a risibí algu mas di nos Kreador. E salmista a bisa: “O SEÑOR, . . . abo ku a pone bo splendor mas ariba di e shelunan! . . . Bo a hasi [hende] un poko ménos ku e angelnan, i ta koron’é ku gloria i mahestat [“onor,” BPK]!” (Sal. 8:​1, 4, 5; 104:1) * Sí, Dios a koroná, òf dòrna, hende en general ku un sierto grado di dignidat, gloria i onor. Pues, ora nos ta trata hende ku dignidat, òf ku rèspèt, de echo, nos ta onra Yehova, e Fuente di dignidat. I si hende en general mes nos tin ku respetá, anto nos tin muchu mas motibu ainda pa respetá nos rumannan den fe!​—Juan 3:16; Gal. 6:10.

Nos Ta Ún Famia

8, 9. Segun Pablo, ki motibu nos tin pa respetá nos rumannan den fe?

⁸ Pablo a menshoná un otro motibu pakiko nos mester respetá otro. Djis promé ku el a instruí kristiannan pa mustra onor na otro, el a bisa nan: “Den amor fraternal tene tierno kariño pa otro” [NW]. E ekspreshon griego tradusí komo “tierno kariño” ta referí na un laso fuerte ku ta uni miembronan di un famia ku ta stima i apoyá otro. Usando e ekspreshon ei, Pablo a enfatisá ku entre e miembronan di kongregashon mester tin un laso fuerte i kaluroso meskos ku ta eksistí den un famia uní. (Rom. 12:5) Es mas, kòrda ku Pablo a dirigí e palabranan ei na kristiannan ungí, kendenan Yehova a adoptá komo su yunan. Pues, komo ku nan tabatin e mesun Tata, den un sentido masha spesial, nan tabata un famia uní. P’esei, kristiannan ungí den tempu di Pablo tabatin un bon motibu pa respetá otro. I esaki ta konta tambe pa kristiannan ungí awe.

⁹ Kiko di e “otro karnénan”? (Juan 10:16) Ounke nan no a ser adoptá ainda komo yunan di Dios, nan por yama otro “ruman” pasobra huntu nan ta forma ún famia mundial i uní. (1 Ped. 2:17; 5:9) Pues, si e otro karnénan ta komprondé bon kiko nan ta bisando ora nan ta yama otro “ruman,” nan tambe tin un bon motibu pa mustra rèspèt profundo pa nan rumannan den fe.​—Lesa 1 Pedro 3:8.

Dikon Ta Asina Importante pa Mustra Onor?

10, 11. Dikon ta asina importante pa respetá i onra otro?

¹⁰ Dikon ta asina importante pa respetá i onra otro? Pasobra, mustrando onor na nos rumannan, nos ta kontribuí mashá na e bienestar i union di henter e kongregashon.

¹¹ Ta klaru ku komo kristiannan berdadero, nos ta bon konsiente ku nos fuentenan prinsipal di fortalesa ta nos bon relashon ku Yehova i e apoyo di su spiritu santu. (Sal. 36:7; Juan 14:26, NW) Pero na mesun tempu, ora nos rumannan ta demostrá ku nan ta balorá nos, esaki ta enkurashá nos. (Pro. 25:11) Sí, nos ta sinti nos animá ora un persona bisa òf hasi algu ku ta demostrá ku e ta respetá nos. Esaki ta duna nos mas forsa pa sigui kana ku goso i determinashon riba e kaminda di bida. Probablemente, bo tambe a yega di sinti asina.

12. Kon nos kada un por yuda kontribuí na e kalor i amor ku ta reina den kongregashon?

¹² Siendo ku Yehova sa ku hende tin e nesesidat básiko di ser tratá ku rèspèt, korektamente e ta urgi nos mediante su Palabra pa “sea esun promé pa respetá otro.” (Rom. 12:10, BPK; lesa Mateo 7:12.) Esaki ta un konseho ku nos por sigui tur ora i bou di tur sirkunstansia. Esnan ku hasi esei ta yuda kontribuí na e kalor i amor ku ta reina den e hermandat kristian. P’esei, ta bon pa nos para ketu i puntra nos mes: ‘Ki dia tabata e último biaha ku mi a bisa òf hasi algu pa demostrá un ruman den kongregashon ku mi ta respet’é profundamente?’​—Rom. 13:8.

 Nos Tur Mester Tuma Inisiativa

13. (a) Ken mester tuma inisiativa pa mustra onor? (b) Kiko Pablo su palabranan na Romanonan 1:7 ta indiká?

¹³ Ken mester tuma inisiativa pa mustra onor? Den e karta ku Pablo a skirbi e hebreonan, el a deskribí ansianonan kristian komo ‘lider.’ (Heb. 13:17) Ta sierto ku ansianonan ta dirigí vários aktividat di kongregashon. Pero, komo wardadónan di e tou, nan mester tuma inisiativa tambe pa mustra onor na nan rumannan den fe—inkluso na nan kompañeronan ansiano. Por ehèmpel, ora ansianonan ta reuní pa konsiderá e nesesidatnan spiritual di kongregashon, nan ta mustra onor na otro, skuchando ku atenshon ora nan kompañeronan ta papia. Ademas, nan ta tene kuenta ku punto di bista i komentario di tur ansiano ora di tuma desishon; esei tambe ta un manera ku nan ta mustra onor na otro. (Echo. 15:​6-15) Pero, nos tin ku kòrda ku e karta ku Pablo a skirbi e romanonan no tabata pa e ansianonan so, sino pa henter e kongregashon. (Rom. 1:7) Pues, den un sentido amplio, e instrukshon pa tuma inisiativa pa mustra onor ta konta pa nos tur awe.

14. (a) Ilustrá e diferensia entre mustra onor i tuma inisiativa pa mustra onor. (b) Ki pregunta nos tin ku hasi nos mes?

¹⁴ Tuma nota tambe di e siguiente detaye di Pablo su konseho. El a urgi su rumannan na Roma pa no djis mustra onor, sino pa duna preferensia den onor, esta, pa tuma inisiativa pa mustra onor. Kiko ta e diferensia entre djis mustra onor i tuma inisiativa pa mustra onor? Pensa riba e ehèmpel akí. Un maestro lo urgi un grupo di studiante bon siñá pa nan siña lesa? Nò. Nan sa lesa kaba. Mas bien, e por yuda nan lesa mihó. Di mes manera, nos ta mustrando onor kaba na nos rumannan, pasobra e amor ku ta identifiká nos komo kristiannan berdadero ta motivá nos pa hasi esei. (Juan 13:35) Sinembargo, meskos ku e studiantenan bon siñá por sigui progresá, mehorando nan abilidat di lesa, nos tambe por sigui progresá, tumando inisiativa pa mustra onor. (1 Tes. 4:​9, 10) Pues, nos tur mester tuma inisiativa pa mustra onor. Nos por puntra nos mes: ‘Ami ta hasi esei? Mi ta tuma inisiativa pa mustra onor no otro hende den kongregashon?’

Onra “Hende Pober”

15, 16. (a) Ken nos no mester pasa por alto ora di mustra onor, i dikon? (b) Kiko por revelá ku nos ta respetá nos rumannan di kurason?

¹⁵ Ken nos no mester pasa por alto ora di mustra onor den kongregashon? E Palabra di  Dios ta bisa: “Esun ku tene miserikòrdia di un hende pober ta fia SEÑOR, i E lo pag’é bèk pa su bon obra.” (Pro. 19:17) Ki efekto e prinsipio tras di e palabranan akí mester tin riba nos ora di tuma inisiativa pa mustra onor na otronan?

¹⁶ Probablemente bo ta di akuerdo ku mayoria di hende ta dispuesto pa mustra onor na nan superiornan. Pero, e mesun hendenan akí kisas ta trata hende ku nan ta konsiderá inferior ku poko òf sin niun tiki rèspèt. Sinembargo, Yehova sí no ta asina. El a bisa: “Esnan ku onra mi, lo mi onra.” (1 Sam. 2:30; Sal. 113:​5-7) Pues, Yehova ta onra tur hende ku ta sirbié i ta mustra onor na dje. E no ta ignorá hende “pober.” (Lesa 1 Samuel 2:8; 2 Kró. 16:9) I ta klaru ku nos ke imitá Yehova. P’esei, ta bon pa nos analisá nos mes pa wak si nos ta mustra berdadero onor na tur hende; nos mester puntra nos mes: ‘Kon mi ta trata rumannan ku no tin un asignashon prominente, òf responsabel, den kongregashon?’ (Juan 13:​14, 15) E kontesta riba e pregunta akí ta revelá kuantu rèspèt nos tin pa otro hende.​—Lesa Filipensenan 2:​3 i 4.

Nos Ta Mustra Onor, Dunando di Nos Tempu

17. Kua ta un manera importante ku nos por tuma inisiativa pa mustra onor na otro hende, i dikon?

¹⁷ Kua ta un manera importante ku nos por tuma inisiativa pa mustra onor na tur hende den kongregashon? Dunando nan algu ku ta masha balioso: nos tempu. Komo kristiannan, nos tin un bida masha okupá. I fuera di esei, nos tin vários aktividat importante di kongregashon ku nos tin ku kumpli kuné. I tur e kosnan ei ta tuma tempu. Pues no ta nada straño ku nos tempu ta balioso pa nos. P’esei, nos ta komprondé tambe ku nos no mester eksigí demasiado tempu di nos rumannan. I nos ta apresiá ora otronan den kongregashon ta komprondé ku nan no mester eksigí demasiado tempu di nos.

18. Manera e plachi na página 26 ta mustra, kon nos por mustra ku nos ta dispuesto pa dediká poko tempu na nos rumannan?

¹⁸ No opstante, nos—spesialmente esnan ku ta sirbi komo wardadó den kongregashon—ta rekonosé tambe ku si nos ta dispuesto pa interumpí nos aktividatnan pa dediká tempu na nos rumannan, esei ta demostrá ku nos ta respetá nan. Kon asina? Wèl, ora nos ta stòp ku nos aktividatnan pa dediká tempu na nos ruman, ta komo si fuera nos ta bis’é: ‘Bo ta asina balioso pa mi ku dediká tempu na bo ta mas importante ku sigui hasi loke mi ta hasiendo.’ (Mar. 6:​30-34) Lo kontrario tambe ta bèrdat. Si nos ta vasilá pa laga nos aktividatnan pa dediká un poko tempu na nos ruman, nos por dun’é e impreshon ku nos no ta balor’é. Ta klaru ku nos tur ta komprondé tambe ku tin biaha bo no por interumpí un asuntu urgente. Pero e echo ku nos ta dispuesto òf nò pa duna algu di nos tempu na nos rumannan ta bisa kuantu rèspèt nos tin pa nan.​—1 Kor. 10:24.

Sea Determiná pa Tuma Inisiativa

19. Fuera di duna di nos tempu, den ki otro manera nos por mustra onor na nos rumannan?

¹⁹ Fuera di duna di nos tempu, den ki otro manera importante nos por mustra onor na nos rumannan? Un manera ta di presta atenshon na nan. Den esaki tambe Yehova a pone un ekselente ehèmpel pa nos. E salmista David a bisa: “E wowonan di SEÑOR ta riba e hustunan, i su oreanan ta atento pa skucha nan sklamashon.” (Sal. 34:15) Nos ta hasi esfuerso pa imitá Yehova, prestando tur atenshon—ku wowo i orea—na nos rumannan, spesialmente  na esnan ku aserká nos pa yudansa. Ora nos ta hasi esei, nos ta mustra onor na nan.

20. Relashoná ku mustramentu di onor, kiko nos mester kòrda?

²⁰ Manera nos a konsiderá, ta bon pa nos keda tene na mente dikon nos mester tin un rèspèt profundo pa nos rumannan. Ademas, nos ta buska oportunidat pa nos ta promé pa mustra onor na tur hende, inkluso esnan pober. Asina, nos ta fortalesé e laso di amor i e union ku ta reina den kongregashon. P’esei, laga nos tur sigui mustra onor i, mas importante ainda, tuma inisiativa pa mustra onor na nos rumannan. Abo ta desididu pa hasi esei?

[Nota]

Bo Ta Kòrda?

• Ki relashon tin entre onor i rèspèt?

• Ki motibu nos tin pa mustra onor na nos rumannan?

• Dikon ta importante pa mustra onor na otro?

• Den ki maneranan nos por mustra onor na nos rumannan?

[Preguntanan di Estudio]

[Plachi na página 26]

Kon nos por mustra onor na nos rumannan?