‘Ken A Konosé e Mente di Yehova?’

“‘Ken a konosé e mente di [Yehova], ku e por instruyé?’ Ma nos tin e mente di Kristu.”​—1 KOR. 2:16.

1, 2. (a) Ki difikultat hopi hende tin? (b) Kiko nos tin ku kòrda relashoná ku nos manera di pensa i esun di Yehova?

BO A yega di tin problema pa komprondé un otro hende su manera di pensa? Kisas bo a kaba di kasa i bo tin un poko problema pa komprondé bo kasá su manera di pensa. Ta sierto ku hende hòmber i hende muhé ta pensa i asta ta ekspresá nan mes diferente for di otro. De echo, den algun kultura, hòmbernan ta komuniká ku otro den un dialekto kompletamente diferente for di esun ku hende muhé ta usa. Ademas, diferensia di kultura i di idioma por resultá den maneranan diferente di pensa i di komportá. Sinembargo, mas bo siña konosé un persona, mas chèns bo tin di kuminsá komprondé su manera di pensa.

² Si hende mes ta pensa diferente for di otro, no ta nada straño ku nos manera di pensa ta masha diferente for di esun di Yehova. Pa medio di su profeta Isaias, Yehova a bisa e israelitanan: “Mi pensamentunan no ta boso pensamentunan, ni boso kamindanan no ta mi kamindanan.” I pa ilustrá esaki, Yehova a sigui bisa: “Meskos ku e shelunan ta mas haltu ku tera, asina mi kamindanan ta mas haltu ku boso kamindanan, i mi pensamentunan mas haltu ku boso pensamentunan.”​—Isa. 55:​8, 9.

3. Kua ta e dos maneranan ku nos por haña ‘komunion íntimo ku Yehova?’

³ Pero, esei ta nifiká ku nos no mester hasi esfuerso pa komprondé Yehova su manera di pensa? Nò. Ounke nunka nos no por komprondé Yehova su manera di pensa kompletamente, Beibel ta animá pa nos tin amistat, òf ‘komunion, íntimo ku Yehova.’ (Lesa Salmo 25:14; Proverbionan 3:32.) Un manera ku nos por logra esei ta di meditá ku rèspèt i apresio riba loke su Palabra, Beibel ta siña nos tokante su manera di aktua. (Sal. 28:5) Un otro manera ta di siña konosé “e mente di Kristu,” kende ta “e imágen di e Dios invisibel.” (1 Kor. 2:16; Kol. 1:15) Ora nos ta tuma tempu pa studia relatonan bíbliko i ta meditá riba nan, nos por kuminsá komprondé Yehova su manera di pensa i su kualidatnan.

Tene Kuidou ku Tendensia Robes

4, 5. (a) Ki tendensia robes nos tin ku evitá? Splika. (b) Ki eror e israelitanan a kometé?

⁴ Ora nos ta meditá riba Yehova su echonan, nos tin ku evitá e tendensia di husga Dios a base di normanan humano. Beibel ta referí na e tendensia akí na Salmo 50:21. Einan Yehova ta bisa: “Bo a kere ku ami ta meskos ku bo.” Ta manera un erudito riba tereno di Beibel a bisa mas ku 175 aña pasá: “Hende tin e tendensia di husga Dios a base di nan propio norma- i leinan i nan ta pensa ku Dios tambe ta mará na e leinan ei.”

⁵ Nos tin ku tene kuidou pa no forma un opinion tokante Yehova a base di nos propio norma- i deseonan. Dikon nos mester evitá esaki? Pasobra segun ku nos ta studia e Skritura, nos por topa algun pasashi relashoná ku Yehova su echonan ku for di nos punto di bista imperfekto i limitá por parse inkorekto. E israelitanan di antigwedat a kometé e eror  ei i a saka un konklushon robes relashoná ku Yehova su manera di trata nan. Tuma nota di loke Yehova a bisa nan: “Boso ta bisa: ‘E kaminda di Señor no ta rekto.’ Tende awor, o kas di Israel! Ta mi kaminda no ta rekto? No ta mas bien ku ta esnan di boso no ta rekto?”​—Eze. 18:25.

6. Ki lès Jòb a siña, i kon nos por benefisiá di su eksperensia?

⁶ Pa evitá e eror di husga Yehova a base di nos propio normanan ta importante pa rekonosé ku nos punto di bista ta limitá i tin biaha asta totalmente inkorekto. Jòb mester a siña esaki. Durante su periodo di sufrimentu, el a bira desesperá i tabata muchu preokupá ku su propio bienestar. Jòb a pèrdè e asuntunan mas importante for di bista. Pero na un manera bondadoso, Yehova a yud’é amplia su punto di bista. El a hasi Jòb mas ku 70 pregunta i ningun di nan e no por a kontestá. Asina Yehova a mustra Jòb kon limitá su komprondementu tabata. Jòb a reakshoná na un manera humilde i a kambia su manera di pensa.​—Lesa Jòb 42:​1-6.

Kon Nos Por Haña “e Mente di Kristu”?

7. Dikon un análisis di Hesus su aktividatnan ta yuda nos komprondé Yehova su manera di pensa?

⁷ Hesus a imitá su Tata perfektamente den tur loke el a bisa i hasi. (Juan 14:9) P’esei, un análisis di Hesus su aktividatnan ta yuda nos komprondé Yehova su manera di pensa. (Rom. 15:5, NW; Fil. 2:5) Pues, laga nos analisá dos relato for di e Evangelionan.

8, 9. Segun Juan 6:​1-5, ki situashon a pone Hesus hasi Felipe un pregunta, i dikon Hesus a hasi esei?

⁸ Imaginá bo e siguiente senario. Tabata djis promé ku Pasku Hudiu di aña 32 di nos era. Hesus su apòstelnan a kaba di regresá di Galilea, unda nan tabatin un ekselente kampaña di predikashon ku a kubri henter e region. Debí ku nan tabata kansá despues di tur e aktividat ei, Hesus a hiba nan na un lugá solitario nortwèst di e kosta di Laman di Galilea. Sinembargo, míles i míles di hende a sigui nan. Despues ku Hesus a kura esnan ku tabata enfermo i a siña e multitut hopi kos, a surgi un problema. Kon tur e hendenan akí por a haña algu di kome den e lugá isolá ei? Mirando e situashon ei, Hesus a puntra Felipe, kende tabata di e region ei: “Unda nos lo kumpra pan pa esakinan por kome?”​—Juan 6:​1-5.

⁹ Dikon Hesus a hasi Felipe e pregunta ei? Akaso Hesus no tabata sa kiko pa hasi? Nò. Kiko Hesus tabatin na mente anto? Apòstel Juan, kende tambe tabata presente na e okashon ei, a splika: ‘Hesus a bisa esaki pa pon’é na prueba; pasobra e mes tabata sa kiko e tabatin intenshon di hasi.’ (Juan 6:6) Sí, Hesus a pone su disipelnan na prueba pa wak kon nan a progresá spiritualmente. Ku e pregunta ei, el a pone nan pensa riba e asuntu i a duna nan oportunidat pa ekspresá nan fe den loke e por a hasi. Pero nan a mustra ku nan tabata falta fe i ku nan punto di bista tabata limitá. (Lesa Juan 6:​7-9.) Despues Hesus a hasi algu ku nan nunka por a imaginá nan mes. Pa medio di un milager, el a alimentá e míles di hendenan ei ku tabatin hamber.​—Juan 6:​10-13.

10-12. (a) Dikon Hesus no a kumpli mesora ku e petishon di e señora? Splika. (b) Kiko nos lo konsiderá awor?

¹⁰ E relato akí por yuda nos komprondé kon Hesus a pensa na un otro okashon. Djis despues ku el a alimentá e grupo grandi ei, Hesus i su apòstelnan a biaha bai nort, pafó di e frontera di Israel, den bisindario di Tiro i Sidon. Einan, nan a topa un señora ku no tabata hudiu i ku a roga Hesus pa kura su yu muhé. Na promé instante, Hesus a ignorá e señora. Pero ora el a sigui insistí, Hesus a bis’é: “Laga e yunan kome nan barika yen promé, pasobra no ta pas pa kohe pan di e yunan tir’é pa e kachónan.”​—Mar. 7:​24-27; Mat. 15:​21-26.

 ¹¹ Dikon Hesus a nenga di yuda e señora akí na promé instante? Akaso Hesus kier a pon’é na prueba pa mira su reakshon i dun’é chèns di demostrá su fe meskos ku el a hasi ku Felipe? Maske e relato bíbliko no ta mustra esei, ta parse ku Hesus su tono di bos no a deskurashá e señora. Den su komparashon, Hesus a usa un forma di e palabra hebreo pa ‘kachó’ ku no ta denigrante. Kisas Hesus tabata aktua manera un mayor ku ke duna su yu loke el a pidi, pero no ta indiká esei mesora. Dikon? Pasobra e mayor ke tèst e mucha pa wak kon determiná e mucha ta pa haña loke e ta pidi. Sea loke sea e motibu, unabes e señora a demostrá ku e tabatin fe, gustosamente Hesus a hasi loke el a pidi.​—Lesa Marko 7:​28-30.

¹² E dos relatonan akí for di e Evangelionan ta yuda nos komprondé “e mente di Kristu.” Laga nos wak awor kon nan ta yuda nos haña un mihó komprondementu di Yehova su manera di pensa.

Yehova Su Trato ku Moisés

13. Kon un bon komprondementu di Hesus su manera di pensa ta yuda nos?

¹³ Unabes nos sa kon Hesus ta pensa, nos por komprondé pasashinan di Beibel ku anteriormente kisas tabata difísil pa komprondé. Por ehèmpel, konsiderá loke Yehova a bisa Moisés despues ku e israelitanan a traha un bisé di oro pa nan adorá. El a bisa: “Mi a mira e pueblo akí, i ata, nan ta un pueblo kabesura. P’esei awor, laga mi ketu, pa mi rabia kima kontra nan i pa mi destruí nan; i di bo lo mi traha un nashon grandi.”​—Eks. 32:​9, 10.

14. Kon Moisés a reakshoná riba Yehova su palabranan?

¹⁴ E relato ta sigui bisa: “Moisés a supliká SEÑOR su Dios, i a bisa: ‘O SEÑOR, pakiko bo rabia ta kima kontra bo pueblo ku bo a saka for di tera di Egipto ku gran poder i ku un man poderoso? Pakiko e egipsionan mester bisa: “Ku mal intenshon el a saka nan pa mata nan den e serunan i pa destruí nan for di riba superfisie di tera”? Bira for di bo rabia ardiente i kambia bo idea di hasi daño na bo pueblo. Kòrda riba Abraham, Isaak i Israel, bo sirbidónan, na kendenan bo a hura pa bo mes i kendenan bo a bisa: “Lo mi multipliká boso desendientenan manera e streanan di e shelunan, i henter e tera akí, di kual mi a papia, lo mi duna bo desendientenan, i nan lo hered’é pa semper.”’ Asina SEÑOR a kambia su idea enkuanto e daño ku el a bisa ku e lo a hasi na su pueblo.”​—Eks. 32:​11-14. *

15, 16. (a) Ki oportunidat e palabranan di Yehova a duna Moisés? (b) Kiko tabata Yehova su desishon?

¹⁵ Moisés realmente tabatin ku korigí Yehova? Di ningun manera! Ounke Yehova a  ekspresá loke e tabatin intenshon di hasi, esei no tabata su huisio final. De echo, den e kaso akí, Yehova tabata tèst Moisés meskos ku Hesus a hasi despues ku Felipe i e señora no-hudiu. Kon asina? Komo ku Yehova a nombra Moisés komo mediadó entre E i e pueblo di Israel i a respetá Moisés su posishon, el a dun’é oportunidat di ekspresá su punto di bista. * Kon Moisés a reakshoná? El a laga frustrashon afekt’é i a probechá di e oportunidat pa animá Yehova pa legumai e pueblo di Israel i produsí un nashon grandi for di su propio desendientenan?

¹⁶ E manera ku Moisés a reakshoná a revelá su fe i konfiansa den Yehova su hustisia. E no tabata interesá den su propio bienestar; mas bien, e tabata preokupá pa e nòmber di Dios no wòrdu difamá. Asina Moisés a mustra bon kla ku el a komprondé e ‘mente di Yehova,’ esta, kon Yehova ta pensa tokante e asuntu akí. (1 Kor. 2:16) Kiko tabata e resultado? Debí ku Yehova no tabata determiná pa destruí e pueblo, e relato inspirá ta bisa ku el a ‘kambia di idea.’ Yehova no a trese e kalamidat ku el a bisa ku e tabatin intenshon di trese riba henter e pueblo.

Yehova Su Trato ku Abraham

17. Kon Yehova a mustra pasenshi ora Abraham a ekspresá su preokupashon?

¹⁷ Un otro ehèmpel ku ta mustra ku Yehova ta permití su sirbidónan ekspresá nan fe i konfiansa den dje tin di haber ku e petishon ku Abraham a hasi relashoná ku Sodoma. Segun e relato, ku pasenshi Yehova a permití Abraham hasié ocho pregunta. Na dado momento, Abraham a ekspresá e deseo sinsero akí: “Ku esei keda leu di bo pa hasi un kos asina, esta, mata e hustu huntu ku e malbado, asina ku e hustu i e malbado ta wòrdu tratá igual. Ku esei keda leu di bo! E Hues di henter mundu lo no hasi hustisia?”​—Gén 18:​22-33.

18. Kiko nos ta siña di e manera ku Yehova a trata ku Abraham?

¹⁸ Kiko e relato akí ta siña nos di Yehova su manera di pensa? Yehova tabatin mester di Abraham pa rasoná kuné pa yud’é tuma e desishon korekto? Nò. Ta klaru ku for di prinsipio Yehova por a bisa Abraham dikon el a tuma e desishon pa destruí Sodoma. Pero mediante e preguntanan ei, Yehova a duna Abraham tempu pa aseptá Su desishon i komprondé Su manera di pensa. Asina, Abraham a haña e chèns tambe di komprondé kon kompasivo i hustu Yehova ta. Sí, Yehova a trata Abraham manera un amigu.​—Isa. 41:8; Sant. 2:23.

Lès pa Nos

19. Kon nos por imitá Jòb?

¹⁹ Kiko nos a siña tokante ‘e mente di Yehova?’ Nos tin ku permití Yehova su Palabra yuda nos haña e komprondementu korekto di Su manera di pensa. Hamas nos mester husga Yehova a base di nos punto di bista, norma i manera di pensa limitá. Jòb a bisa: “[Dios] no ta un hende manera ami, ku mi por kontest’é, ku nos por bai huntu dilanti di hues.” (Jòb 9:32) Meskos ku Jòb, ora nos kuminsá komprondé Yehova su manera di pensa, nos tambe ta sinti nos motivá pa deklará:  “Tur loke m’a trese dilanti ta djis un punta di loke Dios a hasi; tur loke nos a tende ta djis un vrunvrun! Imaginá bo kon zonido poderoso di su poder por aplastá nos.”​—Jòb 26:14, BPK.

20. Kiko nos tin ku hasi si nos topa un pasashi bíbliko ku ta difísil pa komprondé?

²⁰ Segun ku nos ta lesa e Skritura, nos por topa ku pasashinan ku ta difísil pa komprondé. Kiko nos tin ku hasi, spesialmente si esakinan ta relashoná ku Yehova su manera di pensa? Si despues di a analisá e asuntu, ainda nos no ta komprond’é, nos por konsiderá esaki komo un prueba di nos konfiansa den Yehova. Nos mester kòrda ku tin biaha sierto pasashinan bíbliko ta duna nos e oportunidat pa demostrá ku nos ta konfia den Yehova i den e manera ku e ta ekspresá su kualidatnan. I nos mester rekonosé humildemente ku nos no ta komprondé tur loke Yehova ta hasi. (Ekl. 11:5) Esei lo motivá nos pa bai di akuerdo ku apòstel Pablo, kende a bisa: “O profundidat di e rikesanan, tantu di e sabiduria komo di e konosementu di Dios! Ki inskudriñabel su huisionan ta i insondabel su kamindanan! Pasobra ta ken a konosé e mente di [Yehova], òf ta ken a bira su konsehero? Òf ta ken a dun’é promé, pa esaki wòrdu pagá bèk na dje atrobe? Pasobra di dje i dor di dje i p’e tur kos ta. Na e sea gloria pa semper. Amèn.”​—Rom. 11:​33-36.

[Nota]

Bo Ta Kòrda?

• Kiko lo yuda nos evitá e tendensia di husga Yehova a base di nos propio normanan?

• Kon komprondementu di Hesus su echonan ta yuda nos haña ‘komunion íntimo ku Yehova’?

• Ki lès bo a saka for di Yehova su kòmbersashonnan ku Moisés i ku Abraham?

[Preguntanan di Estudio]

[Plachinan na página 17]

Kiko Yehova su trato ku Moisés i ku Abraham ta siña nos di Su manera di pensa?