Hóben​—Resistí Preshon di Pareunan

“Laga boso palabranan ta . . . sasoná ku salu, pa boso por sa kon boso mester kontestá kada persona.”​—KOL. 4:6.

1, 2. Ki opinion hopi hóben tin enkuanto ser diferente for di otronan, i dikon nan ta pensa asina?

SIN duda, bo a yega di tende di e ekspreshon “preshon di pareunan,” i a asta eksperensiá esaki. Kon asina? Podisé un persona a purba konvensé bo pa hasi algu ku bo sa ku ta malu. Kon bo a sinti bo? Christopher, kende tin 14 aña, a bisa: “Tin biaha gewon mi tin gana di disparsé òf hasi meskos ku e otro muchanan na skol pa mi no ta diferente.”

² Bo pareunan tin hopi influensia riba bo? Si ta asina, dikon? Kisas bo ke pa nan aseptá bo? E deseo ei riba su mes no ta malu. De echo, asta hende grandi ke pa nan pareunan aseptá nan. Niun hende no gusta pa otronan rechasá nan. Pero realidat ta ku no ta tur hende ta keda kontentu ku bo ora bo nenga di hasi malu. Asta Hesus a hañ’é konfrontá ku e realidat ei. Miéntras algun hende a siguié i a bira su disipel, otronan a despresiá e Yu di Dios i “no tabatin apresio p’e.” (Isa. 53:3) Apesar di esei, Hesus semper a hasi loke ta bon.

E Preshon pa Ta Meskos ku Bo Pareunan ​—Kon Fuerte Esaki Ta?

3. Dikon no ta sabí pa sigui e normanan di bo pareunan?

³ Tin biaha, bo por haña gana di sigui e normanan di bo pareunan djis pa nan aseptá bo. Pero esei lo no ta sabí. Kristiannan no mester ta manera ‘mucha, tirá p’aki p’aya dor di olanan.’ (Efe. 4:14) Mucha chikitu por ser influensiá masha lihé. Pero abo no ta mucha chikitu; komo un hóben, bo ta riba kaminda pa bira adulto. P’esei, si bo ta kere ku Yehova su normanan ta pa bo mes bon, bo tin ku sigui nan; esei lo benefisiá bo. (Deu. 10:​12, 13) Pero  si bo ta bai tras di bo pareunan, nan lo dirigí bo bida. De echo, bo ta bira un marioneta den nan man.​—Lesa 2 Pedro 2:19.

4, 5. (a) Den ki manera Aaron a sukumbí na preshon di pareunan, i kiko nos por siña for di esaki? (b) Kiko bo pareunan por hasi pa pone preshon riba bo?

⁴ Na un okashon, Aaron, ruman di Moisés, a sukumbí na preshon di su pareunan. Ora e israelitanan a insistí pa e traha un dios pa nan, el a hasié. Aaron no tabata un hòmber kobarde. Anteriormente, e ku Moisés a konfrontá Fárao, e hòmber di mas poderoso na Egipto. E tempu ei, el a deklará e mensahe di Dios ku kurashi. Pero ora su kompañeronan israelita a pone preshon riba dje, e no a para firme. Bo a mira kon fuerte preshon di pareunan por ta? Tabata mas fásil pa Aaron enfrentá e rei di Egipto ku resistí preshon di su pareunan.​—Eks. 7:​1, 2; 32:​1-4.

⁵ Manera e ehèmpel di Aaron ta mustra, no ta solamente hóbennan i hende ku kier hasi malu ta haña nan ku preshon di pareunan. Asta hende ku ke hasi loke ta bon, inkluso abo, por haña nan ku preshon di pareunan. Bo pareunan por hasi vários kos pa obligá bo hasi malu. Por ehèmpel, nan por provoká bo, gaña riba bo, tenta bo i asta insultá bo. Sea kual sea ta e kaso, preshon di pareunan ta difísil pa trata kuné. Pues, pa resistí preshon di pareunan, primeramente bo mester ta konvensí di loke bo ta kere.

Sigui Pone Bo Mes na Prueba pa Demostrá Ki Tipo di Persona Bo Ta

6, 7. (a) Dikon ta importante pa bo ta konvensí di bo kreensianan, i kon bo por logra esei? (b) Ki preguntanan bo por hasi bo mes pa hasi bo konvikshon mas fuerte?

⁶ Pa trata ku preshon di pareunan, primeramente bo mester ta konvensí ku bo kreensia- i normanan ta korekto. (2 Kor. 13:5) Si bo ta konvensí di esei, lo bo por demostrá kurashi ounke bo ta un persona tímido. (2 Tim. 1:​7, 8) Pero asta pa un persona ku normalmente tin kurashi por ta difísil p’e para firme tras di algu ku e no ta plenamente konvensí di dje. P’esei, pakiko no komprobá pa bo mes ku loke bo a ser siñá for di Beibel ta realmente e bèrdat? Pa kuminsá, analisá e kreensianan básiko. Por ehèmpel, bo ta kere den Dios i bo a tende otronan bisa dikon nan tin fe ku e ta eksistí. Awor, puntra bo mes: ‘Kiko ta konvensé ami ku Dios ta eksistí?’ E pregunta  ei no ta pa lanta duda sino pa hasi bo fe mas fuerte. Algun otro pregunta por ta: ‘Kon mi por sa ku e Skritura ta inspirá pa Dios?’ (2 Tim. 3:16) ‘Dikon mi ta konvensí ku nos ta bibando den “e último dianan”?’ (2 Tim. 3:​1-5) ‘Kiko ta konvensé mi ku Yehova su normanan ta pa mi mes bon?’​—Isa. 48:​17, 18.

⁷ Kisas bo no ke hasi bo mes e preguntanan ei, pasobra bo tin miedu ku bo no por kontestá nan. Pero esei lo ta meskos ku keda sin wak bo gauge òf meter di gasolin den bo outo, pa bo no mira ku bo tanki ta bashí. Bo mester wak pasobra si bo tanki ta bashí, bo tin ku hasi algu. Di mes manera, bo tin ku buska pa sa kua kreensia bo no ta masha sigur di dje i traha pa hasi bo konvikshon mas fuerte.​—Echo. 17:11.

8. Splika kon bo por konvensé bo mes mas ainda ku ta sabí pa sigui e mandamentu di Dios pa hui for di fornikashon.

⁸ Laga nos konsiderá e siguiente ehèmpel. Beibel ta urgi nos pa “hui for di inmoralidat.” Awor, puntra bo mes: ‘Dikon ta sabí pa mi sigui e mandamentu akí?’ Kaba, pensa riba tur e motibunan pakiko bo pareunan ta kometé fornikashon. I reflekshoná tambe riba e vários motibunan pakiko Beibel ta bisa ku un persona ku ta kometé fornikashon “ta peka kontra su mes kurpa.” (1 Kor. 6:18) Despues, analisá e motibunan ei i puntra bo mes: ‘Kiko ta e mihó kos pa hasi? Ta realmente bale la pena pa kometé inmoralidat seksual?’ Pensa mas aleu i puntra bo mes: ‘Kon lo mi sinti si mi kometé inmoralidat seksual?’ Kisas bo pareunan lo keda kontentu ku bo. Pero kon lo bo sinti despues ora bo ta huntu ku bo mayornan òf bo kompañeronan kristian na Salòn di Reino? I kon lo bo sinti ora bo ta trata di hasi orashon na Dios? Bo ta dispuesto pa sakrifiká bo posishon limpi dilanti di Dios djis pa agradá bo kompañeronan di skol?

9, 10. Kon e echo ku bo ta konvensí di bo kreensianan ta yuda bo pa ta mas sigur di bo mes ora bo ta huntu ku bo pareunan?

⁹ Si bo ta un adolesente, bo ta den e periodo ku bo kapasidat di pensa ta den pleno desaroyo. (Lesa Romanonan 12:​1 i 2.) Usa e periodo akí pa pensa seriamente dikon ser un Testigu di Yehova ta masha importante pa bo. Esei lo yuda bo pa ta mas konvensí di bo kreensianan. Anto ora bo haña bo ku preshon di bo pareunan, bo por reakshoná mesora i ku konfiansa. Lo bo sinti meskos ku un ruman muhé di 21 aña ku a bisa: “Ora mi haña mi ku preshon di mi pareunan, mi ta laga nan sa mesora ken mi ta i kiko mi ta kere. I ku mi no ta djis sigui ‘un religion.’ Mas bien, ser un Testigu di Yehova ta enbolbé mi manera di pensa, mi metanan, mi norma- i balornan, esta, henter mi bida.”

¹⁰ Sí, bo tin ku hasi esfuerso pa para firme tras di loke bo sa ku ta bon. (Luk. 13:24) I kisas bo ta puntra bo mes si ta bale la pena pa hasi esei. Pero kòrda esaki: Si bo pareunan ripará ku bo ta diskulpá bo mes pa bo kreensianan òf ku bo tin bèrgwensa di nan, nan lo por pone mas preshon riba bo. Sinembargo, si bo papia ku konvikshon, bo por keda sorprendí kon lihé nan lo laga bo na pas.​—Kompará ku Lukas 4:​12 i 13.

“Studia Bon Kon pa Kontestá”

11. Dikon ta bon pa bo prepará bo mes pa resistí preshon di pareunan?

¹¹ Pa trata ku preshon di pareunan, ta importante tambe pa bo ta bon prepará. (Lesa Proverbionan 15:28.) Un bon preparashon ta enserá antisipá situashonnan ku bo por haña bo aden. Tin biaha, esaki por yuda bo evitá konfrontashon. Suponé ku  djaleu bo ta mira algun kompañero di skol pará huntu ta huma. Tin hopi chèns ku nan lo ofresé bo un sigaria? Antisipando e problema, kiko bo por hasi? Proverbionan 22:3 ta bisa: “Un hende prudente ta mira maldat i ta skonde.” Si bo bai den otro direkshon, bo por evitá un konfrontashon. Esei no ta nifiká ku bo tin miedu; mas bien, bo ta un persona sabí.

12. Kon ta un bon manera pa bo reakshoná ora bo haña bo ku preshon di pareunan?

¹² Pero kiko si bo no por evitá un konfrontashon? Suponé ku un kompañero di skol puntra bo na un manera sképtiko: “Bo no a yega di tene relashon?” E klave ta sigui e konseho di Kolosensenan 4:6 ku ta bisa: “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.” Manera e versíkulo akí ta indiká, e manera ku bo ta kontestá e pregunta ei ta dependé di e sirkunstansia. Kisas no ta nesesario pa bai den un diskushon largu tokante Beibel. Un kontesta firme i simpel mes ta sufisiente. Por ehèmpel bo por bisa: “Nò, i mi ta orguyoso di esei.” Òf bo por bisa: “Esei ta mi asuntu personal.”

13. Dikon bo mester di disernimentu pa kontestá pregunta di bo pareunan?

¹³ Vários biaha, Hesus tabata duna kontesta breve ora no tabatin sentido pa bai den detaye. De echo, ora Herodes a interog’é, e no a bisa nada mes. (Luk. 23:​8, 9) Pues hopi bes, un bon manera pa trata ku pregunta imprudente ta di keda ketu. (Pro. 26:4; Ekl. 3:​1, 7) Di otro banda, kisas bo a ripará ku un persona ta sinseramente interesá den bo kreensianan, ounke anteriormente el a yega di ofendé bo. Podisé awor e ke sa kiko ta bo punto di bista enkuanto moralidat seksual. (1 Ped. 4:4) Den e kaso ei, ta na su lugá pa duna un splikashon mas a fondo di bo punto di bista basá riba Beibel. I no laga miedu stroba bo di duna testimonio. Sea semper prepará i “dispuesto pa duna kontesta.”​—1 Ped. 3:15.

14. Den algun kaso, kon bo por usa takto pa pone preshon bèk riba bo pareunan?

¹⁴ Den algun kaso, bo por pone e preshon bèk riba bo pareunan. Pero bo tin ku hasi esaki ku takto sí. Por ehèmpel, si un kompañero di klas ta preshoná bo pa aseptá un sigaria, bo por bis’é: “Nò, danki, mi no ta huma.” Kaba bo por agregá: “Mi a kere ku un persona inteligente manera bo no ta huma.” Bo a mira kon bo ta pone e preshon bèk riba dje? En bes di abo splik’é pakiko bo no ta huma, bo ta laga e bai pensa dikon e sí ta huma. *

15. Ki ora ta bon pa bo kana bai laga bo pareunan ku ta trata di pone preshon riba bo, i dikon?

 ¹⁵ Kiko bo tin ku hasi si apesar di bo esfuersonan bo pareunan ta sigui pone preshon riba bo? E mihó kos ku bo por hasi ta kana bai. Mas bo keda, mas chèns bo tin di komprometé bo mes. P’esei, bai for di einan. Bo por hasi esei sin sinti bo malu, pasobra bo tabatin e situashon bou di kontròl. Bo no a bira un marioneta di bo pareunan, i bo a hasi Yehova su kurason kontentu.​—Pro. 27:11.

‘Plannan Ku Ta Duna Bon Resultado’

16. Kon algun hóben ku ta bisa ku nan ta kristian por pone preshon riba bo?

¹⁶ Tin biaha asta hóbennan ku ta bisa ku nan ta sirbidó di Yehova por pone preshon riba bo pa hasi malu. Por ehèmpel, imaginá ku un hóben asina a invitá bo na un fiesta. I ora bo yega, bo ta ripará ku no tin supervishon di hende grandi. Òf kiko si tin hopi alkohòl na e fiesta ei, i algun hóben ta kuminsá bebe di mas? Ta vários situashon por surgi den kua bo tin ku aktua a base di bo konsenshi bíblikamente entrená. Un hobensita kristian a konta: “Ami ku mi ruman muhé a sali for di un teater pasobra e pelíkula tabata yen di palabra malu. Nos amigunan sí a disidí di keda. Nos mayornan a keda kontentu ku nos. Pero nos amigunan a rabia pasobra nos a laga nan sinti nan malu.”

17. Ki medida práktiko bo por tuma pa kumpli ku e normanan di Dios ora bo ta bai un fiesta?

¹⁷ Manera e eksperensia anterior ta mustra, ora bo ta sigui bo konsenshi bíblikamente entrená bo por haña bo den un situashon poko difísil. Pero hasi loke bo sa ku ta bon. Sea prepará. Si bo ta bai un fiesta, plania di antemano kiko lo bo hasi si kosnan no ta manera bo a ferwagt. Algun hóben a palabrá ku nan mayornan ku nan tin ku djis bèl nan mayornan, i nan ta bin buska nan. (Sal. 26:​4, 5) Sí, “plan bon pensá ta duna bon resultado.”​—Pro. 21:5, BPK.

‘Regosihá, Durante di Bo Hubentut’

18, 19. (a) Dikon bo por ta sigur ku Yehova ke pa bo ta felis? (b) Kon Yehova ta konsiderá esnan ku ta resistí preshon di pareunan?

¹⁸ Yehova a krea bo pa bo disfrutá di bida, i e ke pa bo ta felis. (Lesa Eklesiastés 11:9.) Kòrda ku loke hopi di bo pareunan ta gosa di dje ta “plasernan pasahero di piká.” (Heb. 11:25) E Dios berdadero ke pa bo disfrutá di algu muchu mas mihó ku esei. E ke pa bo ta felis pa semper. P’esei, ora bo haña bo ku tentashon pa hasi loke bo sa ku ta malu den bista di Dios, kòrda ku, a lo largu, loke Yehova ta rekerí di bo semper ta mihó pa bo.

¹⁹ Komo hóben, bo tin ku komprondé ku ounke bo gana aprobashon di bo pareunan, aki poko aña mayoria di nan no ta kòrda ni sikiera bo nòmber. Na kontraste ku esei, ora bo ta resistí preshon di pareunan, Yehova ta tuma nota di esaki, i nunka lo e lubidá bo ni bo fieldat. Lo e ‘habri e bentananan di shelu i basha asina tantu bendishon, ku lo bo no tin sufisiente lugá pa kontené nan.’ (Mal. 3:10) Es mas, lo e duna bo spiritu santu na abundansia pa fortalesé bo ki ora ku bo ta sinti bo débil. Sí, Yehova por yuda bo resistí preshon di bo pareunan!

[Nota]

Bo Ta Kòrda?

• Ki poder preshon di pareunan por tin riba nos?

• Dikon ta importante pa bo ta konvensí di bo kreensianan pa por resistí preshon di bo pareunan?

• Kon bo por prepará bo mes pa enfrentá preshon di bo pareunan?

• Kon bo por sa ku Yehova ta balorá bo fieldat?

[Preguntanan di Estudio]

[Plachi na página 15]

Dikon Aaron a bai di akuerdo pa traha e bisé di oro?

[Plachi na página 17]

Sea prepará—disidí di antemano kiko lo bo bisa