Sekreto 1

Stima Hende, No Plaka ni Kos Material

KIKO BEIBEL TA SIÑA? “Amor pa plaka ta rais di tur sorto di maldat.”​—1 Timoteo 6:10.

KIKO TA E PROBLEMA? Propaganda ta pone preshon riba nos pa no keda satisfecho ku loke nos tin. Nan ke pa nos traha manera katibu pa gana plaka, i pa despues nos gast’é riba kosnan mas nobo, mas mihó, mas grandi. Plaka ta algu masha atraktivo i ta fásil pa nos kai p’e. Sinembargo, Beibel ta spièrta nos ku hende ku stima plaka nunka lo no ta satisfecho den bida. Rei Salomon a skirbi: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada.”​—Eklesiastés 5:10.

KIKO BO POR HASI? Imitá Hesus, i siña stima hende mas ku kos material. Hesus tabata dispuesto pa entregá tur loke e tabatin—asta su bida—pasobra e tabata stima hende. (Juan 15:13) El a bisa: “Duna ta hasi hende mas felis ku risibí!” (Echonan 20:35, BPK) Si nos kria e kustumber di duna hende parti di nos tempu i nos rekursonan, nan tambe lo hasi meskos. Hesus a bisa: “Duna, i lo wòrdu duná na boso.” (Lukas 6:38) Hende ku ta kore tras di plaka i kos material ta kousa nan mes hopi doló i sufrimentu. (1 Timoteo 6:​9, 10) Di otro banda, un hende lo sinti su mes berdaderamente satisfecho den bida ora e ta stima hende i hende ta stim’é.

Pakiko no wak si bo por simplifiká bo estilo di bida? Lo bo por redusí e kantidat di kos material ku bo tin òf ku bo ke kumpra? Si bo hasi esei, lo bo ripará ku bo tin mas tempu i energia pa e kosnan di mas importante den bida, manera yuda otro hende i sirbi Dios, kende a duna bo tur loke bo tin.​—Mateo 6:24; Echonan 17:28.

[Plachi na página 4]

“Duna, i lo wòrdu duná na boso”