Yehova Ta Nos Señor Soberano!
Yehova Ta Nos Señor Soberano!
“Den e Señor Soberano Yehova mi a pone mi refugio.”—SAL. 73:28, NW.
1. Kiko Pablo lo tabatin na mente ora el a skirbi e palabranan di 1 Korintionan 7:31?
“E MUNDU akí den su forma aktual ta pasando.” Eseinan tabata palabranan di apòstel Pablo. (1 Kor. 7:31) Aparentemente, den e idioma original, e tabata kompará mundu ku un esenario den kua e aktornan ta hunga nan papel komo bon òf mal hende den un drama te ora ku e esena kambia.
2, 3. (a) Ku kiko nos por kompará e desafio kontra Yehova su soberania? (b) Ki preguntanan nos lo konsiderá?
2 Awe tin un drama muchu mas importante ta tumando lugá—i e ta enbolbé bo tambe! E drama ei tin di haber spesialmente ku e derecho ku Yehova Dios tin di ta e gobernante Soberano. Nos por ilustrá esaki ku e situashon ku por reina den un pais. Di un banda, tin un gobièrnu legítimo ku ta mantené òrdu. Di otro banda, tin un organisashon kriminal ku ta reina pa medio di engaño, violensia i asesinato. E organisashon ilegal akí ta desafiá e gobernashon supremo di e pais i ta pone e lealtat di tur siudadano na nan gobièrnu na prueba.
3 Riba eskala universal ta eksistí un situashon similar. Tin e gobernashon legítimamente establesé di nos “Señor Soberano Yehova.” (Sal. 71:5, NW) Pero aworakí humanidat ta den gara di un organisashon kriminal enkabesá pa “e malbado.” (1 Juan 5:19) E ta desafiá e gobernashon legítimo di Dios i ta pone e lealtat di tur hende na Su gobernashon soberano na prueba. Kiko a kousa e situashon akí? Dikon Dios ta permitié? I kiko kada un di nos por hasi tokante esei?
E Kuestionnan Enbolbí den e Drama
4. Kua dos kuestion ku tin di haber ku otro e drama universal ta enserá?
4 E desaroyo di e drama universal akí ta enserá dos kuestion ku tin di haber ku otro: E soberania di Yehova i integridat di hende. Hopi bes e Skritura (entre otro den Beibel na papiamentu koriente) ta yama Yehova “Señor Soberano.” Por ehèmpel, ku pleno konfiansa den Yehova, e eskritor di un salmo a bisa den un kantika: “Den e Señor Soberano Yehova mi a pone mi refugio.” (Sal. 73:28, NW) “Soberania” ta nifiká poder supremo òf gobernashon supremo. Un gobernante soberano ta ehersé outoridat supremo. Tin bon motibu pa mira Yehova komo e Haltísimo òf Dios Supremo.—Dan. 7:22.
5. Pakiko nos mester sinti nos motivá pa apoyá e soberania di Yehova?
5 Komo Kreador, Yehova Dios ta e Soberano di tera i di henter universo. (Lesa Revelashon 4:11.) E ta tambe nos Hues, Dunadó di Lei i Rei. (Isa. 33:22) Ya ku ta é por ke ku nos ta na bida, i nos ta dependé di dje, nos mester mir’é komo nos Señor Soberano. Nos lo sinti nos motivá pa apoyá Yehova su posishon elevá si nos keda kòrda ku el ‘a establesé su trono den shelu i ku su reino ta goberná riba tur kos.’—Sal. 103:19; Echo. 4:24.
6. Kiko ta integridat?
6 Pa nos apoyá e soberania di Yehova, nos tin ku mantené nos integridat na dje. “Integridat” ta nifiká rektitut moral òf deboshon di henter kurason na Yehova. Un persona íntegro ta un hende rekto i di kondukta ireprochabel. E patriarka Jòb tabata un hòmber asina.—Jòb 1:1.
Kon e Drama A Kuminsá?
7, 8. Kon Satanas a desafiá Yehova su derecho di ta e gobernante soberano?
7 Algu mas ku 6.000 aña pasá, un kriatura spiritual a desafiá Yehova su derecho di ta e gobernante soberano. El a laga e deseo egoista pa hende ador’é pon’é yega asina leu. El a instigá e promé pareha humano, Adam ku Eva, pa bira desleal na e soberania divino, i el a purba di mancha Yehova su nòmber, pretendiendo ku ta gaña Dios a gaña nan. (Lesa Génesis 3:1-5.) E rebelde ei a bira e gran Atversario, Satanas e Diabel, e kolebra i dragon ku ta resistí i kalumniá Dios, i ku tambe ta gaña i habraká e sirbidónan di Dios.—Rev. 12:9.
8 Satanas a posishoná su mes komo un gobernante rival. Ora nos Señor Soberano Yehova a haña su mes konfrontá ku e desafio akí, kiko el a hasi? Akaso el a destruí e tres rebeldenan—Satanas, Adam i Eva—mesora? No tin duda ku e tabatin e poder pa hasi esei, i un medida asina lo a resolvé e kuestion di ken tin poder supremo. Esei lo a proba tambe ku Yehova a papia bèrdat ora el a bisa ku esun ku violá su lei ta haña kastigu di morto. Pakiko Dios no a tuma e medida ei anto?
9. Kiko Satanas a kuestioná?
9 Ora Satanas a lansa su mentira i alehá Adam ku Eva for di Dios, el a kuestioná Yehova su derecho di eksigí obedensia di humanidat. Ademas, na momento ku el a instigá e promé pareha humano pa desobedesé Dios, el a kuestioná tambe e lealtat di tur kriatura inteligente. Manera a sali na kla den e kaso di Jòb, kende tabata leal na e soberania di Yehova, Satanas a pretendé ku e por alehá tur hende mes for di Dios.—Jòb 2:1-5.
10. Kiko Dios a permití ora el a skohe pa no demostrá mesora ku ta é ta e gobernante soberano?
10 Yehova a skohe pa no demostrá mesora ku ta é ta e gobernante soberano, i esei a duna Satanas tempu pa proba su pretenshon. Tambe Dios a duna hende chèns di demostrá nan lealtat na su soberania. Kiko a pasa den transkurso di siglonan? Satanas a krea un organisashon kriminal poderoso. Ku tempu Yehova lo destruí e organisashon akí i Diabel tambe, i asina demostrá den un forma konvinsente ku E tin derecho di ta e soberano. Yehova Dios tabata asina sigur di e resultado positivo ei ku el a profetisá esaki ora e rebelion den Edén a tuma lugá.—Gén. 3:15.
11. Kiko hopi hende a hasi relashoná ku e soberania di Yehova?
11 Hopi hende a ehersé fe i mantené nan integridat en konekshon ku e soberania di Yehova i e santifikashon di su nòmber. Den e grupo ei tin Abel, Enok, Noe, Abraham, Sara, Moisés, Ruth, David, Hesus, e promé disipelnan di Kristu i miónes di hende íntegro awe. E apoyadónan akí di e soberania di Dios ta yuda demostrá ku Satanas ta un gañadó, i nan ta yuda limpia e nòmber di Yehova di e reproche ku Diabel a montoná riba dje ora el a broma ku e por alehá henter humanidat for di Dios.—Pro. 27:11.
Nos Sa Sigur Kon e Drama Ta Kaba
12. Dikon nos por ta sigur ku Dios lo no sigui tolerá maldat pa semper?
12 Nos por ta sigur ku pronto Yehova lo demostrá ku ta é ta e gobernante soberano. Lo e no tolerá maldat pa semper, i nos sa ku nos ta bibando den e último dianan. Por ehèmpel, Yehova a tuma medida kontra e malbadonan durante e Diluvio. El a destruí Sodoma i Gomora, i tambe Fárao i su ehérsito. I ni Sísara ku su ehérsito ni Senakerib ku su trupanan asirio no tabata rival pa e Dios Haltísimo. (Gén. 7:1, 23; 19:24, 25; Eks. 14:30, 31; Hues. 4:15, 16; 2 Rei. 19:35, 36) P’esei nos por ta sigur ku Yehova lo no sigui tolerá falta di rèspèt pa su nòmber ni maltrato di su Testigunan pa semper. Ademas, aktualmente nos ta mira evidensia di e señal di Hesus su presensia i di fin di e mal sistema di kosnan akí.—Mat 24:3.
13. Kiko nos tin ku hasi pa nos no ser destruí huntu ku e enemigunan di Yehova?
13 Pa nos no ser destruí huntu ku e enemigunan di Dios, nos tin ku demostrá ku nos ta leal na e soberania di Yehova. Nos ta hasi esei ora nos ta keda leu for di e gobernashon malbado di Satanas i ta nenga di laga su kompinchinan intimidá nos. (Isa. 52:11; Juan 17:16; Echo. 5:29) Ta e ora ei so nos por apoyá e soberania di nos Tata selestial i karga e speransa di ser salbá ora Yehova limpia su nòmber di tur reproche i demostrá ku ta é ta e Soberano di Universo.
14. Kiko vários parti di Beibel ta revelá?
14 Den tur parti di Beibel nos por haña detaye di e kuestionnan ku tin di haber ku humanidat i ku Yehova su soberania. E promé tres kapítulonan ta konta nos di kreashon i kon hende a kai den piká, miéntras ku e último tresnan ta mustra kon humanidat lo rekuperá di esei. E partinan meimei ta duna detaye di e pasonan ku nos Señor Soberano Yehova a tuma pa kumpli ku su propósito pa humanidat, pa tera i pa universo. Génesis ta mustra kon Satanas i maldat a drenta mundu, i e último parti di Revelashon ta mustra kon Dios lo eliminá maldat, destruí Diabel i sòru pa Su boluntat sosodé na tera meskos ku den shelu. Sí, Beibel ta revelá e kousa di piká i morto i ta mustra kon esakinan lo keda eliminá for di e esenario mundial i ser remplasá pa goso sin límite i bida eterno pa hende ku ta mantené nan integridat.
15. Pa nos por saka benefisio ora e drama tokante e kuestion di soberania yega na su fin, kiko nos tin ku hasi?
15 Pronto e esena di e mundu akí lo kambia kompletamente. E kortina di e esenario mundial lo baha i e drama tokante e kuestion di soberania, ku ta hungando pa hopi siglo kaba, lo yega na su fin. Satanas lo keda eliminá for di esenario; ku tempu lo e pasa pa olvido, i e boluntat di Dios lo prevalesé. Pero pa nos benefisiá di esaki i disfrutá di e tantísimo bendishonnan ku e Palabra di Dios ta papia di dje, nos tin ku apoyá e soberania di Yehova awor. Nos no por ta pará na tur dos banda di e kuestion. Pa nos por bisa ku ‘Yehova ta na nos banda,’ nos tin ku keda na su banda.—Sal. 118:6, 7, NW.
Nos Por Mantené Nos Integridat!
16. Pakiko nos por ta sigur ku ta posibel pa hende mantené nan integridat na Dios?
16 Nos por apoyá e soberania di Yehova i mantené nos integridat, pasobra apòstel Pablo a skirbi: “Ningun tentashon, fuera di loke tur hende ta pasa aden, no a bini riba boso; i Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.” (1 Kor. 10:13) Kiko e tentashon ku Pablo a menshoná a inkluí, i kon Dios ta perkurá un salida pa nos?
17-19. (a) Den ki tentashon e israelitanan a kai tempu ku nan tabata den desierto? (b) Kon bini nos por mantené nos integridat na Yehova?
17 Manera e kosnan ku a pasa ku Israel den desierto ta ilustrá, e “tentashon” ta bini pa medio di sirkunstansianan ku por pone nos kibra e lei di Dios. (Lesa 1 Korintionan 10:6-10.) E israelitanan por a resistí tentashon, pero nan a deseá “kosnan malu” ora Yehova milagrosamente a perkurá un gran kantidat di para ku nan por a kome un luna largu for di dje. Ounke pa un tempu e pueblo no tabatin karni pa kome, Dios a duna nan sufisiente mana. Pero nan a entregá na e tentashon di hasi kos di golos i a piki e paranan na un manera haragan.—Num. 11:19, 20, 31-35.
18 Mas promé, miéntras ku Moisés tabata risibí e Lei riba Seru Sinaí, e israelitanan a bira adoradó di dios falsu, trahando un bisé pa nan adorá, i entregando nan mes na e plasernan di bida. Komo ku nan lider visibel no tabat’ei, no tabatin nada ku por a frena e tentashon. (Eks. 32:1, 6) Djis promé ku e israelitanan a drenta e Tera Primintí, míles di nan a ser sedusí pa muhé moabita i a kometé inmoralidat seksual ku nan, i nan a muri pa motibu di nan piká. (Num. 25:1, 9) Algun biaha e pueblo di Israel a kai den e tentashon di keha na un manera rebelde, i na un okashon nan a papia kontra Moisés i asta kontra Dios mes! (Num. 21:5) E pueblo di Israel a asta murmurá despues ku Dios a destruí hòmbernan malbado, manera Kore, Datan, Abiram i nan kompañeronan, rasonando inkorektamente ku e ehekushon di e rebeldenan ei tabata inhustu. Komo resultado di esei, Dios a manda un plaga ku a kousa morto di 14.700 israelita.—Num. 16:41, 49.
19 Ningun di e tentashonnan ku nos a kaba di menshoná no tabata di tal índole ku e israelitanan no por a resistí nan. E pueblo a entregá na tentashon pasobra nan a pèrdè fe i a lubidá Yehova i tambe su kuido amoroso i su kamindanan rekto. Meskos ku den e kaso di e israelitanan, e tentashonnan ku nos ta enfrentá no ta nada fuera di lo komun. Si nos hasi e esfuerso nesesario pa resistí nan i dependé riba e sosten di Dios, nos por mantené nos integridat. Nos por ta sigur di esaki pasobra “Dios ta fiel” i no ta permití pa nos wòrdu “tentá mas ku [nos] por soportá.” Hamas Yehova lo bandoná nos, te pa e laga nos kai den situashonnan den kua lo bira humanamente imposibel pa hasi su boluntat.—Sal. 94:14.
20, 21. Ora nos haña nos ku tentashon, kon Dios ta “proveé salida”?
20 Yehova ta fortalesé nos pa resistí tentashon, i asina e ta “proveé salida.” Por ehèmpel, hende ku ta persiguí nos kisas ta maltratá nos físikamente ku e meta pa pone nos nenga nos fe. E maltrato ei por hinka nos den e tentashon di komprometé nos fe pa asina skapa mas sla, tortura òf asta morto. Ma a base di e garantia inspirá ku Pablo a duna na 1 Korintionan 10:13, nos sa ku e situashon ku ta hinka nos den tentashon ta solamente temporal. Yehova lo no laga esei sigui te na e punto ku nos no por keda fiel na dje mas. E por fortifiká nos fe i duna nos e fortalesa spiritual ku nos tin mester pa por mantené nos integridat.
21 Yehova ta sostené nos pa medio di su spiritu santu. E spiritu ei ta yuda nos kòrda tambe riba e pasashinan di Beibel ku nos tin mester pa por resistí tentashon. (Juan 14:26) Pues, nos no ta ser engañá pa sigui un mal kaminda. Por ehèmpel, nos ta komprondé e kuestionnan relashoná ku e soberania di Yehova i e importansia pa keda íntegro. Ku e konosementu ei, Dios a sostené hopi di su sirbidónan pa keda fiel te na morto. Ma no ta morto tabata e salida pa nan; ta e yudansa ku Yehova a duna nan a hasi posibel pa nan perseverá te na fin sin entregá na tentashon. E por yuda nos den e mesun manera. De echo, e ta usa tambe su angelnan fiel pa yuda nos; esakinan ta fungi komo sirbidó públiko ku e ta manda “pa sirbi esnan ku lo heredá salbashon.” (Heb. 1:14) Manera e siguiente artíkulo ta mustra, ta hende ku ta mantené nan integridat so por spera di haña e maravioso privilegio di apoyá e soberania di Dios pa semper. Si nos pega na Yehova komo nos Señor Soberano, nos por ta un di nan.
Kon Lo Bo Kontestá?
• Pakiko nos mester rekonosé Yehova komo nos Señor Soberano?
• Kiko ke men mantené integridat na Dios?
• Kon nos por sa ku pronto Yehova lo demostrá ku ta é ta e gobernante soberano?
• En bista di 1 Korintionan 10:13, dikon ta posibel pa nos mantené nos integridat?
[Preguntanan di Estudio]
[Plachi na página 24]
Satanas a instigá Adam ku Eva pa bira desleal na Yehova
[Plachi na página 26]
Sea determiná pa apoyá e soberania di Yehova
