Demostrá Zelo pa Adorashon Berdadero

“E kosecha ta masha grandi, ma trahadó ta poko.”​—MAT. 9:37.

1. Kon nos ta sinti ora nos tin ku hasi un trabou urgente?

TA KASI na final di bo dia di trabou, i ainda bo tin un dokumento ku un persona mester wak. Kiko lo bo hasi? Lo bo pone e palabra “URGENTE!” riba dje. Òf imaginá bo ku bo ta bayendo un sita importante, i bo ta lat. Kiko lo bo hasi? Bo ta bisa e shofùr: “Bo por ban mesora, esaki ta un kaso URGENTE!” Sí, ora bo tin un tarea pa kumpli kuné, i tempu ta bai laga bo, bo ta bira nèrvioso i agitá. Esei ta pone bo kurpa produsí mas adrenalina, i bo ta kuminsá traha mas lihé i mas duru posibel. Esei ta loke nos ta sinti ora nos tin ku hasi un trabou urgente.

2. Kiko ta e tarea di mas urgente ku kristiannan berdadero tin ku kumpli kuné awe?

² E tarea di mas urgente ku kristiannan berdadero tin ku kumpli kuné awe ta e trabou di prediká e bon notisia di Reino i di hasi hende di tur nashon disipel. (Mat. 24:14; 28:​19, 20) Sitando Hesus su palabranan, disipel Marko a skirbí ku e trabou akí mester tuma lugá “promé,” esta, promé ku e fin bini. (Mar. 13:10) Esei mester ta asina, pasobra Hesus a bisa: “E kosecha ta masha grandi, ma trahadó ta poko.” I ora ta tempu di kosecha, mester rekohé tur e kosecha promé ku e periodo pasa.​—Mat. 9:37.

3. Kiko hopi hende a hasi pa kumpli ku e nesesidat urgente di prediká?

³ Debí ku e trabou di prediká ta asina importante pa nos, nos tin ku dediká mas tempu, energia i atenshon posibel na dje. Hopi ruman ta hasiendo esei i ta meresé nos elogio. Por ehèmpel, algun a simplifiká nan bida di tal manera ku nan por a kuminsá sirbi den e trabou di tempu kompletu komo pionero, misionero òf na un di e kasnan di Bètel rònt mundu. Nan tin un bida masha okupá. Aunke nan kisas a hasi hopi sakrifisio i ta enfrentá hopi desafio, Yehova ta bindishoná nan rikamente. Nos ta kontentu pa nan. (Lesa Lukas 18:​28-30.) Otronan ku no por djòin e fila di proklamadónan di tempu kompletu ta dediká mas tantu tempu posibel den e trabou di salba bida akí. Esaki ta enserá tambe yuda nan yunan kana riba e kaminda pa haña salbashon.​—Deu. 6:​6, 7.

4. Dikon algun ruman por pèrdè nan sentido di urgensia?

⁴ Manera nos a ripará, un trabou urgente, generalmente, ta mará na un sierto lapso di tempu den kua e tin ku tuma lugá. Nos ta bibando den e tempu di fin, i tin un abundansia di evidensia—tantu bíbliko komo históriko—ku ta duna prueba di esei. (Mat. 24:​3, NW, 33; 2 Tim. 3:​1-5) Sinembargo, ningun hende no sa presis ki dia e fin lo bini. Ora Hesus a duna detaye di “e señal” ku ta identifiká “e konklushon dje sistema di kos,” el a bisa spesífikamente: “Di e dia i e ora ei ningun hende no sa, ni e angelnan di shelu tampoko, ni e Yu, sino e Tata so.” (Mat. 24:36) Esei por pone ku algun por tin problema pa sigui hasi esfuerso pa kumpli ku e trabou di Yehova ku un sentido di urgensia aña aden aña afó, foral si nan tin hopi tempu kaba ta hasi esei. (Pro. 13:12) Abo tambe sa sinti asina? Awor kiko por yuda nos keda demostrá zelo, kumpliendo ku e trabou urgente ku Yehova Dios i Hesukristu ke pa nos hasi awe?

 Konsiderá Hesus, Nos Ehèmpel

5. Den ki maneranan Hesus a demostrá ku su sirbishi na Dios tabata urgente?

⁵ Di tur e personanan ku a realisá ku ta urgente pa hasi e trabou di Yehova, definitivamente, Hesukristu ta e mihó ehèmpel. Algu ku a pon’é realisá esaki ta e echo ku e tabatin hopi trabou pa hasi den un periodo di solamente tres aña i mei. Apesar di esei, loke Hesus a hasi pa adorashon berdadero ta mas ku kualke otro hende por a hasi. Por ehèmpel, el a hasi e nòmber i propósito di su Tata konosí, a prediká e bon notisia di Reino, a desenmaskará e hipokresia i siñansanan falsu di lidernan religioso i a apoyá e soberania di Yehova te na morto. Den tur sentido, el a duna di su mes pa siña, yuda i kura e hendenan den henter e pais. (Mat. 9:35) Ningun hende no a yega di logra asina tantu den un tempu asina kòrtiku. Hesus a hasi tur loke e tabata por.​—Juan 18:37.

6. Kiko a motivá Hesus pa traha diligentemente?

⁶ Kiko a motivá Hesus pa traha diligentemente durante su sirbishi riba tera? For di e profesia di Daniel, Hesus por a komprondé kuantu tempu e tabatin pa kumpli ku su trabou segun e orario di Yehova. (Dan. 9:27) Pues, manera e profesia a mustra, su sirbishi riba tera lo a terminá “meimei di e siman,” òf despues di tres aña i mei. Djis despues di su entrada triunfal den Yerusalèm den lènte di aña 33 di nos era, Hesus a bisa: “E ora a yega pa e Yu di hende wòrdu glorifiká.” (Juan 12:23) Aunke Hesus tabata sa ku su morto tabata serka, esei no tabata e motibu prinsipal pakiko el a traha duru. Mas bien, loke a motiv’é ta e deseo pa hasi e boluntat di su Tata i pa mustra amor pa su próhimo. E amor ei a motiv’é pa reuní i entrená su disipelnan i manda nan bai prediká. El a hasi esaki pa nan por a sigui ku e trabou ku el a kuminsá i hasi obranan asta mas grandi ku esnan di dje.​—Lesa Juan 14:12.

7, 8. Kon e disipelnan a reakshoná ora Hesus a limpia e tèmpel, i dikon Hesus a aktua asina?

⁷ Un suseso den bida di Hesus a duna prueba konvinsente di su zelo pa adorashon berdadero. Tabata na prinsipio di su ministerio, durante e Pasku Hudiu di aña 30 di nos era. Hesus i su disipelnan a yega Yerusalèm i a haña “sintá den tèmpel esnan ku tabata bende bue, karné i palomba, i e kambiadónan di plaka.” Kon Hesus a reakshoná, i ki impreshon su reakshon a hasi riba su disipelnan?​—Lesa Juan 2:​13-17.

⁸ Loke Hesus a hasi i bisa na e okashon ei korektamente a pone su disipelnan kòrda e palabranan profétiko di un salmo ku David a skirbi. E ta bisa: “Zelo pa bo kas a kaba ku mi.” (Sal. 69:9) Dikon nan a kòrda e palabranan ei? Pasobra ta solamente un hende ku tin e klase di zelo ei lo hasi algu asina peligroso. Al fin al kabo, ta e outoridatnan di e tèmpel—e saserdotenan, e eskribanan i otronan—tabata tras di e negoshi lukrativo i bergonsoso ku tabata tuma lugá einan. Pues, ora Hesus a eksponé i interumpí nan negoshi korupto, el a hasi su mes enemigu di e outoridatnan religioso di e  tempu ei. Manera su disipelnan korektamente a komprondé, esaki tabata un evidensia kla di ‘zelo pa e kas di Dios,’ òf zelo pa adorashon berdadero. Pero kiko ta zelo? Tin un diferensia entre demostrá zelo i hasi e trabou di Dios ku un sentido di urgensia?

Zelo i Nos Trabou Urgente

9. Kon bo por deskribí e palabra zelo?

⁹ Zelo ta un interes ferviente i profundo ku ta motivá hende na akshon. Algun sinónimo di zelo ta pashon, fervor i entusiasmo. Hesus siguramente a reflehá tur e karakterístikanan akí den su ministerio. P’esei, Beibel na papiamentu koriente ta tradusí Salmo 69:9 ku e siguiente palabranan: “Mi ta kima di zelo pa bo kas.” Ta interesante pa nota ku den algun idioma oriental, e palabra pa “zelo” ta konsistí di dos palabra ku literalmente ta nifiká “kurason ardiente,” komo si fuera, e kurason ta na kandela. Pues, no ta nada straño ku e disipelnan a kòrda e palabranan di David ora nan a mira loke Hesus a hasi na e tèmpel. Pero ta kiko a pone Hesus su kurason kuminsá, na moda di papia, kima i motiv’é pa aktua di e manera ei?

10. Ora Beibel ta papia di “zelo,” kiko e ta referí na dje?

¹⁰ E palabra “zelo” den e salmo di David ta derivá for di un palabra hebreo ku hopi bes ta ser tradusí komo “yalurs” òf “yalursheit” den otro tekstonan di Beibel. Tin biaha, e Tradukshon di Mundu Nobo ta tradusí e palabra hebreo ei komo “ku ta eksigí deboshon eksklusivo.” (Lesa Eksodo 20:5; * 34:14; Josué 24:19.) Un dikshonario bíbliko ta splika ku hopi bes e palabra akí ta ser usá en konekshon ku relashon matrimonial. Meskos ku un esposo òf esposa tin sierto derechonan eksklusivo den matrimonio, Dios tin e derecho eksklusivo riba deboshon di esnan ku ta pertenesé na dje, i e ta eksigí esei. Pues, e zelo ku Beibel ta papia di dje ta mas ku fervor òf entusiasmo ku ta motivá hende na akshon; e ta mas ku loke hopi fanátiko ta demostrá pa nan deporte faborito. E zelo ku David a menshoná ta un yalursheit den e sentido positivo; un persona ku tin un zelo asina no ta tolerá rivalidat ni reproche i tin un deseo fuerte pa protehá un bon nòmber òf pa korigí un daño.

11. Kiko a motivá Hesus pa hasi esfuerso?

¹¹ E disipelnan di Hesus no a kometé un fayo ora nan a relashoná David su palabranan ku loke nan a mira Hesus hasi na e tèmpel. Hesus no a hasi esfuerso djis pasobra su tempu tabata limitá sino pasobra e tabata zeloso—òf yalurs—pa e nòmber di su Tata i pa adorashon berdadero. Ora el a mira tur e reproche i blasfemia ku a bini riba e nòmber di Dios, e tabatin tur motibu pa ta zeloso, òf yalurs. P’esei mes, el a aktua pa korigí e situashon. Ora Hesus a mira kon e lidernan religioso tabata oprimí i probechá di hende humilde, su zelo a motiv’é pa trese alivio pa e pueblo i kondená e lidernan religioso opresivo ku palabranan fuerte.​—Mat. 9:36; 23:​2, 4, 27, 28, 33.

Demostrá Zelo pa Adorashon Berdadero

12, 13. Kiko lidernan religioso di kristiandat djawe a hasi relashoná ku (a) e nòmber di Dios? (b) e Reino di Dios?

¹² E situashon religioso den nos tempu ta meskos—si no ta pió—ku den tempu di Hesus. Por ehèmpel, e promé kos relashoná ku Dios su nòmber ku Hesus a siña su siguidónan pidi den orashon ta: “[Laga] bo nòmber sea santifiká.” (Mat. 6:9) Akaso lidernan religioso, spesialmente klero di kristiandat, ta siña hende konosé Dios na su nòmber i tambe santifiká òf onra e nòmber ei? Al kontrario, nan ta duna hende un idea robes di Dios pasobra nan siñansanan falsu, manera esun di Trinidat, alma inmortal i fièrnu di kandela, ta laga Dios parse un persona misterioso, difísil pa komprondé, kruel i asta sadístiko. Ademas, nan hipokresia i eskándalonan  ta trese reproche riba e nòmber di Dios. (Lesa Romanonan 2:​21-24.) Es mas, nan a hasi tur loke ta posibel pa skonde e nòmber personal di Dios; nan a asta saka e nòmber for di nan tradukshonnan di Beibel. Asina nan ta stroba hende di hala serka Dios i kultivá un relashon personal kuné.​—Sant. 4:​7, 8.

¹³ Relashoná ku e Reino di Dios, Hesus a siña su disipelnan pidi den orashon: “Ku bo reino bin. Ku bo boluntat sosodé na tera meskos ku den shelu.” (Mat. 6:10) Aunke lidernan religioso di kristiandat hopi bes ta ripití e orashon ei, nan ta urgi hende pa apoyá institushonnan polítiko i otro organisashonnan humano. Es mas, nan ta menospresiá hende ku ta hasi esfuerso pa prediká i duna testimonio di e Reino akí. Esei ta pone ku hopi ku ta yama nan mes kristian no ta papia mes di e Reino di Dios te pa nan ehersé fe den dje.

14. Kon klero di kristiandat ta desviá for di e Palabra di Dios?

¹⁴ Den un orashon na Dios, Hesus a bisa bon kla: “Bo palabra ta bèrdat.” (Juan 17:17) I promé ku Hesus a bai shelu, el a indiká ku lo el a nombra “e esklabo fiel i prudente” pa perkurá kuminda spiritual pa su siguidónan. (Mat. 24:45) Aunke klero di kristiandat ta lihé pa bisa ku ta nan ta siña hende e Palabra di Dios, nan a kumpli fielmente ku e trabou ku e Doño a konfia nan kuné? Nò. Hopi bes nan sa bisa ku Beibel ta kontené fábula òf mito. En bes di alimentá nan tou ku kuminda spiritual, i asina yuda nan komprondé e Skritura i konsolá nan, miembronan di klero a kishikí orea di kreyentenan ku filosofia humano. Ademas, nan ta desviá for di e normanan moral di Dios pa satisfasé hende ku ta biba segun e supuesto moralidat nobo.​—2 Tim. 4:​3, 4.

15. Kon bo ta sinti tokante tur e kosnan ku klero di kristiandat a yega di hasi i ta hasiendo den nòmber di Dios?

¹⁵ Debí na tur e kosnan ku klero di kristiandat a hasi—supuestamente den e nòmber di e Dios di Beibel—hopi hende sinsero a keda desilushoná òf no ta kere mas den Dios ni den Beibel. Nan a bira víktima di Satanas i su sistema malbado. Ora bo mira òf tende di e kosnan ei ku ta tuma lugá tur dia, kon bo ta sinti? Ora bo mira tur e reproche i blasfemia ku nan ta trese riba e nòmber di Dios, komo un sirbidó di Yehova, bo no ta haña gana di defendé Dios su nòmber? Ora bo mira kon otronan ta gaña i probechá di hende humilde, bo no ta sinti bo motivá pa konsolá esnan oprimí? Ora Hesus a mira ku hendenan den su tempu tabata “kansá i plamá, manera  karné sin wardadó,” el a sinti kompashon pa nan i a yuda nan. El “a kuminsá siña nan hopi kos.” (Mat. 9:36; Mar. 6:34) Nos tambe tin tur motibu pa demostrá zelo pa adorashon berdadero meskos ku Hesus a hasi.

16, 17. (a) Kiko mester motivá nos pa hasi esfuerso den sirbishi? (b) Ki pregunta e siguiente artíkulo lo kontestá?

¹⁶ Ora nos ta demostrá zelo den nos sirbishi, e palabranan di apòstel Pablo na 1 Timoteo 2:​3 i 4 ta haña un nifikashon spesial. (Les’é.) Nos ta traha duru den sirbishi no solamente pasobra nos ta realisá ku nos ta biba den e último dianan pero tambe pasobra nos sa ku esaki ta e boluntat di Dios. E ke pa hende haña konosementu di e bèrdat pa nan tambe por siña kon pa ador’é i sirbié i risibí su bindishon. P’esei, nos motivashon prinsipal pa hasi esfuerso den sirbishi ta pa onra e nòmber di Dios i yuda hende haña sa su boluntat. Pues, nos no ta prediká djis pasobra tempu ta kabando. Mas bien, nos ta demostrá zelo pa adorashon berdadero.​—1 Tim. 4:16.

¹⁷ Komo e pueblo di Yehova, nos a ser bindishoná ku e konosementu di e bèrdat tokante Dios su propósito pa hende i planeta tera. Nos tin e medionan pa yuda hende haña felisidat i un speransa sigur pa futuro. Nos por mustra nan kon pa haña protekshon ora Satanas su sistema di kos ser destruí. (2 Tes. 1:​7-9) En bes di nos sinti nos frustrá òf desanimá pasobra ta parse ku e dia di Yehova ta tarda, nos mester ta kontentu ku ainda tin tempu pa nos demostrá zelo pa adorashon berdadero. (Mik. 7:7; Hab. 2:3) Kon nos por kultivá e zelo ei? E siguiente artíkulo lo kontestá e pregunta ei.

[Nota]

Bo Por Splika?

• Kiko a motivá Hesus pa traha diligentemente durante su ministerio?

• Ora Beibel ta papia di “zelo,” kiko e ta referí na dje?

• Kiko nos ta mira awe ku mester motivá nos pa demostrá zelo pa adorashon berdadero?

[Preguntanan di Estudio]

[Plachi na página 12]

Loke tabata mas importante pa Hesus ta hasi e boluntat di su Tata i mustra amor pa su próhimo

[Plachi na página 14]

Nos tin tur motibu pa demostrá zelo pa adorashon berdadero