E Relato di Edén Ta Importante pa Bo
ÚN DI e opheshonnan mas sorprendente ku algun eksperto a bini kuné ta ku e otro partinan di Beibel no ta apoyá e relato di Edén. Por ehèmpel, Profèser di Estudionan Religioso Paul Morris a skirbi: “Despues di e promé menshon, Beibel no ta hasi ningun referensia direkto mas na e relato di Edén.” Maske vários “eksperto” ta bai di akuerdo kuné, esaki no ta kuadra ku e echonan.
En realidat Beibel ta referí hopi bes na e hòfi di Edén, Adam, Eva i e kolebra. * Pero e eror ku algun eksperto a hasi no ta nada na komparashon ku un eror hopi mas grandi ku ta afektá masha hopi hende. Ora ku lidernan religioso i krítikonan di Beibel ta lanta duda den e relato di hòfi di Edén, en realidat ta Beibel nan ta ataká. Kon asina?
Pa un hende komprondé loke a pasa den Edén ta masha importante p’e komprondé e otro partinan di Beibel. Por ehèmpel, e propósito di e Palabra di Dios ta pa yuda nos haña kontesta pa e preguntanan di mas profundo i importante. Hopi biaha, Beibel su kontesta riba e preguntanan ei ta relashoná ku e susesonan ku a tuma lugá den e hòfi di Edén. Ban wak algun ehèmpel.
● Dikon nos ta bira bieu i muri? Si Adam ku Eva a keda obediente na Yehova, nan lo a biba pa semper. E úniko manera ku nan lo a muri ta si nan a rebeldiá. E dia ku nan a hasi esei, nan a kuminsá muri. (Génesis 2:16, 17; 3:19) Nan a bira imperfekto i e úniko herensia ku nan a laga pa nan desendientenan ta piká i imperfekshon. P’esei Beibel ta splika: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.”—Romanonan 5:12.
● Dikon Dios ta permití maldat? Den e hòfi di Edén, Satanas a yama Dios un gañadó ku ta priva su kriaturanan di loke ta bon. (Génesis 3:3-5) Pues, el a kuestioná Yehova su derecho di goberná. Adam ku Eva a skohe pa sigui tras di Satanas. Di e manera ei, nan tambe a rechasá Yehova su derecho di goberná i a indiká indirektamente ku hende mes por disidí pa su mes loke ta bon i loke ta malu. Debí na su hustisia i sabiduria perfekto, Yehova tabata sa ku tin solamente ún manera apropiá pa atendé e asuntu ei—laga tempu pasa pa duna hende oportunidat pa goberná nan mes manera nan ke. E maldat ku ta reina, en parte, ta debí na e influensia kontinuo di Satanas. Pero, e maldat akí gradualmente a revelá un gran bèrdat tambe: Hende no por goberná nan mes sin Dios.—Jeremias 10:23.
● Kiko ta Dios su propósito pa e tera? Den e hòfi di Edén, Yehova a stipulá kon bunita henter e tera mester a bira. El a duna Adam ku Eva e tarea pa yena mundu ku nan desendensia i ‘hasi esaki someté na nan,’ pa asina henter e planeta bira mes bunita i armonioso. (Génesis 1:28) Pues, Dios su propósito ta pa e tera bira un paradeis habitá ku desendientenan perfekto i uní di Adam ku Eva. Gran parti di Beibel ta papia tokante kon Dios lo kumpli ku e propósito original ei.
● Pakiko Hesukristu a bini na mundu? Debí ku Adam ku Eva a rebeldiá den e hòfi di Edén, tantu nan komo tur nan desendientenan a haña e kastigu di morto, pero Dios amorosamente a duna hende speransa. El a manda su Yu na mundu pa proveé loke Beibel ta yama e reskate. (Mateo 20:28) Kiko esei ke men? Wèl, Hesus tabata “e último Adam” i el a logra hasi loke Adam no a hasi. Hesus a obedesé Yehova i p’esei el a keda perfekto. El a duna su bida komo un sakrifisio di reskate, i mediante e sakrifisio ei tur hende fiel por haña pordon di nan piká i ku tempu haña e bida ku Adam ku Eva tabatin den e hòfi di Edén promé ku nan a peka. (1 Korintionan 15:22, 45; Juan 3:16) Pues, di e manera ei Hesus a garantisá nos ku Yehova su propósito pa hasi e tera akí un paradeis manera Edén lo bira realidat. *
Dios su propósito no ta vago, ni un konsepto teológiko apstrakto. E ta algu real. Meskos ku nos ta sigur ku e hòfi di Edén realmente a eksistí riba tera i ku e hende- i bestianan ku a biba den dje tabata real, nos por ta sigur tambe ku Dios su promesa pa futuro pronto lo bira realidat. Abo lo no ke disfrutá di e paradeis ei den futuro? Pa un gran parti esei ta dependé di bo mes. Dios ke e futuro ei pa mas tantu hende posibel, asta pa esnan ku a kue mal kaminda.—1 Timoteo 2:3, 4.
Ora Hesus tabata muriendo, el a papia ku un hòmber kende a tuma un rumbo masha malu mes den bida. E hòmber tabata un kriminal i e tabata sa ku e meresé morto. Pero el a papia ku Hesus pa haña konsuelo i speransa. Kiko Hesus a bis’é? “Lo bo ta serka mi den Paraiso.” (Lukas 23:43) Si Hesus kier pa e hòmber ku tabata un kriminal haña resurekshon i e bindishon di biba pa semper den un paradeis manera Edén, bo no ta kere ku lo e ke pa abo tambe risibí e mesun bindishon ei? Klaru ku sí! I su Tata tambe! Si bo ke biba den Paradeis den futuro, hasi tur loke ta na bo alkanse pa siña tokante e Dios ku a traha e hòfi di Edén.
[Nota]
^ par. 3 Wak, por ehèmpel, Génesis 13:10; 1 Krónikanan 1:1; Jòb 31:33; Isaias 51:3; Ezekiel 28:13; 31:8, 9; Lukas 3:38; Romanonan 5:12-14; 1 Korintionan 15:22, 45; 2 Korintionan 11:3; 1 Timoteo 2:13, 14; Hudas 14 i Revelashon 12:9.
^ par. 8 Si bo ke sa mas tokante e sakrifisio di reskate di Kristu, wak kapítulo 5 di e buki Kiko Beibel Ta Siña Realmente? publiká pa Testigunan di Yehova.
[Kuadro/Plachinan na página 9]
E PROFESIA PRINSIPAL DI BEIBEL
“Lo mi pone enemistat entre abo [e kolebra] i e muhé, i entre bo simia i su simia; e lo heridá bo kabes, i abo lo heridá su hilchi di pia.”—Génesis 3:15.
Esei ta e promé profesia di Beibel. Dios a duna e profesia ei den Edén. Ken e muhé, su desendensia, e kolebra i su desendensia ta? Kiko a sosodé debí na e “enemistat” ei?
E KOLEBRA
Satanas e Diabel.—Revelashon 12:9.
E MUHÉ
Yehova su organisashon di kriatura selestial. (Galationan 4:26, 27) Isaias a papia di “e muhé,” i a profetisá ku e lo duna lus na un nashon spiritual den futuro.—Isaias 54:1; 66:8.
E SIMIA DI E KOLEBRA
Esnan ku ta skohe pa hasi e boluntat di Satanas.—Juan 8:44.
E SIMIA DI E MUHÉ
Hesukristu ta e parti prinsipal di e “simia.” El a bini for di e parti selestial di Yehova su organisashon. E rumannan spiritual di Kristu, ku ta goberná kuné den shelu, tambe ta parti di e “simia” akí. E kristiannan ungí ei ta forma un nashon spiritual, “e Israel di Dios.”—Galationan 3:16, 29; 6:16; Génesis 22:18.
E HERIDA NA HILCHI DI PIA
Esaki tabata un gòlpi doloroso pa e Mesias, pero e no a afekt’é permanentemente. Satanas a logra mata Hesus riba tera. Hesus a haña resurekshon.
E HERIDA NA KABES
Esaki lo ta un gòlpi mortal pa Satanas. Hesus lo eliminá Satanas pa semper. Asta promé ku esei, Hesus lo kaba ku e maldat ku Satanas a kuminsá kuné den Edén.—1 Juan 3:8; Revelashon 20:10.
Si bo ke haña un resúmen kòrtiku di e tema prinsipal di Beibel, wak e foyeto Beibel i Su Mensahe (na spañó), publiká pa Testigunan di Yehova.
[Plachi na página 10]
Adam ku Eva a sufri e konsekuensianan desastroso di piká