“Mi por enfrentá tur kos pa medio di Esun ku ta duna mi forsa.”​—FIL. 4:13, BPK.

1. Dikon sirbidónan di Yehova ta haña nan ku hopi kontratempu?

SIRBIDÓNAN di Yehova sa haña nan ku tur tipo di kontratempu. Algun di nan ta debí na nos mes imperfekshon òf ta konsekuensia di e mundu ku nos ta biba aden. Otronan ta debí na e odio ku hende ku no ta sirbi Yehova tin kontra nos. (Gén. 3:15) For di kuminsamentu di historia humano, Dios a yuda su fiel sirbidónan soportá persekushon religioso, resistí preshon dañino di nan pareunan i wanta tur otro tipo di kontratempu. Su spiritu santu por duna nos tambe forsa pa wanta difikultat.

Yudansa pa Soportá Persekushon Religioso

2. Kiko ta meta di persekushon religioso, i den ki forma e por presentá?

² Meta di persekushon religioso ta pa stroba hende ku ta sirbi Dios di sigui nan religion, di plama nan kreensianan i tambe pa pone hende kibra nan integridat. E persekushon akí por presentá den vários forma, sea direkto òf indirekto. Beibel ta kompará e atakenan akí di Satanas ku tantu esnan di un leon yòn komo di un kobra.​—Lesa Salmo 91:13.

3. Den ki sentido Satanas ta ataká nos manera un leon òf un kobra?

³ Meskos ku un leon feros, hopi bes Satanas  ta lansa su atakenan frontal òf direkto kontra nos pa medio di violensia, enkarselashon òf prohibishon di nos obra. (Sal. 94:20) Informenan di Anuario ku ta deskribí e aktividatnan di Testigunan di Yehova den nos tempu ta duna detaye di vários di e tipo di atakenan ei. Por ehèmpel, na hopi lugá, grupo di manifestante, bou di direkshon di klero òf ekstremista polítiko, a maltratá sirbidónan di Dios. E atakenan akí a pone algun di nan stòp di sirbi Yehova. Na otro okashon, Diabel ta lansa su atakenan manera un kobra. For di lugánan di skonde, e ta ataká su víktimanan den forma di traishon, venenando nan mente i engañando nan pa hasi loke e ke. Su meta ta pa debilitá nos òf korumpí nos spiritualmente. Pero ku yudansa di e spiritu santu di Dios, nos por resistí ámbos forma di persekushon.

4, 5. Kon ta e mihó manera pa prepará pa persekushon, i dikon? Duna un ehèmpel.

⁴ Awor kon nos por prepará pa persekushon? No tin sentido pa sinta imaginá tur e posibel atakenan ku nos por haña nos kuné, ya ku nos no sa eksaktamente kiko lo sosodé den futuro. Nos no ta gana nada ku preokupá ku kosnan ku kisas nunka lo no sosodé. Pero tin algu ku sí nos por hasi. Nos por meditá riba e ehèmpelnan bíbliko di sirbidónan di Yehova ku a mantené nan integridat, i tambe riba e siñansanan i ehèmpel di Hesus. Mayoria di ruman ku a hasi esei a logra wanta persekushon. Esaki a yuda nan haña un amor mas profundo pa Yehova, lokual a yuda nan resistí kualke difikultat ku a presentá den nan kaminda.

⁵ Tuma por ehèmpel e kaso di dos ruman muhé kristian na Malawi. Den un intento pa obligá nan kumpra karchi di afiliashon na un partido polítiko, un grupo di hende violento a maltratá nan, kita nan sunú i menasá di violá nan. Nan a gaña nos rumannan ku asta e miembronan di e famia di Bètel a kumpra karchi. Kiko nos rumannan a kontestá? “Ta Yehova Dios so nos ta sirbi. Pues si e rumannan na sukursal a kumpra karchi, pa nos esei no ta nifiká nada. Ni maske boso mata nos, nos no ta nenga nos fe!” Despues ku e rumannan a para riba nan punto ku kurashi, e grupo a laga nan bai.

6, 7. Kon Yehova ta yuda su sirbidónan enfrentá persekushon?

⁶ Apòstel Pablo a bisa ku aunke e kristiannan na Tesalónika a aseptá e mensahe di e bèrdat “den hopi tribulashon,” tòg nan a sinti “e goso di spiritu santu.” (1 Tes. 1:6) En bèrdat, hopi kristian, tantu djawe komo di pasado, ku a wanta persekushon, a bisa ku nèt den e momentonan di mas difísil, nan a sinti un pas, lokual ta un aspekto di e fruta di Dios su spiritu santu. (Gal. 5:22) Anto e pas ei a yuda protehá nan mente i kurason. Sí, Yehova ta usa su forsa aktivo pa duna su sirbidónan poder pa vense difikultat i aktua na un manera sabí ora nan haña nan ku kontratempu. *

⁷ E determinashon di sirbidónan di Yehova pa mantené nan integridat asta durante persekushon kruel a laga otro hende keda asombrá. Nan a haña e impreshon ku Testigunan di Yehova tin un forsa sobrehumano. De echo, esei ta e kaso tambe, pasobra apòstel Pedro a garantisá nos: “Si boso wòrdu reprochá pa e nòmber di Kristu, boso ta bindishoná, pasobra e spiritu di gloria i di Dios ta riba boso.” (1 Ped. 4:14) Pues, e echo ku nos ta ser persiguí pa motibu ku nos ta pega na normanan di hustisia ta un indikashon ku nos tin Yehova su aprobashon, i esei ta duna nos un goso grandi.​—Mat. 5:​10-12; Juan 15:20.

Yudansa pa Resistí Preshon di Nos Pareunan

8. (a) Kiko a yuda Josué i Kalèb resistí preshon di nan kontemporáneonan? (b) Kiko nos por siña for di e ehèmpel di Josué i Kalèb?

⁸ Un forma di oposishon mas indirekto òf sutil ta e preshon ku kristiannan mester soportá di nan pareunan. Ma e spiritu di Yehova ta mas poderoso ku esun di mundu. I esei ta yuda nan soportá bofon, kalumnia òf e preshon pa  sigui normanan di hende. Pensa por ehèmpel riba Josué i Kalèb. Kiko a yuda nan bai kontra e opinion di e dies otro spionnan ku a ser mandá na e tera di Kánaan? Esei tabata spiritu santu. E forsa akí a lanta den nan un “spiritu,” òf aktitut mental, diferente.​—Lesa Númeronan 13:30; 14:​6-10 i 24.

9. Pakiko kristiannan no mester tin miedu di bai kontra e opinion di e mayoria?

⁹ Meskos tambe, spiritu santu a yuda e apòstelnan di Hesus pa no obedesé e personanan ku hopi hende tabata respetá komo maestro di religion berdadero; mas bien, el a yuda nan obedesé Dios. (Echo. 4:​21, 31; 5:​29, 32) Awe, hopi hende ta preferá di bai tras di e mayoria pa evitá konflikto òf konfrontashon. Ma kristiannan berdadero sí tin ku para firme pa loke ta korekto. Debí na e forsa ku Dios ta duna nan pa medio di spiritu santu, nan no tin miedu di ta diferente. (2 Tim. 1:7) Laga nos konsiderá un área den kua nos no mester sede na preshon di nos pareunan.

10. Ki dilema algun kristian por enfrentá?

¹⁰ Algun hóben kisas ta haña nan ku un dilema ora nan haña sa ku un amigu di nan ta enbolbí den kondukta ku Beibel ta kondená. Kisas nan ta pensa ku si nan buska yudansa spiritual pa nan amigu, nan ta kibra e konfiansa ku ta eksistí entre nan. P’esei nan ta evitá di papia riba e asuntu, demostrando asina un sentido ekiboká di lealtat. E hóben ku ta hasi malu por asta preshoná su amigu pa tene su piká skondí. Klaru ku no ta hóbennan so por haña nan ku e tipo di problema akí. Pa algun adulto tambe ta difísil pa aserká e ansianonan ora un amigu òf miembro di famia kometé un piká serio. Pero kon kristiannan berdadero mester reakshoná den e kasonan akí?

11, 12. Kon ta e mihó manera pa reakshoná ora un miembro di kongregashon insistí pa bo no revelá su piká, i pakiko?

¹¹ Imaginá bo e siguiente situashon. Suponé ku un hóben ku yama Alex a haña sa ku su amigu Steve tin e kustumber di wak pornografia. Alex ta bisa Steve ku e ta sumamente preokupá ku loke e ta hasiendo. Ma Steve no ta hasi kaso di dje. Ora Alex animá Steve pa bai papia ku e ansianonan, Steve ta respondé ku si di bèrdat nan ta bon amigu, Alex lo no bai bisa nada riba dje. Alex mester tin miedu di pèrdè su amigu? Kisas e ta puntra su mes: ‘Kiko e ansianonan lo pensa si Steve nenga di atmití su malecho?’ Pero si Alex keda ketu, esei no ta yuda ku nada. Ta pió so e situashon por bira, pasobra Steve por asta pèrdè su relashon ku Yehova. Ta bon pa Alex kòrda ku “temor pa hende ta pone un trampa, ma esun ku konfia den SEÑOR lo ta alsá.” (Pro. 29:25) Kiko mas Alex por hasi? Komo muestra di su amor pa su amigu, e por aserká Steve atrobe i papia frankamente kuné tokante e problema. Esei ta eksigí kurashi. I e chèns ta grandi ku e biaha akí sí Steve ta dispuesto pa papia tokante e asuntu. Alex mester bolbe anim’é pa papia ku e ansianonan i bis’é ku si e no hasi esei denter di un periodo di tempu rasonabel, e mes lo informá nan.​—Lev. 5:1.

 ¹² Si un dia bo haña bo den un situashon similar, podisé na promé instante bo amigu lo no keda kontentu ku bo yudansa. Pero tal bes ku tempu lo e bin realisá ku loke bo ta hasiendo ta pa su mes bon. Si e aseptá bo yudansa, pa semper lo e keda gradisidu na bo pa bo kurashi i lealtat. Di otro banda, si e rabia ku bo, e ta e klase di amigu ku bo ke tin? Semper, e mihó kos pa hasi ta di agradá Yehova, nos mihó Amigu. Ora nos pone Yehova na promé lugá, otronan ku tambe ta stim’é lo respetá nos pa nos lealtat na dje i bira nos berdadero amigunan. Nos nunka mester duna Diabel chèns di infiltrá den e kongregashon kristian, pasobra esei lo hasi Yehova su spiritu santu tristu. Mas bien, nos ta aktua na armonia ku e spiritu ei, trahando duru pa konserbá e puresa di e kongregashon kristian.​—Efe. 4:​27, 30.

Forsa pa Wanta Tur Tipo di Kontratempu

13. Ki kontratempu sirbidónan di Yehova ta haña nan kuné, i pakiko esakinan ta sosodé awe ku mas frekuensia?

¹³ Kristiannan por haña nan ku vários kontratempu, manera problema finansiero, pèrdida di trabou, desaster natural, morto di un ser kerí òf enfermedat. Siendo ku nos ta biba den un ‘tempu trabahoso,’ tardi òf trempan nos tur por haña nos ku un òf otro prueba. (2 Tim. 3:1) Pero ora esei sosodé, ta importante pa no drenta pániko. Spiritu santu por duna nos forsa pa soportá kualke prueba.

14. Kiko a yuda Jòb soportá su pruebanan?

¹⁴ Jòb a pasa den un difikultat tras di otro. El a pèrdè su fuente di entrada, su yunan, su amigunan i su salú. Komo si fuera no ta basta, su kasá a pèrdè konfiansa den Yehova. (Jòb 1:​13-19; 2:​7-9) Sinembargo, Jòb a haña berdadero konsuelo serka Eliú. Eliú su mensahe, i tambe e esensia di Yehova su propio mensahe na Jòb, tabata: “Para ketu i konsiderá e maravianan di Dios.” (Jòb 37:14) Kiko a yuda Jòb soportá su pruebanan? I kiko por yuda nos awe soportá esnan di nos? Nos tin ku meditá riba e vários manifestashonnan di Yehova su poder i spiritu santu. (Jòb 38:​1-41; 42:​1, 2) Kisas nos ta kòrda momentonan den nos mes bida ku nos a mira evidensia di Dios su interes den nos personalmente. Wèl, ainda Yehova tin un interes profundo den nos.

15. Kiko a fortalesé Pablo pa soportá prueba?

¹⁵ Apòstel Pablo, pa motibu di su fe, a wanta hopi kontratempu ku a forma un peliger pa su bida. (2 Kor. 11:​23-28) Kon el a logra mantené su ekilibrio i stabilidat emoshonal bou di e sirkunstansianan difísil ei? El a hasi hopi orashon i a dependé kompletamente riba Yehova. * Durante e tempu di prueba ku aparentemente a kulminá den su morto komo mártir, Pablo a skirbi: “Señor a para na mi lado i a fortalesé mi, pa dor di mi e predikamentu wòrdu kumplí totalmente i tur e paganonan tend’é; i mi a wòrdu librá for di boka di leon.” (2 Tim. 4:17) P’esei, di eksperensia Pablo por a sigurá su rumannan den fe ku nan no tabatin nodi di “preokupá pa nada.”​—Lesa Filipensenan 4:​6 i 7.

16, 17. Duna un ehèmpel di e manera ku Yehova ta fortalesé su sirbidónan pa superá prueba awe.

 ¹⁶ Un pionero ku yama Roxana a mira kon Yehova ta perkurá pa su pueblo. Ora el a pidi su doño di trabou algun dia liber pa bai un kongreso di distrito, e doño a menas’é den forma rabiá ku si e bai, e ta pèrdè su trabou. Roxana a bai tòg i a pidi Yehova fervientemente pa e por keda ku su trabou. Despues di a hasi orashon, el a sintié mas trankil. Su djaluna despues di e kongreso, dicho echo, su hefe a kit’é for di trabou. Roxana a keda masha preokupá. Aunke e no tabata gana mashá, e tabatin mester di e trabou ei pa yuda kria su famia. El a bolbe hasi orashon i a rasoná ku si Dios a perkurá p’e den sentido spiritual na e kongreso, sigur lo e por a hasi esei tambe den sentido material. Na kaminda pa kas, el a mira un bòrchi “Ta Buska Trahadó.” Nan tabatin mester di hende ku eksperensia den traha ku mashin di kose industrial, i el a solisitá pa e trabou. Aunke e gerente a mira ku e no tabatin eksperensia, tòg el a duna Roxana un trabou pa kasi dòbel di e salario ku e tabata gana. Roxana a sinti ku Dios a kontestá su orashonnan. Pero su bindishon di mas grandi tabata di por a kompartí e bon notisia di Reino ku vários di su koleganan, i sinku di nan, inkluso e gerente, a aseptá e bèrdat i batisá.

¹⁷ Tin biaha por parse ku Dios no ta kontestá nos orashonnan, por lo ménos no mesora òf den e manera ku nos ta ferwagt. Si ta asina, mester tin un bon motibu. Yehova sa pakiko, pero kisas ta mas despues nos lo haña sa esei. Pero un kos nos por ta sigur di dje: Dios no ta bandoná su fiel sirbidónan.​—Heb. 6:10.

Yudansa pa Soportá Prueba i Tentashon

18, 19. (a) Pakiko nos por ferwagt prueba i tentashon? (b) Kon bo por enfrentá prueba ku éksito?

¹⁸ Yehova su sirbidónan no ta keda sorprendí ora nan haña nan ku tentashon, desanimashon, persekushon i preshon di nan pareunan, pasobra básikamente mundu ta odia nos. (Juan 15:​17-19) Ma spiritu santu por yuda nos vense kualke difikultat ku nos por enfrentá den nos sirbishi na Dios. Yehova lo no laga nos ser tentá mas ku nos por soportá. (1 Kor. 10:13) Hamas lo e bandoná nos òf laga nos desampará. (Heb. 13:5) Obedensia na su Palabra inspirá ta protehá nos i fortalesé nos. Ademas, su spiritu por motivá nos rumannan pa duna nos e yudansa nesesario, anto ora mas nos tin mester di dje.

¹⁹ Laga nos tur sigui buska Dios su spiritu santu pa medio di orashon i estudio di Beibel. Laga nos sigui permití Yehova ‘fortalesé nos ku su poder glorioso pa asina nos por soportá tur kos ku pasenshi.’​—Kol 1:11, BPK.

[Nota]

Kon Lo Bo Kontestá?

• Kon bo por prepará pa soportá persekushon?

• Kon bo mester reakshoná si un ruman bisa bo pa no revelá su piká serio?

• Ora bo haña bo ku kontratempu, ki konfiansa bo por tin?

[Preguntanan di Estudio]

[Plachi na página 30]

Kiko nos por siña for di e ehèmpel di Josué i Kalèb?

[Plachi na página 31]

Kon bo por yuda un amigu ku a kometé un piká serio?