“[Hesus] a odia maldat.”​—HEB. 1:9.

1. Kiko Hesus a siña su siguidónan tokante amor?

PA MUSTRA kon importante amor ta, Hesukristu a bisa su disipelnan: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.” (Juan 13:​34, 35) Sí, Hesus a manda su disipelnan demostrá amor ku ta reflehá sakrifisio propio. E amor ei lo a identifiká nan komo su siguidó. Ademas, Hesus a urgi nan pa sigui ‘stima nan enemigunan i hasi orashon pa esnan ku ta persiguí nan.’​—Mat. 5:44.

2. Kiko siguidónan di Kristu mester siña odia?

² Fuera di siña su disipelnan tokante amor, Hesus a siña nan tambe kiko nan mester odia. Beibel ta bisa ku Hesus “a stima hustisia i a odia maldat.” (Heb. 1:9; Sal. 45:7) Esaki ta mustra ku no solamente nos mester siña stima hustisia, pero ku nos mester siña odia piká, òf maldat tambe. Apòstel Juan a bisa spesífikamente ku “ken ku praktiká piká ta praktiká kibramentu di lei tambe; i piká ta kibramentu di lei [òf, maldat].”​—1 Juan 3:4.

3. Menshoná algun área den kua nos por demostrá ku nos ta odia maldat i ku e artíkulo akí lo trata.

³ P’esei, komo kristian, ta bon pa nos puntra  nos mes: ‘Mi ta odia maldat?’ Laga nos analisá kuater área den kua nos por demostrá esei: (1) nos aktitut relashoná ku bebementu di mas, (2) nos punto di bista di spiritismo, (3) nos manera di reakshoná riba inmoralidat i (4) nos punto di bista di hende ku ta stima maldat.

No Sea Sklabisá na Alkohòl

4. Dikon Hesus por tabata franko ora el a duna e spièrtamentu pa no bebe di mas?

⁴ De bes en kuando Hesus a bebe biña, aseptando esei komo un regalo di Dios. (Sal. 104:​14, 15) Sinembargo, nunka el a hasi mal uso di e regalo akí bebiendo di mas. (Pro. 23:​29-33) P’esei Hesus por a papia ku tur frankesa ora el a konsehá hende pa no bebe di mas. (Lesa Lukas 21:34.) Bebementu di mas por hiba na otro piká serio. Apòstel Pablo a skirbi: “No bebe biña bira burachi, pasobra esei ta libertinahe, ma sea yená ku e spiritu.” (Efe. 5:18) Ademas, el a konsehá e ruman muhénan di edat den kongregashon pa nan no ta “sklabisá na biña.”​—Tito 2:3.

5. Kiko un persona ku disidí ku e ta bebe bibida alkohóliko lo por puntra su mes?

⁵ Si bo disidí ku bo ta bebe bibida alkohóliko, ta bon pa bo puntra bo mes: ‘Mi tin e mesun punto di bista ku Hesus tokante bebementu di mas? Si mi tin ku konsehá un hende riba e asuntu akí, mi por papia ku frankesa? Mi ta bebe pa lubidá problema òf pa kita strès? Kuantu alkohòl mi ta bebe pa siman? Kon mi ta reakshoná ora hende insinuá ku mi ta bebe di mas? Mi ta defendé mi mes òf asta rabia?’ Si nos permití nos mes bira esklabo di alkohòl, nos lo no por rasoná bon ni tuma desishonnan sabí. Siguidónan di Kristu ta hasi esfuerso pa protehá nan mente, nan kapasidat di pensa.​—Pro. 3:​21, 22.

Keda Leu di Spiritismo

6, 7. (a) Kon Hesus a trata ku Satanas i su demoñonan? (b) Dikon spiritismo ta asina plamá awe?

⁶ Ora Hesus tabata riba tera, el a para firme kontra Satanas i su demoñonan. El a rechasá e atakenan direkto ku Satanas a lansa kontra su lealtat. (Luk. 4:​1-13) Tambe el a rekonosé intentonan sutil pa influensiá su manera di pensa i di aktua i a resistí nan. (Mat. 16:​21-23) Ademas, Hesus a yuda hende sinsero skapa for di e gara kruel di demoño.​—Mar. 5:​2, 8, 12-15; 9:​20, 25-27.

⁷ Despues ku Hesus a bira Rei na aña 1914, el a saka Satanas i su demoñonan for di shelu i asina a eliminá tur influensia impuru ku tabatin den shelu. Komo konsekuensia di esei, Satanas ta mas desididu ku nunka pa “gaña henter mundu.” (Rev. 12:​9, 10) Pues, no ta nada straño ku hopi hende rònt mundu ta fasiná ku spiritismo i ku interes den esaki ta oumentando. Ki medidanan nos por tuma pa protehá nos mes?

8. Ki saminashon kada un di nos tin ku hasi enkuanto nos entretenimentu?

⁸ Beibel klaramente ta spièrta pa e peligernan relashoná ku spiritismo. (Lesa Deuteronomio 18:​10-12.) Awe Satanas i e demoñonan ta influensiá hende su manera di pensa pa medio di pelíkula-, buki- i weganan elektróniko ku ta promové práktikanan ku tin di aber ku spiritismo. P’esei, ora di skohe entretenimentu, kada un di nos mester puntra nos mes: ‘Ku  kiko mi a entretené mi mes e último lunanan akí? Mi a skohe pelíkula, programa di televishon, wega elektróniko, buki òf chiste ku ta presentá magia i kosnan sobrenatural? Mi ta komprondé dikon ta importante pa rechasá kosnan ku tin influensia spiritista, òf mi ta hasi komo si fuera e kosnan akí no ta dje peligroso ei? Mi a yega di para ketu i pensa kiko ta Yehova su opinion di loke mi ta skohe komo rekreo? Si mi a permití e tipo di kosnan satániko ei den mi bida, mi amor pa Yehova i su prinsipionan hustu lo motivá mi pa tuma un desishon firme i libra mi mes di nan?’​—Echo. 19:​19, 20.

Hasi Kaso di Hesus Su Spièrtamentu Relashoná ku Inmoralidat

9. Kon un persona lo por kultivá un amor pa maldat?

⁹ Hesus a apoyá Yehova su norma enkuanto moralidat seksual. El a bisa: “Boso no a lesa ku esun ku a krea hende for di prinsipio ‘a traha nan hòmber i muhé,’ i a bisa: ‘Pa e motibu akí un hòmber lo bandoná su tata i mama i lo uni ku su esposa; i nan dos lo bira ún karni’? Asina anto nan no ta dos mas, sino ún karni. P’esei loke Dios a uni, no laga ningun hende separá.” (Mat. 19:​4-6) Hesus tabata sa ku loke nos wowo mira por influensiá nos kurason. P’esei el a bisa den su Sermon Riba Seru: “Boso a tende ku a wòrdu bisá: ‘No kometé adulterio’; ma ami ta bisa boso ku ken ku wak un muhé pa dese’é, ya kaba el a kometé adulterio kuné den su kurason.” (Mat. 5:​27, 28) De echo, hende ku no ta hasi kaso di e spièrtamentu akí di Hesus ta kultivando un amor pa maldat.

10. Konta un eksperensia ku ta mustra ku un persona por stòp di wak pornografia.

¹⁰ Satanas ta usa pornografia pa promové inmoralidat seksual. Anto e mundu aktual ta pèstá ku pornografia. Personanan ku ta wak pornografia tin difikultat pa saka e esenanan inmoral for di nan mente. Nan por asta bira adikto na pornografia. Wak kiko a pasa ku un ruman hòmber kristian. El a konta: “Mi tabata wak pornografia den sekreto. Mi a krea un mundu di fantasia ku mi a pensa tabata separá for di mi bida komo sirbidó di Yehova. Mi tabata sa ku mi ta hasi malu, ma mi tabata bisa mi mes ku ainda mi sirbishi na Dios ta aseptabel.” Kiko a pone e ruman hòmber akí kambia su manera di pensa? El a bisa: “Mi a disidí di konta e ansianonan mi problema aunke esei tabata e kos di mas difísil ku mi a yega di hasi.” Ku tempu e ruman akí a stòp ku e mal hábito ei. El a atmití: “Despues ku mi a libra mi mes di e piká akí, mi a sinti ku por fin mi tabatin un konsenshi realmente limpi.” Pues, esnan ku ta odia maldat mester siña odia pornografia.

11, 12. Kon nos por demostrá ku nos ta odia maldat ora di skohe músika?

¹¹ Músika, tantu letra komo ritmo, por tin un gran influensia riba nos emoshon i, pues, riba nos kurason figurativo. Músika riba su mes ta un regalo di Dios, i pa hopi tempu kaba e ta hunga un papel importante den adorashon berdadero. (Eks. 15:​20, 21; Efe. 5:19) Pero e mundu malbado akí di Satanas ta promové músika ku ta presentá inmoralidat komo algu bon, sí, ku ta glorifik’é. (1 Juan 5:19) Kon bo por sa si e músika ku bo ta skucha ta hasiendo bo kurason impuru?

¹² Pa kuminsá, puntra bo mes: ‘E kantikanan ku mi ta skucha ta glorifiká matamentu, adulterio, fornikashon i blasfemia? Si mi mester  lesa e letranan di sierto kantikanan pa un hende tende, lo e haña e impreshon ku mi ta odia maldat òf e palabranan ta indiká ku mi kurason ta impuru?’ Nos no por bisa ku nos ta odia maldat si nos ta skucha kantikanan ku ta glorifiká loke ta malu. Hesus a bisa: “E kosnan ku ta sali for di boka ta bini for di kurason, i ta esei ta kontaminá hende. Pasobra for di kurason ta sali pensamentu malu, matamentu, adulterio, fornikashon, ladronisia, testimonio falsu, kalumnia.”​—Mat. 15:​18, 19; kompará ku Santiago 3:​10 i 11.

Siña Mira Hende Ku Ta Stima Maldat Manera Hesus Ta Mira Nan

13. Kon Hesus a mira hende ku a hasi nan kurason duru i deliberadamente a sigui hasi piká?

¹³ Hesus a bisa ku el a bini pa yuda hende pekadó arepentí. (Luk. 5:​30-32) Pero kon el a mira esnan ku a hasi nan kurason duru i deliberadamente a sigui hasi piká? Hesus a spièrta seriamente pa tene kuidou ku e influensia di hende asina. (Mat. 23:​15, 23-26) Ademas, el a bisa bon kla: “No ta tur hende ku bisa mi: ‘Señor, Señor,’ lo drenta e reino di shelu; ma esun ku hasi e boluntat di mi Tata ku ta den shelu. Hopi lo bisa mi den e dia ei [ora ku Dios ta ehekutá su huisio]: ‘Señor, Señor, nos no a profetisá den bo nòmber, i den bo nòmber a saka demoño, i den bo nòmber a hasi hopi milager?’” Ma Hesus lo rechasá esnan ku ta sigui hasi malu sin arepentí, bisando nan: “Bai for di mi.” (Mat. 7:​21-23) Dikon e hendenan akí lo risibí un huisio asina? Pasobra nan ta desonrá Dios i ta perhudiká otro hende ku nan echonan di maldat.

14. Dikon ta ekspulsá pekadó ku no arepentí for di kongregashon?

¹⁴ E Palabra di Dios ta manda pa ekspulsá pekadó ku no arepentí for di kongregashon. (Lesa 1 Korintionan 5:​9-13.) Esaki ta nesesario pa por lo ménos tres motibu: (1) pa tene Yehova su nòmber liber di reproche, (2) pa protehá e kongregashon p’e no ser kontaminá i (3) pa yuda e persona ku a peka yega na arepentimentu si ta posibel.

15. Si nos ke keda leal na Yehova, ki preguntanan serio nos tin ku hasi nos mes?

¹⁵ Nos ta mira hende ku deliberadamente ta sigui hasi piká manera Hesus ta mira nan? Ta bon pa nos pensa riba e preguntanan akí: ‘Lo mi skohe pa asosiá regularmente ku un persona ekspulsá òf ku a desasosiá su mes di e kongregashon kristian? Kiko si e persona ei ta un famia yegá ku no ta biba den kas huntu ku mi?’ Un situashon asina di bèrdat por pone nos amor pa hustisia i nos lealtat na Dios na prueba. *

16, 17. Ki situashon difísil un ruman muhé kristian a enfrentá, i kiko a yud’é kumpli lealmente ku e instrukshonnan relashoná ku ekspulshon di pekadó ku no arepentí?

¹⁶ Konsiderá e siguiente eksperensia di un ruman muhé kende su yu hòmber adulto un tempu tabata stima Yehova. Pero mas despues, e yu a skohe pa hasi malu sin arepentí i a ser ekspulsá for di e kongregashon. Nos ruman muhé tabata stima Yehova, pero e tabata stima su yu tambe; p’esei tabata masha difísil p’e evitá di asosiá ku su yu manera Beibel ta manda.

 ¹⁷ Kiko lo bo a konsehá e ruman muhé akí? Un ansiano a yud’é realisá ku Yehova ta komprondé su doló. Promé, e ansiano a anim’é pa pensa riba e doló ku Yehova mester a sinti ora ku algun di su yunan angelikal a rebeldiá. Despues e ansiano a rasoná kuné i a lag’é mira ku aunke Yehova sa kon doloroso un situashon asina por ta, e ta rekerí pa ekspulsá pekadónan ku no arepentí. E ruman muhé a pensa seriamente riba loke e ansiano a bis’é i a kumpli lealmente ku e instrukshonnan relashoná ku ekspulshon. * Tal muestra di lealtat sigur ta hasi Yehova su kurason kontentu.​—Pro. 27:11.

18, 19. (a) Kiko nos ta odia ora nos kibra kontakto ku un persona ku ta práktika maldat? (b) Kiko por ta e resultado ora nos ta leal na Dios i na su instrukshonnan bíbliko?

¹⁸ Si bo ta den un situashon similar, kòrda ku Yehova ta komprondé loke bo ta sinti. E echo ku bo ta kibra kontakto ku un persona ku a ser ekspulsá òf ku a desasosiá su mes ta mustra ku bo ta odia e aktitut i kondukta ku a hiba na tal disiplina. Ademas, bo desishon ta demostrá ku bo ta stima e persona ku a hasi malu i ta p’esei bo ke hasi loke ta mihó p’e. Ora bo ta leal na Yehova tin mas chèns ku e persona ta arepentí i bolbe na Yehova.

¹⁹ Un ruman muhé ku un tempu tabata ekspulsá a skirbi: “Mi ta kontentu ku Yehova ta stima su pueblo asina tantu ku e ta sòru pa su organisashon keda limpi. Loke por parse algu masha severo den bista di hende ku no ta forma parti di e kongregashon ta un medida nesesario i en realidat amoroso.” Bo ta kere ku e persona akí lo por a yega na e konklushon ei si su famia i e rumannan den kongregashon a sigui tene kontakto kuné miéntras e tabata ekspulsá? Ora nos ta apoyá e instrukshonnan bíbliko relashoná ku ekspulshon, nos ta demostrá ku nos ta stima hustisia i ta rekonosé Yehova su derecho di establesé normanan di kondukta.

“Odia Maldat”

20, 21. Dikon ta importante pa siña odia maldat?

²⁰ Apòstel Pedro a spièrta: “Sea sobrio, sea alerta.” Dikon? Pasobra “boso atversario, e Diabel, ta kana rònt manera un leon ku ta gruña, buskando ken e por devorá.” (1 Ped. 5:8) Abo ta esun ku lo e devorá? Wèl, esei ta dependé di e grado ku bo siña odia maldat.

²¹ No ta fásil pa desaroyá odio pa maldat. Nos a nase den piká i ta biba den un mundu ku ta animá hende pa satisfasé nan deseonan karnal. (1 Juan 2:​15-17) Ma nos por siña odia loke ta malu. Kon? Imitando Hesukristu i kultivando un amor profundo pa Yehova Dios. Pues, laga nos ta desididu pa “odia maldat” i sigui konfia plenamente ku Yehova lo ‘preservá su santunan [òf, “esnan leal na dje,” NW] i libra nan for di man di e malbado.’​—Sal. 97:10.

[Nota]

Kon Lo Bo Kontestá?

• Kiko lo yuda nos saminá nos aktitut relashoná ku konsumo di alkohòl?

• Kon nos por protehá nos mes kontra spiritismo?

• Dikon pornografia ta peligroso?

• Kon nos ta demostrá ku nos ta odia maldat ora un persona ku nos ta stima ser ekspulsá?

[Preguntanan di Estudio]

[Plachi na página 29]

Si bo disidí ku bo ta bebe bibida alkohóliko, kiko bo tin ku puntra bo mes promé?

[Plachi na página 30]

Tene kuidou ku entretenimentu ku tin influensia satániko

[Plachi na página 31]

Amor pa kiko un persona ta kultivá ora e ta wak pornografia?