“Dor di e palabra di SEÑOR e shelunan a wòrdu trahá, i dor di e rosea [òf, “spiritu,” NW] di su boka, henter nan ehérsito.”​—SAL. 33:6.

1, 2. (a) Kon hende su konosementu tokante tera i universo a oumentá atraves di tempu? (b) Ki pregunta meresé un kontesta?

NA AÑA 1905, hopi sientífiko, entre nan e famoso sientífiko Albert Einstein, tabata kere ku universo ta konsistí di un galaksia so, esta, nos Via Láktea. Sinembargo, nos universo ta muchu mas grandi di loke nan a pensa! Aktualmente, sientífikonan ta kere ku tin mas ku 100 mil mion galaksia, di kua algun ta konsistí di míles di miónes di strea. Anto segun ku nan ta usa teleskopnan mas potente, sea riba tera òf den órbita, nan ta sigui deskubrí mas galaksia.

² Na aña 1905, sientífikonan su konosementu di planeta Tera tabata mes limitá ku nan konosementu di universo. Ta un echo ku e hendenan ku a biba un siglo pasá tabata sa mas ku nan antepasadonan. Awe tambe, kompará ku e tempu ei, hende sa muchu mas tokante e bunitesa di kosnan bibu, e manera kompliká ku bida ta hinká den otro i tokante e maneranan ku tera ta sostené bida. I sin duda nos lo siña hopi kos mas tokante nos tera i universo den e añanan benidero. Pues, ta na su lugá pa puntra: Kon tur e kosnan akí a yega na eksistensia? Nos por sa e kontesta riba e pregunta ei pasobra e Kreador a revelá esaki den e Santu Skritura.

Kreashon: Un Milager

3, 4. Kon Dios a krea universo, i den ki sentido su obranan ta dun’é gloria?

³ Beibel su palabranan di introdukshon ta splika kon nos universo a yega na eksistensia: “Na prinsipio Dios a krea e shelunan i tera.” (Gén. 1:1) Yehova a usa su spiritu, òf poder santu, pa krea e tera i tur sobrá kos den universo for di nada. Un artesano, por ehèmpel, ta usa su mannan i su hèrmèntnan pa traha kos, pero Dios ta manda, òf usa, su spiritu santu pa realisá su obranan magnífiko.

⁴ E Skritura ta referí na spiritu santu komo “e dede” di Dios. (Luk. 11:20; Mat. 12:28) Anto loke Yehova a krea mediante su spiritu santu—“e obra di su mannan”—ta dun’é gloria. P’esei David a kanta den un salmo: “E shelunan ta konta di e gloria di Dios; i e firmamentu ta proklamá e obra di su mannan.” (Sal. 19:1) Sí, kreashon ta duna prueba di e poder asombroso di e spiritu santu di Dios. (Rom. 1:20) Kon asina?

Dios Su Poder Infinito

5. Duna un ehèmpel ku ta indiká kuantu poder pa krea e spiritu santu di Yehova tin.

⁵ E universo ta inkreiblemente grandi i ta duna prueba ku Yehova su poder i energia ta inagotabel. (Lesa Isaias 40:26.) Pensa riba solo. E ta un strea i ta keda mas ku 150 mion kilometer for di tera i tin un temperatura di mas òf ménos 15 mion grado Celsius. Aunke solo ta saka asina tantu kayente, e ta nèt na e distansia korekto for di tera pa tur loke tin bida por sigui eksistí riba tera. Ta bisto ku tabatin mester di un tremendo poder i energia pa krea solo i e otro míles di miónes di streanan ku tin. Yehova tin tur e energia ku tabata nesesario pa hasi esei i muchu mas.

6, 7. (a) Kiko ta indiká ku kreashon a tuma lugá na un manera ordená? (b) Kiko ta mustra ku no ta pa kasualidat nos universo a yega na eksistensia?

 ⁶ Rònt di nos tin yen di evidensia ku ta indiká ku Dios a usa su spiritu santu pa krea kos na un manera ordená. Laga nos ilustrá esaki: Suponé ku bo tin un kaha ku bala di diferente koló. Bo ta sagudí e kaha i bruha e balanan. Kaba bo ta basha nan tur abou. Bo ta ferwagt ku e balanan di e mesun koló ta kore bai para huntu? Tur bala blou huntu, tur bala hel huntu, etcetera? Klaru ku nò! Pasobra akshon deskontrolá no ta hiba na un resultado ordená sino na desórden. Esei ta un lei fundamental di naturalesa. *

⁷ Pero ora nos usa teleskop pa studia universo i loke tin den dje, kiko nos ta mira? Nos ta mira un sistema inmenso i masha ordená ku ta move ku gran presishon. E ta konsistí di galaksia, strea i planeta. Esaki no por ta resultado di kasualidat ni di un aksidente kósmiko inesperá. P’esei, nos tin ku puntra: Ki forsa a ser usá pa krea nos universo ku ta asina ordená? Komo hende, nos no por identifiká e forsa ei pa medio di siensia i teknologia so. Sinembargo, Beibel a identifik’é komo e spiritu santu di Dios, e forsa di mas poderoso di universo. E salmista a kanta: “Dor di e palabra di SEÑOR e shelunan a wòrdu trahá, i dor di e rosea [òf, “spiritu,” NW] di su boka, henter nan ehérsito.” (Sal. 33:6) Anto anochi, ora nos tira un bista na shelu, ta un parti masha chikitu di e “ehérsito” di strea ei nos wowonan por mira.

Spiritu Santu i Planeta Tera

8. Kuantu kos nos sa realmente di e obranan di Yehova?

⁸ Loke nos ta komprondé aktualmente tokante naturalesa ta nada na komparashon ku tur loke tin di siña tokante dje. Ainda nos sa masha poko di tur e kosnan ku Dios a krea. Ta manera e hòmber fiel Jòb a bisa: “Mira, esakinan ta djis un parti minimal di su obranan; i ta un palabra suave asina nos ta tende for di dje!” (Jòb 26:14) Siglonan despues, Rei Salomon, un opservadó atento di e kreashon di Yehova, a deklará: “[Dios] a traha tur kos apropiá na su tempu. Tambe el a pone eternidat den nan kurason, sin ku hende por haña sa e trabou ku Dios a hasi for di prinsipio te na fin.”​—Ekl. 3:11; 8:17.

9, 10. (a) Ki forsa Yehova a usa pa prepará planeta Tera? (b) Menshoná algun desaroyo ku a tuma lugá durante e promé dianan di kreashon.

⁹ Pero Yehova a revelá detayenan importante tokante su obranan. Por ehèmpel, e Skritura ta bisa nos ku míles di miónes di aña pasá Dios su spiritu tabata aktivo riba tera. (Lesa Génesis 1:2.) E tempu ei no tabatin tera seku ni lus, i aparentemente ni aire pa hala rosea riba superfisie di tera.

¹⁰ Kaba Beibel ta deskribí loke Dios a hasi durante un seri di dia di kreashon. E dianan ei no tabata dianan di 24 ora; mas bien, nan tabata periodonan largu di tempu durante kua sierto desaroyonan a tuma lugá. Riba e promé dia di kreashon, Yehova a laga lus kuminsá aparesé na superfisie di tera. E proseso ei lo a terminá mas despues ora solo i luna a bira visibel for di riba tera. (Gén. 1:​3, 14) Riba e di dos dia, Yehova a kuminsá forma e atmósfera. (Gén. 1:6) E ora ei planeta Tera tabatin awa, lus i aire; pero ainda e no tabatin tera seku. Na kuminsamentu di e di tres dia di kreashon, Yehova a usa su spiritu santu pa produsí tera seku, kisas dirigiendo e poderoso forsanan natural di tera mes pa forma e kontinentenan. (Gén. 1:9) Durante e di tres dia i e otro periodonan di kreashon tabatin mas desaroyonan asombroso.

Spiritu Santu i Kriaturanan Bibu

11. Kiko e formanan bunita, den proporshonnan bon balansá i a la bes masha kompliká, di organismonan bibu ta demostrá?

¹¹ Durante e di tres te ku e di seis dia di kreashon, Dios a usa su spiritu santu pa krea  organismonan bibu sumamente bon organisá. Sí, el a krea un variedat impreshonante di mata i bestia. (Gén. 1:​11, 20-25) E echo ku kada un di e organismonan akí ta masha kompliká i tin forma bunita den proporshonnan bon balansá ta mustra klaramente ku un persona masha inteligente mester a diseñá nan.

12. (a) Kiko ta e funshon di DNA? (b) Kiko nos ta siña for di e echo ku DNA ta sigui funshoná asina bon?

¹² Laga nos konsiderá nos DNA, esta, e kódigo di instrukshon ku tin den kada sèl i ku ta transmití e karakterístikanan hereditario di un organismo di un generashon pa otro. Tur organismo bibu riba planeta Tera—sea ta mikrobio, yerba, olefante, bayena òf hende—ta hasi uso di DNA pa reprodusí. Aunke e kriaturanan riba tera ta masha distinto for di otro, e kódigo akí, ku ta kontrolá nan karakterístikanan hereditario, ta funshoná masha stabil i a pone ku atraves di siglonan e diferensia entre e sortonan básiko di kriatura a keda bisto. Ta p’esei e vários organismonan riba tera, di akuerdo ku e propósito di Yehova Dios, ta sigui kumpli ku nan funshon den e ret kompliká di bida. (Sal. 139:16) E sistema efikas i ordená akí ta un evidensia mas ku kreashon ta obra di “e dede,” òf spiritu santu, di Dios.

E Kreashon di Mas Importante Riba Tera

13. Kon Dios a krea hende?

¹³ Despues di míles di miónes di aña, durante kua Dios a produsí un kantidat inkontabel di kos ku bida i sin bida, tera no tabata “sin forma i bashí” mas. Pero ainda Yehova no a kaba di usa su spiritu pa krea kos. E tabata na punto di produsí su kreashon di mas importante riba tera. Na final di e di seis dia di kreashon, el a krea hende. Kon Yehova a hasi esei? El a usa su spiritu santu i e elementonan di tera.​—Gén. 2:7.

14. Kiko ta e gran diferensia entre hende i bestia?

¹⁴ Génesis 1:27 ta bisa: “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.” E echo ku nos ta kreá den e imágen di Dios ta nifiká ku Yehova a traha nos ku e kapasidat di desplegá amor, ehersé boluntat liber i asta forma un relashon personal ku kuné, nos Kreador. Pues, nos selebro ta masha diferente for di esun di bestia. Yehova a diseñá e selebro humano di tal manera ku nos por sigui siña tokante Yehova i su obranan pa semper i haña goso den esei.

15. Ki oportunidat Yehova a duna Adam ku Eva?

¹⁵ Na prinsipio, ora Dios a krea hende, el a duna Adam ku su kasá, Eva, e planeta Tera i tur su maravianan pa nan eksplorá i disfrutá di dje. (Gén. 1:28) Yehova a duna nan kuminda na abundansia i un paradeis pa nan biba aden. Nan tabatin e oportunidat di biba pa semper i bira e mayornan stimá di míles di miónes di desendiente perfekto. Ma kos no a bai asina.

Rekonosé e Papel di Spiritu Santu

16. Ki speransa nos tin apesar di e rebelion di nos promé mayornan?

¹⁶ Adam ku Eva no a mustra gratitut ni obedesé nan Kreador; en bes di esei, nan a aktua egoistamente i a rebeldiá kontra dje. Tur hende a bini for di nan i a heredá imperfekshon, lokual a trese hopi sufrimentu. Pero Beibel ta splika kon Dios lo deshasí di tur e daño kousá pa e piká di nos promé mayornan. Ademas, e Skritura ta mustra ku Yehova lo kumpli ku su propósito original. Sí, tera lo bira un paradeis yen di hende felis i salú ku lo biba pa semper. (Gén. 3:15) Pa nos por keda ku fe den e speransa alentador akí, nos tin mester di e yudansa di Dios su spiritu santu.

17. Ki klase di pensamentu nos tin ku evitá?

¹⁷ Nos mester pidi Yehova duna nos su spiritu santu. (Luk. 11:13) Esei lo yuda fortalesé nos konvikshon ku e kreashon ta obra di Dios. Awendia, tin un oumento drástiko  di informashon basá riba rasonamentu falsu i sin base ku ta promové pensamentu ateista i evolushonista. Nos no mester laga e avalancha akí di pensamentu robes bruha nos kabes ni spanta nos. Tur kristian mester prepará nan mes pa resistí tantu esei komo e preshon ku ta bini di hende ku ta pensa asina.​—Lesa Kolosensenan 2:8.

18. Dikon no ta korekto pa deskartá e idea di un Kreador inteligente ora nos ta konsiderá e orígen di universo i di humanidat?

¹⁸ Un análisis onesto di e evidensianan ku ta apoyá kreashon ta algu ku sigur lo fortalesé nos fe den Beibel i den Dios. Pero hopi hende ku ta reflekshoná riba e orígen di universo i di humanidat lo ke deskartá e posibilidat ku lo tabatin otro forsa—fuera di esnan ku siensia por proba—enbolbí den formashon di nos universo. Pero si nos konsiderá e asuntu for di e punto di bista ei, nos evaluashon di tur e evidensianan lo no ta imparsial. Es mas, di e manera ei nos ta rechasá e eksistensia innegabel di kosnan ku a ser kreá na un manera ordená i ku un propósito; obranan ku ta na un kantidat “ku no por wòrdu kontá.” (Jòb 9:10; Sal. 104:25) Komo kristian, nos ta konvensí ku e forsa enbolbí den kreashon tabata spiritu santu bou di e guia inteligente di Yehova.

Spiritu Santu i Nos Fe den Dios

19. Kiko ta konvensé nos personalmente ku Dios ta eksistí i ku su spiritu santu ta obra den diferente manera?

¹⁹ Nos no tin nodi di sa tur kos tokante kreashon pa nos por tin fe den Dios ni pa nos stim’é i respet’é profundamente. Manera den kaso di amistat ku un hende, fe den Yehova no ta basá únikamente riba sierto datonan. Meskos ku un amistat entre dos amigu ta krese segun ku nan ta siña konosé otro mihó, asina nos fe den Dios ta oumentá segun ku nos ta siña mas tokante dje. Sí, nos ta bira mas konvensí ku Yehova ta eksistí ora e kontestá nos orashonnan i ora nos mira e bon resultadonan ku nos ta haña pasobra nos ta apliká su prinsipionan den nos bida. Nos ta hala mas serka Yehova ainda ora nos ta haña mas i mas evidensia ku e ta guia nos pasonan, ta protehá nos, ta bindishoná nos esfuersonan den su sirbishi i ta duna nos loke ta nesesario. Tur esaki ta duna prueba konvinsente ku Dios ta eksistí i ku su spiritu santu ta obra den diferente manera.

20. (a) Dikon Dios a krea universo i hende? (b) Ki privilegio nos lo tin si nos sigui permití Dios su spiritu santu guia nos?

²⁰ Beibel ta un prueba sobresaliente di e echo ku Yehova ta usa su spiritu santu pasobra e eskritornan “a papia, inspirá dor di spiritu santu.” (2 Ped. 1:21) Un estudio profundo di e Skritura por oumentá nos fe den Dios komo esun ku a krea tur kos. (Rev. 4:11) Ta Yehova su bunita kualidat di amor a motiv’é pa kuminsá krea i asina bira e Kreador. (1 Juan 4:8) P’esei, laga nos hasi nos máksimo esfuerso pa yuda otro hende siña konosé nos Amigu i Tata selestial amoroso. I si nos sigui permití su spiritu guia nos, nos lo tin e privilegio di siña tokante Yehova pa semper. (Gal. 5:​16, 25) Pues, laga nos kada un sigui siña tokante Yehova i su obranan maravioso i imitá e gran amor ku el a desplegá ora el a usa su spiritu santu pa krea shelu, tera i hende.

[Nota]

Bo Por Splika?

• Kiko shelu i tera por siña nos tokante spiritu santu?

• Ki oportunidat nos tin debí ku Dios a krea nos den su imágen?

• Dikon nos tin ku analisá e evidensia ku ta apoyá kreashon?

• Kiko por yuda fortalesé nos relashon ku Yehova?

[Preguntanan di Estudio]