E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Ken Dios ta?

E Dios berdadero ta e Kreador di tur kos. Beibel ta yam’é “Rei eterno.” Esei ke men ku e no tabatin prinsipio i ku nunka lo e no tin fin. (1 Timoteo 1:17) Siendo ku Dios ta e Fuente di bida, nos mester adorá é so.​—Lesa Revelashon 4:11.

2. Kon Dios ta?

Nunka niun hende no a mira Dios pasobra e ta un Spiritu, esei ta nifiká ku e tin un forma di bida superior na kriaturanan ku ta biba riba tera. (Juan 1:18; 4:24) Tur e kosnan ku Dios a krea ta yuda nos konosé su kualidatnan. Por ehèmpel, ora nos kontemplá diseño i variedat di fruta i flor, nos ta mira ku Dios tin amor i sabiduria. Ademas, e universo inmenso ta siña nos algu tokante Dios su poder.​—Lesa Romanonan 1:20.

Den Beibel nos por siña asta mas tokante Dios su personalidat. Por ehèmpel, Beibel ta bisa nos kiko Dios gusta i kiko e no gusta, kon e ta trata hende i kon e ta reakshoná den diferente sirkunstansia.​—Lesa Salmo 103:​7-10.

3. Dios tin un nòmber?

Hesus a bisa: “Nos Tata ku ta den shelu, bo nòmber sea santifiká.” (Mateo 6:9) Aunke Dios tin hopi título, e tin ún nòmber so. Den kada idioma hende ta pronunsi’é diferente. Na papiamentu nos ta bisa “Yehova” i tin biaha “Yahweh.” Salmo 83:18 ta bisa: “Laga nan sabi qu Bo, Quen Su nomber solamente ta Jehová, ta e Altísimo ariba tur tera.”​—Salmonan y Proverbionan, Editorial Evangelica.

Den hopi Beibel nan a remplasá Dios su nòmber ku títulonan manera Señor òf Dios. Pero tempu ku a skirbi Beibel, Dios su nòmber tabata aparesé un 7.000 biaha den e Skritura. Ora Hesus a splika hende e Palabra di Dios, el a usa Dios su nòmber i asina el a yuda hende siña konosé Dios.​—Lesa Juan 17:26.

  4. Yehova ta interesá den nos?

E echo ku Yehova personalmente ta skucha nos orashonnan ta mustra ku e ta interesá den nos. (Salmo 65:2) Pero si esei ta e kaso, dikon tin asina tantu sufrimentu? Tin hende ta bisa ku Dios ta laga nos sufri pa pone nos na prueba, pero esei no ta bèrdat. Beibel ta bisa: “Leu sea di Dios di hasi maldat.”​—Jòb 34:10; lesa Santiago 1:13.

Dios a onra hende dunando nan e libertat di skohe. Nos no ta apresiá e echo ku nos tin libertat di skohe pa sirbi Dios òf no? (Josué 24:15) Sufrimentu ta sigui oumentá pasobra hopi hende ta opta pa hasi malu. Ora Yehova mira e inhustisianan ei, e ta sinti duele.​—Lesa Génesis 6:​5 i 6.

Pronto, Yehova lo usa Hesus pa kita sufrimentu i eliminá esnan ku ta kous’é. Mientrastantu, Yehova tin bon motibu pa permití hende sufri temporalmente.​—Lesa Isaias 11:4.

5. Kiko Dios ke pa nos hasi?

Yehova a krea nos di tal manera ku nos por siña konos’é i stim’é. E ke pa nos haña sa e bèrdat tokante dje. (1 Timoteo 2:4) Si nos studia Beibel, Dios por bira nos Amigu.​—Lesa Proverbionan 2:​4 i 5; Santiago 2:23.

Siendo ku Yehova a duna nos bida, nos mester stim’é mas ku kualke otro persona. Nos ta mustra Dios ku nos ta stim’é si nos papia kuné den orashon i ta hasi loke e ta pidi nos. (Proverbionan 15:8) Yehova ta pidi nos pa nos trata otro hende ku amor.​—Lesa Marko 12:​29-31 i 1 Juan 5:3.

Pa mas informashon, wak kapítulo 1 di e buki akí Kiko Beibel Ta Siña Realmente? publiká pa Testigunan di Yehova.

[Plachi na página 10]

Un persona por tin un bon motibu pa permití sufrimentu temporalmente?