“Bo a stima hustisia.”​—SAL. 45:7.

1. Kiko lo yuda nos kana den “e kamindanan di hustisia”?

YEHOVA ta usa su Palabra i su spiritu santu pa guia su pueblo den “e kamindanan di hustisia.” (Sal. 23:3) Sinembargo, komo ku nos ta imperfekto, nos tin e inklinashon di desviá for di e kaminda ei. Anto pa nos kuminsá hasi loke ta korekto atrobe ta rekerí determinashon i esfuerso. Kiko lo yuda nos logra esei? Meskos ku Hesus, nos tin ku stima hustisia, es desir, stima hasi loke ta korekto.​—Lesa Salmo 45:7.

2. Kiko Beibel ke men ku “e kamindanan di hustisia”?

² Kiko Beibel ke men ku “e kamindanan di hustisia”? Na hebreo i griego, e palabra pa “hustisia” ta referí na loke ta “rekto” i ta enserá un pegamentu estrikto na prinsipionan moral. Pues, “e kamindanan” akí ta referí na un estilo di bida basá riba e normanan hustu di Yehova. Siendo ku Yehova ta “e habitashon di hustisia,” su sirbidónan gustosamente ta akudí na dje pa sa kua ta e kaminda moralmente rekto ku nan mester sigui.​—Jer. 50:7.

3. Kon nos por siña mas tokante e hustisia di Dios?

³ E úniko manera ku nos por agradá Dios den tur sentido ta si nos ta hasi esfuerso di henter nos kurason pa kumpli ku su normanan hustu. (Deu. 32:4) Pa logra esei, nos mester kuminsá ku siña tur loke nos por tokante Yehova Dios for di su Palabra, Beibel. Mas nos siña tokante dje, mas serka dje nos ta hala tur dia i mas nos lo stima su hustisia. (Sant. 4:8) Ademas, nos tin ku sigui e guia di Dios su Palabra inspirá ora nos tin ku tuma desishonnan importante den bida.

Buska Dios Su Hustisia

4. Kiko buska Dios su hustisia ta enserá?

⁴ Lesa Mateo 6:33. Buska Dios su hustisia ta enserá mas ku djis dediká tempu na predikashon di e bon notisia di Reino. Pa Yehova aseptá nos sirbishi sagrado, nos kondukta di tur dia mester ta na armonia ku su normanan altu. Kiko tur hende ku ta buska Dios su hustisia mester hasi? Nan tin ku bisti e personalidat nobo “ku a wòrdu kreá segun Dios den hustisia i santidat berdadero.”​—Efe. 4:24.

5. Kiko lo yuda nos vense desanimashon?

⁵ Segun ku nos ta hasi esfuerso pa kumpli ku e normanan hustu di Dios, nos por sinti nos desanimá pa e fayonan ku nos ta kometé, i esaki por debilitá nos. Kiko por yuda nos vense tal desanimashon i siña stima hustisia i praktik’é? (Pro. 24:10) Nos tin ku akudí na Yehova regularmente den orashon “ku un kurason sinsero yen di siguransa di fe.” (Heb. 10:​19-22) Sea ku nos ta un kristian ungí òf nos tin e speransa di biba pa semper riba tera, nos ta pone fe den e sakrifisio di reskate di Hesukristu i den e sirbishi ku e ta rindi komo nos gran Sumo Saserdote. (Rom. 5:8; Heb. 4:​14-16) E promé edishon di e revista akí (na ingles) a duna un ilustrashon pa mustra e efekto sumamente benefisioso di e sanger ku Hesus a drama. (1 Juan 1:​6, 7) E artíkulo a bisa: “Ta un echo ku ora un hende wak un opheto koló skarlata [kòrá] dor di un glas kòrá ku ta den lus, e opheto ta parse blanku. Pues, aunke nos pikánan ta manera koló  skarlata, ora nos ta mira nan for di e posishon ku Dios lo mira nan dor di e sanger di Kristu, nan ta ser konsiderá blanku.” (Yüli 1879, pág. 6.) E reskate ku Yehova a paga pa medio di su Yu stimá ta un provishon realmente maravioso!​—Isa. 1:18.

Chèk Bo Armadura Spiritual

6. Dikon ta sumamente importante pa nos chèk nos armadura spiritual?

⁶ Nos mester tin nos “korasa di hustisia” tur ora bai bistí, pasobra e ta un parti masha importante di e armadura spiritual ku Dios ta duna nos. (Efe. 6:​11, 14) Sea ku ta resientemente nos a dediká nos mes na Yehova òf nos tin vários dékada ta sirbié, ta sumamente importante pa tur dia nos chèk nos armadura spiritual. Dikon? Pasobra Diabel i su demoñonan a ser tirá abou den bisindario di tera. (Rev. 12:​7-12) Satanas ta rabiá, i e sa ku a ked’é solamente un poko tempu mas. Pues, el a intensifiká su atakenan kontra e pueblo di Dios. Bo ta komprondé awor dikon ta importante pa nos tin nos “korasa di hustisia” bistí?

7. Kon nos lo komportá nos mes si nos ta mira e balor di “e korasa di hustisia”?

⁷ Un korasa ta protehá e kurason literal. Komo ku nos ta imperfekto, hopi biaha nos kurason figurativo ta engañoso i desesperá. (Jer. 17:9) Siendo ku nos kurason ta inkliná pa hasi loke ta malu, ta masha importante pa nos entren’é i disiplin’é. (Gén. 8:21) Si nos ta mira e balor di “e korasa di hustisia,” nos lo no kit’é temporalmente dor di skohe entretenimentu ku ta kontené loke Dios ta odia ni nos lo no sinta soña kon nos ta hasi maldat. Tampoko nos lo no malgastá gran parti di nos tempu balioso mirando televishon. Mas bien, nos lo sigui lucha pa hasi loke ta agradá Yehova. Anto maske tin biaha nos ta trompeká pasobra nos ta pensa i hasi algu malu, nos no ta entregá. Nos lo lanta atrobe ku yudansa di Yehova.​—Lesa Proverbionan 24:16.

8. Dikon nos mester di “e eskudo di fe”?

⁸ Un otro parti di nos armadura spiritual ta “e eskudo di fe.” E ta yuda nos “paga tur e flechanan sendí di e malbado.” (Efe. 6:16) Fe i amor sinsero pa Yehova, na nan turno, ta yuda nos praktiká hustisia i keda riba e kaminda ku ta hiba na bida eterno. Mas nos siña stima Yehova, mas nos lo balorá su hustisia. Pero kiko di nos konsenshi? Kon e ta yuda nos den nos esfuerso pa stima hustisia?

Mantené un Bon Konsenshi

9. Kon un bon konsenshi ta benefisiá nos?

⁹ Ora nos a batisá, nos a hasi un apelashon na Yehova pa duna nos “un bon konsenshi.” (1 Ped. 3:21) Komo ku nos ta pone fe den e reskate, e sanger di Hesus ta kubri nos pikánan i asina nos por tin un posishon limpi dilanti di Dios. Pero pa nos por keda den e posishon limpi ei, nos tin ku mantené un bon konsenshi. Si na sierto okashonnan nos konsenshi spièrta nos, nos mester keda kontentu ku e ta funshoná  bon. E spièrtamentunan ei ta indiká ku nos konsenshi no a kria kayo, sino mas bien ku e ta na armonia ku e kamindanan hustu di Yehova. (1 Tim. 4:2) Pero konsenshi di hende ku ta deseá di stima hustisia por tin un funshon adishonal.

10, 11. (a) Konta un eksperensia ku ta mustra pakiko nos mester hasi kaso di nos konsenshi bíblikamente entrená. (b) Dikon amor pa hustisia por duna nos gran goso?

¹⁰ Ora nos ta hasi malu, nos konsenshi por kondená nos òf tormentá nos. Por ehèmpel, tabatin un hóben ku a desviá for di e kaminda di hustisia. El a bira adikto na pornografia i a kuminsá huma mariwana. E tabata sinti su mes kulpabel ora e tabata na reunion i un hipókrita ora e tabata den sirbishi di vèlt, pues el a stòp di partisipá den e aktividatnan kristian akí. El a konta: “Pero mi no a pensa ku mi konsenshi lo a sigui kondená mi.” El a agregá: “Mi estilo di bida bobo a dura mas o ménos kuater aña.” Anto el a kuminsá pensa pa bolbe na e bèrdat. Aunke el a kere ku Yehova lo no a skucha su orashon, tòg el a resa i pidié pordon. Ménos ku 10 minüt despues, su mama a bin bishit’é i a anim’é pa kuminsá bai reunion atrobe. E hóben a bai Salòn di Reino i a pidi un ansiano pa studia kuné. Ku tempu, el a batisá, i e ta masha gradisidu na Yehova ku el a skap’é.

¹¹ No ta bèrdat ku ora nos hasi loke ta korekto nos ta haña un gran satisfakshon? Wèl, segun ku nos ta siña stima hustisia i ta praktik’é mas plenamente, nos lo haña mas goso den hasi loke ta agradá nos Tata selestial. I pensa riba esaki: Lo yega e dia ku tur hende su konsenshi lo laga nan sinti goso so, pasobra e tempu ei, nan lo reflehá e imágen di Dios perfektamente. P’esei, laga nos inkulká for di awor un amor profundo pa hustisia den nos kurason i hasi Yehova kontentu.​—Pro. 23:​15, 16.

12, 13. Kon nos por entrená nos konsenshi?

¹² Kiko nos por hasi pa entrená nos konsenshi? Ora nos ta studia e Skritura i nos publikashonnan basá riba Beibel, ta importante pa nos kòrda ku “kurason di e hustu ta studia bon kon pa kontestá.” (Pro. 15:28) Laga nos konsiderá kon benefisioso esaki ta ora nos tin ku tuma desishon enkuanto empleo. Si un tipo di trabou ta klaramente na konflikto ku rekisitonan bíbliko, mayoria di nos ta kla pa sigui e guia ku Yehova ta perkurá mediante e esklabo fiel i prudente. Sinembargo, ora no ta muchu kla si un trabou ta aseptabel òf nò, nos mester buska prinsipionan bíbliko ku ta apliká na e situashon ei, meditá riba nan i hasi orashon tokante e asuntu. * Por ehèmpel, un di e prinsipionan ku sigur nos tin ku tene kuenta kuné ta di no ofendé konsenshi di otro hende. (1 Kor. 10:​31-33) Nos mester ta interesá foral den e prinsipionan ku tin di aber ku nos relashon ku Dios. Si Yehova ta un persona  real pa nos, e pregunta prinsipal ku nos lo hasi nos mes ta: ‘Lo mi hasi Yehova tristu si mi tuma e trabou akí?’​—Sal. 78:​40, 41.

¹³ Ora nos ta prepará pa e Estudio di Toren di Vigilansia òf pa e Estudio di Beibel di Kongregashon, nos mester kòrda ku ta importante pa meditá riba e informashon. Kon nos ta studia normalmente? Nos ta djis hala strepi lihé-lihé bou di e kontesta di un pregunta i pasa pa e siguiente paragraf? Si nos ta studia di e manera ei, e chèns lo ta masha chikí ku nos lo kultivá un amor profundo pa hustisia i desaroyá un konsenshi sensitivo. Pa nos por stima hustisia, nos tin ku studia diligentemente i meditá riba loke nos ta lesa den e Palabra di Dios. No tin otro manera pa siña stima hustisia di henter nos kurason!

Hamber i Set pa Hustisia

14. Kon Yehova Dios i Hesukristu ke pa nos sinti en konekshon ku nos sirbishi sagrado?

¹⁴ Yehova Dios i Hesukristu ke pa nos ta felis segun ku nos ta rindi sirbishi sagrado. Kiko lo kontribuí na nos felisidat? Wèl, amor pa hustisia! Hesus a bisa den su Sermon Riba Seru: “Felis esnan ku hamber i set pa hustisia; Dios lo satisfasé nan.” (Mat. 5:6, BPK) Kiko e palabranan ei ta nifiká pa hende ku ta deseá di stima hustisia?

15, 16. Kon Dios lo satisfasé hende ku tin hamber i set spiritual?

¹⁵ Nos ta biba den un mundu kaminda e malbado ta goberná. (1 Juan 5:19) Si nos habri un korant den kualke pais na mundu, nos ta haña notisia tokante kosnan kruel i violento ku ta tuma lugá na un eskala sin presedente. E manera inhumano ku hende ta trata otro ta molestiá hende hustu. (Ekl. 8:9) Komo personanan ku ta stima Yehova, nos sa ku ta e so por satisfasé e hamber i set di hende ku ke siña tokante hustisia. Pronto e malbadonan lo ser eliminá, i amante di hustisia lo no sinti mas e angustia ku hende sin eskrúpulo i nan echonan di maldat ta kousa. (2 Ped. 2:​7, 8) Esei sí lo ta un alivio!

¹⁶ Komo sirbidó di Yehova i siguidó di Hesukristu, nos sa ku “Dios lo satisfasé” tur esnan ku tin hamber i set pa hustisia. Nan lo haña satisfakshon kompletu pa medio di e shelu nobo i tera nobo ku Dios lo perkurá i den kua ‘hustisia lo biba.’ (2 Ped. 3:13) Pues, laga nos no bira desanimá ni keda sorprendí pa e echo ku opreshon i violensia a kaba ku hustisia den e mundu satániko akí. (Ekl. 5:8) Yehova, e Haltísimo, sa kiko ta pasando i pronto lo e libra esnan ku ta stima hustisia.

E Benefisionan di Stima Hustisia

17. Menshoná algun benefisio ku nos ta haña ora nos ta stima hustisia.

¹⁷ Salmo 146:8 ta enfatisá un benefisio sobresaliente ku nos ta haña si nos sigui e kaminda di hustisia. E salmista a kanta: ‘Yehova ta stima e hustunan.’ Imaginá bo! E Soberano di universo ta stima nos pasobra nos ta stima hustisia! Komo ku Yehova ta stima nos, nos tin sigur ku lo e perkurá pa nos nesesidat material tanten ku nos ta pone e interesnan di Reino na promé lugá den nos bida. (Lesa Salmo 37:25; Proverbionan 10:3.) Ku tempu, henter e planeta akí lo ta di hende ku ta stima hustisia. (Pro. 13:22) E rekompensa ku gran parti di e  pueblo di Dios lo haña, pasobra nan a praktiká hustisia, ta goso sin igual i bida eterno den un bunita paradeis riba tera. Asta for di awor, hende ku stima Dios su hustisia ta ser rekompensá ku un pas mental ku ta kontribuí na union den nan famia i den nan kongregashon.​—Fil. 4:​6, 7.

18. Kiko nos tin ku sigui hasi segun ku nos ta spera riba e dia di Yehova?

¹⁸ Segun ku nos ta spera yegada di e gran dia di Yehova, nos tin ku sigui buska Su hustisia. (Sof. 2:​2, 3) P’esei, laga nos desplegá amor sinsero pa Yehova su kamindanan rekto. Esei ta enserá keda ku nos “korasa di hustisia” bon bistí pa protehá nos kurason figurativo. Ademas, nos tin ku mantené un bon konsenshi, esta, un konsenshi ku por duna nos goso i hasi kurason di nos Dios kontentu.​—Pro. 27:11.

19. Kiko nos mester ta desididu pa hasi, i kiko nos lo trata den e siguiente artíkulo?

¹⁹ Yehova su wowo “ta move bai bini dor di henter tera, pa e por sostené fuertemente esnan ku nan kurason ta kompletamente di dje.” (2 Kró. 16:9) E palabranan ei ta un gran konsuelo pa nos miéntras ku nos ta sigui hasi loke ta korekto apesar di e instabilidat, violensia i maldat ku dia pa dia ta oumentá den e mundu yen di problema akí! Ta bèrdat ku e kamindanan di hustisia ku nos ta sigui por parse straño pa e gran kantidat di hendenan alehá for di Dios. Pero nos ta saka masha benefisio personal ora nos ta pega na e hustisia di Yehova. (Isa. 48:17; 1 Ped. 4:4) Pues, laga nos ta desididu pa sigui haña goso den stima hustisia i praktik’é di henter nos kurason. Sinembargo, pa nos kurason por ta kompletamente di Yehova, nos mester odia maldat. E siguiente artíkulo lo mustra nos kiko esaki ta enserá.

[Nota]

Kon Lo Bo Kontestá?

• Dikon un hende mester rekonosé e balor di e reskate pa e por stima hustisia?

• Dikon ta masha importante pa nos bisti “e korasa di hustisia”?

• Kon nos por entrená nos konsenshi?

[Preguntanan di Estudio]

[Plachi na página 26]

Un konsenshi entrená ta yuda nos resolvé pregunta en konekshon ku trabou