Papa Benedikto XVI a skirbi den su buki Jesus of Nazareth: “E Reino di Dios ta den e kurason di esun ku ta skucha.” Algun hende ta di akuerdo ku esei. Pa nan, e Reino di Dios ta e kambio ku ta tuma lugá den kurason di hende ku aseptá Hesukristu i haña fe den dje. Akaso e Reino di Dios ta un kambio ku ta tuma lugá den hende, un reino ‘den bo kurason’?

SIN duda e Reino tabata pegá na Hesus su kurason. Papa Benedikto mes a rekonosé ku “Hesus su predikashon a drei rònt di” e Reino. Durante gran parti di Hesus su ministerio relativamente kòrtiku, el a biaha masha hopi pa “prediká e bon notisia tokante di e reino.” (Mateo 4:23, BPK) Loke Hesus a siña hende i e milagernan ku el a hasi a mustra bon kla ku e Reino no ta algu ku un hende ta haña ora e aseptá i obedesé Dios. Mas bien, e tin di aber ku gobernashon, husgamentu i bendishonnan eterno.

Gobernashon i Husgamentu

Na un okashon durante e último dianan di Hesus su ministerio, mama di Santiago i Juan, e disipelnan ku tabata mas será ku Hesus, a bini serka dje i a bis’é: “Ordená ku den bo reino e dos yu hòmbernan akí di mi por sinta, ún na bo man drechi i ún na bo man robes.” (Mateo 20:21) Por nota ku e mama no tabata papiando tokante un kambio ku mester a tuma lugá den kurason di su yu hòmbernan. E mama tabata sa ku e Reino tabatin di aber ku Hesus su gobernashon i, e tabata ke pa su yunan forma parti di e gobernashon ei. Hesus mes a primintí su 11 fiel apòstelnan ku nan lo ta den su Reino i “lo sinta riba trononan” i “husga” huntu kuné. (Lukas 22:30) Pues, pa su siguidónan, Hesus su Reino tabata un gobièrnu real.

Kiko otro hende den tempu di Hesus a kere? Nan a komprondé ku e Reino ta un kambio ku ta tuma lugá den kurason di hende òf nan tabatin otro pensamentu? Wèl, djis promé ku Pasku Hudiu di aña 33 di nos era ora Hesus tabata drenta Yerusalèm riba un yu di buriku, e multitut a yam’é bon biní i algun hende a grita: “Hosana na e Yu di David!” (Mateo 21:9) Dikon nan a grita e palabranan ei? Nan a hasi esei pasobra nan a rekonosé ku Hesus tabata e Mesias primintí i ku Dios lo a dun’é un Reino eterno, “e trono di su tata David.” Nan a anhelá e salbashon, pas i hustisia ku e Reino ei lo a trese.​—Lukas 1:32; Zakarias 9:9.

Bendishonnan Eterno

Asta hende ku no tabata masha interesá den Hesus su ministerio tabata sa tokante e siñansa di Reino. Na momento ku Hesus tabata klabá na staka, e kriminal banda di dje a rog’é: “Hesus, kòrda di mi ora bo yega den bo reino!” Kiko Hesus a kontest’é? El a sigurá e hòmber muribundo: “Lo bo ta serka mi den Paraiso.”​—Lukas 23:​42, 43.

E ladron ei a kere ku Hesus lo resusitá i mas despues haña un Reino. Hesus no solamente  lo tin outoridat pero tambe e deseo pa resusitá i yuda e hòmber kambia su bida, huntu ku miónes di otro hende. Sí, Hesus a haña poder komo Gobernante di e Reino den shelu, i mediante e Reino ei lo e trese bendishonnan eterno pa henter humanidat.​—Juan 5:​28, 29.

Un Reino Meimei di Nan

Pero no ta bèrdat ku Hesus a bisa: “E reino di Dios ta meimei di boso”? Sí, den Lukas 17:21 nos ta haña e palabranan ei. De echo, tin vershon di Beibel ta bisa “e reino di Dios ta entre boso” òf “e reino di Dios ta den boso.” (Wak, por ehèmpel e versíkulo i e nota na pia di página di e vershon Dios habla hoy.) Pero kiko Hesus tabata ke men ku e palabranan ei?

E konteksto ta mustra nos ku Hesus a bisa e palabranan ei na un grupo di hudiu religioso hostil ku yama fariseo. Pues, Hesus no tabata referí na un kambio ku mester a tuma lugá den nan kurason. Nan tabatin nan mes idea enkuanto e binimentu di Mesias i su Reino. Segun nan, e Mesias lo a bini “ku e nubianan di shelu” komo un Rei glorioso pa libra hudiunan for di e romanonan i restorá e reino di Israel. (Daniel 7:​13, 14) Sinembargo, Hesus a mustra ku nan tabata robes ora el a bisa nan: “E reino di Dios no ta bin ku señalnan ku por wòrdu mirá.” Despues el a bisa: “Ata e reino di Dios ta meimei di boso.”​—Lukas 17:​20, 21.

Miéntras Hesus a siña hende tokante e Reino di Dios i a hasi milager ku klaramente a identifik’é komo e Rei primintí di e Reino ei, e fariseonan a bira mas hostil kontra dje debí ku nan no tabatin bon kurason ni berdadero fe. Nan tabata duda ku Hesus tabata e Mesias. P’esei Hesus a presentá e echonan nan dilanti: E futuro Rei di e Reino ei tabata ‘meimei di nan.’ E no a manda nan bai wak den nan kurason. Hesus ku su disipelnan tabata pará ei mes nan dilanti. P’esei, el a bisa e fariseonan: “E reino di Dios ta akinan ku boso.”​—Lukas 17:21, Contemporary English Version.

Un Reino Pegá na Bo Kurason

Aunke e Reino di Dios no ta den nos kurason komo hende pekaminoso, e mester ta pegá sí na nos kurason. Pa medio di su siñansa i milagernan, Hesus a trata na yuda su oyentenan pa edifiká un fe firme den e gobièrnu hustu ku lo trese pas i siguridat. E tabata ke pa nan fe motivá nan pa mehorá nan bida. De echo, el a siña nan pa pidi den orashon: “Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.” (Mateo 6:​9, 10) Hesus su palabranan a konmové hopi hende i nan a desaroyá fe ku a motivá nan pa siguié ku e speransa di haña e bendishonnan di e Reino di Dios.

Bo ke tin un fe asina? Ta kiko bo tin ku hasi pa haña e fe ei? Bo ta kòrda loke Hesus a bisa na prinsipio di su famoso Sermon Riba Seru? El a bisa: “Felis [ta] esnan ku ta rekonosé ku nan tin mester di Dios; reino di shelu ta pa nan.” (Mateo 5:3, BPK) Dikon no kuminsá un estudio di Beibel ku e Testigunan di Yehova ku a laga e revista akí pa bo? E estudio lo yuda bo haña speransa, no den un kambio ku ta tuma lugá den bo kurason, sino den un gobièrnu hustu, un Reino ku lo trese pas i siguridat pa tur hende.

[Komentario na página 11]

E Reino di Dios tabata den kurason di e hendenan tèrko ku a oponé i mata Hesus?