“Lo prediká e bon notisia di e reino rònt mundu komo testimonio pa tur nashon. Anto e ora ei, fin lo yega!”​—MATEO 24:14, BPK.

EKSPERTONAN di Beibel ta di akuerdo ku e teksto ei ta masha importante. Di promé, pasobra e trabou ku e ta menshoná lo ser hasí rònt mundu i, di dos, pasobra e ta mustra kiko kristiannan mester hasi: prediká i anunsiá e suseso importante ku Hesus a yama e “fin.” Nan mester hasi e trabou ei promé ku e “fin” bini.

E profesia ei ta kumpliendo awe. I e ta toka kada un di nos pasobra e bon notisia ta kontené tantu un invitashon komo un spièrtamentu. Bo por sea skohe pa aseptá e Reino di Dios òf rechas’é. E desishon ku bo tuma tin efekto riba bo bida.

Awor, laga nos ban wak e konteksto di e profesia ei. Algun dia promé ku a klaba Hesus na staka, su disipelnan a bini serka dje i a hasié pregunta tokante futuro. Nan tabata ke mas informashon tokante establesimentu di e Reino di Dios ku Hesus a papia asina tantu di dje. I tambe nan kier a sa mas tokante “fin di mundu.”—Mateo 24:3, E Testament Nobo.

Komo kontesta, Hesus a profetisá ku lo tin temblornan grandi i ku guera, hamber i pèst lo tuma lugá na gran eskala. Ademas, el a bisa ku maldat lo oumentá, maestronan religioso falsu lo gaña hopi hende i ku hende lo odia i persiguí kristian berdadero. Tur e kosnan akí tabata mal notisia.​—Mateo 24:​4-13; Lukas 21:11.

Pero despues di e mal notisia, Hesus a duna e bon notisia ku tin sitá aki riba. Pa siglonan e palabranan ei a intrigá hende i a duna nan speransa. I maske hende ta di akuerdo ku e palabranan ei di Hesus ta importante, tòg nan no ta di akuerdo enkuanto e nifikashon. Kiko presis e bon notisia akí ta? Kiko e Reino ta? Na ki tempu e profesia akí lo kumpli i ken lo kumpli kuné? I ta “fin” di kiko ta biniendo? Laga nos ban wak.

[Plachi na página 2, 3]

 Un kopia di e Manuskrito di Washington di Kuater Evangelio. Mateo 24:14 ta ku lèter diki

[Rekonosementu]

For di e buki Facsimile of the Washington Manuscript of the Four Gospels in the Freer Collection 1912