“Sea prepará, pasobra na un ora ku boso no ta spera e Yu di hende ta bini.”​—LUK. 12:40.

1, 2. Dikon nos mester hasi kaso di Hesus su konseho pa ‘ta prepará’?

KIKO lo pasa ku abo i bo famia ora e “Yu di hende bini den su gloria” i separá hende “for di otro”? (Mat. 25:​31, 32) Siendo ku Hesus ta bini na un ora ku nos no ta pensa, ta masha importante pa nos hasi kaso di su konseho pa ‘ta prepará.’​—Luk. 12:40.

² E artíkulo anterior a mustra ku kada miembro di famia por yuda henter e famia keda spiritualmente alerta si kada un ta asumí nan responsabilidat. Awor laga nos konsiderá algun manera mas kon nos por kontribuí na e bienestar spiritual di nos famia.

Mantené Boso Wowo “Simpel”

3, 4. (a) Ku kiko famianan kristian mester tene kuidou? (b) Kiko ta nifiká mantené nos wowo “simpel”?

³ Famianan kristian mester ta prepará pa e binida di Kristu. P’esei nan tin ku tene kuidou pa nada no distraí nan i kita nan atenshon for di adorashon berdadero. Siendo ku materialismo ta un trampa ku hopi famia a kai aden, ta bon pa nos pensa seriamente riba e konseho di Hesus pa mantené nos wowo “simpel.” (Lesa Mateo 6:​22 i 23. *)  Meskos ku un lampi por iluminá nos kaminda pa asina nos por kana sin trompeká i kai, loke nos ta wak pa medio di ‘e wowonan di nos kurason’ figurativo por iluminá nos i yuda nos pa no kai den piká.​—Efe. 1:18.

⁴ Pa nos por mira kla i skèrpi, nos wowo literal mester ta bon i enfoká riba un solo opheto. Ku e wowo di nos kurason ta meskos. Den sentido figurativo, un wowo simpel ta un wowo enfoká riba un solo propósito. Komo kristian, nos no ta hiba un bida ku ta drei rònt di kosnan material ni ta demasiado preokupá pa satisfasé solamente e nesesidatnan físiko di nos famia. Mas bien, nos ta mantené nos wowo enfoká riba kosnan spiritual. (Mat. 6:33) Esaki ta nifiká ku nos ta keda kontentu ku loke nos tin i ta pone Dios su sirbishi na promé lugá den nos bida.​—Heb. 13:5.

5. Kon un tiner a demostrá ku su “wowo” tabata enfoká riba sirbishi na Dios?

⁵ Ora mayornan ta siña nan yunan pa mantené un wowo simpel, esaki por duna bon resultado. Tuma por ehèmpel e eksperensia di un mucha muhé tiner di Etiopia ku tabata siña masha bon mes na skol. Ora el a kaba skol, nan a ofres’é un beka pa sigui un estudio avansá. Pero e no a aseptá e oferta pasobra e tabatin su bista fihá riba su sirbishi na Yehova. Djis despues, el a haña un oferta pa un trabou ku lo a pag’é 3.000 euro pa luna. Maske esaki tabata un oferta atraktivo, ya ku e montante tabata muchu mas ku e salario promedio den su pais, tòg e no a asept’é; su “wowo” tabata enfoká riba e trabou di pionero. Anto e no tabatin nodi di konsultá ku su mayornan pa nenga e trabou. Kon e mayornan a sinti ora nan a haña sa loke nan yu  muhé a hasi? Nan a keda masha kontentu kuné i a lag’é sa kon orguyoso nan ta di dje.

6, 7. Nos mester vigilá kontra ki peliger?

⁶ E palabranan di Hesus na Mateo 6:​22 i 23 ta kontené indirektamente un spièrtamentu kontra golosidat. Tuma nota ku Hesus no a usa e antónimo di “simpel,” esta e palabra “kompliká,” sino e palabra “malbado.” E palabra griego tradusí den e teksto komo “malbado” por nifiká tambe “kudishi” òf “golos.” Kon Yehova ta mira hende kudisioso òf golos? Beibel ta bisa: “No laga inmoralidat òf kualke sorto di impuresa òf golosidat ni wòrdu mentá mes meimei di boso.”​—Efe. 5:3.

⁷ Kisas ta masha fásil pa ripara e karakterístika di golosidat den otro hende, pero no ta asina fásil pa mira esei den nos mes. P’esei ta sabí pa hasi kaso di Hesus su spièrtamentu pa “tene kuidou, i warda boso di tur golosidat.” (Luk. 12:15) Esei ta enserá ku nos tin ku saminá nos mes pa wak kiko realmente tin den nos kurason. Famianan kristian mester pensa seriamente riba e tempu i plaka ku nan ta gasta na kumpramentu di kos material, na entretenimentu i rekreo.

8. Kon nos por usa disernimentu ora di hasi kompra?

⁸ Promé ku nos kumpra algu, djis pasobra nos tin e sèn pa kumpr’é, ta bon pa nos pensa riba e siguiente preguntanan: ‘Lo mi tin tempu pa usa e artíkulo regularmente i pa manten’é? Kuantu tempu lo tuma pa mi siña us’é apropiadamente?’ Hóbennan, ta bon pa boso dominá boso mes i no bai tras di tur propaganda di mundu pensando ku boso mester kumpra paña òf otro kosnan kostoso i di marka. Pues, kada miembro di famia mester wak bon pa loke nan ke kumpra no stroba e famia di ta prepará pa e binida di e Yu di hende. Anto kòrda, Yehova a primintí: “Nunka lo mi no bandoná bo, i nunka lo mi no laga bo desampará.”​—Heb. 13:5.

Hasi Esfuerso pa Alkansá Metanan Spiritual

9. Kon famianan ta benefisiá ora nan ta hasi esfuerso pa alkansá nan metanan spiritual?

⁹ Un otro manera ku miembronan di famia por fortalesé nan fe i kontribuí na e bienestar spiritual di henter e famia ta di pone meta spiritual i hasi esfuerso pa alkansá nan. Esei lo yuda famianan evaluá e progreso di nan sirbishi na Yehova i a la bes disidí kua aktividatnan nan mester pone na promé lugá den nan bida.​—Lesa Filipensenan 1:10. *

10, 11. Ki metanan spiritual boso tin komo famia, i ki meta boso ke pone pa futuro?

¹⁰ Asta metanan realístiko di término kòrtiku ku kualke miembro di famia por alkansá ta benefisiá henter e famia. Tuma por ehèmpel e meta di konsiderá e teksto di dia komo famia tur dia. E komentarionan ku e miembronan di famia ta duna durante e konsiderashon ei por yuda e kabes di famia diserní kuantu nan ta stima Yehova i e bèrdat. Un otro meta ta di lesa Beibel huntu komo famia riba un base regular. Esei ta yuda e yunan mehorá nan abilidat di lesa i komprondé e mensahe bíbliko mihó. (Sal. 1:​1, 2) I kiko di e meta pa mehorá e kalidat di nos orashonnan? Un otro meta ekselente ta pa mehorá den kada aspekto di e fruta di spiritu. (Gal. 5:​22, 23) Òf kiko di pensa di antemano kon nos por mustra kompashon na hende ku nos topa den nos ministerio? Si e famia ta hasi esei, e yunan lo siña mustra empatia, i kisas lo no dura mashá ku nan ta kultivá e deseo pa sirbi komo pionero regular òf misionero.

¹¹ Kua ta algun meta ku abo i bo famia por pone? Boso famia por pone e meta pa dediká mas tempu den sirbishi? Boso por  hasi esfuerso pa vense e temor di duna testimonio via telefòn, riba kaya òf na hende den negoshi? Kiko di sirbi kaminda tin mas nesesidat pa predikadónan di Reino? Un miembro di famia lo por siña un otro idioma pa por kompartí e bon notisia ku hende di otro nashonalidat?

12. Kiko kabesnan di famia por hasi pa yuda nan famia krese spiritualmente?

¹² Komo kabes di famia, wak den ki áreanan bo famia lo por hasi progreso spiritual. Kaba, pone metanan spesífiko pa logra esei. E metanan ku boso ta pone komo famia mester ta realístiko i kuadra ku boso sirkunstansia- i abilidatnan. (Pro. 13:12) Ta klaru ku ta tuma tempu pa traha pa alkansá metanan ku ta bale la pena. Pues pakiko no baha man na wakmentu di televishon i usa e tempu ei pa aktividatnan spiritual? (Efe. 5:​15, 16) Traha duru pa alkansá e metanan ku boso a pone pa boso famia. (Gal. 6:9) E “progreso” di un famia ku ta hasi esfuerso pa alkansá metanan spiritual lo “ta bisto pa tur hende.”​—1 Tim. 4:15.

Usa un Anochi pa Adorashon Komo Famia

13. Ki kambio a keda introdusí den e programa di reunionnan semanal, i ki preguntanan nos mester hasi nos mes?

¹³ Dia promé di yanüari 2009 a bini un kambio signifikante den nos programa di reunion semanal. E kambio akí ta un ekselente provishon pa yuda famianan pa nan ta “prepará” pa e binida di e Yu di hende. Nos no tin ku reuní mas riba un dia spesífiko pa Estudio di Buki di Kongregashon. Awor ta tene e reunion ei huntu ku e Skol di Ministerio Teokrátiko i e Reunion di Sirbishi. E ahuste akí a hasi posibel ku famianan kristian por programá un anochi kada siman pa Adorashon Komo Famia pa fortalesé nan famia spiritualmente. Awor ku un periodo di tempu a pasa for di dia ku a introdusí e kambio akí, nos por puntra nos mes: ‘Mi ta usa e tempu ku a bira disponibel pa tene un anochi pa Adorashon Komo Famia òf pa hasi estudio personal? Mi a logra kumpli ku e meta di e provishon akí?’

14. (a) Kiko ta e meta prinsipal pa usa un anochi pa Adorashon Komo Famia òf pa estudio personal? (b) Dikon ta esensial pa reservá un anochi pa estudio?

¹⁴ E meta prinsipal pa usa un anochi pa Adorashon Komo Famia òf estudio personal ta pa hala mas serka Dios. (Sant. 4:8) Ora nos ta dediká tempu na estudio di Beibel riba un base regular i ta atkerí mas konosementu di nos Kreador, nos relashon kuné ta bira mas fuerte. Mas nos hala serka Yehova, mas motivá nos lo ta pa stim’é ‘ku henter nos kurason, ku henter nos alma, ku henter nos mente i ku tur nos forsa.’ (Mar. 12:30) Sí, nos ta kla pa obedesé Dios i imit’é. (Efe. 5:1) Pues ta masha esensial pa usa un anochi tur siman pa Adorashon Komo Famia, ya ku esei ta yuda tur miembro di e famia pa ta “prepará” spiritualmente segun ku nan ta spera e “gran tribulashon.” (Mat. 24:21) Esaki ta vital pa haña salbashon.

15. Ki efekto e anochi pa Adorashon Komo Famia por tin riba e famia?

¹⁵ Un otro meta di e Adorashon Komo Famia ta pa e famia bira mas uní. Ora miembronan di famia ta studia Beibel huntu tur siman, esei tin un gran efekto riba nan sintimentunan pa ku otro. Parehanan kasá ta sinti nan mashá uní ora nan ta tende nan kasá ekspresá su goso pa un òf otro bèrdat balioso ku nan dos a deskubrí huntu durante nan estudio di famia. (Lesa Eklesiastés 4:12.) Mayor- i yunan ku ta adorá Yehova huntu lo bira mas uní den amor, ku ta “e laso perfekto di unidat.”​—Kol. 3:14.

16. Kon tres ruman kristian a benefisiá di e anochi ku nan a apartá pa studia Beibel huntu?

 ¹⁶ Konsiderá e ehèmpel di tres ruman muhé kristian ku a apartá un anochi pa studia Beibel huntu i kon nan a benefisiá di esei. E tres biudanan di edat avansá akí no ta famia di otro pero bon amiga pa hopi aña, i nan ta biba den e mesun stat. Nan tabatin e deseo pa asosiá mas ku otro, no djis pa kosnan sosial so, sino pa kompartí kosnan spiritual tambe. P’esei nan a disidí di apartá un anochi pa studia Beibel huntu. Nan a skohe pa studia e buki “Testimonio Kabal” di e Reino di Dios. Un di nan a bisa: “Nos ta disfrutá asina tantu di nos estudio ku hopi biaha esaki ta dura mas ku un ora. Nos ta purba visualisá loke nos rumannan di promé siglo a pasa aden i ta konsiderá kiko nos lo hasi si nos haña nos den un situashon similar. Despues, nos ta trata di pone na práktika loke nos a siña for di nos estudio den nos sirbishi di vèlt. Esaki a hasi nos trabou di prediká e Reino i di hasi disipel mas gososo i produktivo ku nunka.” Ademas di edifiká nan spiritualmente, e estudio di Beibel a hala e tres bon amiganan akí mas serka di otro. Nan a bisa: “Nos ta balorá e oportunidat di studia huntu akí mashá.”

17. Kiko ta kontribuí na e éksito di e anochi di Adorashon Komo Famia?

¹⁷ Kiko di abo? Bo ta benefisiando di e anochi di Adorashon Komo Famia òf estudio personal? Si bo ta hasi esei un aden un afó, esaki lo no logra e meta deseá. Kada miembro di famia mester ta kla pa studia na e ora ku nan a palabrá. Nan no mester laga kosnan di ménos importansia stroba nan di tene nan estudio. Ademas, e informashon ku boso a skohe pa studia mester ta práktiko pa e famia. Awor, kiko bo por hasi pa e estudio ta plasentero? Hasi esfuerso pa e ambiente ta agradabel i respetuoso i usa métodonan di siña ku ta efikas.​—Sant. 3:18. *

Keda “Alerta” i “Sea Prepará”

18, 19. E echo ku bo ta konsiente ku e binida di e Yu di hende ta serka mester tin ki efekto riba abo i bo famia?

¹⁸ E echo ku e situashon mundial ta bayendo atras ta un evidensia konvinsente ku desde 1914 Satanas su mundu malbado a drenta su último dianan. No tin duda, Armagedón ta masha serka! Pronto e Yu di hende lo bini pa ehekutá Yehova su huisio riba e malbadonan. (Sal. 37:10; Pro. 2:​21, 22) E echo ku bo ta konsiente di esei no mester tin influensia riba abo ku bo famia?

¹⁹ Boso ta hasi kaso di Hesus su konseho pa mantené boso wowo “simpel”? Miéntras ku e mundu ta kore tras di rikesa, fama i poder, boso famia ta hasi esfuerso pa alkansá metanan spiritual? Boso tin un anochi pa Adorashon Komo Famia òf ta apartá tempu pa estudio personal? E provishon akí a yuda boso famia hala mas serka Yehova i mas serka di otro? Manera nos a konsiderá den e artíkulo anterior, bo ta kumpli ku bo responsabilidat bíbliko komo esposo, esposa òf komo yu, i asina yuda henter e famia keda “alerta”? (1 Tes. 5:6) Si esei ta e kaso, lo bo ta “prepará” pa e binida di e Yu di hende.

[Nota]

Kiko Bo A Siña?

• Splika kon famianan kristian por ta “prepará” si nan ta . . .

mantené un wowo “simpel.”

one metanan spiritual i hasi esfuerso pa alkansá nan.

usa un anochi pa Adorashon Komo Famia.

[Preguntanan di Estudio]

[Plachi na página 15]

Un wowo “simpel” lo yuda nos resistí distraishonnan di mundu