‘Abo so ta e Haltísimo riba henter tera.’​—SAL. 83:18.

1, 2. Aunke ta importante pa konosé e nòmber di Dios, kiko mas nos mester hasi pa nos por haña salbashon?

KISAS e promé biaha ku bo a haña sa ku Dios su nòmber ta Yehova ta ora nan a mustra bo esei na Salmo 83:18 (NW). Probablemente bo a keda sorprendí ora bo a lesa e palabranan akí: “Pa hende por sa ku abo, kende su nòmber ta Yehova, abo so ta e Haltísimo riba henter tera.” Sin duda, bo mes lo a usa e teksto akí despues pa yuda otro hende konosé Yehova, nos Dios amoroso.​—Rom. 10:​12, 13.

² Aunke ta importante pa hende konosé e nòmber di Dios, esei so no ta sufisiente. Tuma nota kon e salmista a enfatisá un bèrdat mas ku tambe ta importante pa nos por haña salbashon. El a bisa: ‘Abo so ta e Haltísimo riba henter tera.’ Sí, Yehova ta e Persona di mas importante den henter universo. Komo e Kreador di tur kos, Yehova ta ferwagt ku tur su kriaturanan ta kompletamente sumiso na dje, i e tin derecho riba esei. (Rev. 4:11) P’esei, nos tin bon motibu pa puntra nos mes: ‘Ken ta e persona di mas importante den mi bida?’ Ta masha importante pa nos kada un analisá nos kontesta pa e pregunta ei!

E Kuestion Ku A Lanta den Hòfi di Edén

3, 4. Kon Satanas a logra gaña Eva, i ku ki resultado?

³ En bista di loke a sosodé den hòfi di Edén, e pregunta menshoná ariba ta masha importante. Aya e angel rebelde ku despues a ser yamá Satanas e Diabel a tenta e promé muhé, Eva, pa e sigui tras di su propio deseonan en bes di obedesé Yehova su mandamentu pa no kome di un sierto palu. (Gén. 2:17; 2 Kor. 11:3) Eva a sukumbí na e tentashon i di e manera ei el a mustra un falta di rèspèt pa Yehova su soberania. Eva no a rekonosé Yehova komo e Persona di mas importante den su bida. Pero kon Satanas a logra gaña Eva?

⁴ Den su kòmbersashon ku Eva, Satanas a usa vários táktika pa gañ’é. (Lesa Génesis 3:​1-5.) Di promé, Satanas no a usa Dios su nòmber personal, Yehova; el a usa simplemente e título “Dios.” Na kontraste, den e idioma hebreo original, e eskritor di Génesis a usa Yehova su nòmber den e promé versíkulo di e kapítulo ei. Di dos, Satanas no a papia di loke Dios a “ordená;” mas bien, el a djis puntra kiko Dios a “bisa.” (Gén. 2:16) Na un manera sutil, Satanas a trata di minimisá e importansia di loke Dios a ordená. Di tres, aunke ta ku Eva so e tabata papia, el a usa e pronòmber “boso” ku ta referí na mas ku un hende. Di e manera ei, Satanas a hunga ku Eva su orguyo i a trata na lag’é sinti su mes importante—komo si fuera ta é tabata sirbi komo bosero. I kiko tabata e resultado? Evidentemente, Eva a tuma e libertat di papia pa e i su esposo ora el a bisa e kolebra: “Di fruta di e palunan di e hòfi nos por kome.”

5. (a) Satanas a dirigí Eva su atenshon na kiko? (b) Kiko Eva a demostrá ora el a kome di e fruta prohibí?

⁵ Satanas a trose e bèrdat. El a insinuá ku Dios tabata inhustu ora el a ordená Adam ku Eva pa “no . . . kome di ningun palu di e hòfi.” Despues, Satanas a pone Eva pensa únikamente riba su mes i supuestamente kon e por mehorá su situashon, esta, bira “manera  Dios.” Finalmente, Satanas a logra gaña Eva, ya ku Eva a kuminsá enfoká riba e palu i su fruta i no riba su relashon ku Esun ku a dun’é tur kos. (Lesa Génesis 3:6.) Lamentablemente, Eva a kome di e fruta i asina a demostrá ku Yehova no tabata e Persona di mas importante den su bida.

E Kuestion den e Dianan di Jòb

6. Kon Satanas a kuestioná Jòb su integridat, i ki oportunidat Jòb a haña?

⁶ Siglonan despues, e hòmber fiel Jòb a haña oportunidat pa demostrá ken tabata e Persona di mas importante den su bida. Ora Yehova a konfrontá Satanas ku e echo ku Jòb ta un hòmber di integridat, Satanas a kontest’é: “Ta pòrnada Jòb ta teme Dios?” (Lesa Jòb 1:​7-10.) Satanas no a nenga ku Jòb ta obediente na Dios. Mas bien, el a kuestioná Jòb su motibunan. Na un manera astuto, Satanas a akusá Jòb di ta sirbi Yehova pa motibunan egoista i no pasobra e ta stim’é. Ta Jòb so por a proba ku e akusashon ei tabata falsu, i el a haña oportunidat pa hasi esei.

7, 8. Ki prueba Jòb a hañ’é kuné, i kiko el a demostrá pa medio di su perseveransia?

⁷ Yehova a permití Satanas trese vários kalamidat riba Jòb ku a tuma lugá un tras di otro. (Jòb 1:​12-19) Kon Jòb a reakshoná riba e kambio di sirkunstansianan akí? Beibel ta bisa ku e “no a peka ni e no a kulpa Dios.” (Jòb 1:22) Pero Satanas no a entregá; el a sigui bisa: “Kueru pa kueru! Sí, tur loke un hende tin e lo duna pa su bida.” * (Jòb 2:4) Satanas a insinuá ku si Jòb a sufri físikamente, lo e no a sigui mira Yehova komo e Persona di mas importante den su bida.

⁸ Jòb a haña un malesa repugnante i su kurpa a keda tur desfigurá. Komo si fuera no ta basta, su esposa a pone preshon riba dje pa maldishoná Dios i muri. Despues, tres supuesto konsoladó a akus’é di mal komportashon. (Jòb 2:​11-13; 8:​2-6; 22:​2, 3) Sinembargo, apesar di tur e sufrimentu ku el a pasa aden, Jòb a keda mantené su integridat. (Lesa Jòb 2:​9 i 10.) Pa medio di su fiel perseveransia, el a demostrá ku Yehova ta e Persona di mas importante den su bida. Jòb a demostrá tambe ku ta posibel pa un hende imperfekto duna un kontesta pa e akusashonnan falsu di Diabel maske ta te na sierto grado.—Kompará Proverbionan 27:11.

Hesus A Duna un Kontesta Perfekto

9. (a) Kon Satanas a trata di tenta Hesus pa sigui tras di deseo personal? (b) Kon Hesus a reakshoná riba e tentashon akí?

⁹ Djis despues ku Hesus a batisá, Satanas a purba tent’é pa sigui tras di deseo egoista en bes di keda mira Yehova komo e Persona di mas importante den su bida. Diabel a konfrontá Hesus ku tres tentashon. Di promé, el a tenta Hesus p’e hasi piedra bira pan i asina trata di laga Hesus enfoká riba su nesesidat físiko. (Mat. 4:​2, 3) Hesus a kaba di yuna pa 40 dia i e tabatin hamber. P’esei Diabel a urgié pa hasi mal uso di su poder di hasi milager pa satisfasé su hamber. Kon Hesus a reakshoná? Na kontraste ku Eva, Hesus a enfoká riba e Palabra di Yehova i a rechasá e tentashon di Satanas umbes.​—Lesa Mateo 4:4.

10. Dikon Satanas a reta Hesus pa e tira su kurpa abou for di e pinákulo di e tèmpel?

¹⁰ Den su di dos intento, Satanas a reta Hesus pa e tira su kurpa abou for di e pinákulo di e tèmpel. (Mat. 4:​5, 6) Kiko Satanas kier a logra? El a insinuá ku si Hesus kai sin lastimá su kurpa, esei lo a proba ku e ta “e yu di Dios.”  Ta opvio ku Diabel tabata ke pa Hesus aktua na un manera egoista. E tabata ke pa Hesus ta demasiado preokupá ku su propio reputashon te na e grado di pone un show espektakular. Satanas tabata sa ku un persona por disidí di hasi un kos deskabeyá pa motibu di orguyo òf pa no pèrdè kara. Pa logra esei, Satanas a apliká un teksto robes, pero Hesus a mustra ku E tabatin pleno komprondementu di Yehova su Palabra. (Lesa Mateo 4:7.) Hesus a rechasá e reto i asina proba un biaha mas ku Yehova ta e Persona di mas importante den su bida.

11. Dikon Hesus a rechasá e oferta di Diabel pa risibí tur e reinonan di mundu?

¹¹ Den su desesperashon, Satanas a hasi su último intento ofresiendo Hesus tur e reinonan di mundu. (Mat. 4:​8, 9) Hesus a rechasá e oferta mesora. Hesus a realisá ku si e aseptá e oferta esei ta meskos ku rechasá Yehova su soberania, esta, Dios su derecho di goberná komo e Haltísimo. (Lesa Mateo 4:10.) Den kada kaso, Hesus a kontestá Satanas sitando teksto for di e Skritura Hebreo ku ta kontené Yehova su nòmber.

12. (a) Ki desishon difísil Hesus mester a tuma na final di su bida riba tera? (b) Kiko nos ta siña for di e manera ku Hesus a trata ku e situashon?

¹² Na final di Hesus su bida riba tera, e mester a tuma un desishon masha difísil. Durante su ministerio, el a ekspresá ku e tabata dispuesto pa duna su bida komo sakrifisio. (Mat. 20:​17-19, 28; Luk. 12:50; Juan 16:28) Sinembargo, Hesus tabata sa ku lo el a ser akusá falsamente i kondená na morto bou di sistema legal hudiu i ehekutá komo un blasfemadó. Pa muri bou di e sirkunstansianan ei a preokup’é mashá. El a hasi orashon i bisa: “Mi Tata, si ta posibel, laga e kopa akí pasa bai for di mi.” Pero el a sigui bisa: “No manera ami kier, ma manera abo kier.” (Mat. 26:39) Sí, Hesus su fieldat te na morto a proba fuera di tur duda ken tabata e Persona di mas importante den su bida.

Nos Kontesta

13. Kiko nos a siña te asina leu for di e ehèmpel di Eva, Jòb i Hesukristu?

¹³ Kiko nos a siña te asina leu? Den e kaso di Eva, nos a siña ku esnan ku ta sigui tras di deseonan egoista òf ku ta konsiderá nan mes importante ta demostrá ku Yehova no ta e Persona di mas importante den nan bida. Na kontraste, e ehèmpel di Jòb, kende a mantené su integridat, ta siña nos ku asta hende imperfekto por perseverá bou di prueba, asta ora nan no ta komprondé e motibu pakiko nan ta pasa den e difikultatnan ei. Di e manera ei, nan ta demostrá ku ta Yehova ta na promé lugá den nan bida. (Sant. 5:11) Finalmente, Hesus su ehèmpel ta siña nos ku nos mester ta dispuesto pa pasa bèrgwensa i no duna muchu importansia na nos propio reputashon. (Heb. 12:2) Pero kon nos por apliká loke nos ta siña for di e ehèmpelnan akí?

14, 15. Distinto for di Eva, kon Hesus a reakshoná riba tentashon, i kon nos por imitá Hesus?

¹⁴ Nunka laga tentashon pon’é bo lubidá Yehova. Eva a dirigí tur su atenshon riba e tentashon ku tabatin su dilanti. El a mira ku e fruta “tabata bon pa kuminda, i ku e tabata un delisia pa bista, i ku e palu tabata deseabel.” (Gén. 3:6) Ki un kontraste for di e manera ku Hesus a reakshoná riba e tres tentashonnan! Den kada kaso, el a wak mas aya di e tentashon i a konsiderá ki konsekuensia su akshonnan lo tin. El a dependé riba e Palabra di Dios i semper a dirigí atenshon na Yehova.

¹⁵ Ora nos haña nos ku tentashon pa hasi loke ta desagradá Yehova, riba kiko nos ta enfoká nos atenshon? Si nos keda pensa riba e tentashon, nos deseo pa hasi malu ta bira mas fuerte. (Sant. 1:​14, 15) Nos tin ku tuma akshon mesora pa eliminá mal deseo asta si esei ta rekerí akshon drástiko, komo si fuera kita un parti di nos kurpa. (Mat. 5:​29, 30) Meskos ku Hesus, nos tin ku enfoká riba e konsekuensianan di nos akshonnan, esta, kon nan lo afektá nos relashon ku  Yehova. Nos tin ku tene na mente loke su Palabra, Beibel, ta bisa. Ta di e manera ei so nos por demostrá ku ta Yehova ta e Persona di mas importante den nos bida.

16-18. (a) Kiko por pone nos bira desanimá? (b) Kiko lo yuda nos trata ku situashonnan difísil?

¹⁶ Nunka laga tragedia personal pone bo rabia ku Yehova. (Pro. 19:3) Segun ku e sistema malbado akí ta yega na su fin, mas i mas sirbidó di Yehova ta ser afektá pa desaster i tragedia. Nos no ta ferwagt di haña protekshon na un manera milagroso den e tempu akí. Meskos ku Jòb, nos tambe por bira desanimá ora nos pèrdè un ser kerí òf ta sufri debí na difikultat.

¹⁷ Jòb no a komprondé pakiko Yehova a permití sierto kosnan sosodé, i tin biaha, nos tampoko no ta komprondé pakiko kosnan malu ta sosodé. Kisas nos a tende di rumannan fiel ku a muri den un temblor, manera esun ku a asotá Haiti, òf den kualke otro desaster natural. Òf kisas nos sa di un ruman íntegro ku a bira víktima di violensia òf ku a muri den un aksidente horibel. Òf kisas nos ta haña nos ku situashon difísil òf ta sinti ku nos a bira víktima di un inhustisia. Den nos angustia, nos por sklama: ‘Dikon Yehova? Dikon nèt ami? Kiko mi a hasi robes?’ (Hab. 1:​2, 3) Kiko lo yuda nos den situashonnan asina?

¹⁸ Ora nos ta konfrontá situashonnan difísil, nos mester tene kuidou pa no pensa ku esei ta un indikashon ku nos no tin Yehova su aprobashon. Hesus a enfatisá e asuntu akí ora el a referí na dos tragedia ku a sosodé tempu e tabata riba tera. (Lesa Lukas 13:​1-5.) Hopi kalamidat ta resultado di “tempu i suseso imprevisto.” (Ekl. 9:11, NW) Sea kual sea e motibu di nos angustia, nos por trata ku e asuntu basta nos buska yudansa serka e “Dios di tur konsuelo.” E lo duna nos e fortalesa ku nos tin mester pa sigui sirbié fielmente.​—2 Kor. 1:​3-6.

19, 20. Kiko a yuda Hesus soportá situashonnan humiante, i kiko por yuda nos hasi meskos?

¹⁹ Nunka laga orguyo, miedu òf bèrgwensa influensiá nos. Hesus tabata humilde; p’esei mes e por “a bandoná su mes gloria, tumando forma di un sirbidó.” (Fil. 2:​5-8) I debí ku el a dependé riba Yehova, e por a soportá hopi humiashon. (1 Ped. 2:​23, 24) Hesus semper a pone Yehova su boluntat na promé lugá den su bida, i p’esei Dios a hals’é na un puesto superior. (Fil. 2:9) Hesus a rekomendá su disipelnan pa hiba nan bida di e mesun manera.​—Mat. 23:​11, 12; Luk. 9:26.

²⁰ Tin biaha, nos por haña nos ku sierto pruebanan di fe ku por pone nos pasa bèrgwensa. Apesar di esei, nos mester tin e mesun konfiansa ku apòstel Pablo, kende a bisa: “Pa e motibu akí mi ta sufri e kosnan akí tambe, ma mi no tin bèrgwensa; pasobra mi sa ta den ken mi a kere i mi ta konvensí ku e ta kapas pa warda loke mi a konfia na dje te na e dia ei.”​—2 Tim. 1:12.

21. Apesar di mundu su aktitut egoista, kiko ta bo determinashon?

²¹ Beibel a profetisa ku durante nos tempu hende lo “ta stimadó di nan mes.” (2 Tim. 3:2) No ta nada straño anto ku nos ta rondoná pa hende ku tin un aktitut di ‘ami-promé.’ Laga nos nunka tin e aktitut egoista ei! Mas bien, sea ku nos ta konfrontá tentashon, ta pasa den tragedia òf ta haña nos den situashon ku por pone nos pasa bèrgwensa, laga nos kada un ta determiná pa demostrá ku ta Yehova ta e Persona di mas importante den nos bida!

[Nota]

Kiko Nos Por Siña for di . . .

• e manera ku Satanas a gaña Eva?

• e manera ku Jòb a reakshoná riba tragedia?

• loke Hesus a konsiderá mas importante?

[Preguntanan di Estudio]