“[Yehova] ta tende ora mi sklama na dje.”​—SAL. 4:3.

1, 2. (a) Den ki situashon difísil David a hañ’é? (b) Kua salmonan nos lo bai analisá?

ORA Rei David tabata goberná Israel pa un tempu kaba, el a hañ’é den un situashon masha difísil. Su yu astuto Absalon a proklamá su mes rei, i David mester a hui for di Yerusalèm. Un bon amigu di dje tambe a traishon’é. Na yoramentu el a subi Seru di Oleifi pia abou ku algun kompañero leal. Despues, Simei, kende tabata pertenesé na un di e famianan di e kas di Rei Saul, a tira David ku piedra, manda tera riba dje i maldishon’é.​—2 Sam. 15:​30, 31; 16:​5-14.

² E sufrimentu akí a pone ku David a baha den su graf? Nò, el a konfia den Yehova. Nos por mira esei bon kla den Salmo kapítulo 3 ku e mes a komponé ora e tabata hui pa Absalon. El a skirbi Salmo 4 tambe. Den tur dos salmo bo por mira ku e tabata konvensí ku Dios ta tende i kontestá orashon. (Sal. 3:4; 4:3) E salmonan akí ta duna nos e siguransa ku Yehova ta ku su sirbidónan fiel di dia i anochi, i ku e ta bendishoná nan ku su sosten, pas i un sentido di siguridat. (Sal. 3:5; 4:8) Pa e motibu ei, laga nos ban analisá e salmonan akí i mira kon nan por duna nos un sentido di siguridat i konfiansa den Dios.

Ora ‘Hopi Lanta Kontra Nos’

3. Segun Salmo 3:​1 i 2, den ki situashon David tabata?

³ Un mensahero a bisa: “Kurason di e hòmbernan di Israel ta ku Absalon.” (2 Sam. 15:13) Puntrando su mes ta kon Absalon a logra haña asina tantu hende na su banda, David a bisa: “O SEÑOR, mira kon mi atversarionan a oumentá! Tin hopi ku ta lanta kontra mi. Tin hopi ku ta bisa di mi alma: ‘No tin yudansa p’e serka Dios.’” (Sal. 3:​1, 2) Hopi israelita a pensa ku Yehova lo no a libra David for di tur e kosnan ku el a sufri na man di Absalon i su kompinchinan.

4, 5. (a) Di kiko David tabatin sigur? (b) Kiko e palabranan “Esun ku ta halsa mi kabes” ta nifiká?

⁴ Pero David tabata sintié sigur, ya ku e tabatin pleno konfiansa den Dios. El a kanta: “Ma abo, o SEÑOR, ta un eskudo rònt di mi, mi gloria, i Esun ku ta halsa mi kabes.” (Sal. 3:3) David tabatin sigur ku Yehova lo a proteh’é manera un eskudo ta protehá un sòldá. Sí, den su behes e rei a hui i tabata kana kabes abou i tapá, e tabata sintié humiá. Pero e Haltísimo lo a duna David gloria atrobe. Yehova lo a yud’é para stret, i p’e hisa su kara na laira atrobe. Ora David a pidi Dios yudansa, e tabatin konfiansa ku Dios lo kontest’é. Abo tambe tin e konfiansa ei den Yehova?

⁵ Ku e palabranan “Esun ku ta halsa mi kabes,” David a rekonosé ku Yehova lo yud’é. Today’s English Version ta bisa: “Pero abo, o SEÑOR, semper ta mi eskudo ku ta protehá mi for di peliger; bo ta duna mi viktoria i duna mi kurashi atrobe.” Relashoná ku e ekspreshon “Esun ku ta halsa mi kabes,” un buki di konsulta ta bisa: “Ora Dios halsa . . . un hende su ‘kabes,’ E ta duna e hende speransa i un sentido di siguridat.” Debí ku e trono di Israel a ser kitá for di David, e tabatin tur motibu pa sintié kibrá. Pero ora Dios a halsa David su kabes, el a bolbe haña kurashi, un sentido di siguridat i pleno konfiansa den Dios.

 ‘Yehova Lo Kontestá!’

6. Dikon David por a bisa ku Yehova lo kontestá su orashon for di Su seru santu?

⁶ Debí ku David tabata konfia den Yehova i tabata sa ku Yehova ta kontestá orashon, el a sigui bisa: “Ku mi bos mi tabata sklama na SEÑOR, i el a kontestá mi for di su seru santu.” (Sal. 3:4) E arka di aliansa, ku ta simbolisá Dios su presensia, a ser hibá Seru Sion manera Rei David a ordená. (Lesa 2 Samuel 15:​23-25.) P’esei, ku rason David por a bisa ku Yehova lo kontestá su orashon for di Su seru santu.

7. Dikon David no tabatin miedu?

⁷ Debí ku David tabatin sigur ku Dios ta skucha su orashon, e no tabatin miedu. P’esei el a kanta: “Mi a kai drumi i a pega soño; mi a spièrta, pasobra SEÑOR ta sostené mi.” (Sal. 3:5) Ni anochi, ora ku e chèns tabata mas grandi pa hende ataká David, e no tabatin miedu di bai drumi. E tabatin sigur ku lo e spièrta, pasobra e tabata sa di eksperensia ku e por konfia siegamente ku Dios lo sosten’é. Nos tambe por tin e konfiansa ei si nos “warda e kamindanan di SEÑOR” i no bandon’é nunka.​—Lesa 2 Samuel 22:​21 i 22.

8. Kon Salmo 27:​1-4 ta mustra ku David a konfia den Dios?

⁸ David su sentido di siguridat i su pleno konfiansa den Dios ta bisto den un di su salmonan ku ta kontené e siguiente palabranan inspirá: “SEÑOR ta mi lus i mi salbashon; di ken lo mi tin temor? SEÑOR ta e fortalesa di mi bida; di ken lo mi tin miedu? . . . Maske un ehérsito kampa kontra mi, mi kurason lo no tin temor. . . . Un kos mi a deseá di SEÑOR, esei lo mi buska: ku mi por keda den e kas di SEÑOR tur e dianan di mi bida, pa kontemplá e bunitesa di SEÑOR, i pa meditá den su tèmpel.” (Sal. 27:​1-4) Si bo ta sinti meskos i bo sirkunstansia ta permití, lo bo asistí regularmente na e reunionnan di kongregashon huntu ku otro adoradónan di Yehova.​—Heb. 10:​23-25.

9, 10. Apesar di loke tin pará skirbí na Salmo 3:​6 i 7, dikon lo bo bisa ku David no tabata vengativo?

⁹ Maske Absalon a traishoná David i hopi  otro hende tabata desleal na dje, el a kanta: “Lo mi no tene miedu di dies milnan di hende ku a pone nan mes tur rònt kontra mi. Lanta, o SEÑOR; salba mi, o mi Dios! Pasobra bo a dal kakumbein di tur mi enemigunan; bo a kibra djente di e malbadonan na pida-pida.”​—Sal. 3:​6, 7.

¹⁰ David no tabata vengativo. Si mester “a dal kakumbein” di su enemigunan, Dios lo a hasié. Debí ku Rei David a skirbi pa su mes un kopia di e Lei, e tabata sa ku Yehova a deklará: “Vengansa ta di mi, i rekompensa.” (Deu. 17:​14, 15, 18; 32:35) Tabata dependé di Yehova tambe si e ta “kibra djente di e malbadonan na pida-pida.” Kibra nan djente a nifiká ku nan no por a hasi daño mas. Yehova sa ken ta malbado pasobra e “ta wak kurason.” (1 Sam. 16:7) Nos ta sumamente gradisidu ku Dios ta duna nos fe i forsa pa para firme kontra e persona mas malbado, esta Satanas. Pronto lo e ser mará manera un leon sin djente ku ta gruña pero ku meresé destrukshon.​—1 Ped. 5:​8, 9; Rev. 20:​1, 2, 7-10.

‘Salbashon Ta di Yehova’

11. Dikon nos mester hasi orashon pa nos rumannan den fe?

¹¹ David tabata desesperá pa haña yudansa, i e tabata sa ku ta Yehova so por a libr’é. Pero e salmista no tabata pensa riba su so. E tabata pensa riba henter Yehova su pueblo. Apropiadamente, David a terminá su komposishon inspirá ku e palabranan: “Salbashon ta di SEÑOR; bo bendishon sea riba bo pueblo!” (Sal. 3:8) Ta bèrdat ku David tabatin problema grandi, pero el a kòrda riba Yehova su pueblo en general i e tabatin konfiansa ku Dios lo a bendishoná nan. Nos tambe no mester kòrda riba nos rumannan den fe? Laga nos kòrda nan den nos orashonnan, i pidi Yehova pa duna nan su spiritu santu pa nan por haña kurashi pa deklará e bon notisia yen di konfiansa.​—Efe. 6:​17-20.

12, 13. Kiko a sosodé ku Absalon, i kon David a reakshoná?

¹² Absalon a muri un morto bergonsoso. Esaki ta un spièrtamentu pa tur esnan ku ta trata otro hende malu, spesialmente Dios su ungínan, manera David. (Lesa Proverbionan 3:​31-35.) Un bataya a tuma lugá, i Absalon su ehérsito a sufri derota. I ora Absalon tabata hui riba su mula, su kabei a keda pegá den e ramanan diki di un palu grandi. Einan el a keda kologá—bibu pero indefenso—te ora Joab a hink’é mata ku tres lansa den su kurason.​—2 Sam. 18:​6-17.

¹³ David a keda kontentu ora el a tende loke a pasa ku su yu? Nò. Mas bien, e tabata kana bai bin ta yora, i a sklama: “O mi yu Absalon, mi yu, mi yu Absalon! Mihó ta ami a muri na bo lugá, o Absalon, mi yu, mi yu!” (2 Sam. 18:​24-33) David su tristesa tabata kasi insoportabel, i ta solamente Joab su palabranan a yud’é bin bei. Ki un final trágiko pa Absalon, kende tabata asina ambisioso ku el a bringa kontra su mes tata—Yehova su ungí—i asina hinka su mes den problema!​—2 Sam. 19:​1-8; Pro. 12:21; 24:​21, 22.

David Ta Bolbe Ekspresá Konfiansa den Dios

14. Kiko nos por bisa tokante di Salmo 4?

¹⁴ Meskos ku Salmo kapítulo 3, Salmo kapítulo 4 ta un orashon sinsero di David ku ta mustra ku e tabatin pleno konfiansa den Yehova. (Sal. 3:4; 4:3) Kisas David a komponé e kantika akí pa ekspresá alivio i gradisimentu na Dios despues ku Absalon su gòlpi di estado a frakasá. Òf podisé el a skirbié ku e kantantenan levita na mente. Sea kual sea e kaso, ora nos meditá riba Salmo 4, esei por yuda nos haña mas konfiansa den Yehova.

15. Ora nos hasi orashon na Yehova mediante su Yu, dikon nos por tin konfiansa ku E ta skucha nos?

¹⁵ David a bolbe manifestá pleno konfiansa den Dios i a mustra ku e tabatin sigur ku Dios ta tende i kontestá orashon. El a kanta: “Kontestá mi ora mi yama, o Dios di mi hustisia! Bo  a aliviá mi den mi aflikshon; tene miserikòrdia di mi i tende mi orashon.” (Sal. 4:1) Nos tambe por tin sigur di esei si nos praktiká hustisia. Nos sa ku Yehova ta e ‘Dios di hustisia’ i ku e ta bendishoná su pueblo hustu. P’esei, nos por tin konfiansa ku Yehova ta skucha nos orashon ora nos hasi esei ku fe den e sakrifisio di reskate i mediante su Yu Hesus. (Juan 3:​16, 36) Ki un pas esei ta duna nos!

16. Dikon David por a desanimá?

¹⁶ Tin biaha, nos por haña nos den un situashon desanimante ku ta kita nos pas. Kisas David a hañ’é temporalmente den un situashon asina, ya ku el a kanta: “O yunan di hende, kuantu tempu mas boso lo kambia mi gloria na bèrgwensa? Kuantu tempu mas boso lo stima banidat i buska mentira?” (Sal. 4:2) E ekspreshon “yunan di hende” evidentemente ta referí na humanidat den un sentido negativo. David su enemigunan ‘tabata stima banidat.’ E New International Version ta tradusié: “Pa kuantu tempu boso lo stima kosnan ku no ta real i buska diosnan falsu?” Asta si nos desanimá pa motibu di loke otronan ta hasi, laga nos sigui hasi orashon sinsero i demostrá pleno konfiansa den e úniko Dios berdadero.

17. Splika kon nos por apliká Salmo 4:3.

¹⁷ Bo por mira bon kla ku David tabata konfia den Dios, ya ku el a bisa: “Ma komprondé ku SEÑOR a apartá pa su mes esun ku ta deboto; SEÑOR ta tende ora mi sklama na dje.” (Sal. 4:3) Pa nos por keda deboto òf leal na Yehova, nos mester tin kurashi i pleno konfiansa den dje. Por ehèmpel, un famia kristian mester tin e kualidatnan akí ora ku ekspulsá un miembro di famia ku no arepentí. Dios ta bendishoná esnan ku ta leal na dje i na su kamindanan. Anto lealtat i pleno konfiansa den Yehova ta promové goso entre su pueblo.​—Sal. 84:​11, 12.

18. Di akuerdo ku Salmo 4:4, kiko nos mester hasi si un hende a ofendé nos òf trata nos malu?

¹⁸ Kiko si un hende bisa òf hasi algu ku ofendé nos? Nos por mantené nos goso si nos hasi loke David a bisa: “Rabia, ma no hasi piká; meditá den bo kurason riba bo kama i keda ketu.” (Sal. 4:4) No tuma represaya si un hende ofendé nos òf trata nos malu. (Rom. 12:​17-19) Nos por bisa Yehova den orashon loke nos ta sinti enkuanto e asuntu ora nos ta riba kama. Ora nos hasi orashon tokante loke ta molestia nos, nos manera di mira e asuntu por kambia i nos amor lo motivá nos pa pordoná. (1 Ped. 4:8) Ta interesante pa mira ku apòstel Pablo a duna un konseho ku aparentemente ta basá riba Salmo 4:4. El a bisa: “Rabia, ma no hasi piká; no laga solo baha riba boso rabiá, i no duna Diabel oportunidat.”​—Efe. 4:​26, 27.

19. Kon Salmo 4:5 por yuda nos pa loke ta trata nos adorashon?

 ¹⁹ Pa mustra ku ta importante pa konfia den Dios, David a kanta: “Ofresé e sakrifisionan di hustisia, i konfia den SEÑOR.” (Sal. 4:5) E sakrifisionan ku e israelitanan a ofresé tabatin balor solamente si e pueblo tabatin e motivashon korekto. (Isa. 1:​11-17) Pa nos adorashon ta aseptabel den bista di Dios, nos tambe mester tin e motivashon korekto i nos mester tin pleno konfiansa den dje.​—Lesa Proverbionan 3:​5 i 6; Hebreonan 13:​15 i 16.

20. Kiko e ekspreshon ‘e lus di Yehova su semblante’ ta nifiká?

²⁰ David a sigui bisa: “Tin hopi ku ta puntra: ‘Ken lo mustra bondat na nos?’ Laga e lus di bo semblante resplandesé riba nos, o SEÑOR!” (Sal. 4:6) E ekspreshon ‘e lus di Yehova su semblante’ ta nifiká fabor divino. (Sal. 89:15) Pues ora David a pidi den orashon: “Laga e lus di bo semblante resplandesé riba nos,” e tabata ke men ‘mustra nos fabor.’ Debí ku nos ta konfia den Yehova, nos tin su fabor i un goso inmenso dor ku nos sa ku nos ta hasi su boluntat.

21. Di kiko nos por tin sigur si nos partisipá plenamente den e trabou di kosecha spiritual djawe?

²¹ Anhelando e goso ku Dios ta duna ku ta mas grandi ku esun durante temporada di kosecha, David a kanta na Yehova: “Bo a pone alegria den mi kurason, mas ku tempu nan maishi i biña nobo tabata produsí na abundansia.” (Sal. 4:7) Nos por tin sigur ku nos lo sinti goso di kurason si nos partisipá plenamente den e kosecha spiritual djawe, esta e trabou di prediká. (Luk. 10:2) Bou di direkshon di esnan ungí, nos ta alegrá awor ku e kantidat di ‘trahadó di kosecha’ ta sigui oumentá. Abo ta partisipá den e kosecha gososo akí ku ta duna berdadero satisfakshon?

Sigui Padilanti ku Pleno Konfiansa den Dios

22. Na armonia ku Salmo 4:8, kon a bai ku e israelitanan ora nan a kumpli ku e Lei di Dios?

²² David ta terminá e salmo akí ku e siguiente palabranan: “Na pas lo mi bai drumi i pega soño, pasobra ta abo so, o SEÑOR, ta hasi mi biba den siguridat.” (Sal. 4:8) Ora ku e israelitanan tabata kumpli ku e Lei di Yehova, nan tabata na pas kuné i tabata sinti nan sigur. Por ehèmpel, “Huda i Israel tabata biba den siguridat” durante e reinado di Salomon. (1 Rei. 4:25) Esnan ku a konfia den Dios tabatin pas asta ora e nashonnan bisiña tabata kontra nan. Meskos ku David, nos ta drumi trankil pasobra Dios ta pone nos sinti sigur.

23. Kiko nos lo eksperensiá si nos tin pleno konfiansa den Dios?

²³ Laga nos ta determiná pa sigui padilanti den Yehova su sirbishi. Laga nos hasi orashon tambe ku fe i asina eksperensiá “e pas di Dios, ku ta surpasá tur komprondementu.” (Fil. 4:​6, 7) Esta un goso esei lo duna nos! I nos siguramente lo por enfrentá futuro yen di speransa si nos mantené pleno konfiansa den Yehova.

Kon Lo Bo Kontestá?

• Ki problema David a haña pa motibu di Absalon?

• Kon Salmo 3 ta duna un sentido di siguridat?

• Den ki maneranan Salmo 4 por yuda nos haña mas konfiansa den Yehova?

• Kon nos ta benefisiá ora nos tin pleno konfiansa den Dios?

[Preguntanan di Estudio]

[Plachi na página 29]

Asta ora el a hui pa Absalon, David a konfia den Yehova

[Plachinan na página 31]

Abo ta mustra ku bo tin pleno konfiansa den Yehova?