“Lo tin temblornan grandi.”​—LUKAS 21:11.

● Winnie, un bebi di ún aña i mei di edat, ta ser reskatá for di e ruinanan na Haiti. Algun reportero di televishon ku tabata na e sitio di desaster a tend’é keña. E bebi ta sobrebibí e temblor, pero su mayornan sí ta muri.

KIKO ECHONAN TA MUSTRA? Na yanüari 2010, un temblor devastador ku un magnitut di 7,0 a sagudí Haiti. Komo konsekuensia di esei, mas ku 300.000 hende a muri. Fuera di esei, un kantidat adishonal di 1,3 mion hende a pèrdè nan kas den un fregá di wowo. Aunke e temblor na Haiti tabata bastante severo, e no tabata e úniko ku a asotá mundu. Entre aprel 2009 i aprel 2010 tabatin por lo ménos 18 temblor grandi rònt mundu.

KIKO TA UN OPHESHON KOMUN? E kantidat di temblor ku ta tumando lugá awe no ta mas ku ántes. Ta debí na teknologia moderno ku awe nos ta mas na haltura di e susesonan akí ku hende ku a biba na ántes.

E OPHESHON EI TIN BASE? Konsiderá e echo akí: Beibel no ta bisa kuantu temblor lo tuma lugá durante e último dianan. Mas bien, e ta bisa ku “temblornan grandi” lo sosodé “na vários lugá,” enfatisando asina ún di e aspektonan notabel di e periodo importante akí den historia.​—Marko 13:8; Lukas 21:11.

KIKO ABO TA PENSA? Nos no ta mira temblornan grandi sosodé manera Beibel a profetisá?

Ta bèrdat ku temblor so no ta duna prueba konvinsente ku nos ta bibando den e último dianan, sinembargo temblor ta djis ún di e profesianan ku ta kumpliendo. Konsiderá un di dos profesia.

[Komentario na página 4]

“Nos [komo geofísiko] ta konsiderá temblornan komo un suseso grandi. Tur otro hende ta konsiderá nan komo susesonan teribel.​—KEN HUDNUT, SERVISIO GEOLÓGIKO DI MERKA.

[Rekonosementu pa Potrèt na página 4]

© William Daniels/Panos Pictures