“Ta keda un sosiegu di sabat pa e pueblo di Dios.”​—HEB. 4:9.

1, 2. Kiko nos ta komprondé for di e palabranan na Génesis 2:3, i ki preguntanan nos lo kontestá?

E PROMÉ kapítulo di Génesis ta bisa ku Dios a usa seis dia pa prepará e tera pa hende por biba riba dje. Na final di kada dia, òf periodo largu di tempu, Beibel ta bisa ku “tabata atardi i tabata mainta.” (Gén. 1:​5, 8, 13, 19, 23, 31) Pero e di shete dia tabata diferente ya ku Génesis 2:3 no ta indiká ku e dia ei a terminá.

² Pues e echo ku Beibel no ta bisa ku “tabata atardi i tabata mainta” den versíkulo 3 ta yuda nos komprondé ku na momento ku Moisés a skirbi e buki di Génesis na aña 1513 promé ku nos era ainda tabata e di shete dia, esta Dios su dia di sosiegu. Ademas, Dios mes a bisa mas despues den su Palabra ku hende por drenta su sosiegu. P’esei e pregunta ta lanta, Dios ta sosegando ainda? I si ta asina, kon nos por drenta su dia di sosiegu? Ta masha importante pa nos haña kontesta pa e preguntanan akí.

Ainda Yehova Ta “Sosegá”?

3. Kon e palabranan di Hesus na Juan 5:​16 i 17 ta mustra ku te den su tempu ainda tabata e di shete dia?

³ Tin dos motibu pakiko nos por bisa ku durante e promé siglo di nos era ainda tabata e di shete dia. Nos por dedusí e promé motibu for di e palabranan ku Hesus a dirigí na su opositornan. Nan a kritiká Hesus pasobra el a kura hende riba sabat; nan a konsiderá esei komo trabou. Hesus a bisa nan: “Mi Tata ta traha te awor i mi tambe ta traha.” (Juan 5:​16, 17) Kiko Hesus tabata ke men? Ku otro palabra, loke e kier a bisa ta: ‘Ami i mi Tata ta hasi e mesun tipo di trabou. Siendo ku mi Tata mes ta traha ketu bai durante su sabat di míles di aña, mi tambe por traha riba sabat.’ For di e palabranan di Hesus nos ta komprondé ku tempu Hesus tabata na mundu, ainda tabata e di shete dia, es desir, e dia ku Dios a sosegá di tur su trabounan di kreashon riba tera. Pero, Dios a sigui traha pa kumpli ku su propósito pa hende i pa planeta Tera. *

4. En bista di loke Pablo a skirbi, dikon nos por bisa ku den su tempu ainda tabata e di shete dia?

⁴ Nos por dedusí e di dos motibu for di e palabranan di apòstel Pablo. Promé ku el a sita Génesis 2:2 ku ta papia tokante Dios su sosiegu, Pablo a skirbi bou di inspirashon: “Nos ku a kere ta drenta den e sosiegu [di Dios].” (Heb. 4:​3, 4, 6, 9) Pues e di shete dia a sigui kore te den tempu di Pablo. Pero pa kuantu tempu mas e dia di sosiegu ei lo a sigui?

5. Kiko tabata e propósito di e di shete dia, i na ki tempu Dios lo kaba di kumpli ku e propósito ei?

⁵ Pa nos por kontestá e pregunta ei, nos mester sa kiko ta e propósito di e di shete dia. Génesis 2:3 ta splika kiko esei ta: “Dios a bendishoná e di shete dia i a santifik’é.” Yehova a hasi e dia ei un dia ‘santu,’ òf sagrado, pasobra esei ta e dia ku el a skohe pa kaba di kumpli ku su propósito pa e tera. I kiko ta su propósito? Pa hende obediente biba riba tera i kuida e planeta i tur loke tin riba dje. (Gén. 1:28) I pa kumpli ku e propósito akí, Yehova Dios i Hesukristu, e “Señor di sabat,” “ta traha te awor.” (Mat. 12:8) Pues, Dios su dia di  sosiegu lo sigui te ora ku su propósito pa e tera kumpli. Esaki lo ta na fin di Kristu Su Reinado di Mil Aña.

No Kai den “e Mesun Ehèmpel di Desobedensia”

6. Ki ehèmpelnan por sirbi komo un spièrtamentu pa nos, i ki lès nos por siña for di esakinan?

⁶ Dios a splika Adam ku Eva bon kla kiko tabata su propósito pa e tera, pero tòg nan a bai kontra su propósito. Ma no ta nan so a desobedesé Dios. Despues di nan, miónes di hende mas a kometé e mesun eror. Asta e israelitanan, ku tabata e pueblo di Dios, a desobedesé Dios bes tras bes. Pablo a indiká ku kristiannan tambe por bira desobediente manera e israelitanan. P’esei el a spièrta: “Laga nos ta diligente pa drenta den e sosiegu ei, pa ningun hende no kai dor di sigui e mesun ehèmpel di desobedensia.” (Heb. 4:11) Ku e palabranan akí, Pablo a mustra bon kla ku hende desobediente no por drenta e sosiegu di Dios. Kiko esei ta nifiká pa nos? Kiko lo pasa ku nos si di un òf otro manera nos bai kontra e propósito di Dios? Nos lo no drenta su sosiegu? Ta masha importante pa sa e kontesta pa e preguntanan akí, i p’esei mes nos lo trata nan den e artíkulo akí. Pero promé, laga nos ban wak ki mal ehèmpel e israelitanan a pone i dikon nan no a drenta e sosiegu di Dios.

“Nan Lo No Drenta den Mi Sosiegu”

7. Kiko tabata Yehova su propósito pa e israelitanan ora el a libra nan for di Egipto, i kiko nan tabatin ku hasi?

⁷ Na aña 1513 promé ku nos era, Yehova a bisa su sirbidó Moisés kiko tabata su propósito pa e israelitanan. Dios a bisa: “Mi a baha bin pa libra nan for di man di e egipsionan i pa saka nan for di e tera ei [Egipto] hiba na un tera bon i grandi, na un tera ku tin lechi i miel na abundansia.” (Eks. 3:8) Sí, Yehova a libra e israelitanan for di Egipto ku e propósito pa hasi nan su pueblo manera el a primintí Abraham. (Gén. 22:17) I Dios a duna e israelitanan leinan pa yuda nan mantené un bon relashon kuné. (Isa. 48:​17, 18) El a bisa nan: “Si di bèrdat boso ke obedesé mi bos i warda mi aliansa [manera ta stipulá den e kódigo di Lei], e ora ei boso lo ta un tesoro pekuliar riba tur pueblo, pasobra henter tera ta di mi.” (Eks. 19:​5, 6) Pues, e israelitanan por a sigui disfrutá di e privilegio di ta e pueblo di Dios solamente si nan a obedesé su leinan.

8. Kon bida lo tabata pa e israelitanan si nan a obedesé Dios?

⁸ Imaginá bo kon bida lo tabata pa e israelitanan si nan a obedesé Dios! Yehova lo a bendishoná nan kunukunan, nan hòfinan di wendrùif i nan tounan di bestia. Ademas, Yehova lo a protehá nan kontra nan enemigunan. Nan lo a disfrutá di pas i prosperidat, manera Yehova a primintí nan. (Lesa 1 Reinan 10:​23-27.) Es mas, Yehova lo no a permití otro nashon goberná riba nan; lo e no a permití ni e romanonan ku a goberná riba hopi nashon den tempu di Hesus dominá nan. E nashon di Israel lo por tabata un bon ehèmpel pa e otro nashonnan. Tur hende lo por a mira bon kla ku e Dios berdadero ta bendishoná esnan ku ta obedes’é.

9, 10. (a) Dikon e israelitanan a kometé un eror grave ora nan a deseá di bolbe Egipto? (b) Dikon e israelitanan lo no por a adorá Yehova manera e tabata ke si nan a bolbe Egipto?

⁹ E israelitanan por a kooperá ku Yehova, trahando na armonia ku su propósito. Esei lo a resultá den hopi bendishon, no solamente pa nan mes, sino pa henter e tera. Ki un gran privilegio nan tabatin! (Gén. 22:18) Pero, mayoria di e israelitanan no a balorá e privilegio di ta Dios su pueblo i di por ta un ehèmpel pa e otro nashonnan. Figurá bo, asta nan kier a bai Egipto bèk! (Lesa Numbernan 14:​2-4.) Pero si nan a bai bèk, nan lo no por a adorá Yehova manera e tabata ke ni bira un ehèmpel pa otro nashon. Nan lo a  bolbe bira esklabo na Egipto i nan lo no tabata liber pa obedesé e Lei di Dios i risibí pordon di piká. Ki egoista e israelitanan tabata! Nan tabata pensa riba nan so i no riba Yehova i su propósito. P’e motibu ei Yehova a bisa: “Mi tabata rabiá ku e generashon akí, i a bisa: ‘Semper nan ta desviá den nan kurason; i nan no tabata konosé mi kamindanan’; manera mi a hura den mi furia, ‘Nan lo no drenta den mi sosiegu.’”​—Heb. 3:​10, 11; Sal. 95:​10, 11.

¹⁰ E echo ku e israelitanan kier a bolbe Egipto a mustra ku nan no a balorá e bendishonnan ku nan a risibí di Yehova. E israelitanan desobediente ei a preferá e bon kuminda, e prei, e siboyo i e konofló ku nan a haña na Egipto. (Num. 11:5) Den un sentido nan tabata meskos ku Esau, kende no a balorá su derecho di primogénito i a bend’é pa un plato di kuminda.​—Gén. 25:​30-32; Heb. 12:16.

11. Yehova a keda sin kumpli ku su propósito pa motibu ku e israelitanan no a mustra fe den dje?

¹¹ Maske e israelitanan ku a bandoná Egipto no a mustra fe den Yehova, tòg el a sigui “traha” pa kumpli ku e propósito ku e tabatin na mente pa Israel. Pero awor Yehova a disidí di dirigí su atenshon riba e siguiente generashon: e yunan di e israelitanan; nan tabata mas obediente ku nan mayornan. Nan sí a obedesé e mandato di Yehova pa drenta e Tera Primintí i pa konkist’é. Na Josué 24:31, nos ta lesa: “Israel a sirbi SEÑOR tur e dianan di Josué i tur e dianan di e ansianonan, kendenan a biba mas ku Josué, i kendenan tabata konosé tur e echonan di SEÑOR ku el a hasi pa Israel.”

12. Kon nos sa ku kristiannan djawe tin e posibilidat di drenta e sosiegu di Dios?

¹² Ku tempu, e israelitanan obediente ei a muri. E generashon nobo ku a bini despues “no tabata konosé SEÑOR, ni e obra ku el a hasi pa Israel.” Nan a kuminsá “hasi maldat den bista di SEÑOR” i a sirbi diosnan falsu. (Hues. 2:10, 11) I debí na nan desobedensia, e israelitanan akí no tabata na pas mas ku Dios. P’esei e Tera Primintí no a resultá di ta un “lugá di sosiegu” pa nan. Relashoná ku e israelitanan akí, Pablo a skirbi: “Si Josué a [“hiba nan na un lugá di,” NW] sosiegu, [Dios] lo no a papia di un otro dia despues di esei. P’esei anto, ta keda un sosiegu di sabat pa e pueblo di Dios.” (Heb. 4:​8, 9) Ora Pablo a papia di “e pueblo di Dios,” e tabata referí na tur kristian, sea ku nan tabata hudiu òf nò. Pues for di loke Pablo a bisa, nos por konkluí ku kristiannan djawe tambe tin e posibilidat di drenta e sosiegu di Dios.

Algun Kristian No A Drenta e Sosiegu di Dios

13, 14. Kiko (a) e israelitanan den tempu di Moisés i (b) e kristiannan den tempu di Pablo mester a hasi pa nan por a drenta e sosiegu di Dios?

¹³ Pablo a skirbi e kristiannan hudiu pasobra  algun di nan tabata bai kontra Dios su propósito. (Lesa Hebreonan 4:1.) Den ki sentido? Wèl, nan a sigui kumpli ku algun Lei di Moisés. Ta pa mas o ménos 1.500 aña e pueblo di Dios mester a obedesé e Lei di Moisés pa agradá Dios. Pero despues ku Hesus a muri, nan no tabatin ku sigui e Lei di Moisés mas. Algun kristian no a komprondé esei, i p’esei nan a sigui kumpli ku sierto aspekto di e Lei. *

¹⁴ Pablo a splika e kristiannan ku tabata insistí pa sigui e Lei di Moisés ku Hesus su posishon komo sumo saserdote ta superior na esun di kualke sumo saserdote imperfekto, ku e pakto nobo ta mihó ku e pakto ku Dios a sera ku Israel i ku Yehova su gran tèmpel ta “mas grandi i mas perfekto” ku e tèmpel “trahá ku man.” (Heb. 7:​26-28; 8:​7-10; 9:​11, 12) Probablemente Pablo a usa e lei di sabat komo ehèmpel pa splika kon kristiannan por drenta Yehova su dia di sosiegu. El a skirbi: “Ta keda un sosiegu di sabat pa e pueblo di Dios. Pasobra esun ku a drenta den su sosiegu, e mes tambe a sosegá di su trabounan, manera Dios a sosegá di esnan di dje.” (Heb. 4:​8-10) E kristiannan hudiu mester a komprondé ku pa nan por a haña aprobashon di Dios nan no mester a sigui hasi “trabou,” òf obranan di fe ku Lei a eksigí, es desir obedesé e Lei di Moisés. Desde Pentekòste di aña 33 di nos era, Yehova ta aprobá di esnan ku ta pone fe den Hesukristu.

15. Dikon obedensia ta masha importante pa nos por drenta e sosiegu di Dios?

¹⁵ Dikon e israelitanan den tempu di Moisés no por a drenta e Tera Primintí? Nan no a drenta pa motibu di nan desobedensia. Dikon algun kristian den tempu di Pablo no por a drenta e sosiegu di Dios? Pa e mesun motibu: desobedensia. Nan no kier a aseptá ku e Lei di Moisés a logra su propósito i ku desde e tempu ei padilanti Yehova tabata ke pa su pueblo ador’é di un otro manera.

 Kon Nos Por Drenta e Sosiegu di Dios Awe?

16, 17. (a) Kon kristiannan por drenta e sosiegu di Dios awe? (b) Kiko nos lo trata den e siguiente artíkulo?

¹⁶ Ningun di nos no ta kere ku kristiannan mester obedesé e Lei di Moisés pa haña salbashon. E palabranan ku Pablo a dirigí na e kongregashon di Efeso ta masha kla: “Pa medio di grasia boso a wòrdu salbá dor di fe, i esei no di boso mes; e ta e don di Dios; no komo resultado di obranan, pa ni un hende no gaba.” (Efe. 2:​8, 9) Pues kon kristiannan por drenta e sosiegu di Dios awe? Kòrda ku Yehova a skohe su dia di sosiegu pa e kaba di kumpli ku su propósito pa planeta Tera i hende obediente. I Yehova ta usa su organisashon pa revelá su propósito na nos i tambe kiko e ta spera di nos. Nos por drenta e sosiegu di Dios solamente si nos ta obedes’é i ta sigui e guia di su organisashon.

¹⁷ Pero si nos no ta obedesé e esklabo fiel i prudente òf ta obedesé solamente loke nos ta haña ta importante, nos ta bai kontra e propósito di Yehova. I si nos ta hasi esei, nos no por ta Yehova su amigu. E siguiente artíkulo lo trata algun situashon den kua nos tin e oportunidat di demostrá ku nos ta obediente. E desishonnan ku nos ta tuma den situashonnan asina lo duna prueba si di bèrdat nos a drenta e sosiegu di Dios.

[Nota]

Preguntanan pa Meditashon

• Kiko tabata e propósito di e di shete dia?

• Kon nos sa ku ainda nos ta den e di shete dia?

• Dikon e israelitanan den tempu di Moisés i algun kristian den tempu di Pablo no a drenta e sosiegu di Dios?

• Kon nos por drenta e sosiegu di Dios awe?

[Preguntanan di Estudio]

[Komentario na página 27]

Nos por drenta e sosiegu di Dios solamente si nos ta obedes’é i ta sigui e guia di su organisashon

[Plachinan na página 26, 27]

Kiko ta nesesario te awe pa e pueblo di Dios drenta su sosiegu?