POBRESA ekstremo ta pone bida di hende na peliger. Un hende den un situashon asina no tin sufisiente kuminda, awa, kombustibel ni tampoko un bon kuido médiko, edukashon i bibienda. Ta kalkulá ku mil mion hende ta biba den pobresa i e kantidat akí ta kasi igual ku henter e poblashon di Afrika. Sinembargo, mayoria di hende na lugánan manera Wèst Europa i Norteamérika no sa kon hende den pobresa ekstremo ta biba. Pues, dikon no ban wak kon algun di nan ta biba?

Mbarushimana ta biba na Ruanda, Afrika, huntu ku su esposa i nan yunan. Un di nan seis yunan a muri di malaria. E ta konta: “Mi tata mester a parti su tereno den seis pida. Mi pida tabata asina chikitu ku nos mester a muda bai un pueblo. Ami ku mi kasá ta karga saku di piedra i santu pa nos por gana nos pan. Nos kas no tin bentana i ta for di e pos na e warda di polis nos ta saka awa. Normalmente nos ta kome ún biaha pa dia, pero dia ku no tin trabou nos no tin kuminda. Riba un dia asina mi no ta keda kas, pasobra mi kurason ta kibra ora mi tende mi yunan yora pa kuminda.”

Victor ku Carmen tur dos ta sapaté. Nan ta biba den un pueblo isolá na Bolivia ku nan sinku yunan. E kas di klei kaminda nan ta hür un kamber ta kasi kai den otro, e no tin koriente i su dak di zink ta lèk. E skol ku Victor su yu muhé ta bai tin mas mucha ku e tin banki di skol i p’esei Victor mes mester a traha un banki pa su yu. Victor ku Carmen mester kana dies kilometer pa kap palu pa nan por kushiná i herebé awa pa bebe. Carmen ta bisa: “Nos no tin w.c., pues no ta keda nos nada otro sino di baha bai riu. Den e mesun riu ei nos ta baña i tira sushi afó. Tur ora e muchanan ta bira malu.”

Francisco ku Ilídia ta biba den kunuku na Mozambique. Nan tabatin sinku yu pero ún a muri di malaria debí ku hospital a nenga di tum’é pa tratamentu. Riba nan tereno chikitu nan ta planta sufisiente aros i batata dushi ku ta produsí kuminda pa tres luna. Francisco ta bisa: “Tin biaha awa no ta kai òf ladron ta hòrta loke nos a planta. P’esei, pa traha un poko sèn mi ta  kòrta i bende lata di bambu pa usa den konstrukshon. Tambe nos ta kana dos ora pa bai piki palu den mondi. Nos kada un ta bini ku un karga, ún pa por kushiná henter siman i ún pa bende.”

Hopi hende ta haña ku ta inhustu i kruel ku 1 di kada 7 hende ta biba manera Mbarushimana, Victor i Francisco, miéntras míles di miónes di hende ta gosa di un prosperidat manera nunka promé. Algun hende a purba kambia e situashon akí. E siguiente artíkulo lo trata nan esfuerso i speransa.

 [Plachi na página 2, 3]

Carmen ta saka awa for di riu huntu ku dos di su yunan