“Nos tin sufisiente kreensia religioso pa pone nos odia otro, pero no sufisiente pa pone nos stima otro.”​—JONATHAN SWIFT, OUTOR INGLES.

AUNKE Swift a ekspresá e palabranan akí den siglo 18, awe hopi hende ta di mesun opinion. Algun hende asta ta pensa ku mayornan no mester tin derecho di siña nan yunan tokante Dios. Segun nan, mucha ku lanta den un famia religioso di un òf otro manera lo sali perhudiká.

Kiko bo ta pensa? Kua di e siguiente deklarashonnan ta mas rasonabel?

● No mester permití mayornan siña nan yunan tokante Dios.

● Mayornan mester warda te ora yunan bira grandi promé ku nan papia ku nan tokante asuntu religioso.

● Miéntras ku yunan ta chikitu ainda, mayornan mester siña e yunan nan kreensia religioso. Pero, ora nan bira grandi, mayornan mester animá nan pa analisá e asuntu akí pa nan mes.

● Yunan mester adoptá e kreensia religioso di nan mayornan sin importá si esakinan ta bon òf malu.

Religion Ta Perhudiká Mucha?

Hende ku ta bisa ku mucha no mester siña tokante Dios ta pretendé ku esaki ta perhudiká mucha. Pero esei ta bèrdat? Pasobra, un mayor ku ta stima su yu lo no ke perhudik’é. Wèl, pa dékadanan investigadónan a bin ta hasi estudio intensivo pa wak ki efekto kreensia religioso di mayornan tin riba nan yunan. Ku ki resultado?

E estudio akí a komprobá ku religion no tin un mal influensia riba mucha; mas bien, e por tin un bon efekto riba nan desaroyo. Na 2008 e revista Social Science Research * a publiká e siguiente informashon: “Ta parse ku religion ta fortalesé e laso ku mester tin entre mayor i yu, i esei ta konta tantu pa e tata komo e mama.” E ta sigui bisa: “Aparentemente, religion i spiritualidat tin un lugá importante den bida di hopi mucha i ta vital pa e relashon entre e miembronan di famia.” Tuma nota ku esaki ta kuadra ku loke Hesukristu a bisa: “Felis [ta] esnan ku ta rekonosé ku nan tin mester di Dios.”​—Mateo 5:3, BPK.

Kiko di e ponensia ku mester warda yunan bira grandi promé ku kuminsá papia ku nan tokante Dios i religion? E punto di bista ei ta pasa por haltu di e realidat akí: Mente di mucha ta manera un hèmber bashí kla pa ser yená. Pues, mayornan tin ku disidí: sea nan ta yena e mucha su mente na kas ku prinsipionan moral i kreensianan ku nan ta haña apropiá òf nan ta laga e mundu pafó yena e mente i kurason di e mucha ku un avalancha di idea.

Kon Por Logr’é?

Historia a demostrá ku religion tin e potensial di fomentá prehuisio i odio. Awor kon mayornan por evitá ku loke Jonathan Swift a bisa ta kumpli riba nan yunan? Kon nan por siña nan yunan kreensianan ku ta laga nan stima otro hende?

Pa logra esaki ta importante pa haña kontesta pa e tres preguntanan akí: (1) Kiko nan mester siña? (2) Ken mester siña nan? (3) Ki método di siñansa ta duna mihó resultado?

[Nota]