PROBABLEMENTE nunka bo a yega di topa ku un lider di krímen organisá. Pero esei ke men ku nan no ta eksistí? Lidernan di krímen organisá ta eksperto den skonde nan identidat i asta por dirigí otro kriminalnan aunke nan mes ta den prizòn. No opstante, loke nos ta lesa den korant tokante por ehèmpel droga, negoshi di prostitushon i trafikashon di hende ta hasi nos konsiente di e influensia korupto i e konsekuensianan horibel di e aktividatnan di lidernan kriminal. Sí, e daño ku e personanan akí ta kousa komunidat ta prueba ku nan ta eksistí.

Dios su Palabra, Beibel, ta revelá ku Satanas ta un persona real i ku, meskos ku un lider kriminal poderoso, e ta rekurí na ‘señal engañoso,’ “inhustisia i tur sorto di engaño” pa hasi sigur ku su boluntat lo sosodé. De echo, Beibel ta bisa ku e “ta sigui disfrasá su mes na un angel di lus.” (2 Tesalonisensenan 2:9, 10; 2 Korintionan 11:14) Pues, meskos ku den kaso di un lider kriminal, e daño ku Diabel ta kousa humanidat ta prueba ku e ta eksistí. Tòg, mayoria di hende tin problema pa kere den un spiritu malbado. P’esei, promé ku nos analisá mas djaserka kiko Beibel ta bisa tokante Diabel, laga nos papia tokante algun opstákulo komun i kreensia eróneo ku ta stroba hende di aseptá ku Diabel ta un persona real.

▪ “Kon un Dios amoroso por a krea Diabel?” Siendo ku Beibel ta bisa ku Dios ta bon i perfekto, ta parse kontradiktorio pa pensa ku lo el a krea un persona malisioso i malbado. Pero Beibel no ta bisa ku Dios a krea un persona asina. Al kontrario, e ta bisa di Dios: “E Baranka! Su obra ta perfekto, pasobra tur su kamindanan ta hustu; un Dios di fieldat i sin inhustisia, hustu i rekto e ta.”—Deuteronomio 32:4; Salmo 5:4.

Awor, un persona ku Dios a krea perfekto por hasi malu? Wèl, Dios no a krea robòt; mas bien, el a krea su kriaturanan ku boluntat liber—esta, ku e kapasidat di tuma nan mes desishonnan. Pues, un persona perfekto i inteligente por skohe pa hasi bon òf malu. En realidat, ta pasobra kriaturanan inteligente—sea ku ta hende òf spiritu—tin boluntat liber, nos por papia di moral.

P’esei Dios lo no prevení su kriaturanan di hasi malu si nan a skohe pa hasi esei, pasobra ta e mes a duna nan libertat di skohe. I Hesus a mustra ku e kriaturanan akí por hasi mal uso di nan libertat ora el a bisa ku Diabel “no a keda firme den e bèrdat.” (Huan 8:44) Loke Hesus a bisa ta indiká klaramente ku, na prinsipio, e kriatura ku a bira Diabel tabata un angel perfekto, kende un tempu tabata “firme den e bèrdat.” * Sí, Yehova Dios a krea tur su kriaturanan ku boluntat liber pasobra e ta stima i konfia nan.—Wak e kuadro  “Un Persona Perfekto Por Bira Imperfekto?” na página 6.

 ▪ “Diabel ta un sirbidó di Dios” Segun algun hende, Beibel ta siña esaki den e buki di Yòb. Di akuerdo ku un komentarista di Beibel, e ekspreshon bíbliko ku Diabel tabata “bai-bin riba tera” ta referí na loke spionnan di antiguo Persia tabata hasi; nan tabata biaha bai i bin informá nan rei di sierto asuntunan. (Yòb 1:7) Pero si di bèrdat Diabel tabata un spion di Dios, dikon e mester a bisa Dios ku e tabata “bai-bin riba tera”? Pues, e relato den e buki di Yòb no ta deskribí Diabel komo un aliado di Dios. Al kontrario, e ta yama Diabel Satanas, ku ta nifiká “Resistidó,” indikando asina ku e ta e Atversario prinsipal di Dios. (Yòb 1:6) Di unda anto hende a haña e idea ku Diabel ta den servisio di Dios?

For di komienso di promé siglo, bukinan hudiu apókrifo a deskribí Diabel ta negoshá ku Dios i a la bes ta hasi e boluntat di Dios. E historiadó J. B. Russell a skirbi, den su buki Mephistopheles, ku Martin Luther, un protestant reformá, tabata konsiderá Diabel komo un instrumento di Dios, manera “un skèr di kòrta mata òf chapi ku [Dios] ta usa pa kultivá su hòfi.” Segun Russell, “e idea di esaki ta ku aunke e chapi tin plaser den destruí e mal yerbanan,” e ta den man di Dios i no por hasi  nada ku no ta Dios su boluntat. E siñansa akí di Luther—ku e teólogo franses John Calvin a aseptá despues—a ofendé hopi kreyente. Kon un Dios di amor por permití maldat i asta ta kousa maldat? (Santiago 1:13) E doktrina akí i tur e kosnan horibel ku a sosodé den siglo 20 ta pone ku hopi hende no ta kere den Dios ni den Diabel.

▪ “Diabel ta djis un konsepto di maldat” Si Diabel ta djis un konsepto di maldat, anto algun pasashi di Beibel lo ta práktikamente inkomprendibel. Por ehèmpel, ta ku ken Dios tabata papia na Yòb 2:3-6? E por tabata papia ku un konsepto apstrakto di maldat ku a eksistí den Yòb, òf kisas e tabata papia ku su mes? Es mas, ta lógiko ku di un banda Dios ta elogiá Yòb pa su bon kualidatnan i despues e mes ta laga un konsepto di maldat pone Yòb na prueba? Si Dios en bèrdat ta manera algun hende ta pensa, lo e no por ta un Dios den kende “no tin inhustisia,” sino un Ser pèrvèrso. (Salmo 92:15) Pero Beibel ta bisa nèt lo kontrario; Dios a nenga di ‘saka su man’ pa lástima Yòb. Ta klaru anto ku Diabel no ta un konsepto di maldat ni un parti skur di Dios su personalidat; mas bien, e ta un persona invisibel ku a hasi su mes Atversario di Dios.

Ken Realmente Ta Goberná Mundu?

Awe, pa hopi hende, kerementu den Diabel ta algu ouderwets. Sinembargo, fuera di e eksistensia di Diabel no tin ningun otro splikashon satisfaktorio pa e maldat ku ta eksistí. De echo, e intento ku hende a hasi pa nenga e eksistensia di Diabel a pone ku hopi hende a rechasá Dios i tur su prinsipionan moral.

E poeta Charles-Pierre Baudelaire di siglo 19 a skirbi: “E mihó triki di Diabel ta pa konvensé nos ku e no ta eksistí.” Debí ku Diabel ta skonde su identidat, el a lanta duda enkuanto e eksistensia di Dios. Si Diabel no ta eksistí, outomátikamente Dios lo bira esun responsabel pa tur maldat, no ta bèrdat? I no ta esei ta loke Diabel ke pa hende kere?

Meskos ku un lider kriminal, Diabel ta skonde su identidat pa e logra su meta. Kiko ta su meta? Beibel ta bisa ku “e dios di e mundu akí a siega mente di esnan ku no ta kreyente, pa lus di e glorioso bon notisia tokante Kristu, kende ta e imágen di Dios, no bria riba nan.”—2 Korintionan 4:4.

Awor tin un otro pregunta masha importante: Kiko Dios lo hasi ku e kriminal astuto akí, kende ta tras di tur maldat i sufrimentu? E siguiente artíkulo lo kontestá esei.

[Nota]

[Komentario di e plachi na página 5]

Diabel ta un sirbidó di Dios òf su resistidó?

[Kuadro/​Plachi na página 6]

 Un Persona Perfekto Por Bira Imperfekto?

Maske Dios a krea su kriaturanan inteligente komo personanan perfekto, e no a duna nan libertat apsoluto. Adam mester a respetá e limitashonnan físiko ku su Kreador a pone p’e. Por ehèmpel, Adam no por a kome tera, piedra òf palu sin sufri konsekuensia. I si el a ignorá e lei di gravedat i bula for di un baranka haltu, lo el a muri òf keda gravemente heridá.

Di mes manera, ningun kriatura perfekto—sea hende òf angel—no por pasa por haltu di Dios su leinan moral sin sufri konsekuensia. P’esei anto, si un kriatura inteligente hasi mal uso di su boluntat liber, fásilmente e ta kometé eror i kai den piká.—Génesis 1:29; Mateo 4:4.