▪ Kiko ta bini na mente di hopi hende ora nan tende e palabra “Armagedon”? Nan ta pensa riba destrukshon masal, guera nuklear, desaster natural òf asta riba un desaster ekológiko kousá pa keintamentu di planeta Tera. Pero Beibel no ta usa e palabra akí pa referí na ningun di e susesonan ei. Kiko Beibel ke men anto ku e palabra “Armagedon”?

E palabra “Armagedon” ta aparesé den e buki di Beibel Revelashon. E ta referí na un guera úniko: “E guera ku lo tuma lugá riba e gran dia di Dios, e Todopoderoso.” I “e reinan di henter e tera habitá” lo ser mobilisá pa bringa e bataya final akí kontra Dios. Vários otro versíkulo di Beibel ta referí na e guera ei.—Revelashon 16:14-16; Ezekiel 38:22, 23; Yoël 3:12-14; Lukas 21:34, 35; 2 Pedro 3:11, 12.

Ken ta partisipá den e guera akí, i kiko lo ta e resultado? Usando idioma simbóliko, e buki di Revelashon ta bisa nos: ‘E reinan di tera i nan ehérsitonan a bini huntu pa bringa kontra esun sintá riba e kabai i kontra su ehérsito.’ “Esun sintá riba e kabai” ta e Yu di Dios, Hesukristu, kende Dios a nombra pa guia e ehérsitonan di angel guerero i asina logra viktoria riba enemigunan di Dios. (Revelashon 19:11-16, 19-21) Yeremías 25:33 ta revelá kuantu hende malbado lo ser destruí, bisando: “Esnan ku SEÑOR mata riba e dia ei lo keda bentá tur kaminda, for di esun ekstremo di mundu te na e otro.”

Dikon Armagedon ta nesesario? Pasobra e nashonnan ta nenga di rekonosé Dios komo e Soberano; mas bien, nan ta propagá nan propio soberania. (Salmo 24:1) Salmo 2:2 ta deskribí kon nan ta desafiá Yehova; e ta bisa: “E reinan di mundu ta tuma nan posishon, i e gobernantenan ta konsultá huntu kontra SEÑOR i kontra su ungí.”

Bon mirá, e rebeldenan akí ta meskos ku hende kabesura ku ta poderá di propiedat ku no ta pertenesé na nan i ta mal usá i ruiná esakinan. Sí, nashonnan awe ta ruiná tera i ta kontaminá su medio ambiente. E Palabra di Dios a profetisá no solamente di e polushon akí sino tambe di tur daño ku gobernashon humano ta kousa na humanidat i nos planeta, bisando: “E nashonnan a bira furioso, i [Dios su] propio rabia a bini riba nan.” Pues, Dios lo “kaba ku esnan ku ta kaba ku e tera.” (Revelashon 11:18) I el a disidí ku Armagedon ta e medio ku lo e usa pa resolvé e kuestion tokante ken tin derecho di goberná humanidat.—Salmo 83:18.

Awor, na ki tempu Armagedon lo tuma lugá? E Yu di Dios a bisa bon kla: “Pa loke ta e dia i ora ei, ningun hende no sa, ni e angelnan di shelu ni e Yu, sino e Tata so.” (Mateo 24:36) Tòg, papiando di Armagedon, e Rei Guerero Hesukristu a duna e spièrtamentu akí: “Tende! Mi ta bini manera un ladron. Felis ta esun ku keda lantá.” (Revelashon 16:15) Pues, e guera mundial akí lo tuma lugá durante e presensia di Kristu. I segun profesianan di Beibel, Kristu su presensia a kuminsá kaba.

Durante Armagedon, e malbadonan ku no ke arepentí lo ser destruí. Pero lo tin “un multitut grandi” di hende ku lo sobrebibí. (Revelashon 7:9-14) Nan lo mira kumplimentu di e siguiente palabranan: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.”—Salmo 37:10, 11.

[Komentario na página 32]

“E humildenan lo heredá e tera, i lo deleitá nan mes den pas abundante”