E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Dios ta skucha tur orashon?

Yehova ta invitá hende di tur nashon pa hala serka dje den orashon. (Salmo 65:2) Pero e no ta skucha tur orashon. Por ehèmpel, ora e israelitanan a persistí den hasi maldat, Dios a nenga di skucha nan orashonnan. (Isaías 1:15) I e orashonnan di un hòmber ku ta maltratá su kasá tambe por ser strobá. (1 Pedro 3:7) Sinembargo, Dios lo skucha orashon di asta hende ku a kometé pikánan grandi, basta nan arepentí.—Lesa 2 Krónikanan 33:9-13.

2. Kon nos mester hasi orashon?

Orashon ta un privilegio i parti di nos adorashon; pues, nos mester hasi orashon na Yehova so. (Mateo 4:10; 6:9) Komo ku nos ta imperfekto i nos no por “yega serka e Tata” riba nos mes, nos tin ku hasi orashon den nòmber di Hesus, ya ku e ta e “kaminda” apuntá pa esei. (Huan 14:6) Yehova no ke pa nos ripití orashonnan ku nos a siña for di kabes òf orashonnan skirbí; mas bien, nos mester resa di kurason.—Lesa Mateo 6:7; Filipensenan 4:6 i 7.

Nos Kreador por asta skucha orashon hasí den silensio. (1 Samuel 1:12, 13) E ta invitá nos pa hasi orashon tur ora bai, por ehèmpel, na komienso i na final di dia, na ora di kome i ora nos ta konfrontá problema.—Lesa Salmo 55:22; Mateo 15:36.

3. Dikon kristiannan ta reuní huntu?

Hala serka Dios no ta fásil pasobra nos ta biba meimei di hende ku no tin fe den Dios i ku ta hasi bofon di su promesa di trese pas riba tera. (2 Timoteo 3:1, 4; 2 Pedro 3:3, 13) P’esei nos tin ku asosiá ku nos kompañeronan di kreensia pa nos animá otro.—Lesa Hebreonan 10:24 i 25.

Bo por hala serka Dios si bo sera amistat ku hende ku ta stima Dios. E reunionnan di Testigunan di Yehova ta duna bo oportunidat di benefisiá di e fe di otro hende.—Lesa Romanonan 1:11 i 12.

 4. Kon meditashon por yuda bo hala serka Dios?

Bo por hala serka Yehova dor di meditá riba loke bo a siña for di su Palabra. Reflekshoná riba Yehova su aktividatnan, su instrukshonnan i su promesanan. Meditashon kompañá pa orashon ta stimulá berdadero apresio pa e amor i sabiduria di Dios.—Lesa Hosue 1:8; Salmo 1:1-3.

Bo por tin un amistat será ku Dios solamente si bo ta konfi’é, si bo tin fe den dje. Pero fe ta manera algu ku bo mester tene na bida. Bo mester alimentá bo fe konstantemente i bo por hasi esaki ora bo ta repasá e base di bo kreensianan.—Lesa 1 Tesalonisensenan 5:21; Hebreonan 11:1 i 6.

5. Kon lo bo benefisiá si bo hala serka Dios?

Yehova ta kuida hende ku ta stim’é. E ta protehá nan for di tur loke por perhudiká nan fe i nan speransa di bida eterno. (Salmo 91:1, 2, 7-10) E ta spièrta nos pa e estilonan di bida ku ta forma un peliger pa nos salú i felisidat. Yehova ta siña nos e mihó manera di biba.—Lesa Salmo 73:27 i 28; Santiago 4:4 i 8.

Pa mas informashon, wak kapítulo 17 di e buki akí, publiká pa Testigunan di Yehova.