“Konsolá Tur Esnan Ku Ta Yora”
“SEÑOR a ungi mi . . . pa konsolá tur esnan ku ta yora.”—ISA. 61:1, 2.
1. Kiko Hesus a hasi pa esnan ku tabata yora, i dikon?
HESUKRISTU a bisa: “Mi kuminda ta pa hasi e boluntat di esun ku a manda mi i kaba e trabou ku el a duna mi pa hasi.” (Huan 4:34) Segun ku Hesus tabata kumpli ku e asignashon ku Dios a dun’é, el a reflehá e kualidatnan magnífiko di su Tata. Un di nan ta e gran amor ku Yehova tin pa hende. (1 Huan 4:7-10) Apòstel Pablo a menshoná un manera ku Yehova ta demostrá e amor ei ora el a deskribí Yehova komo e “Dios di tur konsuelo.” (2 Kor. 1:3) Hesus a demostrá e mesun amor ei ora el a hasi loke Isaías a profetisá. (Lesa Isaías 61:1 i 2.) Hesus a lesa for di e profesia ei den e snoa na Názarèt i a apliká e palabranan na su mes. (Luk. 4:16-21) Durante Hesus su sirbishi, el a konsolá esnan ku tabata yora, òf sinti nan tristu, i a duna nan animashon i pas mental.
2, 3. Dikon siguidónan di Kristu tin ku konsolá hende?
2 Tur siguidó di Hesus tin ku imit’é i konsolá hende ku ta yora. (1 Kor. 11:1) Pablo a bisa: “Sigui animá [òf, “konsolá,”] otro i fortalesé otro.” (1 Tes. 5:11; nota) Foral awor ku humanidat ta konfrontá “tempunan krítiko, difísil pa trata kuné,” nos tin ku konsolá otro hende. (2 Tim. 3:1) Mas i mas, personanan di kurason sinsero na tur parti di mundu ta haña nan konfrontá ku algun hende kende nan palabra- òf akshonnan ta kousa sufrimentu i tristesa.
3 Manera profesia bíbliko a bisa di antemano, den e último dianan di e era akí hopi “hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios.” Awe e tipo di aktitutnan ei ta pió ku nunka, pasobra ‘hende malbado i gañadónan a bai di malu pa pió.’—2 Tim. 3:2-4, 13.
4. Kiko a pasa ku e kondishonnan mundial den nos tempu?
4 Nada di esaki no mester sorprendé nos, pasobra e Palabra di Dios ta splika bon kla ku “henter mundu ta den poder di e Malbado.” (1 Huan 5:19) “Henter mundu” ta inkluí e elementonan polítiko, religioso i komersial di e mundu akí, i tambe e medionan ku Satanas ta usa pa plama su ideanan. No tin duda ku Beibel tin rason di yama Satanas e Diabel “e gobernante di mundu” i “e dios di e mundu akí.” (Huan 14:30; 2 Kor. 4:4) Kondishonnan mundial ta sigui empeorá ya ku awor akí Satanas ta masha rabiá mes, pasobra e sa ku a ked’é masha poko tempu promé ku Yehova kit’é for di kaminda. (Rev. 12:12) Ta un gran konsuelo pa sa ku Dios lo no tolerá Satanas i su sistema malbado pa muchu tempu mas, i ku e kuestion ku Satanas a lanta relashoná ku Yehova su derecho di goberná lo keda resolvé.—Gén., kap. 3; Yòb, kap. 2.
E Bon Notisia Ta Ser Prediká Rònt Mundu
5. Kon e profesia tokante e trabou di prediká ta kumpliendo den e último dianan akí?
5 Loke Hesus a profetisá ta kumpliendo durante e periodo difísil akí di historia humano. El a bisa: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mat. 24:14) E testimonio mundial tokante e Reino di Dios ta tumando lugá na un eskala kada bes mas grandi. Awe, mas ku 7.500.000 Testigu di Yehova, den mas ku 107.000 kongregashon rònt mundu, ta prediká e bon notisia di e Reino di Dios meskos ku Hesus tambe a prediká i siña hende tokante dje. (Mat. 4:17) Pa medio di e predikashon ei, hopi hende ku ta yora ta haña konsuelo. Resientemente, den un periodo di dos aña, un total di 570.601 persona a batisá komo Testigu di Yehova!
6. Kiko bo ta pensa di e eskala di nos aktividat di prediká?
6 Nos por komprondé mihó na ki gran eskala e trabou di prediká akí ta tumando lugá ora nos tuma nota di e echo ku awor Testigunan di Yehova ta tradusí i distribuí literatura bíbliko na mas ku 500 idioma. Nunka promé den historia hende a mira esaki! E eksistensia di e parti terenal di e organisashon di Yehova, huntu ku e obra ku e ta hasi i su kresementu, ta algu realmente ekstraordinario. Si no tabata pa e guia i yudansa di e spiritu santu poderoso di Dios, esei lo tabata imposibel den e mundu akí ku ta bou di kontròl di Satanas. Komo ku e bon notisia ta ser prediká den henter e tera habitá, tantu e pueblo di Yehova komo hende ku ta yora i ku a aseptá e mensahe di Reino ta risibí konsuelo for di e Skritura.
Konsolá Nos Rumannan den Kongregashon
7. (a) Dikon nos no por ferwagt ku Yehova lo kita tur loke ta kousa sufrimentu for di awor? (b) Dikon nos por ta sigur ku nos por wanta persekushon i tribulashon?
7 Den e mundu akí yen di maldat i sufrimentu, nos tur lo haña nos ku situashonnan ku ta kousa doló. Nos no por ferwagt ku for di awor Dios lo kita tur loke ta kousa infelisidat i tristesa; nos tin ku warda te ora e destruí e sistema akí. Mientrastantu, ora nos ta konfrontá e persekushon ku Beibel a profetisá, nos tin oportunidat pa demostrá nos integridat na Yehova i tambe ku nos ta apoyá su soberania universal. (2 Tim. 3:12) Sinembargo, komo ku nos a risibí yudansa i konsuelo di nos Tata selestial, nos por ta meskos ku e kristiannan ungí di antiguo Tesalónika, kendenan a wanta persekushon i tribulashon ku perseveransia i fe.—Lesa 2 Tesalonisensenan 1:3-5.
8. Kon Beibel ta mustra ku Yehova ta konsolá su sirbidónan?
8 No tin duda ku Yehova ta perkurá e konsuelo nesesario pa su sirbidónan. Por ehèmpel, ora Reina Yézabèl a menasá profeta Elías ku morto, e profeta a haña miedu i a hui bai; el a bisa asta ku e kier a muri. Pero en bes di skual Elías, Yehova a konsol’é i dun’é e kurashi nesesario pa kumpli ku su trabou komo profeta. (1 Rei. 19:1-21) E eksperensia di e kongregashon kristian di promé siglo ta un ehèmpel mas ku ta mustra ku Yehova ta konsolá su pueblo. Nos ta lesa ku tabatin “un periodo di pas pa e kongregashon den henter e área di Hudea, Galilea i Samaria, i nan fe a sigui ser edifiká.” Ademas, “komo ku henter e kongregashon tabata kana den temor di Yehova i biba na armonia ku e konsuelo ku nan a risibí di spiritu santu, esaki a sigui oumentá.” (Echo. 9:31) Nos ta masha gradisidu ku nos tambe tin ‘e konsuelo ku nos ta risibí di spiritu santu’!
9. Dikon nos por haña konsuelo ora nos siña tokante Hesus?
9 Komo kristian, nos a risibí konsuelo ora nos a siña tokante Hesukristu i kana den su pasonan. Hesus a bisa: “Bini serka mi, boso tur ku ta traha duru i ku ta kargá, i lo mi refreská boso. Tuma mi yugo riba boso skouder i siña di mi, pasobra mi tin un genio suave i un kurason humilde, i boso alma lo keda refreská. Pasobra mi yugo ta suave, i mi karga no ta pisá.” (Mat. 11:28-30) Un gran yudansa pa aliviá strès ta di siña tokante e manera bondadoso i amoroso ku Hesus a trata hende, anto despues imitá su ehèmpel positivo.
10, 11. Ken den kongregashon por duna konsuelo?
10 Nos por haña konsuelo tambe serka otro rumannan den kongregashon. Por ehèmpel, pensa riba e manera ku ansiano ta yuda e rumannan ku ta konfrontá situashonnan difísil. Disipel Santiago a skirbi: “Tin un hende den boso ku ta [spiritualmente] malu? Lag’é manda yama e ansianonan di kongregashon, i laga nan hasi orashon p’e.” Ku ki resultado? “E orashon hasí ku fe lo kura esun ku ta malu, i Yehova lo lant’é. Ademas, si el a kometé piká, lo e ser pordoná.” (Sant. 5:14, 15) Pero otro rumannan den kongregashon tambe por duna konsuelo.
11 Hopi biaha, hende muhé ta haña ta mas fásil pa nan papia ku otro hende muhé tokante nan problemanan. Foral ruman muhénan mas grandi i ku mas eksperensia por duna masha bon konseho na ruman muhénan mas yòn. E ruman muhénan mas grandi i maduro akí kisas a yega di pasa kaba den situashonnan similar den nan bida. Nan kompashon i kualidatnan femenino por ta di gran yudansa. (Lesa Tito 2:3-5.) Klaru ku ansiano- i otro rumannan por, i mester, “papia palabranan di konsuelo ku esnan ku ta deprimí” entre nos. (1 Tes. 5:14, 15) Anto ta bon pa kòrda ku Dios “ta konsolá nos den tur nos tribulashonnan, pa nos por konsolá otro hende ku ta den kualke tipo di tribulashon.”—2 Kor. 1:4.
12. Dikon ta masha importante pa nos asistí na nos reunionnan kristian?
12 Un manera masha importante pa nos haña konsuelo ta di asistí na reunionnan kristian. E informashon bíbliko ku keda presentá einan ta animá nos. Nos ta lesa ku Hudas i Sílas “a animá e rumannan ku vários diskurso i a fortalesé nan.” (Echo. 15:32) Promé i despues di nos reunionnan, e rumannan tin kòmbersashonnan edifikante ku otro. Pues asta si nos ta sufriendo pa motibu di un òf otro problema, laga nos no isolá nos mes, pasobra esei lo no yuda ku nada. (Pro. 18:1) Na lugá di isolá nos mes, nos ta hasi bon di sigui e konseho inspirá di apòstel Pablo: “Laga nos presta atenshon na otro pa nos por stimulá otro pa mustra amor i hasi bon obra, i no keda sin bai e reunionnan, manera algun a tuma pa kustumber, sino mas bien animá otro, i muchu mas ainda ku boso ta mira e dia ta yega serka.”—Heb. 10:24, 25.
Saka Konsuelo for di e Palabra di Dios
13, 14. Mustra kon e Skritura por konsolá nos.
13 Sea ku nos ta kristian batisá òf hende ku nèt a kuminsá siña tokante Dios i su propósito, e Palabra di Dios por duna nos gran konsuelo. Pablo a skirbi: “Tur loke a ser skirbí anteriormente a ser skirbí pa nos instrukshon, pa asina mediante nos perseveransia i e konsuelo for di e Skritura nos por tin speransa.” (Rom. 15:4) E Santu Skritura por konsolá nos i hasi nos “plenamente kompetente, kompletamente prepará pa tur bon obra.” (2 Tim. 3:16, 17) E echo ku nos konosé e bèrdat tokante Dios su propósito i ku nos tin un berdadero speransa pa futuro ta duna nos gran konsuelo. P’esei, laga nos hasi pleno uso di e Palabra di Dios i di e publikashonnan basá riba Beibel ku por konsolá nos i benefisiá nos den hopi manera.
14 Hesus a pone un bon ehèmpel pa nos ora el a usa e Skritura pa instruí i konsolá hende. Por ehèmpel, un biaha ku el a aparesé na dos di su disipelnan despues ku el a resusitá, el a ‘splika nan e Skritura na plaka chikí.’ Segun ku e tabata papia ku nan, el a touch nan kurason. (Luk. 24:32) Siguiendo e ekselente ehèmpel di Hesus, apòstel Pablo “a usa e Skritura pa rasoná” ku hende. Na Berea, esnan ku a skuch’é “tabata masha ansioso pa aseptá e palabra di Dios, i kuidadosamente nan tabata analisá e Skritura tur dia.” (Echo. 17:2, 10, 11) Pues, ta masha importante anto pa nos lesa Beibel tur dia, benefisiando di dje i di nos publikashonnan kristian spesialmente prepará pa duna nos i otro hende konsuelo i speransa den e tempu difísil akí.
Mas Manera pa Konsolá Otro
15, 16. Kiko asina nos por hasi pa yuda i konsolá nos rumannan?
15 Nos por yuda nos rumannan kristian i asina konsolá nan den vários manera práktiko. Por ehèmpel, nos por bai kumpra kos pa rumannan ku ta malu òf di edat avansá. Nos lo por yuda otronan ku nan trabounan di kas, i di e manera ei demostrá interes personal den nan. (Flp. 2:4) Podisé nos por elogiá nos rumannan pa nan abilidatnan i bon kualidatnan, manera nan amor, kurashi i fe.
16 Un kos ku nos por hasi pa konsolá nos rumannan di edat ta di bishitá nan i skucha bon ora nan ta konta nos tokante nan eksperensianan di pasado i e bendishonnan ku nan a risibí den e sirbishi di Yehova. Por resultá asta ku ta nos ta esnan ku ta ser animá i konsolá! Nos lo por lesa Beibel i nos publikashonnan bíbliko pa esnan ku nos bishitá. Kisas nos por konsiderá ku nan e artíkulo di Estudio di Toren di Vigilansia òf e informashon di e Estudio di Beibel di Kongregashon ku lo bai trata durante di e siman ei. Nos lo por sinta wak un DVD di un tema bíbliko huntu ku nan. Tambe nos por lesa òf konta algun eksperensia animante for di nos publikashonnan.
17, 18. Komo sirbidónan leal di Yehova, dikon nos por ta sigur ku lo e konsolá nos i apoyá nos?
17 Si nos ripará ku un ruman tin mester di konsuelo, nos por menshoná e ruman ei den nos orashonnan privá. (Rom. 15:30; Kol. 4:12) Segun ku kada un di nos ta trata ku e problemanan di bida i ta purba konsolá otro hende, nos por tin e mesun fe i konvikshon ku e eskritor di salmo ku a kanta: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” (Sal. 55:22) Sí, semper Yehova lo t’ei pa konsolá nos i apoyá nos komo su sirbidónan leal.
18 Dios a bisa su sirbidónan di pasado: “Ami, sí, ami, ta Esun ku ta konsolá boso.” (Isa. 51:12) Yehova lo hasi asina ku nos tambe i lo bendishoná e bon obra- i palabranan ku nos ta usa pa konsolá hende ku ta yora. Sea ku nos speransa ta pa haña bida den shelu òf riba tera, kada un di nos por saka konsuelo for di e palabranan ku Pablo a skirbi e kristiannan ungí di su tempu: “Nos ta deseá pa nos Señor Hesukristu i Dios, nos Tata, kendenan a stima nos i pa medio di bondat inmeresí a duna nos konsuelo eterno i speransa maravioso, konsolá boso i fortalesé boso den tur bon obra i bon palabra.”—2 Tes. 2:16, 17.
Bo Ta Kòrda?
• Kon ekstenso nos trabou di konsolá esnan ku ta yora ta?
• Kiko asina nos por hasi pa konsolá otro hende?
• Kon Beibel ta mustra ku Yehova ta konsolá su pueblo?
[Preguntanan di Estudio]
[Plachi na página 26]
Bo ta yuda konsolá hende ku ta yora?
[Plachi na página 28]
Tantu rumannan hóben komo esnan di edat por animá otro hende
