Loke hende sa bisa: “Meskos ku tin hopi kaminda pa yega na e mesun destinashon, tin hopi kaminda pa yega na Dios. Ta kada ken mester disidí kon e ta adorá Dios.”

Loke Beibel ta siña: Nos mester adorá Dios ku un motivashon sinsero; nos no mester ta hipókrita ni pretendé di ta deboto. Dikon? Pasobra Dios a rechasá e lidernan religioso den tempu di Hesus pa e motibu ei. Wak kiko Hesus a bisa nan: “Ku rason Isaías a profetisá tokante boso, hipókritanan, manera ta pará skirbí: ‘E pueblo akí ta onra mi ku nan lep, ma nan kurason ta masha leu for di mi.’” (Marko 7:6) No opstante, sinseridat so no ta un garantia ku Dios lo aseptá nos forma di ador’é.

Hesus a mustra esei bon kla ora el a revelá e motibu prinsipal pakiko Dios a rechasá tantu e adorashon di e lidernan religioso di su tempu komo esun di nan siguidónan. Hesus a apliká na nan loke Yehova a bisa, esta: “Ta pòrnada nan ta sigui adorá mi, pasobra nan ta siña mandamentu di hende komo doktrina.” (Marko 7:7) Nan adorashon tabata “pòrnada,” òf sin balor, pasobra nan tabata sigui nan tradishon religioso en bes di kumpli ku e rekisitonan di Dios.

Ta bisto anto ku Beibel no ta apoyá e idea ku tin hopi manera pa adorá Dios. Al kontrario, Beibel ta siña ku tin ún solo forma di adorashon ku ta aseptabel pa Dios. Mateo 7:13 i 14 ta bisa: “Drenta di e porta smal, pasobra e kaminda ku ta hiba na destrukshon ta hanchu i espasioso, i hopi ta esnan ku ta pasa riba dje; miéntras ku e porta ku ta hiba na bida ta smal i e kaminda ta pèrtá, i poko ta esnan ku ta hañ’é.”

Kon e bèrdat ta yuda bo? Imaginá bo ku bo a train lunanan largu pa un máratòn. Bo ta kompetí i ta sali e ganadó apsoluto. Pero djis despues nan ta deskualifiká bo pasobra bo a kibra ku un regla ku bo no tabata sa di dje. Kon lo bo sinti bo? Ku tur bo esfuersonan tabata pòrnada, no ta bèrdat? Esei lo por ta e kaso tambe ku nos esfuersonan pa adorá Dios?

Apòstel Pablo a kompará nos adorashon ku un kompetensia deportivo. El a skirbi: “Asta ora un hende ta kompetí den e weganan, e no ta risibí e premio si e no kompetí segun regla di wega.” (2 Timoteo 2:5) Pues, nos por tin e aprobashon di Dios ora nos ta ador’é “segun regla,” ku otro palabra, na e manera ku e ta aprobá. Meskos ku un koredó no por kibra regla i spera ku e ta gana e kareda, nos tampoko no por disidí kon nos ke adorá Dios.

Si nos ke agradá Dios, nos adorashon no por ta basá riba mentira. Hesus a bisa: “Adoradónan berdadero lo adorá e Tata ku spiritu i ku bèrdat.” (Huan 4:23) I Beibel ta mustra nos kua ta e kaminda berdadero ku ta hiba na Dios.—Huan 17:17. *

[Nota]

[Komentario na página 8]

Tur religion ta siña hende adorá Dios manera e ke?