KON lo bo sinti bo si un hende ku bo ta konfia gaña bo? Esei lo duel bo mashá, no ta bèrdat? Kisas bo ta rabia, bo ta sinti bo humiá òf asta traishoná. Sí, mentira ta hasi daño; e ta kibra amistat i matrimonio. Ademas, hende a yega di pèrdè miónes di florin pa motibu di estafa.

Awor, kon lo bo sinti bo si bo haña sa ku loke nan a siña bo tokante Dios ta mentira? Si bo ta un persona religioso, esei lo molestiá bo mashá. Esei tabata e kaso tambe ku e siguiente baidónan di misa. Wak kiko nan a bisa:

● “Mi a sinti ku mi iglesia a traishoná mi.”—DEANNE.

● “M’a rabia. Mi a sinti ku nan a gaña mi. Tur mi speransa i metanan a kai na awa.”—LUIS.

Podisé bo no ke ni pensa ku loke bo a siña tokante Dios por ta mentira. Dikon? Pasobra hopi biaha, loke bo sa tokante Dios bo a siñ’é for di personanan ku bo ta konfia i ku lo no hasi bo doló deliberadamente, manera por ehèmpel bo mayornan, bo pastor òf un bon amigu. Kisas ta henter bo bida bo a kere den un sierto doktrina. Pero, bo no ta kere ku asta un idea òf pensamentu ku ta komun i plamá por ta falsu? Franklin D. Roosevelt, eks presidente di Merka, a atmití esei ora el a bisa: “No ta pasobra hende ta ripití un mentira yen di biaha esaki ta bira bèrdat.”

Awor, kon bo por haña sa si nan a gaña bo òf nò? Hesus a yega di bisa Dios den orashon: “Bo palabra ta e bèrdat.” (Huan 17:17) Sí, e Palabra di Dios, esta Beibel, ta yuda nos distinguí bèrdat for di mentira.

P’esei, laga nos ban wak kon Beibel ta refutá sinku mentira komun tokante Dios. I lo bo mira kon e bèrdat por mehorá bo bida.