“Konfia den SEÑOR ku henter bo kurason, i no dependé riba bo mes komprondementu.”—PRO. 3:5.

1, 2. (a) Menshoná algun situashon ku nos por konfrontá. (b) Riba ken nos mester dependé ora nos ta pasa den situashonnan difísil òf tin ku tuma desishon òf tin ku resistí tentashon, i dikon?

CYNTHIA * su doño di trabou a sera parti di su kompania i a manda vários trahadó kas kaba. Cynthia ta preokupá ku djis nan lo manda e tambe kas. Kon e ta hasi si e pèrdè trabou? Kon lo e kubri su gastunan? Un otro ruman ku yama Pamela ke bai biba na un lugá ku tin mester di mas predikadó di Reino, pero e no ta sigur si e mester hasié. Un yònkuman ku yama Samuel tin un otro problema. El a yega di wak pornografia tempu ku e tabata mucha. Awor ku e tin 20 i piku aña, e ta sinti un tentashon fuerte pa bolbe wak pornografia. Kon e por resistí e tentashon ei?

² Riba ken bo ta dependé ora bo haña bo ku situashonnan difísil òf tin ku tuma desishonnan importante òf tin ku resistí tentashon? Bo ta stèns riba bo mes so, òf bo ta ‘tira bo karga riba Yehova’? (Sal. 55:22) Beibel ta bisa: “E wowonan di SEÑOR ta riba e hustunan, i su oreanan ta atento pa skucha nan sklamashon.” (Sal. 34:15) Pues, ta masha importante anto pa nos konfia den Yehova ku henter nos kurason i pa nos no dependé riba nos mes komprondementu.—Pro. 3:5.

3. (a) Kiko konfia den Yehova ta enserá? (b) Kiko por pone algun ruman kuminsá dependé riba nan mes komprondementu?

³ Konfia den Yehova ku henter nos kurason ta enserá ku nos ta hasi kos na su manera, di akuerdo ku su boluntat. Pa por hasi esei nos mester akudí na dje konstantemente den orashon i pidié sinseramente pa e guia nos. Pero hopi ruman tin difikultat pa dependé kompletamente riba Yehova. Por ehèmpel, un ruman ku yama Lynn ta atmití ku p’e ta un lucha konstante pa siña pone tur su konfiansa den Yehova. Dikon? El a bisa: “Mi no tin ningun kontakto ku mi tata, i mi mama no a duna mi e kuido ku mi tabatin mester, ni emoshonalmente ni físikamente. Pues, for di chikitu mi a siña sòru pa mi mes.” Ta p’esei ta difísil pa Lynn konfia un persona plenamente. Bon abilidat i éksito tambe por pone ku un hende ta bai konfia den su mes. Por ehèmpel, un ansiano ku tin hopi eksperensia kisas ta dependé riba su mes i ta kuminsá atendé asuntunan di kongregashon sin akudí na Dios promé den orashon.

4. Kiko nos lo trata den e artíkulo akí?

⁴ Ora nos ta pidi Yehova yuda nos, e ta ferwagt ku nos lo hasi nos bèst i aktua di akuerdo ku su boluntat. Pero kon nos por sa ki ora nos mester tira nos karga riba Yehova i ki ora nos mes mester hasi esfuerso pa resolvé problemanan difísil? Ora di tuma desishon, nos mester tene kuidou ku kiko? Dikon ta importante pa hasi orashon ora nos ta hasi esfuerso pa resistí tentashon? Nos lo kontestá e preguntanan akí a base di algun ehèmpel for di Beibel.

Ora Nos Ta den Angustia

5, 6. Kon Ezekías a reakshoná ora e rei di Asiria tabata menas’é?

⁵ Beibel ta bisa di Rei Ezekías di Huda: “El a tene duru na SEÑOR; e no a laga di siguié, ma  a warda su mandamentunan, ku SEÑOR a ordená Moises.” Sí, ‘el a konfia den Yehova, e Dios di Israel.’ (2 Rei. 18:5, 6) Kon Ezekías a reakshoná ora Rei Senakerib di Asiria a manda su representantenan—inkluso Rabsakes—bai Herúsalèm huntu ku un forsa militar grandi? E poderoso ehérsito asirio a kapturá vários stat fortifiká di Huda kaba, i awor Senakerib a fiha su bista riba Herúsalèm. Ezekías a bai na e kas di Yehova i a bisa den orashon: “O SEÑOR nos Dios, mi ta pidi, libra nos for di su man pa tur reinonan di tera por sa ku abo so, o SEÑOR, ta Dios.”—2 Rei. 19:14-19.

⁶ Ezekías a aktua di akuerdo ku su orashon. Asta promé ku el a bai tèmpel pa hasi orashon, el a duna òrdu na e pueblo pa nan no kontestá e insultonan di Rabsakes. Tambe Ezekías a manda un delegashon bai buska konseho serka profeta Isaías. (2 Rei. 18:36; 19:1, 2) Ezekías a hasi e kosnan ku e tabata sa ku ta korekto. E no a purba di bini ku un solushon ku tabata kontra e boluntat di Yehova. Por ehèmpel, e no akudí na Egipto òf na un di e nashonnan bisiña pa yudansa. En bes di Ezekías dependé riba su mes komprondementu, el a konfia den Yehova. E angel di Yehova a mata 185.000 sòldá di Senakerib, i Senakerib a kita bai i a regresá Nínive.—2 Rei. 19:35, 36.

7. Ki konsuelo nos por saka for di e orashonnan di Ana i Yonas?

⁷ Ata dos ehèmpel mas. Ana, kasá di e levita Elkana, tabata masha tristu mes pasobra e no por a haña yu. Pero el a dependé riba Yehova i a hasi orashon tokante su situashon. (1 Sam. 1:9-11, 18) Profeta Yonas a ser librá for di barika di e piská grandi despues ku el a resa: “Den mi angustia mi a sklama na SEÑOR, i el a kontestá mi. For di e profundidat di Sheol mi a sklama pa yudansa, i bo a tende mi bos.” (Yon. 2:1, 2, 10) Ta un gran konsuelo pa sa ku maske kon difísil nos situashon ta, semper nos por resa na Yehova i suplik’é pa yuda nos.—Lesa Salmo 55:1 i 16.

8, 9. Ki preokupashon Ezekías, Ana i Yonas a ekspresá ora nan a hasi orashon, i kiko nos ta siña for di esaki?

⁸ E ehèmpelnan di Ezekías, Ana i Yonas ta siña nos un lès importante tambe tokante un kos ku nos no mester lubidá ora nos ta hasi orashon durante prueba difísil. Nan tur tres a sufri emoshonalmente ora nan tabata den situashonnan difísil. Ma nan orashonnan ta mustra ku nan no tabata simplemente preokupá ku nan mes i djis kier a haña un alivio di nan problemanan. Loke tabata mas importante pa nan tabata pa onra e nòmber di Dios, ador’é na e manera korekto i hasi loke e tabata rekerí di nan. Ezekías tabata masha tristu pa e reproche ku e hendenan tabata trese riba e nòmber di Yehova. Ana a primintí ku lo el a duna Yehova e yu hòmber ku e tabata anhelá asina tantu pa esaki por sirbi na e tabernakel na Silo. Anto Yonas a bisa: “Lo mi kumpli ku mi promesa.”—Yon. 2:9.

⁹ Ora nos ta hasi orashon pa haña yudansa den un situashon difísil, ta bon pa nos analisá e motibunan pakiko nos ta hasi orashon. Akaso nos ta interesá solamente den haña un solushon pa nos problema, òf nos ta kòrda riba Yehova i su propósito den nos orashon? Ora nos ta sufri, fásilmente nos por bira asina preokupá ku nos situashon ku Yehova su propósito i adorashon no ta dje importante ei mas pa nos. Ora nos ta pidi Dios yudansa, laga nos enfoká den nos orashon riba Yehova, riba santifikashon di su nòmber i riba vindikashon di su soberania. Esei por yuda nos mantené un punto di bista positivo asta si nos no haña e solushon ku nos tabata spera. Podisé e kontesta riba nos orashon ta ku nos mester wanta e situashon ku yudansa di Dios.—Lesa Isaías 40:29; Filipensenan 4:13.

 Ora Nos Tin ku Tuma Desishon

10, 11. Kiko Yehosafat a hasi ora e tabata den un situashon ku e no tabata sa kiko pa hasi?

¹⁰ Kon bo ta tuma desishon importante den bo bida? Bo ta disidí promé kiko bo ke bai hasi anto despues pidi Yehova den orashon pa laga sosodé manera bo a disidí? Wak kiko e rei di Huda, Yehosafat òf Josafat, a hasi ora ku e ehérsito kombiná di Moab i Amon a bini pa bringa kontra dje. Huda no tabata den posishon pa lucha kontra nan. Kiko Yehosafat mester a hasi?

¹¹ Beibel ta bisa: “Yehosafat a haña miedu i a disidí di buska SEÑOR.” El a proklamá un yunamentu pa henter Huda i a reuní e pueblo huntu ‘pa nan buska e yudansa di Yehova.’ Anto el a bai para meimei di e asamblea di Huda i Herúsalèm i a hasi orashon. Parti di su súplika tabata: “O nos Dios, lo bo no husga nan? Pasobra nos ta sin forsa dilanti di e multitut grandi akí ku ta bini kontra nos; ni nos no sa kiko pa hasi, ma nos wowo ta riba bo.” E Dios berdadero a skucha e orashon di Yehosafat i a libra nan milagrosamente. (2 Kró. 20:3-12, 17) Ora nos tin ku tuma desishon, foral desishon ku lo por influensiá nos relashon ku Yehova, nos lo no tin ku dependé riba Yehova en bes di dependé riba nos mes komprondementu?

12, 13. Ora di tuma desishon, kiko nos por siña for di e ehèmpel di Rei David?

¹² Kiko nos mester hasi ora nos ta den un situashon ku por parse fásil pa resolvé, kisas pasobra nos a yega di pasa den algu similar kaba? Un relato ku a enbolbé Rei David ta yuda nos komprondé kiko nos mester hasi den situashonnan asina. Ora e amalekitanan a invadí e stat Ziklag, nan a bai ku e kasánan i yunan di David i tambe di e hòmbernan huntu kuné. David a konsultá ku Yehova, puntrando: “Mi mester persiguí e trupa akí?” Yehova a kontest’é: “Persiguí nan, pasobra siguramente lo bo alkansá nan i siguramente lo bo reskatá tur.” David a obedesé, i el a “rekobrá tur loke e amalekitanan a kohe.”—1 Sam. 30:7-9, 18-20.

¹³ Poko tempu despues di e invashon amalekita, e filisteonan a ataká Israel. David a bolbe konsultá ku Yehova i el a haña un kontesta bon kla. Dios a bis’é: “Bai, pasobra siguramente lo mi entregá e filisteonan den bo man.” (2 Sam. 5:18, 19) No muchu tempu despues, e filisteonan a bolbe bini kontra David. Kiko lo el a hasi e biaha akí? E por a rasoná: ‘Mi a haña mi ku un situashon similar dos biaha kaba. Laga mi bai kontra e enemigunan akí di Dios manera mi a hasi e biahanan ei.’ Ta esei David a hasi òf el a buska e guia di Yehova? David no a dependé riba su mes ni riba su eksperensia di pasado. El a bolbe akudí na Yehova den orashon. Lo e mester a keda hopi kontentu ku el a hasi esei, pasobra e biaha akí Yehova a dun’é otro instrukshon. (2 Sam. 5:22, 23) Ora nos ta konfrontá un situashon òf un problema konosí, nos tin ku tene kuidou pa nos no dependé riba nos mes ni riba nos eksperensia di pasado.—Lesa Yeremías 10:23.

14. Ki lès nos por siña for di e manera ku Hosue i e ansianonan di Israel a trata ku e gabaonitanan?

¹⁴ Nos tur ta imperfekto. Pues nos tur—asta si nos ta ansiano ku hopi eksperensia—tin ku tene kuidou pa nos no tuma desishon sin pidi Yehova su guia. Wak kiko Hosue, e susesor di Moises, huntu ku e ansianonan di Israel a hasi ora e gabaonitanan a bin pidi nan pa no bringa kontra nan. E gabaonitanan astuto a disfrasá nan mes i a hasi manera kos ku nan a bini di un lugá leu. Sin konsultá ku Yehova, Hosue i e ansianonan a sera un pakto ku nan i a primintí di no bringa kontra nan. Aunke Yehova al final a apoyá e pakto, el a sòru pone e relato den Beibel pa nos mira ku Hosue i e ansianonan no a buska su guia.— Hos. 9:3-6, 14, 15.

 Ora Nos Ta Lucha Kontra Tentashon

15. Splika dikon orashon ta importante pa resistí tentashon.

¹⁵ Ya ku nos tin “e lei di piká” den nos kurpa, nos tin ku lucha duru kontra deseonan pekaminoso. (Rom. 7:21-25) Nos por gana e bataya akí. Pero kon? Hesus a bisa su siguidónan ku orashon ta masha importante pa resistí tentashon. (Lesa Lukas 22:40.) Asta si mal deseo òf mal pensamentu keda persistí despues ku nos a hasi orashon, nos tin ku “sigui pidi Dios” sabiduria pa yuda nos lucha kontra e prueba akí. Beibel ta sigurá nos ku Dios ta “duna tur hende generosamente, sin tira na nan kara.” (Sant. 1:5) Santiago a skirbi tambe: “Tin un hende den boso ku ta [spiritualmente] malu? Lag’é manda yama e ansianonan di kongregashon, i laga nan hasi orashon p’e i hunt’é ku zeta den nòmber di Yehova. I e orashon hasí ku fe lo kura esun ku ta malu.”—Sant. 5:14, 15.

16, 17. Ki ora ta e mihó momento pa hasi orashon ora nos ta buska yudansa pa resistí tentashon?

¹⁶ Orashon ta esensial pa resistí tentashon, pero nos tin ku kòrda hasi orashon na e momento korekto. Konsiderá e kaso di e hóben ku Proverbionan 7:6-23 ta menshoná. Na un okashon, ora nochi tabata sera, el a kana pasa den un kaya kaminda tabata konosí ku tin un muhé inmoral ta biba. E muhé a gañ’é i sedusié ku su labiamentu, i e hóben a bai su tras manera un toro òf bue ku nan tabata bai kuné pa mata. Dikon e hóben akí a bai einan? Beibel ta bisa ku e tabata “falta komprondementu,” esta, e no tabatin eksperensia, pues ta probabel ku e tabata lucha ku mal deseo. (Pro. 7:7) Ki ora lo tabata e mihó momento pa el a hasi orashon? Klaru ku lo tabata bon si el a hasi orashon pa resistí e tentashon kualke momento durante ku e muhé tabata papia kuné. Pero e mihó momento pa hasi orashon lo tabata for di ora ku el a haña e idea di bai pasa den e kaya ei.

¹⁷ Awe, kisas un ruman hòmber ta lucha duru pa e no wak pornografia. Pero suponé ku e ta bai riba websitenan ku e sa ku tin potrèt òf vidio provokativo. Su kaso lo no ta meskos ku esun di e hóben menshoná den Proverbionan kapítulo 7? Esei ta un kaminda hopi peligroso pa pasa! Pa resistí e tentashon pa wak pornografia, un persona tin ku buska e yudansa di Yehova promé ku e kuminsá bai den e direkshon ei riba Internet.

18, 19. (a) Dikon ta difísil pa resistí tentashon, pero kon bo por gana e bataya ei? (b) Kiko bo ta determiná pa hasi?

¹⁸ No ta fásil pa resistí tentashon ni pa vense mal kustumber. Apòstel Pablo a skirbi: “E deseo di karni ta kontra e spiritu, i e spiritu kontra e karni.” P’esei, “nèt e kosnan ku  [nos] lo ke hasi, [nos] no ta hasi.” (Gal. 5:17) Pa nos gana e lucha akí, nos tin ku hasi orashon ferviente ora mal pensamentu òf tentashon ta lanta den nos mente, anto despues aktua di akuerdo ku nos orashon. “Ningun tentashon ku boso a pasa aden ta fuera di loke ta komun pa hende,” i ku yudansa di Yehova, nos por keda fiel na dje.—1 Kor. 10:13.

¹⁹ E privilegio di hasi orashon ta un regalo maravioso ku Yehova a duna nos pa yuda nos, sea ku nos ta pasando den un situashon difísil òf nos tin ku tuma un desishon importante òf nos ta hasi esfuerso pa resistí tentashon. Pa medio di orashon, nos ta demostrá ku nos ta dependé riba dje. Tambe nos mester sigui pidi Dios duna nos su spiritu santu, pa esaki guia nos i fortalesé nos. (Luk. 11:9-13) Riba tur kos, laga nos konfia den Yehova i no dependé riba nos mes komprondementu.

[Nota]

Bo Ta Kòrda?

• Kiko bo a siña for di Ezekías, Ana i Yonas tokante konfia den Yehova?

• Kon e ehèmpelnan di David i Hosue ta mustra bon kla ku nos mester tene kuidou ora di tuma desishon?

• Spesialmente ki ora nos tin ku hasi orashon tokante tentashon?

[Preguntanan di Estudio]

[Plachi na página 13]

Ki ora ta e mihó momento pa hasi orashon pa nos por resistí tentashon?