“Ta e mesun spiritu ta hasi tur e aktividatnan akí.”—1 KOR. 12:11.

1. Kiko nos lo trata den e artíkulo akí?

PENTEKÒSTE. E palabra ei ta laga nos kòrda susesonan masha emoshonante ku a tuma lugá den promé siglo. Ta na e okashon ei Dios a drama su spiritu santu riba su sirbidónan. (Echo. 2:1-4) Dios a kuminsá usa su spiritu santu pa guia su pueblo den un otro manera. Den e artíkulo anterior nos a mira kon e spiritu di Dios a yuda sirbidónan fiel di pasado kumpli ku asignashonnan difísil. Sinembargo, e spiritu di Dios a obra na un manera diferente despues ku e kongregashon kristian a ser formá. Kiko tabata e diferensia? I kon kristiannan ta benefisiá di e guia di spiritu santu awe? Laga nos ban wak.

“Ata Mi Aki! Yehova Su Sirbidó!”

2. Kon spiritu santu a obra den Maria su bida?

² Maria tabata presente den e sala espasioso ei na Herúsalèm ora spiritu santu a ser  dramá. (Echo. 1:13, 14) Pero promé ku esei, Maria a yega di eksperensiá ku Yehova su spiritu santu ta obra na maneranan masha asombroso. Mas ku tres dékada promé ku e okashon ei, Yehova a transferí e bida di su Yu for di shelu pa tera. I ta “spiritu santu” Yehova a usa pa laga Maria sali na estado siendo bírgen ainda.—Mat. 1:20.

3, 4. Ki aktitut Maria a desplegá, i kon nos por imit’é?

³ Dikon Yehova a skohe Maria pa e gran privilegio ei? Wèl, despues ku e angel a splika Maria ku tabata Dios su boluntat pa e duna lus na e Yu di Dios, emoshoná Maria a bisa: “Ata mi aki! Yehova su sirbidó! Laga sosodé ku mi manera bo a bisa.” (Luk. 1:38) E manera ku Maria a reakshoná a mustra ki aktitut e tabatin. E tabata kla pa aseptá Yehova su boluntat den e asuntu akí. E no a puntra e angel kiko hende lo a bisa di su embaraso. E no a teme tampoko ku kisas Hose lo no kier a kasa kuné mas. Maria a konsiderá su mes un sirbidó humilde di Dios, i a demostrá ku el a konfia kompletamente den Yehova komo su Doño.

⁴ Abo a yega di sinti ku e responsabilidatnan ku bo tin den Dios su sirbishi ta muchu hopi pa bo? Kada un di nos ta hasi bon di puntra nos mes: ‘Mi ta konfia plenamente ku Yehova lo sòru pa tur kos sosodé segun su boluntat? Mi ta realmente dispuesto pa hasi tur loke Yehova pidi mi?’ Wèl, bo por tin sigur ku Dios lo duna su spiritu santu na esnan ku ta konfia den dje ku henter nan kurason i ku ta obedes’é komo Gobernante.—Echo. 5:32.

Spiritu Santu A Yuda Pedro

5. Den ki manera Pedro a eksperensiá poder di spiritu santu promé ku Pentekòste di aña 33 di nos era?

⁵ Meskos ku Maria, apòstel Pedro tambe a eksperensiá e poder di Dios su spiritu santu promé ku Pentekòste di aña 33 di nos era. Hesus a duna tantu Pedro komo e otro apòstelnan outoridat pa saka demoño. (Mar. 3:14-16) I aunke e Skritura no ta duna nos muchu detaye di esei, ta parse ku Pedro a usa e outoridat ei. E poder di spiritu santu a ser manifestá tambe ora Hesus a bisa Pedro pa e kana riba Laman di Galilea i bini serka dje, i Pedro a hasi esei. (Lesa Mateo 14:25-29.) Pues, ta opvio ku Pedro a dependé riba spiritu santu pa hasi obranan grandi. I lo no a dura muchu ku e mesun spiritu ei lo a duna Pedro i e otro disipelnan poder pa hasi hopi otro kos.

6. Kiko e spiritu di Dios a yuda Pedro hasi durante i despues di Pentekòste di aña 33 di nos era?

⁶ Na Pentekòste di aña 33 di nos era, spiritu santu a duna Pedro i otronan e abilidat milagroso di papia e idioma di e hendenan ku tabata di bishita na Herúsalèm. Despues, Pedro a lanta para i a kuminsá papia ku e multitut. (Echo. 2:14-36) Sí, e hòmber akí, ku na algun okashon tabatin miedu i a yega di hasi kos sin pensa, awor tabata yen di kurashi pa prediká apesar di menasa i persekushon. (Echo. 4:18-20, 31) Dios a usa su spiritu santu pa duna Pedro konosementu spesial. (Echo. 5:8, 9) I e spiritu di Dios a asta dun’é poder pa lanta un persona for di morto.—Echo. 9:40.

7. Kua siñansanan di Hesus Pedro a bin komprondé te despues ku el a ser ungí?

⁷ Asta promé ku Pentekòste di aña 33 di nos era, Pedro a komprondé hopi di e bèrdatnan ku Hesus a siña hende. (Mat. 16:16, 17; Huan 6:68) Pero tabatin algun aspekto di Hesus su siñansanan ku e no por a komprondé na e momentu ei. Por ehèmpel, Pedro no a komprondé ku Kristu lo a resusitá komo spiritu despues di tres dia òf ku Kristu su Reino lo tabata den shelu. (Huan 20:6-10; Echo. 1:6) E no a komprondé tampoko kon hende por bira spiritu i bai goberná den un Reino selestial. Pero tabata ora el a ser ungí ku spiritu santu na Pentekòste i a ser skohé pa bida den shelu, el a bin komprondé e siñansanan akí di Hesus.

8. Ki konosementu tantu e ungínan komo e “otro karnénan” por haña?

 ⁸ Despues ku e disipelnan di Hesus a risibí spiritu santu, nan a bin komprondé e siñansanan ku nan no tabata komprondé promé. I ta spiritu santu a inspirá e outornan di e Skritura Griego Kristian pa splika fasetanan asombroso di Yehova su propósito. (Efe. 3:8-11, 18) Awe, tantu e kristiannan ungí komo e “otro karnénan” por studia i komprondé e bèrdatnan akí. (Huan 10:16) Bo ta balorá e konosementu i komprondementu di e palabra di Dios ku spiritu santu ta yuda bo haña?

Pablo A “Yena ku Spiritu Santu”

9. Kiko Pablo tabata por a hasi ku yudansa di spiritu santu?

⁹ Rònt di ún aña despues di Pentekòste di aña 33 di nos era, Saulo, kende despues a haña e nòmber Pablo, tambe a ser ungí ku spiritu santu. E spiritu di Dios a kapasit’é pa hasi kosnan ku te awe nos ta saka benefisio di dje. Por ehèmpel, spiritu santu a inspir’é pa skirbi 14 buki di Beibel. I meskos ku spiritu santu a yuda Pedro, el a yuda Pablo tambe komprondé i skirbi tokante e speransa di bida ku no ta kaba na nada i inmortal den shelu. Ku yudansa di spiritu santu, Pablo a kura hende enfermo, saka demoño i asta a resusitá algun hende. Sinembargo, spiritu santu a duna Pablo poder pa hasi algu mas importante ainda, algu ku tur sirbidó di Dios ta hasi awe, aunke no milagrosamente.

10. Kon spiritu santu a yuda Pablo den e manera ku el a papia ku hende?

¹⁰ Pablo, kende tabata “yená ku spiritu santu,” a papia ku kurashi kontra un hasidó di bruha. E atministradó prinsipal di Chipre, kende a skucha henter e kòmbersashon, a keda asina impreshoná te ku el a aseptá e bèrdat. Beibel ta bisa “ku e kosnan ku el a siña di Yehova a lag’é keda asombrá.” (Echo. 13:8-12) Pablo a komprondé bon kla ku ta Dios su spiritu santu so por a dun’é kurashi pa prediká e bèrdat di e manera ei. (Mat. 10:20) P’esei, mas despues, el a urgi e kongregashon di Efeso pa sigui pidi p’e den orashon pa e por sa kon pa papia.—Efe. 6:18-20.

11. Kon spiritu santu a guia Pablo?

¹¹ Spiritu santu no solamente a yuda Pablo papia, pero tabatin momentonan tambe ku na sierto lugánan spiritu santu a prohibié di papia. Ademas, spiritu santu tabata guia Pablo durante su biahenan komo misionero. (Echo. 13:2; lesa Echonan 16:6-10.) Te ainda Yehova ta guia e trabou di prediká pa medio di su spiritu. I meskos ku Pablo, tur Yehova su sirbidónan obediente ta hasi esfuerso pa papia e bèrdat ku zelo i ku kurashi. I maske e guia di Dios su spiritu santu no ta asina evidente awe manera den tempu di Pablo, nos por tin sigur ku Yehova ta usa su spiritu santu pa tur esnan ku ta meresedor haña e bèrdat.—Huan 6:44.

“Diferente Tipo di Aktividat”

12-14. E spiritu di Dios ta obra di e mesun manera riba tur su sirbidónan? Splika.

¹² Ta masha animante pa lesa kon Yehova a bendishoná e kongregashon di kristiannan ungí den promé siglo. Pensa un ratu riba e siguiente  palabranan inspirá ku Pablo a dirigí na e kongregashon di Korinto tokante e donnan milagroso di spiritu santu ku e kristiannan a risibí: “Awor bon, tin diferente tipo di don, ma ta e mesun spiritu ta duna nan; i tin diferente tipo di sirbishi, i tòg tur ta pa e mesun Señor; i tin diferente tipo di aktividat, i tòg ta e mesun Dios ta hasi e obranan akí den tur hende.” (1 Kor. 12:4-6, 11) Sí, spiritu santu por obra na diferente manera den bida di diferente sirbidó di Dios pa kumpli ku un sierto propósito. Anto tantu e “trupa chikitu” komo e “otro karnénan” ta risibí e guiá di spiritu santu. (Luk. 12:32; Huan 10:16) Sinembargo, no ta tur ora spiritu santu ta obra na e mesun manera riba kada miembro di e kongregashon.

¹³ Ansianonan, por ehèmpel, ta ser nombrá pa medio di spiritu santu. (Echo. 20:28) Pero no ta tur kristian ungí ta sirbi komo ansiano den kongregashon. Kiko esaki ta laga nos komprondé? Ku poko palabra, e spiritu di Dios ta yuda miembronan di kongregashon na diferente manera.

¹⁴ E spiritu ku ta duna rumannan ungí e siguransa ku nan ta “yu adoptá” di Dios ta e mesun spiritu ku Yehova a usa pa resusitá Hesus pa un bida selestial. (Lesa Romanonan 8:11 i 15.) Ta e mesun spiritu akí Yehova a usa pa krea henter e universo. (Gén. 1:1-3) I ta pa medio di e mesun spiritu akí, Yehova a kapasitá Bezaleel pa hasi un trabou spesial na e tabernakel, a duna Sámson forsa ekstraordinario pa hasi kosnan ku ningun otro hende por a hasi i a pone ku Pedro por a kana riba awa. P’esei anto, ser guiá pa e spiritu di Dios no ta meskos ku ser ungí ku e spiritu di Dios. Ser ungí ku spiritu ta un manera spesial ku Dios ta usa su spiritu santu. I ta Dios ta skohe ken e ta ungi ku spiritu santu.

15. Boutismo ku spiritu santu lo sigui pa semper? Splika.

¹⁵ E spiritu santu di Dios semper a obra na diferente manera den bida di su sirbidónan fiel; i e tabata obra den nan pa míles di aña kaba, promé ku Dios a kuminsá ungi hende. Bon mirá, ta na Pentekòste di aña 33 di nos era, Dios a kuminsá ungi hende ku spiritu santu, pero esei lo no sigui pa semper. Boutismo ku spiritu santu lo terminá un dia, pero spiritu santu lo sigui obra den e pueblo di Dios pa nan por sigui hasi Dios su boluntat pa semper.

16. Kiko sirbidónan di Dios ta hasiendo awe ku yudansa di spiritu santu?

¹⁶ Kiko sirbidónan di Yehova ta hasi awe ku yudansa di spiritu santu? Revelashon 22:17 ta duna nos e kontesta: “E spiritu i e brùit ta sigui bisa: ‘Bini!’ I laga esun ku tende bisa: ‘Bini!’ I laga esun ku tin set bini; laga esun ku ta deseá bin tuma e awa di bida pòrnada.” Pues ku yudansa di spiritu santu, awe kristiannan ta invitá ‘tur hende ku ta deseá’ bin tuma e awa di bida. Kristiannan ungí ta esnan ku ta tuma inisiativa den esaki i e otro karnénan ta djòin nan den ekstendé e invitashon akí. Ámbos grupo ta kooperá ku e mesun spiritu santu pa kumpli ku e trabou ei. Tur dos grupo a simbolisá nan dedikashon na Dios pa medio di boutismo “den nòmber di e Tata i di e Yu i di spiritu santu.” (Mat. 28:19) Nan tur ta someté nan mes na e guia di Dios su spiritu santu i ta desplegá e fruta di spiritu den nan bida. (Gal. 5:22, 23) I ku yudansa di Dios su spiritu nan ta hasi esfuerso pa hiba un bida limpi ku ta agradá Dios.—2 Kor. 7:1; Rev. 7:9, 14.

Sigui Pidi Dios Spiritu Santu

17. Kon nos por duna prueba ku nos tin e spiritu di Dios?

¹⁷ Pues, sea ku bo tin e speransa di biba pa semper den shelu òf riba tera, Yehova por duna bo “poder ku ta surpasá esun di hende” pa bo mantené bo integridat i risibí bo rekompensa. (2 Kor. 4:7) I maske hende ta hasi bofon di bo ora bo ta prediká e bon notisia  di Reino, no laga esei stòp bo di prediká. Pasobra ora bo sigui prediká, bo ta duna prueba ku bo tin e spiritu di Dios. Kòrda: “Si nan ta insultá boso pa motibu di e nòmber di Kristu, boso ta felis, pasobra e spiritu di gloria, sí, e spiritu di Dios, ta riba boso.”—1 Ped. 4:14.

18, 19. Kon Yehova lo yuda bo pa medio di su spiritu santu, i kiko bo ta determiná pa sigui hasi?

¹⁸ Dios ta duna su spiritu santu na tur esnan ku ta pidi esaki di henter nan kurason. Spiritu santu no solamente por yuda bo bira mas ábil den sirbishi, ma e por yuda bo haña mas deseo pa sigui hasi lo mehor ku bo por den Dios su sirbishi. “Dios ta esun ku ta obra den boso i ta duna boso tantu e deseo komo e poder pa hasi tur loke ta agrad’é.” P’esei, si bo ta permití spiritu santu yuda bo i ta hasi esfuerso sinsero pa tene “un gara firme riba e palabra di bida,” lo bo “sigui traha ku temor i temblamentu pa alkansá [bo] salbashon.”—Flp. 2:12, 13, 16.

¹⁹ Pues, sigui konfia plenamente den Dios su spiritu santu i traha duru pa kumpli ku kualke asignashon ku bo haña. Hasi esfuerso pa bira ábil den loke nan a duna bo pa hasi i pidi Yehova yuda bo. (Sant. 1:5) Yehova lo perkurá e yudansa ku bo tin mester pa komprondé su Palabra, pa trata ku problema i pa prediká e bon notisia. Hesus a primintí: “Sigui pidi, i boso lo risibí; sigui buska, i boso lo haña; sigui bati na porta, i lo habri pa boso.” (Luk. 11:9, 13) Esaki ta inkluí pidi Dios spiritu santu. Sí, sigui supliká Yehova pa e yuda bo meskos ku el a yuda tur e otro sirbidónan fiel di dje kendenan a ser guiá pa su spiritu santu.

Bo Por Splika?

• Meskos ku Maria, ki aktitut nos mester tin pa nos por risibí bendishon?

• Kon e spiritu di Dios a guia Pablo?

• Den ki manera spiritu santu ta guia Dios su sirbidónan awe?

[Preguntanan di Estudio]

[Plachi na página 26]

E spiritu di Dios a yuda Pablo resistí influensia di spiritunan malbado

[Plachi na página 28]

Awe, spiritu santu ta disponibel pa yuda tur kristian, sin importá kua speransa nan tin