“Mi tabatin dies aña ora mi a kuminsá sali ku mucha hòmber. Promé, nos tabata djis tene man i sunchi. Pero no a dura muchu ku nos a kuminsá mishi ku partinan íntimo di otro i eksperimentá ku sèks pero sin tene relashon seksual. Ku 15 aña, mi a kuminsá traha i e hòmbernan na mi trabou tabata pidi mi tene relashon ku nan. Komo ku mi kier a hunga tòf, mi a djòin mi koleganan den tur loke nan tabata hasi. Mi tabata ke pa nan aseptá mi, i esei a pone ku bes tras bes mi tabata tene relashon seksual ku nan.”—SARAH, * OUSTRALIA.

LO BO keda sorprendí si bo haña sa ku Sarah a lanta den un famia ku ta sirbi Dios, no ta bèrdat? Sí, su mayornan a trata di eduk’é segun e normanan di Beibel. Pero Sarah a skohe un otro rumbo.

Hopi hende no tin niun problema ku e estilo di bida ku Sarah a skohe. Pa nan, Beibel su punto di bista di sèks ta masha antikuá. Otronan ta haña ku no tin nada malu si un persona religioso ta hiba un bida parotin.

Kiko abo ta pensa? Ta importante pa sa kiko Beibel ta siña tokante sèks i biba na armonia ku esei? Wèl, Beibel mes ta bisa ku e ‘ta inspirá di Dios i probechoso pa siña hende.’ (2 Timoteo 3:16) P’esei, si abo ta kere ku Dios a krea hende i ku Beibel ta su Palabra inspirá, ta bale la pena pa sa kiko Beibel ta bisa tokante sèks.

Lamentablemente, hopi hende no sa presis kiko Beibel ta siña tokante sèks. Lidernan religioso ta promové ideanan robes tokante sèks i ta pretendé ku e ideanan akí ta basá riba Beibel. De echo, e diferente opinionnan tokante sèks ta pone ku mayoria di e religionnan tradishonal ta splet.

P’esei anto, en bes di bai tras di loke hende ta bisa, dikon bo no ta tuma un tiki tempu pa bo mes analisá e asuntu akí? E siguiente artíkulo ta trata dies pregunta ku hende sa hasi frekuentemente relashoná ku Beibel su punto di bista di sèks. E último artíkulo den e seri ta splika dikon ta importante pa wak bon ki desishon nos ta tuma enkuanto sèks.

[Nota]