▪ Hopi mayor ta hasi masha esfuerso pa protehá nan yunan pa nan no haña malesa grave. Ta e mesun esfuerso ei mayornan tin ku hasi pa protehá nan yunan di kondukta inmoral ya ku esaki tambe ta perhudiká nan. I un manera ku nan por hasi esei ta di duna nan yunan edukashon seksual balansá. (Proverbionan 5:3-23) Edukashon i guia enkuanto moralidat di parti di mayornan ta masha importante pasobra muchanan ta haña nan mas i mas konfrontá ku imágen i informashon seksual na televishon, riba Internet i den buki i kòmeks.

E outor i profèser di edukashon Diane Levin a splika: “Nos problema awe no ta ku nos yunan ta haña informashon tokante sèks, sino ta kiko nan ta siñando, e edat ku nan ta siña esaki i ken ta siñando nan. E edukashon seksual ku nos yunan ta haña for di hasidónan di propaganda i di komunidat en general tin masha influensia riba nan i ta perhudiká nan.”

Mayornan tin ku protehá nan yunan di punto di bista robes i inmoral ku ta hasiendo daño na sosiedat. (Proverbionan 5:1; Efesionan 6:4) Muchanan mester sa kon nan kurpa ta funshoná, kon nan tin ku kuida nan kurpa i kon nan tin ku protehá nan mes di hende inmoral. Promé ku pubertat—e periodo ku e kurpa di un mucha ta indiká ku el a kuminsá madurá seksualmente—un yu muhé mester sa kon su kurpa lo kambia i komprondé dikon e ta haña menstruashon i kon esaki ta tuma lugá. Asina tambe, un mucha hòmber mester sa di antemano ku e por haña eyakulashon den anochi i dikon. For di ora e muchanan ta chikitu, mayornan por kuminsá siña nan e nòmbernan korekto di e partinan privá di kurpa. Mayornan amoroso ta siña nan yunan tres lès importante tokante e partinan akí: (1) Nan ta spesial i privá. (2) Nos no mag papia na un manera vulgar di e partinan akí. (3) Generalmente, otro hende no mag di mira nan ni mishi ku nan. Segun ku e muchanan ta krese, mayornan tin ku diserní ki ora nan tin ku splika nan kon un hende muhé ta sali na estado. *

Na ki tempu mayornan mester kuminsá duna nan yunan edukashon seksual? Mas trempan ku hopi hende ta pensa. Dikon? Pasobra un mucha muhé, por ehèmpel, por kuminsá haña su menstruashon for di ora e tin 10 aña òf asta promé ku esei. I un mucha hòmber por kuminsá haña eyakulashon den anochi na edat di 11 òf 12 aña. Anto e kambionan akí por konfundí un mucha si e no ta komprondé kiko ta pasando. P’esei, di antemano mayornan mester yuda nan yunan komprondé ku e kambionan akí ta desaroyonan normal i ku no tin nada robes ta sosodiendo ku nan kurpa. Ademas, e ora ei ta tempu tambe pa mayornan yuda nan yunan komprondé e balor i importansia di sigui normanan moral di Beibel, loke mayoria di otro programa di edukashon seksual no ta hasi.—Proverbionan 6:27-35.

[Nota]