“Abo ta mi Dios; laga bo bon spiritu guia mi.”—SAL. 143:10.

1. Ilustrá kon un forsa invisibel por guia un persona.

BO A yega di usa un kompas pa sa unda bo tin ku bai? Un kompas ta un aparato simpel ku tin un solo parti ta move, esta, un angua ku ta mustra den direkshon nort. Ta un forsa invisibel, e asina yamá forsa magnétiko, ta pone e angua akí move. Pa hopi siglo, eksploradó- i biaheronan a usa kompas pa guia nan riba tera i laman.

2, 3. (a) Ki forsa poderoso Yehova a usa hopi tempu pasá? (b) Kon bini nos sa ku Dios su forsa aktivo por guia nos bida awe?

² Tin un otro forsa invisibel ku ta asta mas importante ku por sirbi komo un guia pa nos. Kiko e ta? Esei ta e forsa deskribí den e promé dos versíkulonan di Beibel. Relashoná ku e obranan ku Yehova a efektuá hopi tempu pasá, Génesis ta deklará: “Na prinsipio Dios a krea e shelunan i tera.” Pa hasi esei, el a usa un forsa poderoso, pasobra e relato di kreashon ta sigui bisa: “E spiritu di Dios tabata move riba superfisie.” (Gén. 1:1, 2) Ki forsa el a usa? Spiritu santu, e forsa dinámiko tras di kreashon. Pues, nos ta na bida pasobra Yehova a usa su spiritu pa krea nos i tur loke ta eksistí.—Yòb 33:4; Sal. 104:30.

³ Awor, Yehova su forsa aktivo por influensiá nos bida di un òf otro manera? E propio Yu di Dios a indiká ku sí, pasobra el a bisa su disipelnan ku ‘e spiritu lo guia nan pa komprondé e bèrdat plenamente.’ (Huan 16:13) Kiko e spiritu akí ta? Dikon nos mester lag’é guia nos?

Loke Spiritu Santu Ta

4, 5. (a) Kiko hende ku ta kere den Trinidat ta pensa tokante spiritu santu? (b) Kon abo lo splika kiko spiritu santu ta?

⁴ Probablemente, algun di e hendenan ku bo ta papia kuné den e trabou di prediká tin un punto di bista di spiritu santu ku no ta kuadra ku loke Beibel ta bisa. Por ehèmpel, hende ku ta kere den Trinidat ta pensa ku spiritu santu ta un persona igual ku Dios, e Tata. (1 Kor. 8:6) Pero ta fásil pa mustra ku e doktrina di Trinidat ta kontrali na loke Beibel ta bisa.

⁵ Kiko spiritu santu ta anto? E palabra hebreo rúag, ku na Génesis 1:2 ta ser tradusí komo “spiritu,” den otro versíkulonan ta ser tradusí komo “bientu” òf otro palabra ku ta indiká un forsa aktivo invisibel. (Kompará ku Génesis 3:8; 8:1.) Pues, aunke bientu ta invisibel, nos por mira i sinti su efekto. Asina tambe, spiritu santu ta invisibel, i aunke e no ta un persona, e por pone kos sosodé. E spiritu akí ta energia ku ta bini for di Dios; e ta us’é den kaso di hende òf kos pa kumpli ku su boluntat. Ta difísil pa kere ku un poder maravioso asina ta bini for di e Fuente santu, e Dios Todopoderoso? Klaru ku nò!—Lesa Isaías 40:12 i 13.

6. Kiko David a supliká Yehova?

⁶ Awor, Yehova por sigui usa su spiritu pa guia nos? El a primintí David: “Lo mi instruí bo i siña bo e kaminda ku bo tin ku kana.” (Sal. 32:8) David tabata ke esei? Sí, pasobra el a supliká Yehova: “Siña mi hasi  bo boluntat, pasobra abo ta mi Dios; laga bo bon spiritu guia mi.” (Sal. 143:10) Nos tambe mester tin e mesun deseo ei pa laga e spiritu di Dios guia nos. Dikon? Tin por lo ménos kuater motibu pa esei.

Nos No Por Guia Nos Mes

7, 8. (a) Dikon nos no por guia nos mes sin yudansa di Dios? (b) Ilustrá dikon nos no ta tribi di dirigí nos bida sin e guia di Dios den e mundu malbado akí.

⁷ Di promé, nos mester sigui e guia di Dios su spiritu pasobra nos no tin e kapasidat pa guia nos mes. E verbo “guia” ta nifiká “dirigí den un direkshon òf mustra e kaminda ku mester sigui.” Yehova no a krea nos ku e kapasidat ei; pues, nos no por guia nos mes i sigur no komo hende imperfekto. Profeta Yeremías a skirbi: “O SEÑOR, mi sa ku e kaminda di hende no ta di dje mes; tampoko no ta keda na hende pa dirigí su pasonan.” (Yer. 10:23) Dikon nò? Dios a bisa nos e motibu tambe pa medio di Yeremías. Papiando di e persona ku nos ta di paden, Yehova a bisa: “E kurason ta mas engañoso ku tur kos i ta totalmente korupto; ken por komprond’é?”—Yer. 17:9; Mat. 15:19.

⁸ Imaginá ku un persona sin eksperensia ta bai kana su so den un mondi grandi i deskonosí sin un bon guia òf un kompas. Esei lo no ta sabí, tòg? Si e no sa kon pa sobrebibí den un lugá inhabitabel asina ni kon pa haña su kaminda pa yega sano i salvo na su destinashon, lo e ta riskando su bida. Asina tambe, e persona ku ta pensa ku e mes por dirigí su bida den e mundu malbado akí i no ta laga Dios mustr’é e kaminda korekto ta riskando su bida. Pues, e úniko chèns ku nos por tin éksito den bida ta si nos pidi Yehova meskos ku David a pidi: “Hasi mi konosé bo kamindanan, o SEÑOR; siña mi bo bereanan.” (Sal. 25:4; 23:3) Kon nos por risibí e guia ei?

9. Segun e plachi na página 19, kon e spiritu di Dios por fungi komo un guia konfiabel pa nos?

⁹ Si nos ta humilde i dispuesto pa dependé riba Yehova, lo e duna nos su spiritu santu komo un guia sigur pa nos pasonan. Kon e forsa aktivo ei lo yuda nos? Hesus a splika su disipelnan: “E ayudante, e spiritu santu, ku e Tata lo manda den mi nòmber, lo siña boso tur kos i laga boso kòrda tur loke mi a bisa boso.” (Huan 14:26) Segun ku regularmente nos ta hasi orashon i studia e Palabra di Dios, inkluso tur loke Kristu a bisa, spiritu santu lo oumentá nos komprondementu di Yehova su sabiduria profundo pa nos por kumpli ku su boluntat kabalmente. (1 Kor. 2:10) Ademas, ki ora ku nos haña nos ku algu inesperá riba e kaminda di bida, e spiritu di Dios lo mustra nos kiko pa  hasi, esta, lo e yuda nos kòrda prinsipionan di Beibel ku nos a siña kaba i yuda nos komprondé kon nos por apliká nan pa tuma bon desishon.

Hesus A Sigui Guia di Spiritu Santu

10, 11. Kiko e Yu unigénito di Dios tabata ferwagt di spiritu santu, i kon spiritu santu a yud’é?

¹⁰ Un di dos motibu pakiko nos mester laga spiritu santu guia nos ta ku Dios a us’é pa guia su propio Yu. Promé ku Dios su Yu unigénito a bini na tera, e tabata sa di e profesia akí: “E spiritu di SEÑOR lo keda riba dje, e spiritu di sabiduria i komprondementu, e spiritu di konseho i poder, e spiritu di konosementu i temor di SEÑOR.” (Isa. 11:2) Bida riba tera lo no tabata fásil pa Hesus. Pues, bo por imaginá bo kon ansioso lo e tabata pa risibí yudansa di e spiritu di Dios?

¹¹ E palabranan di Yehova a kumpli. E relato di Evangelio ta konta nos kiko a pasa djis despues ku Hesus a kaba di batisá: “Hesus, yen di spiritu santu, a kita bai for di Riu Hordan, i e spiritu a gui’é miéntras ku e tabata den desierto.” (Luk. 4:1) Einan, miéntras ku Hesus tabata yuna, hasi orashon i meditá, Yehova probablemente a instruyé i prepar’é pa loke tabata sper’é. E forsa aktivo di Dios tabata obra riba Hesus su mente i kurason, guiando su pensamentu i desishonnan. Komo resultado di esei, semper Hesus tabata sa kiko pa hasi den kada situashon, i el a hasi presis loke su Tata tabata ke p’e hasi.

12. Dikon nos tin ku pidi Dios pa laga su spiritu guia nos?

¹² Komo ku Hesus tabata sa kon importante spiritu santu tabata den su mes bida, el a animá su disipelnan mashá pa pidi Dios spiritu santu i pa laga esaki dirigí nan. (Lesa Lukas 11:9-13.) Dikon nos tambe tin ku hasi esei? Pasobra e por transformá nos manera di pensa pa asina nos por tin e mente di Kristu. (Rom. 12:2; 1 Kor. 2:16) Sí, ora nos laga e spiritu di Dios guia nos bida, nos por pensa manera Kristu ta pensa i imitá su ehèmpel.—1 Ped. 2:21.

E Spiritu di Mundu Por Desviá Nos

13. Kiko e spiritu di mundu ta, i kiko e ta produsí?

¹³ E di tres motibu pakiko nos mester laga e spiritu di Dios guia nos ta ku sin su guia e spiritu di mundu lo por desviá nos. E spiritu akí ta obra den bida di mayoria di hende awe. Sí, e mundu tin su propio forsa poderoso ku ta instigá hende pa hasi nèt lo kontrario di loke spiritu santu ta guia nos pa hasi. En bes di yuda hende haña e mente di Kristu, e spiritu di mundu ta pone nan pensa i aktua manera e gobernante di mundu, Satanas. (Lesa Efesionan 2:1-3; Tito  3:3.) Ora un persona ta laga e spiritu di mundu influensi’é i ta kuminsá praktiká obranan di karni, esei lo tin konsekuensia grave p’e; lo e no risibí e Reino di Dios.—Gal. 5:19-21.

14, 15. Kon nos por resistí e spiritu di mundu?

¹⁴ Yehova a duna nos loke nos mester pa resistí e spiritu di mundu. Apòstel Pablo a bisa: “Sigui haña mas fortalesa den Señor i den su forsa poderoso . . . pa ora e dia di maldat yega boso por resistí.” (Efe. 6:10, 13) Sí, Yehova ta duna nos fortalesa pa medio di su spiritu pa nos por resistí Satanas su intentonan pa gaña nos. (Rev. 12:9) E spiritu di mundu ta fuerte, i nos no por evit’é kompletamente. Ma nos por resistié sí, pasobra spiritu santu ta mas fuerte i lo e yuda nos!

¹⁵ Apòstel Pedro tabata papia di e hendenan ku a bandoná kristianismo den promé siglo ora el a bisa: “Nan a bandoná e kaminda rekto i a ser desviá.” (2 Ped. 2:15) Nos por ta masha gradisidu ku nos a aseptá “e spiritu ku ta bini di Dios—no e spiritu di mundu”! (1 Kor. 2:12) Si nos laga spiritu santu guia nos i hasi bon uso di tur loke Yehova ta perkurá pa nos por tin un bon relashon kuné, nos por resistí e spiritu satániko di e mundu malbado akí.—Gal. 5:16.

Spiritu Santu Ta Produsí Bon Fruta

16. Ki fruta spiritu santu por produsí den nos?

¹⁶ Un di kuater motibu pakiko nos mester laga e spiritu di Dios guia nos ta ku e ta produsí fruta saludabel den bida di esnan ku ta sigui su guia. (Lesa Galationan 5:22 i 23.) Kua di nos lo no ke ta mas amoroso, gososo i pasífiko? Kua di nos lo no ke tin mas pasenshi, mustra mas amabilidat i bondat? Kua di nos lo no benefisiá si nos tin mas fe, dominio propio i ta mas suave? E spiritu di Dios ta produsí e kualidatnan ekselente ei den nos; esakinan ta benefisiá nos, nos famia i e kongregashon. Pero nos tin ku sigui traha duru pa kultivá i demostrá e aspektonan akí di e fruta di spiritu ya ku no tin límite na e grado ku spiritu santu por produsí esakinan den nos.

17. Kon nos por traha mas duru pa kultivá un sierto aspekto di e fruta di spiritu?

¹⁷ Lo ta sabí pa nos kada un saminá nos mes i puntra: ‘Mi palabra- i akshonnan ta duna prueba ku spiritu santu ta guia mi i ku mi ta produsí su fruta?’ (2 Kor. 13:5a; Gal. 5:25) Si nos ripará ku nos tin ku traha riba algun aspekto di e fruta di spiritu, nos por hasi mas esfuerso pa laga spiritu santu guia nos i produsí e kualidatnan ei den nos. Un manera ku nos por hasi esaki ta di studia loke Beibel i nos publikashonnan ta bisa di kada un di e kualidatnan akí. Asina nos por saka afó kon nos por demostrá e fruta di spiritu den nos bida di tur dia i traha duru pa kultiv’é. * I ora nos ta mira e bon resultado di e guia di e spiritu di Dios den nos bida i den bida di nos rumannan, nos ta komprondé dikon nos tin mester di su yudansa.

Abo Ta Laga e Spiritu di Dios Guia Bo?

18. Kiko nos por siña for di e manera ku Hesus a reakshoná riba guia di e spiritu di Dios?

¹⁸ Hesus tabata Dios su “trahadó eksperto” ora di krea universo. Pues, Hesus tabata sa bon di e forsa magnétiko di tera ku ta yuda hende ora nan ta usa kompas. (Pro. 8:30; Huan 1:3) Ma Beibel no ta indiká ku Hesus a yega di usa e forsa ei pa gui’é ora e  tabata riba tera. Loke sí Beibel ta informá nos ta ku Dios su spiritu santu tabata un forsa poderoso den Hesus su bida ora e tabata riba tera. Ora spiritu santu a dirigié pa hasi algu, gustosamente el a hasié. (Mar. 1:12, 13; Luk. 4:14) Abo tambe ta hasi meskos?

19. Kiko nos tin ku hasi pa spiritu santu por guia nos bida?

¹⁹ Dios su forsa aktivo ainda ta dirigí esnan ku tin un mente i kurason dispuesto pa sigui su guia. Kon abo por lag’é guia bo den e direkshon korekto? Pidi Yehova konstantemente pa e manda su spiritu santu i pa e yuda bo aseptá su guia. (Lesa Efesionan 3:14-16.) I obra na armonia ku bo orashonnan dor di buska e konseho ku tin den Beibel, e Palabra di Dios, ku ta produkto di su spiritu santu. (2 Tim. 3:16, 17) Kaba, obedesé e instrukshonnan sabí ku tin den Beibel, aseptando asina e guia di spiritu santu. Hasiendo e kosnan akí, bo ta demostrá ku bo tin fe ku Yehova tin e kapasidat pa guia bo na e mihó manera posibel den e mundu malbado akí.

[Nota]

Bo A Kapta e Puntonan Prinsipal?

• Kon spiritu santu por influensiá nos bida?

• Menshoná kuater motibu pakiko nos mester sigui guia di e spiritu di Dios.

• Kiko nos tin ku hasi pa benefisiá plenamente di e guia di spiritu santu?

[Preguntanan di Estudio]

[Plachi na página 17]

E spiritu di Dios tabata un forsa poderoso den Hesus su bida

[Plachi na página 19]

E spiritu di Dios ta obra riba mente i kurason di hende i ta motivá nan i guia nan